獨白

如果連呢度都唔可以抒發感受，我怕我會癲！。。。

如果　愛情狂烈到可怕程度
連受傷都不控訴　怕你告別得更早
除非　愛情沒法有一種尺度
為甚麼猜不到　攀得有多高
才令我不必跌倒

＊當一心堅持為你好
　你也將雙手亂抱　還有誰待我好

　誰來愛我　小心愛錯　以免彼此無助
　還能熱戀誰　誰能受得起那麼多
　你最記得清楚
　誰來愛我　請好好對我
　猶如拿捏著星火　認真的我
　花開了總想結果　才令你這麼對我　＊

如果　愛情是個最孤單國度
就在荒島起舞　只得我知道
曾為你怎麼跌倒

Repeat ＊

誰來愛我　小心愛錯　以免彼此無助
還能熱戀誰　誰能受得起那麼多
為何拿著我消磨
誰來愛我　請好好對我
猶如拿捏著星火　認真的我
花開了總想結果　才令你閃身掠過
不懂得愛　不懂得我　別親我

心語

六月去旅行，所以提早至今晚去灣仔＜潮燒＞食飯，慶祝父親節＋端午節！席間，弟弟說已求婚成功，約２年後結婚。聽罷我沒有一絲開心，反而更加唔開心！而且，飯後至回家後一直處於極度抑鬱狀態，有諗過自殺！

所有事情有因有果，以及一個＂break point＂讓潛藏的心理狀況爆發出來。

而家的我，由於長期（都有成３０年起碼）處於唔開心狀態，以前接觸到任何唔開心的事我會更加唔開心，而家則連接觸開心的事都會唔開心！點解？

看到對對戀人，夫妻的相處／快樂事／幸福事／小心思／相處／甜言蜜語／情話／為對方做的一切＋驚喜＋生日或任何節慶的慶祝。。。。等等一切事／舉動，我都唔開心，我會諗，人拍拖我拍拖，點解丁點兒我都未嘗過？我，係咪咁乞人憎？難道我只是人家的＂鍾無艷＂？永遠只在有事相求／金錢幫助先對我好？是我太易信人嗎？是我不值我愛嗎？點解我遇上的都是衰人，都是來攞債的？點解我之前一起的他，只可共患難（我默默地為他們付出，幫他們渡難關），到他們生活／情況好Ｄ，就會拋棄我，用完即棄？

我越來越唔知自己生活左咁多年，付出了的一切，對人好的一切，花心思時間精神金錢耐性的一切，到頭來我得到什麼？得到唾棄，謾罵，嫌棄，打，惡言相向，借錢唔還，些微尊重都冇。。。。。如果係咁，我做人又有咩意思呢？

我已對將來沒有任何信心，更沒有期望，我越來越冇安全感。。。

桃茶

早上你喜孜孜的說買了盒桃茶，還傻氣的展示，之後贈我一包說大家分享！我看著這包茶即時聯想起年頭我給你的手信－－皇室 F&M 桃茶。。。

你忘了嗎？你喝完了嗎？你扔下了嗎？你記得有過我那盒同是桃茶，同是英國出品的手信嗎？這半年來一直都沒有聽過你說飲用，沒有聽你提起過，沒有聽說過你將手信茶跟這種 AHMAD 味道比對過。。。是，丟了嗎？是根本就硬生地擱了在一邊嗎？

心痛

不要知道太多，會難過！

傷心的時候，心

會切切實實的痛！

韓國 Bee Venom Collagen Essence Mask

成個包裝我只能看懂＂蜂毒＂這兩個漢字！蜂毒？好像好嚇人，面膜包裝上說它有舒緩，修護和緊緻功效。

讚：打開包裝，有幽幽的蜜糖味，剪裁不錯，尤其是人中位置，夠厚和寬，剛剛鋪蓋人中位！其餘面部位置，如下巴，鼻翼位都不錯，夠貼也可＂芒＂開全覆蓋。面膜成份好快被皮膚吸收。

缺點：可能精華及 collagen 唔夠，敷 15 分鐘面膜就乾乾的。

正當我覺得這面膜不錯時，敷後２天眼下眼袋及黑眼圈位置，顴骨及面珠墩位等都長了紅色粒粒，不是暗瘡，就像蚊叮了後的一小粒紅粒那種！蜂蜜＋蜜糖不是具修護，舒緩及滋潤作用嗎？為什麼竟然會長出紅點？？？

１２小時的週末

一早 book 左 10:15am 睇醫生，我 10 點去到，醫生未番，結果等到 11 點！因為個醫生兼在法國醫院睇証，可能佢要早上巡房呱！

我睇第一個，入到去講左我的問題，佢好溫柔細心，不慍不火，不會因為出面有好多病人／孕婦而快快趣趣打發你走！醫生幫我做超聲波檢查，佢搽了Ｄ gel 在我下腹，打橫打直地碌個檢查器，我看著放在病床右邊的小屏幕，醫生一邊碌一邊講解呢個係咩位置！我看到我的膀胱，腸，子宮。。。醫生說我太瘦，層皮太薄，所以唔駛點用力壓個檢查器，就碌出要看的位置！檢查完後付過款再等埋張收據就離開。（檢查時我忽然喺度諗，孕婦做產檢時的模樣－－她們躺著，看到螢光幕的胎兒的感動，可能我都會恨不得立即用手機拍幀照片，或者我亦會感動落淚！）

睇完醫生 11:30 左右，之後去茶仔食野！我食左個＂特餐＂：有沙爹肥牛公仔麵＋奶油小脆豬＋芝士腿腸奄列＋熱央！想講的是，個麵同杯央真係好得！

食完見時間尚早未上得堂，加上我知道 Adidas 喺旺角開左間 Flagship store，有５層咁多，而且就喺附近梗係行下啦！

佢話就話５層，其實每層都好窄長。。。相比之下尖沙咀果間好行好多！行完 Adidas 就行埋就黎結束的瓊華，然後就坐地鐵去尖咀上堂！今日由２點黐手黐到５點，一如以往雙手都瘀晒，腰骨痠痛到斷咁滯。上完堂再行埋後面果間尖咀 Adidas Flagship，之後漫無目的行行下竟然行到海港城，咁岩梗係影埋巨鴨啦。現場真係好多人，影影下我竟然可以霸佔到一個＂有利＂位置，瞥瞥左右，見有一個男仔怔怔的望住我，於是我就順理成章叫佢幫我揸機，影時佢話：＂嗯，要幫你搵個靚位影先！＂；影完佢仲好好人咁話：＂你睇下張相先啦！唔靚再同你影過！＂當下我只想快點離開，因為現場人太多，強國人太多，而且我雙腿真係好倦；於是我急急拋下一句就走了！

離開後打道回府，我知道佢地一定打緊牌，我亦知道我唔買野食今晚就冇野食，縱使雙腳幾咁倦，我都快手快腳喺超市買了 $11.5／２包的孖寶蛋糕就回家！

小 cafe 三文治

今日唔係食叔叔檔仔的奶醬多，食了小 cafe 的早餐，我一見碎蛋沙律就要了，而另外一件係碎牛蛋沙律，花心的我同佢換了件芝腿，結果佢２日都食唔到芝士！～

茶點

是日黑雨

早上準備梳洗，扭開收音機先知黑雨，於是瞓下醒下。。。難得偷來的２個鐘，結果ＯＴ番２個幾鐘，打個和！

呢幾日都好忙，剩係要＂翻手做＂的大陸野已攪了成個 before lunch，再收發電郵（每日平均五十幾六十個），處處理理，做整個 department 的事（實則唔係我個 pose 本身的＂份內事＂），已是下午４，５點！之後先做自己的工作，加埋拎番屋企做，日日都係搵笨的！

放工，我又神不守舍，行錯月台上錯車，直到架地鐵駛往彩虹，我才恍然大悟。。。呆下呆下出車過對面月台。這２天身體好像出了小毛病，我怕是關子宮的事，唉，又怕又擔心。。。

麥記黑白新品

麥記新出的新包，奶茶和雪糕，我已試了！覺得唔錯，不過原來唔同地區的麥記，售價都有出入，大家去食時不妨格下價！

先講白漢堡餐，個包的皮鬆軟，像軟軟的 panini，雞屬炸雞，有點辣但惹味！生菜絲多Ｄ更好，至於個松露醬，我食唔出有咩特別，但襯埋舊雞味道都算夾。最出奇就係有 pat 薯容，味道像肯德雞的薯容，同事覺得怪怪，但我就覺得尚可。

而個黑白珍珠焦糖新地，由於我一向係麥記焦糖新地的 fans，之前有呢個甜品，但後來唔知點解就冇左。。。所以今趟佢重出江湖，我當然捧場！佢保持到以前的味道，多左Ｄ咬口－－黑白珍珠，唔錯！

而個黑白珍珠奶茶，keep到麥記凍奶茶的味道，冇貢茶咁甜，不過我果杯只有黑珍珠而冇白珍珠？！。。。

整體黎講，麥記呢批＂新食力＂可以一試！

執衫

見天色時陰時晴，免得慘變落湯雞，我今日冇去跑步，轉去買日用品！

我先去萬寧買洗隱形眼鏡藥水，潤唇膏；再去日本城買膠櫃桶，袋裝抽濕劑。因為我終於忍唔住埋＂衫山＂，加上＂應該＂轉季（唔會再凍番），可以將冷衫厚衛衣執好！

由於屋企細，我沒有一個像樣的衣櫃，我只有２個膠箱，以及２個根本打唔開門（外面被一堆又一埋雜物封住，呢個抽屜名存實亡，有名無實，嘥氣！）的抽屜！又由於我只得呢２個膠箱，所以上面好多時亦被雜物，常穿的衫褲疊上，要拎膠箱入面的東西其實都很費力！

去到日本城，見有特價 $89兩個膠箱，我差Ｄ又買下！（再買膠箱的話，只會將＂箱疊箱＂的情況惡劣，解決不了問題！）幾經唇舌，我不斷跟自己講其實今次來的，是為了買什麼什麼！我才不致＂失手＂，再買了２個平但無用的膠箱！結果，我在日本城買了一包３個的收納袋，２ packs特惠裝的衣物抽濕劑，以及一個膠櫃桶，使它疊在本身個膠箱上，起碼容易拉開就知裡面是什麼，要拎要存放也較方便！當然，執了２個鐘頭，丟了一大袋著不了的衣褲！

您

佛誕假期, 我居然瞓到下午5點先起身! 中途當然有醒過, 仲3次咁多! 其中一次, 就係俾你的連環 whatsapp 弄醒!

中午12 時許你SEND了多張相片俾我, 係舞龍! 最後附加一個訊息, 裡面個 "你" 字係用有 "心" 字底的那個---"您", 還加上一個 kiss 的 icon, 縱使我很清楚我不是你的邊個, 但始終也感到窩心! 今年的生日願望, 就係搵到一個像你一樣, 有風度, 懂女仔心事, 細心, 肯承擔, 有膊頭有腰骨, 尊重對方, 會為對方籌謀, 無微不至的關顧對方, 有心思有情趣, 清楚知道/了解對方一切, 對待另一半亦夫亦友, 似番個男人的男朋友! 我希望下一個男朋友會是我的 Mr. Right, 是我的結婚對象!

花之戀

今日 lunch 去牛頭角地鐵站間爭鮮買壽司番公司食！我第一次食＂花之戀＂，無論係個名又好，個款式又好，Ｄ材料又好，我都好鐘意，但一直冇機會試，今次終於得嘗所願！我地買了一盒花之戀，一盒雜錦，加一條鰻魚卷 share。由於佢唔俾筷子（要加一蚊先有一對），我又唔想買，好彩我櫃桶咁岩有２對！爭鮮Ｄ壽司真係平靚正，好鮮味，足料大大件，唔錯！

*PS：冇錯，下午２點半開始我就唔開心，因為我真係開心唔到，縱使你察覺，縱使你用小鸚雄逗我笑，縱使你有問我２次，但我都冇答你原委；因為，我唔想講原因係因為你！知道嘛！

平左嘅？

Lunch 去飲茶，叫左幾樣之前未叫過的點心，有蛋散，有魚茸蟠龍茄子，荷葉飯等，全部都幾好食，全單比平時食果Ｄ仲平左。

最香杏仁餅

呢間 D 杏仁餅真係幾好食！餅底乾身又爽又脆，唔＂立＂口，Ｄ粒粒杏仁大小適中，成塊餅充滿好香的杏仁味，非鉅記及咀香園可媲美！推介！

麥記雞扒沙律

今日 lunch 就係食呢個麥記雞扒沙律，今次要了凱撒醬，我覺得整體味道比千島醬更夾！

d 雞扒就如板燒雞腿包的雞扒一樣，有少許黑胡椒味，跟蔬菜很夾。其他配料如青瓜，車厘茄，粟米，紫椰菜，紅蘿蔔絲，西生菜，火箭菜等，對我來說份量剛剛好，廿七蚊ＯＫ啦！

自殺原因－－麻雀？？？

為了遷就一個成日出 trip 的老闆，加上遷就請了假與老婆今明兩天一起到澳門睇水舞間的他，今早 8:30 我地三人就在上環信德 starbucks 開會。

由於昨晚失眠，凌晨３點幾４點仍然眼光光，為了穩定頭腦，所以出門前快喝了一罐咖啡，臨行前還點算袋子裡疊疊已分類好的幾個品牌的廣告／稿／ clipping，及相關資料，準備就緒就出發。（所有今日開會要用要傾的東西，全部我預備負責？？！！）

結果，最早到果個亦係我！。。。

個會話長唔長話短唔短，其中都係講改稿／新稿樣式Ｄ野（唔太關我事，但我要在場我要聽！）。另外，４個品牌黎緊日子都要影相，拍 TVC，我越聽越汗顏。。。因為你地一句搵過Ｄ人影相／轉稿，其實有好多功夫／聯絡要做－－*重點係，得我一個人做：

１）聯絡 model agency（for 搵罡正Ｄ的 model，主角）／talent 公司（for 搵用家實証，配角及綠葉）－－事前當然要 draft 好晒所有相關的資料俾佢地，如：亞洲人／混血模特？有咩 spec？著咩衫？影咩，做咩？

２）自己上相關網頁進行篩選，揀定幾個自己覺得岩個廣告／較合適的人選－－再聯絡其所屬公司－－約上黎 casting

３）casting 前的所有準備－－搵 reference pose／表情，動作，講稿

４）接待上黎 casting 的人－－講解，教擺 pose，影相，拍 video。（如果個 model 失蹤／遲到，又要好似搵女咁。。。跟進／了解）

５） Quote價（影相／幾多小時／幾多天／將會用作的範疇）

６） casting 後的準備－－過相，篩選，排位，輯錄成一張 comm card－－以便俾老闆＂最後決定＂。

７）聯絡攝影師，化妝師＋ quote價＋book期

８）confirm 邊位 model，攞 size－－幫佢地買衫買鞋

９）再搵定正式影相的 pose，將會出街的廣告的 layout

１０）follow 合約

１１）出街買衫買鞋買 props

１２） 整 rundown

１３）shooting day－－現場跟進＋監察＋熨衫＋幫佢地著衫整衫＋買飯＋做 model 的呀四，幫佢地睇位驚佢地走光＋ remind 攝影師及 art director 所有記得唔記得的東西及拍攝場景／動作，跟 rundown，跟時間

以上所說，只限於一間 agency 及一個 job task（只是影相，未計拍 TVC 果 part）。如果一間唔岩，同步要將以上步驟重覆（視乎同步搵左幾多間 model／talent 公司）另外，以上所有步驟都要時間和人力去做，但偏偏得我一個人做。。。你知唔知 casting 好花時間，我成日做埋呢Ｄ野，我其實係個 copywriter 黎架！我根本唔可以坐定定寫稿！打唔夠一行字就要處理第二Ｄ野，跟大陸野，跟廣告部Ｄ野，跟印刷跟貨倉Ｄ野；點解佢地就可以坐定定做一隻稿做２日？？？？唔好話Ｄ稿要度要諗，做 research 都要時間呱！我當唔駛諗，齊晒料，咁打字都要時間呱！個人個心無時無刻同步處理７，８樣野。。。每一日番工就好似做緊粵語長片入面＂家嫂＂個角色咁！。。。最近呢次，我仲要出動私人相機來影 casting 相，我一個人因為要等遲到的 model 上來 casting 而ＯＴ。。。平時日日都要帶野番屋企做，而家星期六／日又要 spare 俾公司，我唔鍾意咁樣！

開完會我就落去坐地鐵回家。踏入屋企第一眼就見到食飯檯面已＂擺好＂麻雀陣式－－佢地繼昨晚打牌打到凌晨２點之後，今早又打！－－我心下一沉，繼而黑面，心情就好似外面個天一樣，又黑又灰！

我想要寧靜，我想要尊重，我想要空間，我想要休息。。。通通都唔得！我唔開心！做人唔開心！我唔想我自殺的原因，係反對屋企人打牌！－－我唔想死後做頭版俾人訕笑！－－但係，賭可以令人性情大變，令正常生活／時間完全癲倒完全抹掉，來奉獻晒俾呢 144 隻麻雀！打牌，係好多衍生問題的主因，又係導致我抑鬱的近因。落雨濕濕，去跑步又唔得，去上詠春課又冇精神又冇人同我對練又會俾人搏懵；呢排又冇戲好睇；我又唔想無啦啦為出街而出街，無事出街少破財。。。留喺屋企真係好辛苦！我可以點做？我忍了廿幾三十年，我唔可以繼續再長期 suffer／stay 喺一個唔開心，冇 support 冇 backup 冇愛冇關懷的情況／地方／生活，我真係會死的！

此刻，我－－

『感覺很差，但仍然要裝強扮瀟洒

落淚也要躲下，免得連僅餘的尊嚴丟架』

潮打冷

＂打冷潮，潮中有潮。。。＂呢句歌詞假如你扭開收音機，幾乎每５至１０分鐘聽到一次！佢係美心 MX 打冷餐的廣告歌，每日都聽到，潛移默化，lunch 時腦海響起，去廁所響起，放工又響起，冇錯，咁樣進入人體潛意識呢個方法係好得嘅，抗拒不了，於是。。。

今晚我就去食呢個餐！

呢個餐有好幾款潮式食物選擇，我最後揀了鹵水鵝＋墨魚，配粥＋中國茶（茉梨烏龍），胡椒豬肚湯，盛惠 $59（我用卷，減 $3＝$56）

鹵水鵝：好林，半肥瘦，數量足夠送晒成個粥！
墨魚：又係好林，唔駛點趙都食到，點埋個潮式酸汁，好味！
粥：不過不失！
中國茶（茉莉烏龍）：佢係茉莉烏龍茶，good！
胡椒豬肚湯：成碗湯我一舊豬肚，有Ｄ＂狎＂。酸菜有Ｄ辣，總括個湯，可能要辟狎味，所以放左好多胡椒，所以都幾辣口！
其他：配料之中仲有幾舊鹵水豆腐托底，味道唔錯。

終於叫做試左呢個＂洗腦＂餐，份量都ＯＫ，不過五十幾蚊真係貴左Ｄ！

尊重我

我開始懷疑，我老闆已變得奉旨，因今早我又收到 whatsapp 叫我星期日開會。。。點解遷就過一次就每逢 weekend 都要隨時候命隨時 on call？你出 trip 就要我犧牲？乜我要咁做架咩？我份約冇列明喎！第二Ｄ同事一個可以番工時間織野，一個睇 myTV，一個淘寶購物，一個狂落樓下煲煙，一個 facebook，一個打機／睇韓劇，一個借巡舖之名日日去 shopping，所有野全部 pass 晒過黎俾我！我唔係出埋佢地份糧囉！仲有，我申請３天 annual leave 你唔批又諸多留難，又要做定個半月前Ｄ野。。。我２個月前遞假紙架囉！

氣難下，仲要今早先知弟弟去韓國（同我去日本個期一樣），即係話佢唔借得個 luggage 俾我！咩話，我２個月前話左你知我要用個 luggage 架喎，你仲要反駁我，說你今早先決定去，仲即刻俾左錢。。。真係俾佢一鑊橋起！。。。連屋企人都係咁，唔通我就要係遷就人果個，冇人尊重我，冇人鍚我！

氣難下，４點幾佢話口痕之後行開左，折返時拿著麥記！於是，我地又 share 薯條！～

椰林閣

今日終於食到椰林閣啦，我要了蝦頭醬海鮮鴛鴦粉 set lunch ($41，要加一)！

先黎個紅湯（本來我要白湯的，侍應聽錯了，算），加牛油餐包！我好鍾意食呢類餐包，好軟熟，暖暖的，加埋牛油好好食！

隻青口好似鐵達尼咁，直插入粉中！其他配料有蝦（１大加蝦米？！），魷魚鬚（１小舊，炸左的；另加ＢＢ魷魚腳尖啄２粒。。。），魚柳（１小舊），蜆仔肉。至於鴛鴦粉即係粉絲＋新竹米粉。味道尚可，如加入辣椒醬會更好；另外如果魷魚大塊Ｄ，配料多Ｄ唔好咁細咁碎就仲好。

還有什麼可以送給妳

話說上星期五收到老闆 call 叫我星期六番公司傾Ｄ稿，隻稿明天出，即係最遲今日要 upload 俾 media！我好趕咁一早整好Ｄ字，然後俾 designer 砌 layout，點知改幾次老闆都唔岩心水，而且佢地又唔係用我俾佢地Ｄ字，新加舊字加唔知喺邊度 copy 過黎的字，錯漏百出，我一次又一次要 proofread，我好嬲！直至改到第７轉稿，我愣住，但他叫我 send 俾老闆。。。明知個稿唔岩，但都要被迫 send 出去俾老闆 approval！（我就係充當呢個＂中間人＂角色）

誰不知，老闆共打左３次長途俾我，電話中佢語氣好重，又大鬧，我覺得好委屈好無辜，因為真係唔關我事，我冇 brief 錯（係佢地唔聽我講去改，去砌稿；又亂放Ｄ字，完全唔順 flow），點解成日要我受呢Ｄ冤獄？我好唔開心！

掛線了後，我＂必須要＂轉達老闆的意思俾佢地聽然後改過隻稿，講真，佢地遲整好 layout 我又要ＯＴ，遲 upload 攪到 media 遲回覆遲 confirm 又係我ＯＴ，你地工作進度慢我又要ＯＴ，根本我就係走唔甩！我心情已唔好，都要硬著頭皮去做去幫你地處理。。。我靜靜地搵番一年前出過的稿，搵 sample 俾你地去跟！就係呢種唔開心情緒，我叫自己忍住唔好喊，時聽到一把熟悉的聲音，熟悉的歌詞打動我心－－係 Eason 首歌＜還有什麼可以送給妳＞，悅耳舒服又親切的聲音令我停下來，至少３秒──喘息，靜心，思索．．．好多謝這種＂歌緣＂，你來得合時，讓我心安穩過來！

之後一邊跟進佢地改稿，一邊去做 casting 去影相，分身不瑕；時秘書走來叫我聽電話，又係老闆。。。點解我要做埋呢Ｄ野？期間，我發脾氣說：＂我好清楚我人工冇包架囉！＂大家聽罷語塞。

韓國 Green Tea Latte

繼續韓國手信，今日試 Green Tea Latte，外型包裝靚仔別緻，打開個盒裡面獨立包裝，一包沖一杯。

味道方面很淡，沒有綠茶／抹茶味，奶味很淡。同事說它像淡紅豆冰味，我覺得似無糖淡味云呢拿奶昔。鮮奶綠茶／抹茶，還是星巴克好飲。

首爾衛生巾

同事韓遊回來，除了有韓國零食作手信外，仲有漢方衛生巾，聞說好好用、乾爽又吸收，嗯，今個月試下先！

母親節嘆茶

Goropikadon 雷公仔

離開公司，順道到淘大商場行下，裡面有好多精品店、模型舖、玩具店、手作飾品店，還有書店，全是我喜歡的東西！

喺其中一間精品店，撞岩搬遷大減價，還要俾我看到粉藍色的雷公仔！雷公仔是日本 Sanrio 的卡通人物，我３年級時就愛上，不過礙於環境，所有的精品玩具都是大個了才去睇去買。雷公仔向來都是三合一，一個紅色（打雷鼓）、一個藍色（提著布袋），一個綠色（拿著晴天公仔）頭髮（以前見過有紫色頭髮的雷公仔）。

雷公仔所出產品不多，很多時佢都列入＂罕有＂之列，呢個粉藍色確實少見！精品店標價 $69（已比出面所售的平），而家仲有額外折扣，平上加平，我想也不想就買下！（其實如果它是原價 $69，我都會買下的）

買到這個 baby blue雷公仔我好開心，總算weekend 番工有所得著。

亂中有序

星期五 19:41，收到老闆的 whatsapp，內容是這樣的：

老闆：＂仲喺唔喺公司？＂

我：＂走了！＂

老闆：＂Have agood weekend＂

１５秒後，再收到老闆whatsapp：

老闆：＂I neededto have a chat with u，我想傾下某品牌隻稿……It’s excellent of u will be in office tomorrow……＂

就係咁，我又再一次喺非番工時間＋老闆一個電話／一句說話要我番公司。其實佢想傾隻稿的 layout／design，係＂唔＂關我事的，由於我一直都做＂中間人＂、＂橋樑＂的角色，基本上成個 design team 的大小事、往來事等等，都關我事！

傾完＂唔＂關我事的＂重要事＂之後，老闆在老闆房，我看著一檯面東西，全個 office 又得我一個，不禁拍了幀照片；回想起一年前初入職，我的工作檯只有電話＋電腦＋ box file （這情況維持了一星期左右），乾淨得很。如今我的桌面乃至我電腦入面的＂桌面＂都＂常滿＂，是亂中有序的情況！我這樣說，是因為我曾經於半年前執拾過一次，但轉頭要搵的東西找不著，從此，我就一直 keep 住這種情況！

Sharing

不知何時開始，我地就默契地 sharing：薯條，薯片，朱古力，麵包，拿破崙，曲奇，餅餅，樽裝野飲，糖。很多時，都係你口痕想食野，揀選了／買了，回來打開包裝，然後自然地遞過來給我。

自從開始食早餐以來（應該是這二、三個月的事）我已胖了很多，雖然面頰、手腳都是瘦瘦的，但腰腹就胖了一圈！（肥在鬼鼠位，衣履可遮但自己卻暗自不快，那種又頂又谷的感覺真係好辛苦）雖然每星期我都運動四、五個鐘，但比起脂肪及卡路里増長速度依然不及。