除夕。今夕是何年

去年 12 月 31 日，正值失業 7 個月的我，為了讓自己開心，所以逕自去了元氣買壽司外賣番屋企一人晚餐，臨近 12 點，又逕自走出露台望街望天、孤獨許願孤獨倒數（其實年年都一個人過架啦，人越大越唔開心）。

今年有工番，放４點！向來宅女的我放工當然第一時間番屋企，未幾父母就回來。大約７時，我們三個人去附近街新開了幾個月的紅星餐廳晚飯！我和爸爸點了軟殼蟹雜菇意大利飯，媽媽點了意大利白汁海鮮焗飯，味道唔錯好飽好滿足！

*今天兩次的巧遇，教我愕然得驚喜，我也擔心著你的健康（雖然我沒可能是陪伴你的那個）！新一年，希望你快快樂樂，健健康康。

預感

這幾天心緒不寧，加上昨晚發夢見到你，所以這幾天外出都有諗過會撞到你！

晚上大約８時，誤打誤撞之下，最後決定到吉之島食板長壽司！我向媽媽交代了聲後便逕自急步行先，去取號碼籌。時途經超市 cashier，見到那雙橙色波 boot，當時我心諗：＂咦，對鞋好靚呀，咪就你你果對？！＂一瞥，這個人就是你！當時的你正與她在點算著所購物，聚精匯神地。。。我不由得的心跳加速，只管往前走，行至不遠處我再回頭，未幾你與她就消失在我的眼前！之後的半句鐘，我的心一直惦念著，由初時的緊揪心變為釋然；因為，我終於見到你們＂真人＂，那，我再無甚牽掛，好像放下了什麼似的。也許，是時候了！。。。

綠悠雅苑示範單位

去茶餐廳食完個下午茶就去長沙灣睇綠悠雅苑示範單位，因為記錯關門時間，所以我６點去到，點知太多人要在馬路排隊拎籌，之後又等了半個鐘先入到去睇！裡面有一個２房示範單位以及一個１房示範單位，成程睇晒都只不過係半個鐘！

對比之下，２房單位個廳有玄關，廳中露台可望到細房，私隱度欠奉，那怕個細房只可做工作間或衣帽間。。。而且細房裡有個窗台，真係夠放張單人床就冇其他位了，有Ｄ迫！至於１房果個單位，雖冇玄關位，但間房更見駛及大好多！廁所及廚房方面，兩者廁所的企缸呈長方形，時有位叔叔示範在裡面沖涼（很攪笑），但見感覺太窄，提起手都會撞到牆壁。。。廚房就算ＯＫ，仲有個工作臺，可晾衫！（不過廳中露台也可以晾衫用）

排隊時聽見好多人對綠悠雅苑有唔少意見，當中都話其實以一個一人單位黎計，２百幾萬其實算貴。。。而且地點也不太愜意，佢地都只係抱住黎睇＂現場＂，睇示範單位的心態而已！仲有，一人單位只係佔全數的９９個，抽中都難！

Nivea gentle facial cleansing wipes

因為英遊所以唔想帶卸妝水＋卸妝棉咁麻煩，最好有一 take 過具備卸妝潔面護膚效果的產品！

上網搜尋之下見到有卸妝紙巾，不過牌子眾多唔知點揀，而價錢約廿餘至四十元不等！又因為牌子眾多，質素參差，於是我放棄 SaSa 及卓悅等店舖，親身去萬寧睇睇！我視察完一輪後最後揀了 Nivea 以及 Boots 兩款，它們分別有口碑及通過皮膚科專業測試，價錢亦可以接受，仲有成 25 片，夠晒成個 trip 用！

兩包 facial wipes 最後決定帶 Nivea 去英遊，而家差不多用完一包，覺得真係好方便好好用，以下就係用後感：

首先，它寫明不含酒精，經皮膚科專家測試認可──已具信心！

其次，它是 With natural almond oil & calendula extract，向來寫慣美容護膚品的我，一睇就知佢地係有美白，滋潤，保濕，抗炎，曬傷護理，以及修護效果──岩晒倫敦超乾燥天氣，而且敏感肌膚人士亦可用，唔錯！

氣味及質料方面：一張 facial wipe 算柔韌，可爭開而不爛，重覆拭抹亦可！它有點像嬰兒爽身粉的氣味（沒有酒精及香水味），挺舒服！

效果嗎？一片卸走眼妝，foundation，two ways cake，方便又乾淨，用後皮膚（尤其是眼底脆弱肌膚）唔會乾涸繃緊，滋潤度很好！

總括黎講，值得推介！

以人為本？！

唔知由幾時開始，Starbucks 會在杯身寫上客人的名字！係咪因為方便整好飲料好讓客人知道自己那杯已弄好有得攞？（因為通常佢地沖完飲料後，口快快一輪咀邊把飲料擱上邊說出飲料名字，其實一Ｄ都聽唔清佢地講緊咩！）

今日去買杯 mocha，付款時店員問我叫咩名？我說＂Ｒ＂之後，他身旁的２位店員聽到後像感到奇怪又有點好奇的在談論＂Ｒ＂？！。。。等了一會，我的 mocha 沖好了！店員又是快快口地說出飲料名字之後，就說：＂Ｒ小姐的 mocha！＂挺有趣！

炒麵

之前說過英遊期間最想回港食到的是：格仔餅，炒麵，魚肉燒賣，可樂！上星期已飲了可樂，今天去茶仔食野時叫了個午餐肉炒麵，都算係食左炒麵。。。餘下的魚肉燒賣及格仔餅，則要看緣份，睇下邊日係天時地利人和了！

末日第一個關鍵時刻

話說今日係世界末日，更有評論說今日下午２點，４點及明早７點係關鍵！今日又係冬至，公司已訂檯 12:30 食 lunch，之前我地談論過唔想同某Ｄ人一齊食，但最後都決定 join！食完做冬飯去麥記買榛子新地，折返公司，到２點－－第一個關鍵末日時間，你把＂小鸚雄＂擱了在我們之間的 partition 上，很逗趣！而你，也很傻氣！我偷偷地把當下情景拍了一幀照片，紀錄這一刻！

4 時許放工，終於唔駛 OT！我們說再見後，你的眼神／神情似有話要說。。。我忖度著！。。。

行去地鐵站路上突然被人叫住，我回頭一瞥，見那人怔怔的站著似等我的回首！他，就是一位識了 12 年但只見過 4 次面（計埋今次）的舊朋友，如果不是他叫我，我準會繼續望地下急步走而  miss 了這次再遇！由於他正在見客途中，問了我的電話號碼便 say bye了！沿途上我們以 whatsapp 聯絡，他說這 12 年來一直用盡所有方法找我但找不著，如今竟然在街上擦身而過再遇，他喜極！約半個鐘後他給我來電，他說得出我的中文名字，住在那區，家人等等資料，我驚訝他記性的好，他回應我一句：＂因為他真正當我係朋友！＂

Tea time 有新地

冬天反而更心思思想食雪糕，今日下午3點3，同事給我買來麥記士多啤梨新地，仲係走花生添，thank you so much！

意蠔店

呢間野幾好食，賣相又靚！

做冬@太子京華酒樓

明明book左檯，佢竟然冇mark到，要當walk in輪候，有冇撹錯！

人齊後立即點菜，講真真係吾預期會有咩驚喜，我全晚／全餐飯最期待反而係豆沙窩餅同埋炸饅頭！

世界末日

之前有諗過，如果有人問我倘若知道那年那月那日那時那分世界末日的話，我會做什麼？我會答：＂我會跟蹤我鍾意的人！＂

昨天你陪我進7-11看了儲印花換領的大口仔實物時，甫出門口你問我假設明確知道明天將是大限，我有冇什麼說話未講／未做／感到遺憾的事？我想也不想的答道：＂我有！＂幸好你冇再追問下去，因為，我唔想將心入面的秘密揭穿！

想食

英遊之前一直想食格仔餅，奈何公司附近竟然冇，放工又夜又倦根本懶得再搭多個地鐵站再排隊去買。。。去到英國倫敦當然冇格仔餅賣，旅程去到一半，我想到除左格仔餅外，仲想食魚肉燒賣＋炒麵＋可樂，唯有寄望回港一嚐滋味！

回港後又是日以繼夜的ＯＴ，食唔到。。。今晚，難得七點幾收工，回家即刻開罐可樂大口大口喝下，打了個長噎，迅速地將139卡路里吞進肚子裡，算止止咳啦！

希望

明天的英國之旅，希望我可以快快樂樂，好好的玩過夠，當散心又好當叉電又好當開眼界又好，我想我可以盡情忘記唔開心的一切，忘記根本唔會屬於我的他，忘記過去的抑鬱。。。

我希望，我可以真正得到由心而發的快樂！我希望－－

放手

相處得久，相處得來，相互影響，相互彼長，總要靠丁點緣份！

說話的語氣，態度，動靜，行為甚至口頭禪都在不知不覺中糅滲，是耳濡目染，是難得！

快樂就像偷來的，會終結。奇蹟，並不會在我身上發生。。。

有的時候，選擇放手

並非懦弱，並不是無法堅持，
只是

明白了有些事情注定無法實現。

放手－－讓我好－－因為－－我再無太多的時間用來療傷！

來自日本的小俠狗

多謝姐姐的日本手信--小俠狗！汪汪！~

英遊準備

為英遊作最後準備，我先去萬寧買平安藥及洗 con 水，再去無印買衣物分類袋！去到無印，我在貨架前停駐良久，畢竟 $190 一個頸枕（可能只是用一次），始終不捨得，縱使我曾先後四次逛無印。。。

暗戀

今日睇雜誌，裡面有篇係講「暗戀」！

當中的男女主角，是工作上的 partner，由於 OT ／無間斷的合作，大家已衍生出一種「屬於二人」的默契和工作模式來。然而，佢地二人亦很了解對方，如：喺對方出聲之前或根本唔駛出聲之前，每天早上，男方已給女方買早餐；男方英文唔好，喺佢未開聲之前，女方已給男方 draft 好 email。。。一次，如常的 OT，當工作「大功告成」後，大家攤喺沙發上伸展一下。下意識地，女方倦極把頭枕在男方膊上，男方的手亦自然的搭向女方香肩，那一刻時光似是凝住，幸好二人沒有互望，如果唔係，肯定出事！女方說：因為男已有家室，所以好清楚大家根本唔會有任何可以發展嘅空間！（佢係衰男人／婚外情／一腳踏兩船者另作別論！）

此時此刻，我感到共鳴。。。

2013 座枱月曆

步出地鐵站見小販檔有鬆弛熊精品，見呢個2013座枱月曆，仲要係香港假期，問過價錢只是$15，即刻買下！

Olay micro peeling

一直用開 Olay 產品，廿多年來質量一直不賴！廣告說它的效果媲美甚至好過專櫃那些千元面霜／產品，自己都做呢行、寫過各大小品牌的護膚美容產品，我知道那些是＂廣告＂那些是真才實料，至今我用過的，Olay 確實係好！仲要係以這個價錢，說實在，又夫復何求呢！

這瓶 Olay micro peeling，匿稱是＂super cream＂，質地不膩不厚（冇 Olay total effect 咁厚），易推開！我由夏天到秋天幾乎天天使用，沒有長油脂粒！它有好清香的梨＋茉莉花味，一貫 Olay 的水準！

我多數把它當 night cream 用，每日臨瞓前搽一次，補濕美白，當然約一至兩星期做多點功夫，敷一塊針對性的mask（如那時乾燥就敷補濕的，如面色偏黃＋黑眼圈就要敷美白）！已差不多用完一罌，眼紋有改善，面上色斑淡了，面珠墩白皙又有彈性，對我經常失眠＋唔飲水＋鐘意食煎炸油膩野的人，皮膚都 keep 得住而冇把真實年齡說穿，一半功勞全靠 Olay，好野！

Sogo 感謝日

一向都好怕在感謝日逛 Sogo，實在多人到癲，加上自由行，自問沒這樣的能耐！今日，我特登造訪，因為無意中看到它的減價清單：100% 茄士咩頸巾由 $2190 減至$218，嘩，不得了兼我確實有此需要，於是鎖定目標，抵達 Sogo 便衝上五樓！（Sogo 簡直人多到像淪陷！）

喺同一大堆男女鬥快手鬥搶鬥翻之際，突然選擇障礙，結果我買了三條！（一條係黑白灰格仔、一條係深寶藍底加幼直條，尾有黑加紫細格、最後一條係我真正喜歡的黑灰紫格仔）回家後再逐一細看，其實只有一條才真正是自己喜歡的。。。沒法子，睇下家人鍾吾鍾意，如果它們最後成為孤兒仔，那就將之轉售，尋找有緣人吧！

黑人頭Ｂ女染髮劑

泡泡狀，易搽易用，都算上色，但效果唔會似個盒上面show出黎果種，大約似４成啦！

附送嘅護髮素，同其他牌子染髮劑所附送嘅一樣，細細支／包，根本唔夠用！

老人痴呆。抑鬱

這陣子我都失落失神，一向好記性的我竟然不論白天或黑夜都勁迷路，儘管果條街／道／出口我都日日咁行。。。我唔知係倦得滯所以神經衰弱，定係我有老人痴呆！

這時我諗起＜抱擁這分鐘＞這電影，裡面的女主角又靚又後生，但發現有老人痴呆。她開始唔記得野，只記得舊事，記得曾經好 hurt 好 hurt 佢果個有婦之夫。。。之後，她逐漸覺得好疲倦，更開始失禁不自知。。。我唔想好似佢咁樣！

我承認呢排好唔開心，失眠，日頭無故的哭！我一度懷疑自己又抑鬱復發，我也多次想過自殺！。。。我又要辭職嗎？辭了又怎樣？如常又要每月俾家用，屋企沒有容身之所，經濟大失預算，難搵工，所有所有之後會發生的事又湧現，我唔想再經歷上一次失業的痛苦和徨恐。。。我應該怎樣？我可以怎樣？我覺得冇出路！

我是不是太倦所致而亂諗野？我要等到去完英國之後，細察自己究竟太倦需要放假，還是真係抑鬱復發？這刻，有誰可以告訴我怎樣做？。。。

innisfree pomegranate mask

好貼薄，面膜紙覆蓋率剛剛好，敷上面後就如牛油紙一樣，很透徹！

據說紅石榴有抗氧化、補濕及美白功效！見面膜上寫有 green complex 成份，頗含糊，雖然唔知佢其實代表乜野，敷完這面膜後，面部肌膚冇咁繃緊乾燥。

避靜

連環 OT 加上瞓得唔好，個人本身已神經衰弱＋燥底，一早 9:37 就俾雀聲人聲吵醒，心情就更差！

下午 2 點已走出街，行遠些少去食野再去剪頭髮，跟住在街流連，目標係逃離兼避靜！我全程失魂落魄咁，腳在行腦在轉，直到7 點番到屋企雀局已散，接著又為到食飯問題煩擾。。。

東海大閘蟹

闊別七年，見尾龍骨好得七七八八，加上姐夫請，我地成家人就一斉拆蟹！呢個蟹餐（$298）包二隻大閘蟹、蟹粉小龍包、花膠桃脂燉湯、蒜容蟹粉包、烚菜、臘味飯、薑茶湯丸！

OT 極兇

已連續三日放凌晨十二點幾，返到屋企成一點幾鐘，疲累得要命，情緒間歇失控！

Mum, happy birthday!~

新曆之後舊曆之前呢個「樽頸位」，就讓玫瑰花茶加白朱古力造的蛋糕攝位吧！媽媽，生日快樂！~

Eslite Tea Room @ Hysan

good taste：出乎意料之外的伯爵蛋糕，超香伯爵茶味，吾太甜！叫「熱帶雨林」的Lavazza coffee，成壺上，超嘆！

前途似錦

多謝 cancan owe us a great lunch，祝前途似錦！