維園都有櫻花？

行過維園，無意中見到有朵粉紅色花花，它與櫻花實在相像，究竟係咪櫻花呢？

維園的櫻花！(得一棵，花開還未燦爛；仲要一棵之中得 3，4朵花而已。)

前年在鰂魚涌公園所拍的櫻花！

再行過一邊，見到有一堆紫花，雖然唔知佢係咩花，但也教人驚喜！

電車河 (西行線)

前幾天坐完東行線，昨天坐西行線，坐到堅尼地城尾站落車。落車後去之前家人開設的舖頭位置望望+緬懷，然後行至泓都及海傍。

這海傍比想像中短，同埋唔太好行。 (因根本冇設行人路，沿泓都行去對面，要側側身+小心翼翼行，遇上巴士或大車經過，不得不停步先讓，其實好危險！) 經過一段 "閃身側避" 的路後，終於叫做可以踏入 "海傍"。甫踏進去就見到一條雞泡魚掛在刺欄上......行了幾步，這 "海傍" 就完了！適逢日落，雖未見紫霞紅霞，但個鹹蛋黃也搶眼。

電車河 (東行線)

雖是港島人，但好少搭電車。究其原因，最主要係平時趕時間，電車難預時間和人流；次之，就係成長之中，曾經幾次被非禮的不快經歷。再次之，就係電車罕有有位可以坐；就算有位，坐唔夠一個站就要起身，儘管你身體不適 / 幾咁倦 / 拎住重物 / 腳抽筋......莫說坐位，其實企位也有點為難。

前幾天，下午 3 點左右食完野就索性坐東行線電車 (仲要坐樓上)，人流不太多，吹下風睇下人生百態。由上車到落車都有位坐，在筲箕灣總站下車，慢慢熬下熬下行個圈又坐電車折返。

情人節？咪又係尋常的一個星期二！

潮語 "Show Me Your Love" 飯亦即粟米肉粒飯，佢係咪男人的第二位浪漫我就唔知 (第一位浪漫仲要問？唔係咁出名嘅 "豆腐火腩飯" 都唔知嘛！)，情人節當日，我就有自家製的豬扒煎蛋飯，倒少許家樂牌鮮露作飯汁，好味夠飽！情人節？咪又係尋常的一個星期二！......

後記：惠康的 PACK 裝豬扒幾好咪，醃得入味煎熟就食得，仲有 3 款味道揀添！

利申：曲抽情人節！開咩事吖，咪又係尋常的一餐飯！

豆腐蛋糕 @ 北角糖水道紅車厘麵包西餅

由細到大，我都對一D "白色一個面" 的食物特別喜愛，什麼是 "白色一個面" ？好似：豆腐，砵仔糕 (兒時愛吃白色冇豆，大個愛吃黃糖有豆)，鬆糕，白糖糕，豆腐花，饅頭，蓮容包，麻容包等等。

近排經過一 D 麵包西餅店蛋白蛋糕，特別係舊式或屋村地舖那種，總會見到有蛋白蛋糕或豆腐蛋糕賣，價錢由 $4 至 $8.5 一件不等 (視乎大細或地段)。好似呢舊豆腐蛋糕咁，大大件沖杯咖啡或牛奶抹茶又可當一餐。

dinner time @ McCafe

唔想食粥粉麵飯，一些特色三文治其實都係一個選擇！

晚上九點後，在灣仔尾金鐘頭的地段，要搵一D唔貴又飽肚的 "包點餐"，McCafe 也是個選擇！

在修頓斜對面間麥記，裡面有齊麥記同埋 McCafe，而且冇修頓隔離果間咁多人，先在 McCafe counter 揀了焦糖鮮奶咖啡 (姐姐有張唔知咩卡，可將中SIZE 免費升級至大杯裝)，加 $17 就可以揀份三文治，我就要了小龍蝦碎蛋沙律。三文治即點即製，烘後熱辣辣，餡料夠多夠足料，味道鮮美。大大份，SHARE 一齊食。

茶木 @ 黃金廣場

聽過未去過，今晚有機會一試。晚上接近 9 點，客人不多 (只坐了全店的一半)，所以唔駛取票等位。

由於十五食齋，睇勻全個餐牌得 2 款 "叫做" 可以食，就係呀麻蔥油麵 ($71)，同埋黑松露白汁忌廉扁意粉 ($75)。餐牌上面有圖，見前者碗麵上面有一堆白色長條形東東，似係白雲鳳爪或牛柏葉的東西。後者個意粉應該有煙肉......諗了一諗，既然兩款都係 "一剔一點"，但前者都要 $71 的話，咁我寧願叫個意粉好似抵 D。

賣相幾 OK，但味道方面......成個意粉冇乜味，既冇黑松露的鮮中帶腥，又冇忌廉汁的濃厚。不過杯黑糖珍珠奶茶幾好飲，調得好勻 (唔會似奶精或用粉溝開咁)，飲到尾都好濃郁，唔會因為係凍飲而冰淡了。D 珍珠粒粒分明，大細適中又煙韌！唔似街邊加盟 / 連鎖店那樣會結纏在一起，或有 D 太硬難咬，太稔唔夠圓潤而黐牙。

元宵一龍五獅

要開年的已開年，要採青的已採青，收爐的又再開爐；話晒都已經年十五，仲以為今年冇得睇舞獅......

正值元宵，步出灣仔地鐵站已聽到鑼鼓聲，心諗，是玩具街裡面傳來嗎？是合和中心果邊嗎？下午六時了，咁晏點會仲有舞獅......於是繼續往金鐘方向行，瞥見對面修頓球場那裡有 "龍身" 起伏，由於附近被修路的圍板遮擋著，看不清楚攪什麼。見鑼鼓聲持續，不如過去睇下啦......

走進修頓，原來有個元宵活動，仲要剛剛開始！下，咁晏先開始？不過還好，因為我好想睇舞獅，仲要有埋舞龍添；更難得的是，是次活動不像平時店舖 / 商廈開張 / 開年那樣被眾多的護衛員 / 職員 / 工作人員所攔，這裡大家都守秩序，安份有禮，所以更可以自由走位，近距離地看。嘩，足足睇左半個鐘！有 5 獅 1 龍，有點睛，簪花掛紅，上樁，噴煙噴彩帶，遊園等，睇完心裡有點踏實感覺。

住家菜

姐姐回來食飯，菜式難免豐富，有：瑤柱扒豆苗胚，蔥炒蛋，鮑魚響螺湯，薑蔥蒸鯇魚。飯後仲有雪米糍和鳳仙雪條作甜品。

Magi Planet 士多啤梨爆谷

聞說好出名，呢盒台灣的 Magi Planet 士多啤梨爆谷，包裝精美，打開紙盒有一張牛油紙，掀開有一包白色"內餡"，最底下仲有一張像明信片的東西。

白色"內餡"，就係 "目標"！每粒士多啤梨爆谷外層係一層士多啤梨朱古力 (加入士多啤梨果肉粒)，好好包裹爆谷。口感豐富，味道有點甜，個人認為比 "朱古力薯片" 更夾更好食。

道地山楂黑烏龍茶

很喜歡食山楂餅，山楂球；就連但凡有山楂的飲品，好似：健康工房的山楂蘋果茶都有買來飲。近期發現了一款山楂飲品 (唔知係新出OR限定OR推出左好耐)，就係道地的山楂黑烏龍茶！大大支適逢減價 ($20 樓下)，放入雪櫃，幾時飲就拿出來斟。

佢味道可口，有點似酸梅湯又有點似大澳的紫背天葵茶。佢有山楂的酸甜又有烏龍茶的踏實，而且仲好解渴。

五黃大兇位

雖不是迷信，但我也會睇各師傅的新一年生肖運程；一些要注意的事項，或某方位有問題，如果簡單郁動或加一些簡單擺設可以化解，其實買個安心也好。

得悉今年五黃大兇位係南方，即係我書檯個位，每天起碼 12 小時我都會待在這裡，不得不提防。於是，把安忍水從去年的五黃位搬至書檯，再找個合適位置放好。時，見到樽安忍水已鏽蝕變晒色，於是去超市買粗鹽和礦泉水，重新整過一樽。

鏽蝕變色了！

重新整過的安忍水！

爸爸生日飯 @ 萬麗咖啡室

初二訂位今天來食，dinner buffet 由6:30 開始可以食到 10 點，唔迫唔趕。呢個 dinner buffet 本身包一杯飲品 (可選：鮮橙汁 / 百事 / 七喜)，仲要係席間不停 refill。另外再有一杯咖啡或茶，每位五百幾 (有 8 折)。環境舒適，服務周到，廁所位夠方便，岩一家大細去食。

佢有生蠔，海鮮和刺身，甜品 counter 大大個；雖然熱食欠奉，不過只要你食 2 至 3 隻龍蝦，生蠔，刺身和 Haagen-Dazs 都已回本。(未計 refill 飲品添)

本人推介：龍蝦、南瓜蘿蔔湯、即磨咖啡！

燉奶佬豬頸肉煎蛋麵餐

燉奶佬豬頸肉煎蛋麵餐，連餐飲 $35。記得我黎過 3 次，2 次係叫呢個餐，每次食時都叫自己下次唔好叫呢個餐，點知，又重複犯錯。

其實冇咩嘅，大大碗，D 麵夠味，唔似滾水淥。豬頸肉有成 5 片；杯奶茶都幾好飲。只係 D 豬頸肉好似有陣怪味，有 D 羶+燒味汁的味道......

男人鹹唔鹹濕只係取決於有冇機會！

睇新聞赫見有中醫師非禮，一睇個醫師名覺得好熟，諗起前年在工聯會學過中醫推拿課程，遂即拿出卡片一睇，咦，真係佢......

好眉好貌，樣子老成踏實。生於醫學世家，行醫 13 年，有家室，於尖沙咀有一醫館，工餘在工聯會授課......真係睇唔出！如果你有心幫朋友治療，點解唔約番喺自己醫館？而約去時鐘酒店？司馬昭之心啦......猶記起一句話："男人鹹唔鹹濕只係取決於有冇機會！" 判囚時，咁佢 D 課程係咪要換人？咁佢主診的醫館要搵替工？會唔會留案底？出番黎，仲可唔可以掛牌呢？？？......防不勝防，識左十年又點？真係吾熟吾食！

<新聞參考連結>
https://hk.news.yahoo.com/%E9%85%92%E5%BA%97%E6%8E%A8%E6%8B%BF%E9%9D%9E%E7%A6%AE%E5%A5%B3%E7%97%85%E4%BA%BA-%E4%B8%AD%E9%86%AB-%E6%99%82%E9%AC%BC%E8%BF%B7%E5%BF%83%E7%AB%85-045956116.html