因為你

為了一隻廣告稿，我地要出去影張 main image 相，所以提早半個鐘出去兼食 lunch！又因為早半個鐘，所以決定先去平時好多人排隊嘅食肆食上海野，我地 share 兩個客飯套餐，加一籠小籠包！成餐飯我地閒話家常有講有笑（當中不乏好多無聊話題及爛 gag），雖然期間老闆隔空打籮咁連環搵我，最終我都要用手提打長途俾佢問咩事，但只要和他一起，我就感到快樂。

食完就去 apm 影相，佢負責做動作，我負責偷影！我地更行過我至愛的 adidas及某連鎖運動舖，企圖用來做大 background，影完就折返公司。

今日，我依然好開心，當然係因為佢！

warm my heart

又一次的細心及無微不至舉動，奈何表面上我要裝作沒事發生及無恙，但其實心裡面我是多麼的感激與在乎，很窩心且快樂的一天！

Essential Purely Smooth 系列

花王出品，之前用過粉紅色及橙色系列，無論氣味，質料，效果等方面都不錯，所以今趟新出淺黃色系列，我當然會買來用啦！

用後感：＜Shampoo＞ cream 狀乳霜，很豐潤而且很快被頭髮吸收！搓揉易起泡，過水容易洗去，唔會黏黏答答好難洗淨。洗完頭即刻用風筒吹，乾髮時感覺髮絲 keep 住柔韌、很爽淨，軟軟而有彈力，不會像鐵線般！補濕效果ＯＫ，洗髮時掉髮情況亦滿意，唔會好似 Pantene 咁樣，洗緊和洗完頭甩勁多頭髮。＜Conditioner＞唧出黎，質地唔會厚甸甸，塗搽上頭髮好易被吸收。泡沫適量，易沖洗乾淨，用後感覺好爽。

心情影響味覺

因為詠春，一星期我都有２日會去尖沙咀！每次雄心萬丈的上堂，專心的聽講和練習，這２個鐘讓我可以唔駛諗其他野，唔駛諗住佢，但一落堂，一落到大廈樓下，平日的我又回來了！。。。

每次上完堂我都有莫名的失落感，站在十字路口我都若有所失，感到迷失感到孤獨，唔開心的感覺隨即湧現，那時候我會走到 K11，因為今日想食窩夫和雪糕，於是去了 Holly Brown！

一個人比較易搵位，我落了 order 然後走到一張４人檯坐下，看著周遭的人，不是情侶就是好友三五成群。。。我，又是一個人，去那裡做什麼，都是一個人！

等左一陣，我點的食物來了：一杯叫 Piccolo Latte（佢係 drip 那種，所以不是滿滿的一杯，而且味道較濃，像飲唔放糖的雀巢咖啡！）以及一碟叫 Appleland 的雪糕窩夫（Ｄ醬較少，窩夫厚而無味，至於那個蘋果批味的雪糕，小小的一球，但我食唔出蘋果的香甜，就像食緊一球少甜的焦糖雪糕）。其實唔可以完全怪它無味，因為我受著心情影響！不過，這裡的服務依樣不大好（之前第一次黎食已於當日即刻放食評到 openrice），首先：侍應端來食物，因為冇號碼牌子，佢地往往就要捧著周圍行，周圍搵邊個客落嘅 order！而且，佢地又唔會同步俾餐具你，好似今日咁，我自己一個黎食，搵位已經難，仲要待食物黎左之後，我又要走出去門口位置那張檯去拎餐具，折返時我個位被人坐了（縱使我嘅 order 根本原封不動的擱著），我要向那對情侶交代了會佢地先讓番個位俾我，我仲見到，佢地一屁股坐左我個位之後，見檯面有杯咖啡及雪糕，那個女的順手就將佢地＂搬＂過去另一張檯。。。關於呢點，希望 Holly Brown 會留意及改善！

good morning

睇下，d芝士必出黎呀！

英國 Border 曲奇

逛吉之島超市，在無意慾購物下瞥見這些英國牛油曲奇，$39.8兩盒，吾駛諗，即刻揀味道：朱古力碎及燕麥曲奇！（一盒十塊，好味又抵）

道地薑蜜

悉心及純美的包裝絕對令人加分，我就係因為咁而揀左呢支薑蜜！佢薑與蜜味分量恰當，吾會太甜，亦吾會過於辛辣嗆喉，感覺暖胃滋潤，如果有熱嘅或吾凍嘅就更好！

double 永恆

今日終於有時間去香港藝術館睇＜Andy Warhol 15 分鐘的永恆＞展覽，之前有同事說：＂有什麼好睇？佢咪又係將同一樣野用唔同顏色照 dup 幾幅畫出黎！＂咩話？如果呢番話出自無知婦孺或者係行外人口中我唔會嘩然，但呢番話竟然出現喺一個 Art & Design 的行內人口中，我就覺得有Ｄ唔尊重，以及反映佢自己對呢方面嘅＂熱誠＂有幾多！

出乎意料之外，比起上次豐子愷展，今次排隊買飛嘅人唔多亦冇出現人龍，所以我好快就買到飛入場！入到去有好多一家大細，情侶，自由行睇，其實我覺得睇畫展一個人睇反而更可以靜靜思索，除左可以邊睇邊諗，諗下當時的社會環境，當時的復興與大勢，以及他的用色與技巧。

呢個展覽係 15 分鐘的永恆，我用左半個鐘行完！足足將永恆 double up！

韓式年糕

突如其來的 dinner，我仲以為你跟住要上堂！其實無論你駛唔駛上堂，只要你開聲我都會奉陪！

我地去左就近 apm food court，一路行一路睇下有咩食，及至梨花園我被炒年糕吸引住，時你亦說：＂我正想食韓國野！＂好，一於呢間！我要了韓式窩蛋牛肉年糕拉麵＋柚子蜜，而你則要了韓國氣鍋人參雞。一路食路宣洩工作上的種種人和事，食到８點就散了。

今餐晚飯好飽，好多謝你＂間接＂陪我食飯！

同林

繼古巨基的＜戀無可戀＞及＜告別我的戀人們＞之後，最近我＂連環播＂嘅係林峯的＜同林＞！

姑勿論佢係咪 CHOK，係咪值得攞最受歡迎男歌手，以及之前的亞太區最受歡迎男歌手也好，要承認嘅係，喺眾多＂男人魅＂嘅 TVB 男藝員暨歌手，佢嘅唱功係 ok 的。而且，幕後人特別用心作佢嘅歌。呢首＜同林＞，第一次我係喺收音機聽到，再睇埋Ｄ詞，箇中有Ｄ意會。。。

作曲：鄧智偉　填詞：林日曦
編曲：Johnny Yim　監製：鄧智偉／莊冬昕
路上是樹木　共相識於天空
天高花開春暖　你與我常遊樂與共
但誤入大廈　盪失於奔波中
只懂追趕工作　慢慢飛開各有推進
一對簡單鳥兒　飛過山水萬里
那同林年代　會自信長留原地
不再簡單鳥兒　不再甘心把臂
從成長之中失散　各自各天地
或是在學習　或者多得青春
即使風急秋雨　你我也曾貧病與共
或是現實吧　或者天真失蹤
今天多少失意　獨自擔當各有傷痛
一對簡單鳥兒　飛過山水萬里
那同林年代　會自信長留原地
不再簡單鳥兒　不再甘心把臂
從成長之中失散　各自各飛
年和年掠過一個過活　空氣將你跟我隔開
頑強面對所有意外　裝作英勇爬越障礙
繁忙日子掙扎太耐　喘息之間靠近了窗台
便記起　圍牆外
一對簡單鳥兒　享有山水萬里
那同林年代　有沒有拿來回味
也未算是分歧　是時代強搶你
抱擁沒權利　羽翼太鋒利

牛大力湯

對上一次，係9月的事！相隔四個月，今日再叫＜靚湯工房＞!

花膠章魚太子參牛大力土茯苓淮山赤小豆蜜棗湯+瑞士鷄翼及土魷鷄粒蒸肉餅飯，我地 share 食！

Boots simply sensitive face wipes (with soothing aloe vera)

繼上次用完 Nivea facial wipes 後，終於到呢包 Boots 了！

佢每一張 wipe 大細 size 不過不失，打開沒有任何味道，應該沒有加入香精及香水之類的東西。摸上手濕度唔算很重，說回它的卸妝效果：首先，foundation mousse唔算卸得好好，仍有殘留粉底液於眼尾、鼻翼及眼肚位置。Mascara 只卸到７成左右，用後補濕效果一般。總結 Nivea 及 Boots 兩個牌子卸妝紙巾，Nivea 贏成條街，我會推介 Nivea 多Ｄ！

戰績

首堂詠春課今日展開！我準時去到拳館，先除下佛珠及手錶，擱好隨行袋子，然後走到助教師兄跟前，說了聲早晨後便開始我的＂小念頭＂。

＂小念頭＂不難學，但要記清每個步驟及拳掌等姿勢，每寸肌肉的用力及屈曲度都要拿捏準繩。我跟著他的示範，邊做邊學，然後自己試練。約 45 分鐘後他再教我＂日字衝拳＂和＂拍手＂，我又自己試練了陣，他竟叫一位師兄跟我對練。由於我未能放鬆（筋與骨），所以雙手連手指抽筋連連，但仍然要忍耐著，因為一方面要迎著師兄的衝拳，另方面我要連環的用＂拍手＂擋擋擋，打打打，我們對練了會，他感到攰而喊停！正所謂＂拳拳到肉，拳腳冇眼＂，我雙手已爆紅，而師兄雙手戴錶位置也被我的＂拍手＂打得紅了。過了一陣，助教再教我＂拍手衝拳＂，這需要更大的手腳，左右腦協調，對我來說有難度，不是拳手出錯，就是位置擺錯，看來要回家認真練練！

放學時助教說下午再有班，問我會唔會來？我說我要 home office，say bye 後我穿回外套就離開。下樓後我再看看我雙手，發現兩隻手姆指對下的＂雞髀位＂瘀了腫了，前肘更乏力，手有點震，這是久未運動，一下子操練過來的後遺，就像閒來偶爾踏單車翌日雙腳 pat pat 位痠痛一樣，希望明天雙手手震情況，以及瘀腫程度可以減退些。總的來說，第一次接觸詠春，感覺不錯。

詠春。踏出第一步

幾經掙扎之下，昨晚凌晨網上買飛，今早睇＜一代宗師＞早場！雖然王導演拍攝手法及角度都極其靚和細緻，但觀感刺激和戲味就比起甄子丹套＜葉問＞差好遠。（如果先入為主的是＜一代宗師＞，恐怕我唔會入場睇＜葉問＞！）

睇完戲行去兒時回憶之地－－百好冰廳食個午餐（即係出面茶仔果Ｄ常餐），再行落西灣河尾工聯會拎春季課程，然後＂的起心肝＂，去尖沙咀那國術會參觀順道睇下Ｄ課程／介紹。我一時許去到，櫃面說２點有班，如果我冇野做可以等陣再上去＂旁聽＂，或者即刻報名即刻上堂！於是，我去附近Ｋ１１蹓躂，２點再上去。（講真那幢大廈有點雜，有好多印巴籍人士，又有好多賓館，人流複雜，在搵路搵電梯時俾人眼望望，其實我有Ｄ驚！）

＂旁聽＂了一陣，見過集體操拳，以及單對單黐手！未幾師傅出現，他知我來＂參觀＂就好客地跟我握手，然後說了一點關於詠春的事我聽又俾剪報我睇。就這樣，我＂旁聽＂了接近個半鐘！

我曾想過睇完就走，回家再考慮一下先報名，但我又知自己性格，咁樣回家一諗，恐怕唔會再折返；於是我嘗試正面地諗，當踏出第一步也好，當學一門新東西也好，當強身健體也好，學下無妨，更何況師傅俾了個好好的 unlimited learning offer 我？！就算唔岩玩，我冇時間或冇興趣，我都可以 quit！最後，我都報了名，明早就上第一堂！離開前禮貌上跟師傅說再見，他問我幾時上堂？我說明早。他即反應地＂哎呀＂了聲，說話他明天飛北京唔喺度！然後隨即交帶身旁的助教明天指點我這位新同學。

報完名下樓，我過對面的 Adidas 旗艦店，但個心就一直惦記著學詠春的事，因我怕好似之前學電單車咁，做錯決定。。。

輕怡健康餐

Dinner time吾知食乜好，吾想食粥麺飯，更吾想食麥當勞，於是走去Market Place諗住買即叮食物，快靚正嘛！

行下行下，見有pack好的Caesar salad，一盒有斉菜、toast bread粒、topping，仲有埋隻叉，減價$25，ok喎，反正平時冇菜食，當清腸胃都好！

番到屋企就動手撈沙律，一打開倒出，菜多如填滿個湯碗，topping又夠，酸酸地加㰖欖加salad醬味，d toast bread本身有蒜香味，總括黎講好味軽怡又夠飽！沖埋杯麥皮，今餐好健康！

蛻變

「蝴蝶效應」有著它的底蘊與哲學，這世上究竟

有什麼效應可以通向快樂？

因事順心命篇，不執著，放手，豁達－－

就可以蛻變了麼？

Annecy facial mask 唔係好得！

陳茵薇做代言人，TVC 攻勢日見夜見！到萬寧購物送了一片，今天終於有機會敷上！佢宣稱屬 repairing mask，又有豐富 HA 同埋 rose hip oil，應該係補濕修護一類面膜！

面膜質量及 size：打開後整片面膜都好 rich，但卻係＂水滴滴＂果種 rich，而唔係含有好多精華果種豐潤！面膜紙大細適中，都可以覆蓋全塊面！略嫌鼻下咀唇上果個位（即人中位置）的面膜高度太＂闊＂，遮了半個鼻哥窿，我敷著面膜呼吸時，那層面膜紙也隨著每一下呼吸伸張！如果拉下Ｄ，就遮住上唇，感覺唔太好！我建議這位置可以修窄少許。

用後感：一般面膜說敷 15-20 分鐘便可卸去，不過有時都要視乎那面膜的質量。根據過往經驗，我都是敷上 45 分鐘，好讓面膜精華完全滲透，好讓肌膚有充足時間吸收，當然啦，這些面膜所含精華成份，都是足夠我敷上 45 分鐘甚至１個鐘都綽綽有餘！但觀乎這片 Annecy，我只敷了 10 分鐘左右，摸摸面膜，於額、鼻、眼下、顴骨位，即係全片面膜的４分３位置通通都已乾掉了！只是下巴位、亦即面膜最下端的邊緣位置尚有少許濡濕。。。它，未免太＂唔得＂了吧！

半馬 warm up

尾龍骨跌裂了後，治療了２個月，康復＋休息迄今都已３個月，踏入 2013，今天正式再開步！

傷癒復出，我唔敢太著力，跑了一個圈作熱身，做了點拉筋壓腿動作後，再連跑３個圈。之後咀唇和喉嚨都感到乾涸，體溫方面雖然跑出汗，但雙手仍是凍冰冰，就像英遊時４度室外那種冰凍！其實這星期我左邊坐骨神經都隱隱作痛，今日再次踏足緩跑徑，我只能當 warm up 而唔敢全衝，平時跑＂全馬＂（10000 米），今次只堅持跑個＂半馬＂就鳴金收兵了，離去前，我還看了陣小朋友足球班。

今日。一生一世

昨日直踩了15個鐘，12點幾先放得工！身心疲累得很，家人又吾體諒，做人做著我真是沮喪加洩氣。

今日拖著極倦身軀番工，地鐵如常多人，一瞥原來今日係 2013 年 1 月 4 日，原來簡寫就係＂1314＂：一生一世！

因為沙嗲王多人所以轉去對面的太興，我就把那張號碼輪候票順手拈來，摺了隻紙飛機。。。

我的 2012

1 月至 3 月：失業。失業接近一年但日常支出猶在，就算幾慳都好，積蓄已所剩無幾，人很抑鬱，每天祈盼，每天苦著臉做人。

接近失去：媽媽身體出現毛病，輾轉多次進出醫院、急症室，我很擔心、我乾著急。今年早過年，一切以往的算命、一幕幕失業期間和父母嚐廉價餐拉上補下的情境、一起到公園、一起 window shopping。。。一切一切絮絮記憶令我悲從中來，每天哭著失眠、哭至倦極進睡又窄醒。終於，媽媽 2 月 27 日入醫院 standby，28 日動手術；我的身體也唔爭氣，2 月 18 至 26 日連續發燒，啊，已連續數年於年頭發病，生理心理交戰得極不好受！當時我在想，只要媽媽無事，一切也變得不重要；如果她有事，我會內疚自己＂愛得太遲＂！

新挑戰：3月中 interview 後，過了 2 天收到電話叫我番工！我終於有工番，唔駛再好似無主孤魂咁，經濟方面亦可以有舒緩空間。成為這公司的職員９個月，multi-task 很多，幹著我 title 以外的工作很多，OT 很多，帶回家的工作也很多，情緒每分每秒都被影響，11月更一度抑鬱爆發、厭食。這 9 個月，我瘦了 12 磅！在這公司，我嘗試多個＂第一次＂：第一次於辦公室跌裂尾龍骨、第一次戴腰封、第一次要跟大陸各地區同事聯絡溝通、第一次要上大陸開會（幸好我的回鄉卡過期才可幸免）、第一次被共事了３個月的同事邀請我做她的姊妹團（最後我拒絕了）、第一次請 annual leave、第一次做埋 AM＋ME＋PA＋PC＋OA＋CW 等工作，當然是仍然出一份糧！我說過，只要還有一個原因值得我留下，我會留下。可是，這個原因、這個 quota 早於半年前已發揮它的作用。這半年，我不斷反思，不斷失眠，我在想我很戇居我很傻，我還堅持至今，到底是什麼？到底我是什麼？

暗戀。代價：很快地，我已對你的體貼與細心關顧產生好感，及至８月事件把你我一度拉近。我萬料不到世上竟然有人跟我有著如此的默契、相近的想法和嗜好；你為我所做的一切也是無人能及，那怕是家人及以前的各位前度（對你來說可能只是雞毛蒜皮舉手之勞的事）！可是，你已婚。日復日，你的偏愛使我將這種好感變成情愫，但只限於暗戀、只限於工作時間上的暗戀！（縱使我無時無刻都會想著你、掛念你）迄今我仍然每天面對著掙扎與交戰，因為我不可以愛你但我又愛你。

世界末日：末日論甚囂塵上，我知道你相信，我知道你希望真的世界末日！當你告訴我你所作的準備、為某某作的準備，我羨慕又妒忌。。。而你，也很清楚我！記得有次某同事問我想唔想世界末日來臨？你即代我答道，說：＂R 嗎？她始終也唔想！雖然她灰灰地。。。＂沒錯，我唔想！。。。假如有人問我世界真的在某時某分末日，我會做什麼？我想也不用想的會答道：＂我會用餘下的時間，跟蹤我喜歡的人！＂彷彿，我在他身邊，他在我身邊！或許我會看見他牽著她的手，擁著她，吻著她。。。世界末日的一刻，至少在我的眼裡，有他！

關於跑步：當我失意時、抑鬱發作時，我想到跑步！用汗水代替淚水，挺好，感覺也較正面！我正尋覓一雙功能性跑鞋，希望再操一下，出年可以跑馬拉松！除了壁球，也許只有跑步，可以讓我一個人進行；只有跑步，屬於我一個人。

第二度英遊：英國對我來說有著濃濃的情意結－－我曾喜歡的人、曾對我許下承諾的人／好友都跟英國有著直接或間接的關係。我，不再等，用自己雙腳去英國完成歹願！2010 年首次踏足英國倫敦，我愛上了她！2012 再度重臨，看的東西不同，到的地方不同，吃的喝的都不同，唯一不變的，就是我更愛這個地方！英國倫敦讓我生好感，讓我有著一種莫名的安全感，所有在整個旅途上遇過的人、給予我幫忙的人、每個笑容和照臉，通通都很親切、很和藹可親。離開，很不捨得！

總結 2012，一如往年過的不大愜意，悲喜交雜。人大了終於開竅，終於理解理想唔可以當飯食。（可是俾我從頭來過，我也會依然選擇行這樣的路）每天營營役役，工作佔據了整個人生整個生活，筋骨精神損耗但卻捱不出頭來，朋友沒多個、交心沒幾個、另一半沒出現過。走了人生的一半，我除了每年揀一個慈善機構捐點錢之外，有意義的事彷彿冇乜做過、生活冇好好過過、自己真正想做的事真正想去的地方冇好好實踐過、自己冇好好鍚過。。。我唔敢祈求新一年事事順心順意順境，只求凡事盡力、過到自己過到人，身邊人一切安好就於願足矣。