菩提心

工作上不如意已不是第一日的事，連月來的車輪戰，每日番１５鐘頭工，weekend 抖唔到，真係筋疲力竭。我，今天又食屎！

又係因為某Ｄ人 copy & paste 錯，連累我！因為，最尾 assumed 我 proofread，明明我冇俾錯字，又係佢地順理成章唔用我Ｄ字。。。老闆，只會打黎鬧我怪責我！點解有Ｄ人可以唔駛負責任，唔駛對老闆，永遠卸左俾人？明明係佢地做嘅野，我要做條＂橋＂，我要食死貓？！我很累。。。

走落公司樓下抖氣，因我唔想在公司發脾氣（根本冇人會體諒和尊重），更唔想在公司喊！時，姐姐 whatsapp 我，我們傾談著都一直未能釋懷，直到她打出了三個字－－＂菩提心＂，我好像平靜下來，怒氣消失。我抖擻精神再折返公司，因我這趙＂出走＂左落樓下足足一個鐘。

喺我出走的一個鐘裡，冇人搵我冇人打俾我冇人 whatsapp 我。。。就像情侶鬧意見我奪門而出，但他沒有追來／找我的感覺，算了吧，呢３個月我已慢慢放下，慢慢學習不著緊不上心，因為，是沒結果的，只有苦了自己！

南瓜蛋糕

東海堂新出呢個南瓜蛋糕，造型如之前的蜜瓜般別緻，十分可愛又討好！

外面一層橙色糖霜，裡面的蛋糕內有栗子粒和南瓜粒，底層是薄麵包加朱古力cream。整體吾太甜，有種好鮮好紮實好足料而且用心炮製的成品！

我的第一個馬拉松

今日係渣馬十公里報名大日子，七點就開始接受報名！我一早較左鬧鐘 6:30 起身，但輾轉都係 7:30 先起身。拿拿臨梳洗就開機報名！

經歷過網上購演唱會，波飛都唔成功，今次報渣緊比我想飲中暢順，一 click 就入到！以我平時練習時間，其實可以報十公里挑戰賽，仲有機會跑頭３名。不過今次我初次啼聲，想參加下試下水溫，試下跑公路，試下喺咁大堆人入面跑的情況及時間（因為咁應該會阻慢我的 training record），所以我就報普通的十公里公開組！

十公里一組起跑係６點，比賽紀錄約 00:50 至 1:10；而二組起跑係６：３０，比賽紀錄係 1:20 至 1:50。思前想後，計埋自己可能之前果晚會失眠，所以最後報左二組！完成報名程序成 8:20，要出門口了！

希望今次這個＂人生第一個馬拉松＂可以順順利利，跑出自己成績！

小南國大閘蟹

臨時提早日子兼轉場食大閘蟹！今次揀了小南國，仲轉場去了北京道一號果間！嘩，氣氛情調一流，入到去仲以為呢間係一間日式高級料理，黑麻麻的，有個落地大玻璃面對維港，看到對面的會展及中銀，睇埋幻彩詠香江！（揀岩日子，可以睇埋煙花）招呼一流，Ｄ侍應又有禮貌，不過呢度Ｄ冷氣凍左Ｄ！

呢個大閘蟹餐，用渣打卡每位 $298，Ｄ蟹鮮味又多膏，就算唔點鎮江醋都咁好食，個人認為好味過東海和鴻星！個餐有蟹粉豆腐，燒肉，蟹肉菜苗秀珍菇，大閘蟹（每人２隻），蟹粉小籠包，紫米芝麻薑汁湯丸，雲吞雞湯。好飽！

香格里拉 Cafe Too

沿途由金鐘地鐵站--太古廣場--直上香格里拉酒店，都見到黑衣人！（包括我）不過，這趟來金鐘是嚐 tea buffet！

同樣地，沿途都嗅得高貴氣息，一個個窗櫥，一間間食肆，每面牆身，天花，掛畫，吊燈，地毯，都雅致而上等；仲有，這裡有著一股香氣，像古典的香薰，很濃烈。平時，我又怎會有機會來這裡（其中一間食肆）進餐！

同樣地，沿途瞥見每一間食肆裡面的人，有 couple 有情侶有一家人。。。檯面擱著咖啡／奶茶，以及＂雀籠＂式的 tea set，配上英式／法式傳統餐具，他們在慶祝什麼的紀念日嗎？然而，肯為另一半花錢來這類餐廳食一個 tea／飲一杯野／食件餅，唔係價格問題，是對他／她的誠意和用心，想她開心，想和她一起多一個與別不同的經歷！無錯，快樂不能只靠人！甚至其實一餐高級 tea，一件 cova 切餅，一枚戒子，只要慳上一定日子省下來自己也可以買給自己；不過，我所指的並非價格方面，而是一個會對你上心，一個著緊你，愛護你，想你開心的人！

說了兩段廢話，不中聽的那就 skip 去吧！講番香格里拉 Cafe Too 的 tea buffet，匯豐卡有折，折後二百多元一位！以 tea buffet 來講，野食種類算多，尤其喜歡甜品／ cakes 的人！雖然沒有炒飯沒有餐湯和餐包，但有三文魚，仲要係厚切那種！（除左北角海逸綠怡廳之外，我未食過有一間如他們般厚切不吝嗇，抵讚！）最令我驚喜的是中式點心裡竟然有麻蓉包！（而家已很少地方／酒樓可以食到了！）甜品方面，有雪糕有 pancake 有冬甩有小撻葡撻以及好多種樣子色澤賣相美輪美奐的美食，全個 tea buffet 中，我食得最多就係甜品！

麻蓉包呀！

呢個藍苺蛋糕乃至上面的忌廉都製作認真、充滿好香牛油味、用料及份量調較得恰到好處！

下面的栗子撻d栗子味濃郁，軽滑、底部層牛油餅底，香而不膩，真係好好食！同行人話鬆餅都好好食，拍得住文華酒店那種，可是太飽我冇試到！

吾好睇少呢件香㦸，製作用料不賴，而且 topping 和內餡你自己揀，看似細件其實好飽！

朱古力梳乎里！

有碗仔翅及生菜魚肉！

Free drinks only got these??!!....

要彈的，就係野飲選擇方面好少，只有葡萄汁，柚子汁，椰果水。其實可以加番橙汁／蘋果汁這類大路少少的鮮果汁！而餐飲方面（每位包一杯餐飲），侍應竟然漏單，除左要叫幾次先送上我杯凍奶茶之外，仲要再叫先遞上糖漿水。味道方面，又真係好差，比茶餐廳比三合一比自己沖的還要差上多倍！（可能檸茶會比較穩陣）

公主禮品

下星期日是 Chloe 小妹妹 5 歲生日，明天會見到她，所以預早買了禮物給她－－她喜愛的公主物品：包括鉛筆套裝，擦膠筆連吸印套裝，筆盒，disney princess kinder chocolate egges，公主人型公仔一套！

這陣子小妮子為到小學問題東奔西跑撲學校，上星期她面試的小學不取錄，她唔開心！希望之後的叩門能夠順利。

十五蚊英雄

Lunch 行過見到有個走鬼檔，有一 set set figure 賣，全都是美國英雄系列的公仔，仲有 ironman，我即瞳孔放光！一 set 賣$85-$100不等，但我又冇位擺，唯有買散隻！（$15）

我滿心歡喜帶埋 ironman 食 lunch，去到食肆已急不及待拆盒兼影相！可是打開裡面個公仔同盒面個樣不符，雖然吾係我想要果隻，但也很靚！同事說：「咪當抽扭蛋囉！」說的也是！

*後話：同事後來說深水埗賣$8一個，oh my god！不過算啦，因為都是緣。

多過＂一個對＂！

星期一係重陽，今個星期暫時番左２日工，不過２日都成十點幾先放工，２日都番左＂多過一個對＂的時間。。。倦！昨晚回家後還要寫２隻 adv，今晚嗎？！。。。

唱Ｋ睇戲

同好友唱 lunch K 補祝她生日，12 點唱到 3 點包一個 lunch，每位 $58（加一）。之後去 The One 睇戲！

呢套＜回到最愛的一天＞歷時２個鐘，睇下睇下我覺得裡面Ｄ橋段／內容分別包含了＜求愛大作戰＞＋＜人生交叉剔＞＋＜十二夜＞＋＜情逆三世緣＞。。。講男主角知道自己有超能力開始，由初時用超能力來為己慾而＂番轉頭＂再黎過；到最後係因為親人及＂不要愛得太遲＂這 message 而行駛超能力。整體來說內容有點貪心，而且不乏＂拖＂及＂犯駁位＂，個幾鐘劇情為左煲整套戲末段的＂哲理＂。。。而這個＂哲理＂我又覺得係為加而加，感覺有點夾硬來。

睇完戲我地就散了！在 7-11 增值，排我前面的人買了一本外國雜誌，有成廿幾個印花，佢話佢自己唔儲，問我要唔要？於是，無啦啦我就多了廿幾個印花！

元朗。豬油撈飯

一早坐地鐵去天后，再搭 968 入元朗！

與姐姐夫婦 ＋ Chloe 小妹妹會合 之後去日之味食野，再去佢地屋企參觀！我同 Chloe 畫公仔，玩白板！有一回佢問我鐘意咩色，我說了藍色後，佢就送左個藍色哈哈笑貼子俾我，仲貼在我件 tee 上！多窩心的舉動！

（回家後我把這貼子貼在我學日文的小本子上）

之後我地再食埋白涼粉＋豆腐花＋沙律就去會所玩！今天難得地冇人，我地變相＂包場＂。我地玩過波波池，捉迷藏，紅綠燈，到 5:30 就去大榮華了！

（salad made by Chloe）

一場黎到，梗係要試呢度嘅出名菜式，所以點了豬油撈飯，砵仔蛋焗魚腸，蝦子鵝掌柚皮，芋頭南瓜煲，金銀蛋菠菜，南乳炸子雞，奶皇馬拉糕，麥米糖水！

估唔到豬油撈飯的味道竟似臘鴨燜飯味，很舊香港，很老家的味道。要讚的是，大榮華的菜夠大碟，份量質量十足，冇欺場而且上菜又快，很好！

（豬油和頭抽，支裝上枱，我地仲以為撈吾晒可以拎走，但原來吾係！咁，我地只撈左少少，吾知職員係咪再「入滿佢地」然後俾下一個客呢？！）

（砵仔上的「靚仔」，毎粒飯都比平時食開的大粒！）

（先倒d豬油）

（再加頭抽）

（撈勻便食得）