Get A Life: 11月 2016

2016年11月18日星期五

Nakayo Shokudou 三文魚赤蝦丼 @ AEON 康怡店

十月中先去完東京，事隔一個月再加埋晚晚杜如風好介紹，真係好想食三文魚飯！

上網搵下邊間就近又夠水準，搵到康怡 AEON 入面果間 Nakayo Shokudou。平時成日大排長龍，趁下午茶時段一於懷緬下築地果種鮮甜味美。

到櫃檯前率先要了個三文魚赤蝦丼 ($89)，等左一陣由店員親自送來。大碗飯連麵豉湯，仲有日薑一包。嘩，四片三文魚大塊鮮美，三隻大蝦好鮮甜，個湯飲得出足料炮製唔係一味死鹹。呢個價錢恰如其分，高水準又夠飽，最緊要係真正滿足到味蕾，同埋一解相思之苦。

噢，呢個角度有一隻蝦入唔到鏡！

涼伴陳醋雲耳 @ 大家樂

近排大家樂推出高湯菜飯套餐，試過沙薑鹽焗雞髀同埋醇香酥排兩款，分量和味道都不俗；不過我主要想讚嘅係個伴菜：涼伴陳醋雲耳！

佢個汁做得好惹味，雲耳好爽好入味，用黎送飯一流 (齋食或當佐飲小食都相當唔錯)。佢為成個餐收畫龍點睛之效，加分！

Nivea smoky rose 唇膏

在東京藥妝店買的 Nivea smoky rose 唇膏 (Made in Japan，有 3 種顏色可揀，未知香港是否有售)，一支有齊 "有色有潤" 之效果！塗上咀唇後，顯色得來不誇張，似裸妝或啞妝效果；不過略嫌色澤唔持久，就算唔食野唔飲野，約半小時左右就 "自然地" 褪晒色。

木糠布甸

不要看輕不起眼的東西，有時，小店都會給你驚喜！

街坊麵包店出品的木糠布甸，一杯滿滿不馬虎，不賴皮。木糠份量係我食過咁多間之中最多的，食到尾都仲有！而忌廉唔會太油唔會太膩，好香滑。

Country Stream Natural honey lip

之前太古 AEON 重開買下的 Country Stream Natural honey lip，而家開黎搽就岩晒。打開蓋子即聞到滿滿的蜂蜜味，軟 GEL 狀的膏身有點似 lip gloss，易搽易滲入爆拆的裂縫，睡前搽一遍潤成晚。

新森林焗之專門店...把鬼！

一輪香噴噴嘅焗芝士香味，一輪沉厚嘅白汁焗味，每逢經過新森林焗之專門店都一定吞口水。我這個 "白汁+芝士控" 一直想試，但就周不時聽到家人或朋友說呢間唔掂，唔好食......真的嗎？

下午茶時段終於有機會到太古坊分店試！黎得就冇理由唔叫焗飯啦，甫坐下即叫了白汁牛肝菌豬扒焗飯+即磨咖啡套餐 ($41，以 TEA TIME 份量及 TEA TIME 價錢黎講算貴)，等左一陣就有得食！

熱辣辣的焗飯賣相應該唔錯，唔知味道如何！咦，乜原來呢度只有叉匙...冇刀架？！......件豬扒又唔係碎上，點切開呢？...算，叉匙都照食，因為都幾肚餓下。

先把叉子叉進，咦，UFO？個頗熱嘅鐵盤起勢轉......唯有一手用叉在另一旁固定，再另一手用匙畢飯食啦！嗯，個白汁焗飯真係冇白汁焗味，又冇芝士味...嚴格黎講，成個飯係冇味的，似白烚！

D飯好多飯焦 (唔似煲仔飯果種焦香)，硬到咬唔開不特止，仲好黐牙。D菌味充滿，豬扒味道又乾又韌，食一半食唔到一半......我終於明白點解咁多人叫我唔好 "中伏"......呢間焗飯專門店，真係好睇唔好食。(安慰的是，杯咖啡尚算 OK)

維記雪米糍

"雪米糍？都未聽過！糯米包雪糕？...(一輪馬叫笑聲)" N年前梅小惠的雪米糍廣告，唔知大家仲記唔記得！天氣凍就會想食雪糕，雪米糍，仲要係維記香芋味，確實真係好耐冇食過了。見 7 仔 $12 兩盒，買回去過下口癮啦！

美麗華 Habitu 金栗白松露 LATTE

只係 11 月限定的金栗咖啡，終於有機會試！個女店員似乎又係玄壇，知我唔係食野只係 "齋飲"，即時變臉！咦，美麗華分店原來係有最低消費？！......其實我只係想飲杯咖啡清清口及叉叉電而已，咁唯有要外賣啦。

等左 10 分鐘以上 (當時又係得 3 檯客，佢地食完正在 "吹水" 中，廚房 / 口吧應該唔算忙囉！)，"終於" 有得拎。

唔知係外賣問題定係分店問題，太古城及金鐘分店都好 OK......但呢杯，就不敢恭維......

這金栗白松露 LATTE，溫度方面雖則佢夠熱，不過栗子味及白松露味欠奉；雖然我唔係咖啡達人，不過以我的 "啡齡"，都仲可以分得出咖啡及 LATTE......手中呢杯，似係翻滾左嘅深啡色罐裝雀巢特濃咖啡而已......飲至成杯的 3 分 1 左右，突如其來的 "厚糖漿"，真係嗆口膩牙！當堂打左個冷顫......唉，剛剛先食左碗油益拉麵，隨後又飲左杯五十幾蚊嘅 "雀巢特濃"，真係想爆！

甜品工房 X 出前一丁聯乘

尖沙咀厚福街的甜品工房與出前一丁攪聯乘，推一丁拉麵餐仲有禮品閣，突發機會見佢又冇人等 (平時大排長龍，今日係星期六，仲要晚上 7:30 唔見有人排隊不特止，仲要入面只得 3 檯客而已...有古怪...)，入去試下！

成間店都有清仔，清妹等 DECOR；店員又轉晒日系裝束 (個個玄壇面口，冇表情冇禮貌，好似唔想做咁)，至於個一丁餐則有 3 款面揀 (豬骨濃湯，黑蒜醬油，泡菜風味)，配甜品一款，每款 $60 (未計加一...)。

個麵真係唔掂，無論湯底抑或麵身都半桶水，仲有陣油益味，似自己宵夜求其煮熟上碗咁 (應該話仲差過自己煮)，叉燒又韌皮兼冇肉味...成碗麵黎講，只係D海苔同埋隻蛋叫做OK......而甜品方面，由於士多啤梨果個售罄，所以點了芝麻雪糕+黑蒜窩夫+丸子款，雪糕和丸子都沒問題，可是個窩夫......淋嘅??!!...加入黑蒜味真係怪怪地

睇報導或聯乘海報說如果食客拍張照片放上 FB，可得清仔禮品一款，店員由頭到尾都冇提過，都算！ (我都去過唔少呢類 CROSSOVER 食店，店員的殷勤及態度真係好唔同，你地店舖做得聯乘，推而唔推，主動又唔主動，究竟搵你聯乘做乜???) 食完步出店舖，聽到出面行過 "搵食" 的客人說：＂咦，甜品工房冇人嘅? ＂另一位答道："梗係啦，佢地轉晒餐牌，只做出前一丁。冇其他野食架啦！"......咁即係話，佢地整一丁麵都唔掂，比平時佢地自家的餐牌更趕客！(之前我都有食過甜品工房，佢地D甜品都唔算好出色，不過D店員依然係玄壇囉！)

用人地D料黎煮都可以咁難食，仲要加一，真係一次 DQ。唯有安慰自己，出面食碗拉麵都唔止 $66 啦... ...之後仲要走去買野飲，因為佢碗麵真係好油益，好"立"口，只有油味冇豬骨湯味...

2016年11月6日星期日

又係失眠---巴哈甜睡寧，花王蒸氣晚安貼

冇錯，又係講失眠問題！看過這 BLOG 或熟悉我的朋友都知道我是失眠常客，仲要係嚴重失眠果種！

之前在這裡分享過，我用過一般人 / 坊間 / 網上一些醫治失眠的 12 個方法：外用的，內服的都試過，全部對我來說冇用.....(*大家可以看回這裡：<失眠@收音機，棋子餅> 這篇內文--- http://getalife612.blogspot.hk/2016/05/blog-post_60.html)

不得已，於是我又試 DO 姐代言的 "巴哈甜睡寧" (DO 姐代言，應該不賴吧！而且它又是英國出品，冇副作用，它更被醫生 / 醫療團體用以精神或舒緩治療，應該有一定保證吧！)，官網說它：加入了第六種花卉精華 - White Chestnut 白栗花，減低睡眠「干擾」，可以幫助你停止重複、無意義的思考，讓你安穩入睡。

於是我去萬寧買了一支試試...其實它很貴，減價後也要 $250，我用了萬寧券減了 $50，都要成兩舊水一支...唉，希望有效啦！

一支可用 3 個月，睡前噴 2 下於舌底。初是一陣酸 (約 2-3 秒便散)，之後味道像蜜味。

這 3 個月以來，我 1:30 左右噴完便上床就寢，可是仍然輾轉 + 眼光光到早上 7 點，更甚者係至早上 11 點仍然瞓唔到！大約中午 12 點終於瞓到，可是到下午 2 時便 "自然醒"......瞓唔到兼瞓得 2 個鐘而已，好明顯這支巴哈甜睡寧都幫我唔到，對我冇效！(究竟係我的問題還是它的問題？！) 本來諗住如果有效，貴都會買來用；可惜，而家唔駛了......

中伏嗎？我不敢就此斷言說，不過連巴哈甜睡寧都唔得，咁點算呢？

上個月去東京，買來 2 盒新出品的花王蒸氣晚安貼，姑且又試下啦！(一盒有 14 片，每片獨立包裝。平均東京賣 $5 一片，香港要成 $10 左右一片)

用了 3 晚，都係臨瞓前貼在 "背門" 位置 (香港廣告說這是 "瞓覺制"...不過我睇勻中醫穴位，助眠 / 安眠的穴位都唔係呢度...！！！)

一開封其實已經發熱，40度左右，不太熨，不像冬天時貼在衣物上的暖包！就咁貼喺身，暖著挺舒服！(大約只會維持著熱 30 分鐘左右) 至於它的助眠功效嗎？我貼完即上床就寢，以這 3 天親身體驗來說，大約接近 2 小時後便會入睡，之後會隔 1至2 小時紮醒。可能大家覺得不大愜意，但至少好過眼光光 5，6 個鐘好。

暫時，這晚安貼 "叫做" 幫我快D入睡......有失眠經驗的人會體會得到，瞓唔到，真係好慘架！

2016年11月5日星期六

Curel 試用裝

天氣轉冷，皮膚乾乾的又甩皮，見到電視及社交媒體廣告，CUREL 有試用裝拿取，於是上其官網連結登記... ...

等呀等，等左 3 個月都唔見寄來，狐疑之時原來有人又係登記左 2 個幾 3 個月都未有貨到手... ...莫非，又係 PR 或 MKT 技倆？目的只係想獲取用戶資料而設這免費試用活動？！... ...

終於，剛剛收到了，足足等左成 4 個月時間......！不過，同活動廣告有出入...廣告明明標示一 SET 的，而我收到...的只是 2 小支... ...