天使雞扒飯 @ 美心

我是茶餐廳及連鎖快餐店的常客！大家樂的咖啡奶茶最香醇濃厚奶滑，焗豬和炸髀最好味；大快活的雞翼加入蒜香最入味惹味，至於美心呢......夾硬要講的話，就係佢個天使雞扒飯啦！

所謂的 "天使" 係指白汁！("魔鬼" 則是黑椒汁) 今時今日三十蚊樓下一個飯，佢算抵食夾大件了。最讚就係佢個白汁濃厚夠味，唔係稀淋淋那種。雞扒成個飯盒咁大塊，配菜有西蘭花椰菜花雜菇翠肉瓜。

中上環略影

講下花生醬

失業時期，最平靚正的省錢大法就係食 "奶醬包"！買一 LOAD 生命麵包回家+花生醬一樽，至於煉奶則屋企常有。花生醬方面，平時食開 SKIPPY 幼滑裝 (減價時只須廿零蚊一樽)，味道比 PLANTERS 更濃更香花生味。每日食 2 片，一 LOAD 麵包 (14片 / $11.1) 可頂到一星期。

個人認為，與花生醬最夾的麵包款，就是排包或者車輪包，白方包次之。

童年回憶 (零食篇)

"真魷味，真蝦味，又香又爽又脆，時興隆！" 這句當年的廣告歌詞，仍然在腦裡迴響。童年的零食之一， 一定有牛仔片與真魷味，仲要喺屋村士多買喎！

行過惠康，赫見大包裝，平均 $18 一大包，買回家後適逢姐姐到訪，俾了幾包 CHLOE 小妹妹。零食嘅野，梗食開心 SHARE 至好味！

十字牌白朱古力奶

十字牌鮮奶具水準，近排新出白朱古力奶當然會試。惠康 $11 兩包，買回家放入雪櫃，晚上當宵夜飲用。

奶質依然香滑，白朱古力味濃郁，沒有朱古力奶的可可味，與牛奶本身好夾。

Julius Popp 藝術裝置 BIT.FALL @ Pacific Place

Zaha Hadid 展覽 @ 太古坊康和大廈 ARTISTREE

見有時間，就去睇 Zaha Hadid 展覽，不過康和大廈好難搵......我兜左 2 次又折返，開埋 GOOGLE MAP 又搵唔到再折返；咁岩天橋上就係呢個展覽的 PROMOTION BANNER AD，於是就指著這 AD 問停車場的員工 "呢個展覽喺邊度？" (在我上前去問之前，咁岩又有個人問，佢又係指住個 AD 黎問位置......) 那員工講了後，我又折返剛才迷路的位置，總叫做搵到康和大廈。但入到大廈，又迷一迷路，拐彎再上樓梯再上自動電梯先搵到......

阿華田脆脆鮮奶咖啡 @ MCCAFE

姐姐老闆俾左張 MCCAFE 卡佢，她又轉了俾我，3月26 DEADLINE，不如換杯今期推出的阿華田脆脆鮮奶咖啡吧！

講真，噱頭黎架唧！因為佢唔係以阿華田粉入饌，只是普通一杯 LATTE 上加阿華田脆粒而已，基本上冇阿華田味；比之前推出的 OREO 咖啡味道欠奉......試過一次夠了！

焗牛油薯容田螺 @ 意粉屋

自從 N 年前在 MARIO 食過焗牛油薯容田螺之後都好耐冇食過了，而一般食肆好像沒這菜式。今回在意粉屋見到，一碟有焗牛油薯容+菠菜+煙肉粒和 6 隻田螺，即刻要食！另外要多個蟹肉大蝦卡邦尼意粉，一意粉一田螺和姐姐 SHARE 岩岩好。

唔止 MARIO，其實意粉屋都係咁大個女第二次食，因佢價錢比 PIZZA HUT 貴，又冇芝心批，所以都好少考慮意粉屋。

除左田螺之外，碟意粉不過不失，都算大碟；我們二人每人可以 "添食" 一轉。至於 D 蝦好爽好鮮，要嫌的就係蟹肉甚少，應該說成碟得 6 粒 (每粒的 SIZE 如半塊手指尾的指甲般而已......)，而且有好多蟹殼，小朋友和老人家要小心食。再者，成碟意粉與汁好像沒關係咁，意粉還意粉，汁還汁；好似茶餐廳夾完意粉再林 D 汁上去咁。

食齋平價之選 @ 海皇

佢有雙拼餐，任選兩款只是 $20，如加野飲則豆漿加 $5，熱飲加 $6，凍飲加 $8，嚴格來說也夠飽。

Loreal 玫瑰昇華修護美髮油洗頭水

之前說過 Loreal 玫瑰昇華修護美髮油護髮乳，現在回購埋佢支 SHAMPOO 用。

同樣地，倒出來已有玫瑰幽香，易起泡；它的泡不算綿密 (略嫌有點稀)，不過也算易洗易過水。

關於護髮乳的博文可 CLICK 以下連結查看：
https://www.blogger.com/blogger.g?blogID=990555350945751550#editor/target=post;postID=8036163670402444229;onPublishedMenu=allposts;onClosedMenu=allposts;postNum=0;src=postname

蕁麻疹藥膏

早排講過我的日本 "卸用指定" 手信，就係蕁麻疹藥膏同埋資生堂的卸妝棉，最近屋企 "存貨" 只剩 2 支，剛巧姐姐有朋友分別去東京及日本，她已托朋友幫我 "入貨"。

估唔到姐姐朋友不付所托，各人買了數支，如今我的 "存貨" 已有 10 支 (未計已開封用緊的 2 支)。當姐姐拿來俾我時，赫見 10 支後我見狀即打趣說："下，睇黎我的蕁麻疹好嚴重啊！"，ANYWAY 謝謝。

*參考之前關於蕁麻疹藥膏的相關帖文：https://www.blogger.com/blogger.g?blogID=990555350945751550#editor/target=post;postID=5104343141319960677;onPublishedMenu=allposts;onClosedMenu=allposts;postNum=2;src=postname

山楂餅 @ 鉅記餅家

原來鉅記出左山楂餅？！一包 9 筒，每筒獨立包裝，係大塊款的山楂餅。

雙腸熱狗 @ 永樂園餐廳 ($15)

傳聞好多人讚的老店熱狗 (尤其係雙腸款)，特別之處在於佢入面的秘製白色醬汁。有機會一試，先叮 15 秒，搣開兩段，汁料都足夠；可能係叮熱關係，D汁變稀了，邊食邊滴。

味道方面，醬汁唔酸，甜甜的與平時的熱狗醬唔同。(但又未至於大家所說的 “好味到爆炸 ”！) 而香腸方面，據說這店用荷蘭腸，故味道帶鹹香 ......鹹香味又唔太食得出，我反而覺得腸仔味道似超市 PACK 裝的小紅腸多 D。唔知點解，整體黎講 (即在包皮，餡料和醬汁方面)，我覺得大家樂的熱狗較好食。

Crostini 紅莓榛子曲奇

以存氣玻璃瓶盛載，曲奇唔太甜唔會一味太重牛油味，入口好清香的紅莓味；口感清怡鬆化，唔錯！不過  $88 一瓶略嫌貴左 D......

羽衣甘藍+金槍魚杯麵 @ 太子 Farm Direct

行過金魚街見到有間有機蔬菜店，諗住入去行下，點知就見到羽衣甘藍！(本地自家農場 $38 一包，澳洲款 $30 一包) 聽聞它對免疫力有幫助，對婦女病乃至乳癌都好好，我站著細閱了貨架上的產品簡介，以及烹調方法，便買了一包本地的給姐姐，希望幫到她的病。

行至收銀檯準備付款時，又見到有風靡一時的日本金槍魚杯麵，它 2015 年開始盛行，香港少見，就算係 $4X一個都捧場客不絕，成箱成箱買。見呢度賣緊 $100 三個，好似聽過姐姐說過喺日本食過一次，於是就買了三個，連同羽衣甘藍送給她。

龜丸製麵 @ 希慎

在銅鑼灣食野，一係貴，一係等好耐位......行完希慎誠品，見有 FOOD COURT 諗住行個圈睇下有咩食 (平時甚少行，仲未知佢已有 FOOD COURT，以為裡面只有一D CAFE 和蛋糕店而已)。

本來我已打定輸數，因為一定難搵位，二來邊有平靚正的DINNER......邊行邊睇，PEPPERLUNCH 的香味已令肚餓程度提升，再行呀行見到有以前在太古 UNY (現已叫 APITA) 食過的紀文，它的炸物和天婦羅又令人垂涎。原來都有幾多店舖喎，而且間間都好吸引，最後我揀了龜丸製麵，佢嘅麵餐有：一碗大麵加兩隻雞翼仲有飲品，都只係 $53！以銅鑼灣來說，仲要係日式拉麵，我諗呢度算好平了！(甚至平過味千)

找了位子坐下，先喝一口麵湯，好鮮甜入味！麵質好彈牙，配料有粟米粒，豆芽，紫菜 (3片咁多，灣仔著名日式拉麵店都只係一片)，日式叉燒一片。雞翼不油膩，上面灑有芝麻更香口。單單碗麵的份量，已大過一蘭！食下食下原來好飽肚，飲埋跟餐的綠茶，呢餐好滿足。

自家製沙律

媽媽廚藝不算精湛，也少入廚煮食，但有幾款 "媽媽出手" 煮的東西確實好好食，包括：腐竹雞蛋糖水，蒜容炒豆苗，苟杞湯，豉椒炒魷，同埋沙律。

今次鄰居俾了一袋薯仔我們，聞說是唔知到那裡有機農場自己種自己摘的，於是我提議用來整沙律。材料包括：粟米，蘋果，雞蛋，青瓜。

至於 "重中之重" ---沙律醬方面，以前用過卡夫紅蓋 (但太酸，要同時加兩湯匙煉奶才行)，卡夫綠蓋又酸味欠奉，丘比的蛋黃醬整出來味道又偏鹹......不得要領，聰明的媽媽竟然逕自問過連鎖快餐店及茶餐廳，佢地 D 沙律係用咩醬？得悉了後，我家但凡要整沙律，媽媽都會買丘比沙拉醬 (香甜味)，它酸甜度剛好，不用加煉奶以拌！聞說一些酒店都是用此醬呢。

蔥油餅

豆腐花舖所賣的食物種類不多，多數是煎豆腐茄子青椒類，少有煎菜肉包子，有賣即煎蔥油餅則更少有。西灣河成安街裡面的豆腐花舖就是其中一間，幾蚊大大件，我間唔中都會買一兩件回家，食時叮 15 秒左右，又熱又香口。

光酥餅

之前講過我對 "白色一個面" 的食物尤其喜愛，昨天經過商場見有小攤檔，云云貨品裡面那 "白色一個面" 的東西吸引我埋去看看，它就是光酥餅。

平時幫襯開太子的老店 "奇趣餅家"，這檔子所賣的是大角咀的 "金牌雞仔餅"，見佢有白糖，黃糖款；$16 一包 (4個)，$30 兩包；於是我就買了白黃各一包回家試試。

Neutrogena 卸妝紙巾

去旅行或平時回家太夜，總會懶得就懶，如有化妝的話，卸妝程序越簡越好，所以 (尤其去旅行) 我都會帶卸妝紙巾，牌子方面就是 Nivea，因佢冇酒精冇香料，防敏而且清潔效果一流，專為眼部柔嫩易敏肌膚而設。唯一缺點，係佢開封後好易變乾，縱使每次用完都緊貼好個封口。

前天姐姐俾左一包 Neutrogena 卸妝紙巾我，昨晚用了一片，覺得佢好香+每片夠濕潤，而且好大塊，一塊就可完成成臉的 "卸妝"。(*以我只是塗黑眼圈遮瑕+眉筆這 "化妝" 計) 雖然如此，唔知係咪佢加入香料，同埋冇講明係敏感肌 (特別係雙眼) 適用，今天起床左眼上眼線位置就生左粒瘡......

嗯，都係用番 Nivea 好D......

悅木。老趙

N 年前食過，上星期六有幸再試，不過佢叫悅木 (under 老趙)！

看餐牌價錢有平有貴，一於試佢嘅生牛河，最普通的越南粉，睇下水準如何。

呢碗生牛肉河，都算大碗，仲有青檸和紅椒粒上檯，隨個人喜好而添加。牛肉份量都算 OK，也夠 "林"。河粉好滑，個湯底最驚喜，入味得黎唔會太味精。反觀碟雞翼就失色啦......本想叫牛油雞翼，但礙於價錢而卻步，轉叫了香煎雞翼 。<*香煎雞翼 ($64 / 4隻)，牛油雞翼 ($78 / 4隻)> 味道方面沒太特別，太乾身，就好似一般家常便飯的煎雞翼咁樣。

牛角包蛋糕 @ Cantevole

牛角包的外皮，包著海綿蛋糕，雙重口感而且充滿牛油和蛋香，就叫它做牛角包蛋糕吧！好似兩個成年人拳頭加埋咁大嘅 SIZE，食一個加一罐咖啡，飽飽。

可可米朱古力卷 @ Tony Wong

木盒設計，像首飾盒般別緻。內有 12 條朱古力卷，獨立包裝。口感豐富但太甜，吃畢第一啖已感到 "無以為繼"......以我這樣嗜甜的人來說都覺得佢太甜，更遑論有糖尿的父母......結果這盒東西的結果是 "爛尾" 收場！

蕎麥茶

弟弟帶來的蕎麥茶，圓柱形的包裝設計，附有小匙。打開原來 D 茶葉係粒狀的，畢一匙再加熱水，等一陣就可飲用。

色澤淺綠，茶味偏淡，有少少似元氣壽司果 D 玄米茶。以一匙來說，大約翻沖 4 至 5 次左右便沒味了。

Oreocinno @ McCafe

晚上不太肚餓但如果唔食就要等到翌日 2:30 後先食，所以就去 McCafe ，試新出的 Oreo 咖啡系列。

今次先試 Oreocinno，顧名思義就係 Cappuccino + Oreo，用 citibank 卡可免費轉至大杯裝，再加脆辣雞翼，yummy！

**杯 Oreocinno 唔太甜，飲到一半反而有 D 似走甜的熱好立克~

麥皮 @ 椰林閣

星期二趁住仲未封路去拜山，7點幾出門口至 10:30 完成，之後落山甫抵市區對面就係新翠商場，一家人先食野再回家。

好耐都冇去過椰林閣了 (對上一次去可能係一年前，食左個有點變味的豬扒沙律 lunch set)，佢早餐時段至到 11:30，比一般食肆長半個鐘。我挑了個麥皮餐，包括鮮奶麥皮+雜菇芝士炒蛋+多士+餐飲。可能好耐冇食過麥皮，覺得好好味，既有奶香，夠熱又好滑。