Get A Life: 7月 2016

2016年7月12日星期二

福岡手信

今回的手信來自福岡，但都係同熊有關！

有軟熟的北極熊大，小毛巾；蜜瓜味 KITKAT；防蚤防麈蟎吸蚤布（香港賣$62一片）；超好味的橙味味覺糖 (香港只見過提子 / 青提 / 士多啤梨味)；由布院的鬆弛熊水晶玻璃擺設；鬆弛熊小袋子 (外層是 PU，但絕冇一陣臭膠味)！

去左 9 成黑頭

N年前用過花王黑頭貼，搣時痛到飛起而且效果麻麻，以後唔敢再用這類去黑頭產品......

久而久之，士多啤梨鼻跟我連上關係，人越大士多啤梨鼻亦跟住我大！近期好興一隻韓國黑頭膏，攪到我心思思又想攪攪我粒士多啤梨。上次去康怡 AEON 買了支日本黑頭膏 (Pore Clear Pack eggshell essence & charcoal $45)，今晚決定一試！

洗完面後唧出搽上鼻 (包裝說可以搽埋眉心及下巴位置)，黑色膏狀少少杰，不過好易推開好易搽！唔駛太厚，薄薄一層總之把鼻及鼻翼位覆蓋就得。搽完約 5 分鐘開始 FEEL 到鼻鼻有點緊緻感，應該是黑頭膏開始乾，十分鐘左右就乾晒可以搣了！

搣果時有 D 痛，攪到兩行鼻涕流出......搣完見到黑色的衣 (黑頭膏乾了變成黑色的衣) 上面有白頭及粉刺，再看一下鼻子，嘩，我的士多啤梨鼻白淨番，呢支膏去左我 9 成的黑頭，勁呀！隔個禮拜我再清清先！

2016年7月11日星期一

祝我生日快樂，祝我生日快樂，祝我生日快樂---樂，祝我生日快樂！6 月，已過了 2016 的一半......同時，今年生日，我踏入另一個字頭......

遇上另一個人生樽頸位，加上失眠折騰，生日要令自己開心一點寬心一點，諗來諗去，就特地用海洋公園這 EXCLUSIVE 優惠-----生日正日免費，滿心歡喜的出發！(距離對上一次去，都成 16 年了... ...)

依然瞓唔到，早上十點半先搭地鐵去中環，再轉乘城巴，去到 OP 入口憑身分證換了張入場券 (期間有蝗媽打尖，赫見 OP 職員都 O 了咀反應)，過閘機一刻，OP 的職員向我說了句生日快樂！(她沒有眼神交換，而且面無表情的... ...)

由於我唔打算玩任何機動遊戲，目標是看海洋劇場+睇水母，企鵝+睇禮品店+玩旋轉木馬，所以時間上好鬆動。(況且個天陰晒，天文台說會有雷雨，更加唔駛玩機動遊戲啦！)

沿著指示，好容易就完成我今次來的目標，當然也有吃場內熱狗和搭纜車了。在禮品店，我又忍唔住毛公仔的誘惑，買了一條粉藍色海豚 (外面的斧頭鯊服可以脫下) 公仔。

雨有落，但雨量可以接受！本來生日遊園都幾開心，可是搭纜車時發生小插曲----上山時我可以自己坐一架，但下山時卻被職員叫我 JOIN 三名大陸佬... ...事情是這樣的：

排我前面的三名著夏威夷 SHIRT 穿涼鞋，戴有金戒子粗頸鍊，滿口煙味的大陸佬登入車廂之後，職員叫我入埋去....

我：我想坐下一架！
職員：(聲大....唔知係咪夾惡) 下咩一架！上啦！
我 (一瞥之後排隊的人，是 5 人家庭，有老人大人和小朋友) ：我想 JOIN 佢地呢家人坐！
職員：揀咩呀，一架可以坐 6 個人架！(邊說邊趕我上車)

於是我被迫上了那架裡面有 3 個大陸佬的纜車。其實我勁驚，點知在車廂裡會發生咩事？仲要係自己生日添... ...成程車程，佢地除了鞋，有2個更把腳擱上2張吉椅上；未幾，有1個更大刺刺地攤手在我面前擱著，嚇了我半死，於是我把背囊緊抱在前，成個人硬晒咁只戒備地留意著佢地 3 個男人... ...同時，我又見到之後的一架纜車竟然只坐左 3 個人，再之後一架只有 2 個大人......即係話，排我後面的 5人家庭，佢地可以拆開黎坐，並唔係 "一架可以坐 6 個人的車廂" 坐晒入去！！！

我又驚又嬲，呢個可以講係是次生日海洋公園之旅的不快事！

***PS：我買了這本與 EASON 歌曲名變奏的 <任你行>。林夕，作為今年特地送給自己的生日禮物。

新曆生日之後，農曆生日之前

新曆生日之後，農曆生日之前......

FREE 你一次 PROJECT TIME，我就喝到星巴克新出的雙重朱古力抹茶星冰樂+CREAM；東海堂靚靚檸檬蛋糕；以及 VERANDA COFFEE 的士多啤梨檸檬茶。

謝謝！

真正鴛鴦

從色澤看，半分天下，仲唔係真正鴛鴦？

薰衣草香薰

舊的用完，換上新的一款！

仍然是薰衣草味，仍然是粉紫色的香薰瓶，仍然上面有支花 (以前是紫色的向日葵，而家是白色的桔梗)

是執迷？是湊巧？是心之所向？

新的味道更濃烈，放在書檯頂，希望分分秒秒潛移默化下，讓我放鬆舒緩。

2016年7月10日星期日

譚仔。十年

初出時人山人海，好誇張！對上一次食譚仔，都應該有十年了......

媽媽未食過好恨食，於是就同她來。如十年前一樣，我要了 10小辣，乍醬+豆卜。十年人事幾番新，今次一食，乍醬的驚喜和回味失去了 (冇左以前的水準)，而銀芽及腐皮的配料也慳皮了好多... ...媽媽則要了豬肉+腐皮清湯米線 (忘記它配菜也有腐皮，如不，媽媽可以試揀第二D)。我地仲叫了碟細的土匪雞翼！(雞翼總算 KEEP 到咁好食)

到底譚仔定係三哥係正宗？抑或真係佢而家的水準差了？

康怡 AEON

康怡 AEON 裝修重開，身為街坊，去行個圈先！去到見有好多攤位，包括超市都有著西裝的日本人 (似係大粒高層)，又見佢地圍埋開會 (有點阻住D貨架)...原來這天係第一日啟業！人流？好多，但又未至於迫爆嘅。

裝修後真係好行好多，高檔左，多貨品款式左，藥妝更多左好多 (有D似去左日本)，仲引入左好多有機 / 健康 / 天然等貨類，連我都行左 3 個鐘！

今次 AEON 令我敗了黑頭去角質膏 ($45)，熊仔 SET (HAND CREAM + LIP BALM，$49.9).....明明自己已經有，都未用晒...因為個包裝又買下...仲有一小包 JELLY BEAN 送添！

講開個包裝，我見到呢個 MADE IN JAPAN 的 "熊仔牌子" (個名叫 COUNTRY & CREAM) 有好多產品，仲以天然蜜糖掛帥。包括：PEELING，黑眼圈轆轆筆，面霜，保濕，防 UV GEL，防曬潤唇膏等，唔知係咪日本新興的牌子呢？

熱辣辣

已經 3 點先出街，都成 37 度幾......天氣越黎越反常，然而我地對環保又做了幾多功夫呢... ...

銀龍 XO 醬豬頸肉炒一丁

銀龍 XO 醬豬頸肉炒一丁，$41 連餐飲！...間唔中豪一次啦！

味道：夠鑊氣，豬頸肉切條又夠多，唔太辣；嘆埋杯地道黑白煉奶奶茶，FEEL SO GOOD！

維他梨茶

咦，乜唔係秋天限定咩？7 仔減價 $ 7.9 一支，出面空氣勁翳焗，咽喉有點涸，買支試下先！

睇下背面個標籤，原來係水晶梨味茶飲品，反式脂肪和飽和脂肪都係 0，飲落有好香的梨的清甜，冇自家煲的雪梨水咁甜，唔知佢會唔會長出呢？

蜜瓜控

越大越愛蜜瓜，福岡手信之一的這款 KITKAT 蜜瓜朱古力，一盒 3 小包，一小包內有 2 條！蜜瓜小小甜，令人一開就好快食晒一盒！

蜜瓜海綿蛋糕仔，獨立包裝，打開包裝紙蜜瓜香已撲鼻而來，海綿蛋糕好軟熟，裡面有蜜瓜醬，一口一個....不得了，又係唔停得口！

美心布丁狗蛋糕+慕絲布甸X2

在對面馬路，已見到櫥窗裡有個黃色蛋糕！甫過去，就見到牠了，係布丁狗啊~

美心出布丁狗蛋糕，味道係芒果海綿蛋糕+芒果慕絲，裡面仲有芒果肉！好鮮甜好好味，略嫌裡面的芒果有D酸....扣少少分！

另外 2 杯係雞蛋慕絲布甸及朱古力慕絲 (@$32)，二者質感綿滑，雞蛋布甸味道很驚喜，好香好濃，唔太甜。而且呢款少見D，要到各間美心碰運氣！

食完佢地仲可以要黎放小物，如髮夾，萬字夾呢~