媽媽要買來試，行過惠康和 market place都冇，結果都係去番萬寧買。
用時覺得佢薰衣草味唔太出，一睇樽身，原來佢係普羅旺斯薰衣草 + 柑果……之但係，連柑果味都冇乜喎……
呢隻沖涼液唔太多泡、氣味欠奉，不過尚算易推開易沖洗、而且唔 “立”；沖完涼皮膚尚算潤 (唔記得以前係咪出過兼用過，覺得唔太愜意所以冇再翻炒)，唔會好似 Kelly 代言果隻花王素肌沐浴乳咁，沖時覺得好 “鹼” 好 “啜” 肉+ 沖完涼感覺好乾身 + 皮膚繃緊。
至於會唔會再用，則交番俾媽媽決定。
2017年5月28日 星期日
卡紙碎芝蛋治 @ 龍景大廈 Champion
上次先讚完 Champion 的 tea set 平靚正，事隔三日，適逢星期五 （初一） 食齋，於是翻炒去食個芝蛋治。
等左一陣就有得食，咦，咁薄嘅？掀起塊麵包，見到 D 蛋好少，應該係一隻蛋 (甚至冇一隻蛋) 加水炒成；都不特止，由落單至食得都等左有 5 分鐘，但件三文治係凍的？！…見佢雙拼三文治只係 $24 (出面普遍茶仔由 $27 至 $31 不等)，算啦，可能人地將貨就價唧！…好又一餐，唔好又一餐，食啦！
點知，咀嚼時發現唔妥，我又掀開塊麵包睇下，有紙碎呀！！！搣左一 D 出黎，再食，又有…佢係煙韌只溶溶地唔爛的，所以唔係落單果 D 紙，應該似係 “外賣用來隔開 2 碗野、上下擺埋入一袋” 果 D 卡紙……唉，質量同質料都好唔掂，三文治都可以整到咁……其實要做的只係炒蛋唧，塊方包同芝士都係現成有的……估唔到第二次黎呢間再食就咁瀨野……咁，仲好唔好再俾機會佢呢？！
麵包乾、凍、硬。部分蛋有蛋殻！（d蛋已經少啦，仲要有殻食吾到要吐出）照片裡右下角只是 "部份" 的卡紙碎！真係離譜！
鮮奶撻 @ 天后禾田
之前在這裡終於搵得番兒時食過嘅荷蘭撻 (我叫佢做 “帽仔”) 的味道，今次試下佢嘅鮮奶撻 ($7 一個，$10 兩個)。
佢係牛油皮的，厚身而且鬆化，好香牛油味。而鮮奶內餡亦算不過不失。(個人認為 PIE & TART 果 D 好食 D)
2017年5月21日 星期日
房署求其事但拋波仔……
無線新聞事事但但之外，其實有好多機構做野都好事但求其……
公屋雖則定期會幫住戶進行維修，但好唔好真係見仁見智！今年佢分 ”家居維修大使” 及 “全方位維修” 兩組人進行 (唔知邊組人負責做咩，總之有問題就拋波仔…)。首先有人上來睇下你間屋邊度要維修------之後落 “柯打”-----約 7 至 10 日有人會覆你幾時上黎整 (佢喺第 9 日晚上 7 點幾打俾你，話明天上黎整！…得唔得你嘅事，唔得再等再改期囉……話之你請假係要 “時間”…)-----上黎整又分唔同工種……總之一句，佢地話事，整咩、幾時整你只可 STANDBY….
如是者，佢地 “評定” 我家有以下問題：廁所燈座鬆鬆地 (其實係因為廁所天花石屎剝落 + 露鋼筋，攪到個燈座鬆脫吊吊 FING)、廚房鋁窗窗花鬆脫 + 窗骹老化。
等到佢地決定邊日上來整，點知又求 X 其 “處理”……攪到老父老媽發晒老脾……
先講廁所燈問題：D工人 (唔知係 ”家居維修大使” 定係 “全方位維修” 的工人) 居然拆左本來盞燈，再喺附近位置另鑽天花，然後將本核盞燈裝上就算。媽媽見狀佢地先 “勉強” 同我地換過一個燈座。安完燈就拍籮友走……攪咩呀，原本位置依然露石屎露鐵通 (個鐵通位我一度諗，會唔會其實安裝左隱蔽 CAM？如果係，個位置 TOP SHOT，真係咩都睇晒！)……咁就叫維修完？到房署報，佢地又A膊，一個部門推一個部門…….終於又等了一星期多D，有人來批盪，填平番個位就算。(*廁所問題由DAY 1有人上來睇至 ”整左” 前後足足接近一個月……)
Before
第二，廚房鋁窗窗花鬆脫 + 窗骹老化問題：又有另一幫人來 “處理”！佢話識又話知，結果只係同你配粒螺絲，仲要係配錯嘅 (無論長度和闊度都係錯)……平帽頭變左凸 + 斜帽頭，夾硬鑽番入個窿就算。成個帽頭凸晒出黎，抹窗一定界到手！都不特止，粒螺絲個尖位仲凸左出街……為此，老爸同個工人大吵，嘩，人地手執電鑽，我幾驚真係開拖會見紅呀…. (*廚房鋁窗窗花問題由DAY 1有人上來睇至 ”整左” 前後足足接近 3 星期……但其實仲有窗骹老化佢地完全 IGNORE 左！！！)
平帽頭的螺絲
佢地居然求其搵粒凸＋斜帽頭的來濫竽充數⋯⋯
仲夾硬鑽入，叫做完成「維修」！
雀巢 shakissmo cappuccino
新出的，7 仔有售，昨天先試 cappuccino，先搖 8 下 (佢個蓋係咁話，不過我搖多幾下)，然後打開飲用。
打開蓋子一飲，係就係有泡 (官方說先搖搖才飲用，就係想有綿密奶泡效果)，不過似係一般飲料 “因搖晃而產生泡” 咁嘅情況咋喎，同埋搖同唔搖味道 / 口感係冇分別的！啡味不太出，偏奶味 (另一款 latte 版應該更奶…)，D 泡又唔知點咁……最 “驚喜” 係佢個口感好杰，似合桃糊咁，又似豆漿擱了一會未及飲用而起 “舊” 嘅情況咁樣……？！都係飲番罐裝奶滑版好過！
大門食堂 @ 灣仔中港大廈地下
睇門口 MENU 見佢平平地，有拉麵有日式咖哩飯又有親子丼，又唔駛加一，好似都唔錯喎！於是和姐姐入去 DINNER。
我地不約而同揀左大門拉麵 ($48) + 煎餃子 ($28 / 5隻)，等左一陣就有得食。睇佢大大碗，賣相幾好，但唔食唔知咁好食囉……
大門拉麵：麵質較一般的硬身；形狀唔係圓柱條形，而係類似烏冬咁樣扁身匹方柱體那樣。配料只有一塊叉燒、一片紫菜和大量筍……湯底未至於味精，但又唔似豬骨熬成，好難形容……見佢餐牌上話日本自家工場直送湯底？真係 “飲” 唔出喎！D麵唔掂、湯底又唔得、配菜唔夠，由於我地都唔食筍，所以就由果塊唯一的叉燒送晒成碗麵……確實感到吃力、單寡、食到口where where….
煎餃子：味道不過不失！不過佢冇餃子醬 / 餃子豉油俾你點，只有果支屋企的生抽般的鹹豉油……
魚柳沙律 @ Champion
之前行過太多人所以冇入，今次都多人不過我一個人易搵位，所以就入去試啦。
以 TEA TIME 黎講佢算多款揀，由小食至三文治、麵餐，以及炒粉焗飯都有，價錢也公道。我要了魚柳沙律 ($26)，連餐飲都係二字頭唧，出面九成係 $35 以上。等左一陣就開餐了！
魚柳好大塊而且好厚身，唔似出面薄薄一 “片”。外皮炸得金黃而唔係焦黑深橙色；炸粉厚度適中，魚唔腥，都 OK 啦。沙律方面，呢度係純菜那種沙律，如果你想要生果沙律或薯仔沙律就唔太岩你啦。成個餐仲有兩 PAT
醬 (沙律醬 + 千島醬) 俾你點。杯咖啡係即磨那種。嗯，呢間可以翻炒，下次試下第二 D 野食先。
厚興瑜記手撕雞 @ 鰂魚涌
以前係么鳳，如今變了做手撕雞。佢開張幾日，今晚爸爸憋不了去買了半隻 ($55，新張期內送一款小食，我們則要了海蜇絲)。
半隻都裝滿一個外賣飯盒 (係平底那款，不是中間有條骨 ”裝假狗” 果種)，份量都算多，上有芝麻吊味，看似不錯。夾夾下原來半隻雞係連雞皮 (大量)、雞頸、雞翼 (一隻)、雞爪 (一隻) 的，至於雞 PAT PAT，可能係另一盒先 “搭有” 吧 。咦，真係俾你睇到足半隻喎；但食落就知佢味道偏鹹……而海蜇則算爽口。
2017年5月19日 星期五
要好好保護對眼！
因飛蚊兼有大黑影，每年都有驗眼習慣的姐姐迫不得已轉去養和睇眼科。檢查後，醫生說她因太深近視 (姐姐有過千度近視+散光，近兩年好似有老花…) 加上年紀漸大之故，所以雙眼出毛病，當然也包括看電腦看手機等因素啦……幸好不是視網膜脫落、不是黃斑病變！之後她同事提議她食藍莓，係紐西蘭果種，還 SEND 了產品圖片給她，說好多眼科乃至外國權威都推介它。姐姐給我看看，由於照片像素太低，咩名唔係好睇得清，依稀睇到右下有隻眼睛的 graphic，同埋個 brand name 係 HealthMate，之後我自己上網搵，終於搵到了。原來香港只有三處可買，包括：健怡坊，莎莎，邦邦堂。
呢盒 HealthMate 千里眼之目 (健怡坊 $350一盒，邦邦堂做緊減價 $280一盒)，格價之後，減價+做會員再有優惠，終於敲定在邦邦堂網購，並揀由順豐送至樓下的 7-11 取貨；我星期二落單，星期四晚上 6 時已送至。
今午取了包裹後回家打開，佢仲送左盒草姬甜睡飲 (一盒有5茶包)，咦，呢個岩我喎！效果如何，之後再補帖文！
***<HealthMate 千里眼之目>的成份包括 (資料源自網絡)：
野生藍莓成份---有活性成份”花青素”超過25%，而抗氧化的能力更是維他命E的50倍，不但可以做到眼部的血液循環，更能有效抑制破壞眼部的細胞酵素，加強血管彈性和微血管的保護作用。
葡萄籽---含豐富的”原花青素”，能夠抵禦自由基的侵害，也能有助消除眼澀和眼乾的問題，對眼睛也很有幫助的成份。
金盞花---蘊含豐富的葉黃素，可以保護眼睛和視網膜細胞，今到它們延緩退化。
DHA---它是構成視網膜的成份之一，有著足夠的DHA，不但可以改善視力，同時也能預防視力退化。
小米草---它具有多種的療效，不但可以改善視力，眼部機能，也能去除眼睛疲勞，舒緩乾澀和抗自由基的功效。
訂閱：
文章 (Atom)