森永蜜瓜糖

去日本必飲森永的屋仔形紙盒裝咖啡，朱古力咖啡，朱古力奶；在香港食過它的紅豆牛奶糖，焦糖奶味糖，如今見到這蜜瓜味當然要試啦！

KleanNara 清純自然盒裝面紙 (270張) 3P

只在 759 有售的韓國盒裝紙巾 KleanNara 清純自然盒裝面紙，一 PACK 有 3 盒 (270張)，公價 $41.8，七折後 $29.3 一 PACK，平均十蚊唔駛一盒。

我家無論卷裝，盒裝，細包裝的廁紙 / 紙巾都用得超快；梗要揀隻平靚正的。盒裝方面，之前用開健力氏，雖然質料 OK 但好快用完一盒，而且價錢唔平；我們轉用這盒裝紙巾因為佢夠大盒份量又多，每塊紙巾唔太薄，質地唔錯；但佢成日缺貨，平時見到有貨就要入手啦！這次，我就捧了三 PACK 回家。

蕁麻疹藥膏

蕁麻疹來去如風，紅痕刺痛周圍走，真惱人。香港並沒有一隻專治的藥膏，有人會搽濕疹膏，有人會搽蚊爛膏，有人會搽家裡任何一款止痕止癢的藥膏 "頂住"。

記得上回在日本旅行時發痕，即席在藥妝買了 2 款不同牌子的止痕膏，諗住睇下邊支好用就買定幾支回港用。其實一般止痕膏也可以止住一陣，直至姐姐從網上見到有網店代購日本曼秀雷敦蕁麻疹藥膏後，她就拿主意買了一支給我試用，睇下會唔會好 D。

用後效果唔錯，即時止紅止痕，刺痛感覺冇左，蕁麻疹好快消去。之後每逢她去日本，也會幫我 "入貨"。(它也成為我的 "指定手信"~) 我家共存了 6 支，現在已用到第 4 支！（吾知香港曼秀雷敦幾時會正式引入香港）

蕁麻疹好難斷尾，雖之前曾睇過一位中醫好番，不過轉季或受刺激又會再出，睇一次中醫成 $700，我無可能長期睇的；現在這專門的藥膏折合約港幣 $117 左右，需要時塗搽，我覺得咁樣較好較化算。

盒裝麥維他消化餅

麥維他消化餅和嘉頓薄餅，是我喜愛餅食首 2 位。從前的麥維他消化餅圓碌碌一筒，開封了後因收藏不好而變淋或弄碎，好食但有點麻煩。逛零食店見到有這盒裝，即買回家。

一盒 6 包，一包 2 條。方便易食易攜，轉成條裝的麥維他消化餅味道仍然好吃。

第十年。大坑舞火龍

病了個幾星期，赫見今天是 "迎月"，見精神好些，又擔心翌日會打得成風，所以晚飯後就出去天后睇舞火龍。(第十年去看了，舊年因為發燒而冇去)

它 8:15 開始，根據過往經驗，"早到早霸位" 其實有點搵笨，人煙火舌大汗淋漓，主禮嘉賓演說，等點香插成火龍等等的儀式及進程......所以今年 8:15才出門口，一到步便可得到 "有利位置"，無論距離和站位都較從容又不致太迫，當然最緊要係睇到影到火龍啦。

大約 9 時正式開始，到 10:40 左右結束，期間遊大坑及再點香插成火龍，共舞了兩遍。睇完後就到就近檔口，被一隻手掌大少許的白天鵝燈籠 ($50) 吸引，是少見的款式，正想拿出銀包付款，又見到毛毛虫（蠶繭）燈籠，想也不想就轉買了它。"毛毛虫" 對我來說充滿著典故，是 "有故事的" 虫。咁特別罕有的款式，還要比白天鵝便宜 $5 啊！

我喜孜孜的拿著我的小虫燈籠，見小甜谷爆滿，不如去麥記食 double 焦糖新地啦，中秋是應該甜甜的過！可是剛病好，味覺仍欠奉，因口渴之故轉去便利店買了支維他奶茶，邊喝著邊坐丁丁回家。

華豐國貨中醫

踏入九月的首個星期二突然發燒，今次是 "乾燒" 並沒有傷風和咳，只是鼻敏感加劇。看了西醫退燒了後覺得胃部仍頂住頂住，又冇咩味覺，口淡口苦的，也覺得個人好似 WING WING 地，想睇中醫調理下同埋清毒。記得年頭睇過華豐國貨頂樓的中醫，基於華豐的中藥材料比較正 (睇得多中醫飲過中藥的會好易知道 / 飲出分別)，又可代煲，所以一早就去睇了。

因為閒日冇人，我基本上係直入直出，睇左一小時然後拎藥方去櫃檯執藥兼咨詢幾時煲好來取。之後在拿著單據過隔離收銀處付款！(會診 $50，2日藥 $134，代煲藥 $20)

睇完中醫過對面海皇食粥，再行逛一會，一個半小時就有我折返取藥了。

***如果想去睇中醫的朋友，記得先查好個別醫師的應診時間，因為裡面的中醫有的早上喺度，下午在別處應診。

Small gift Big smile (part 2)

早前說過 "小禮物為生活添歡笑"，(8月16日之發文) 今回準備了布甸狗磁貼，行路公仔，茶包連四方罐子，小樽米餅，用來逗人開心；同場加映豆豆大口仔小公仔一個，貫徹 Small Gift Big Small 的宗旨。

金菇肥牛卷韓式泡麵餐 (@ 吉野家)

$30 樓下的餐已買少見少，呢個吉野家金菇肥牛卷韓式泡麵餐 ($29.5 / 下午茶時段) 岩岩好！

一人一鍋，圓形韓麵一個，金菇肥牛卷 3 條，溫泉蛋一隻，連餐飲一杯，夠飽又夠抵。家下呢個時勢，普通麵包 (如腸仔包) 要成 $10.5 一個，算係咁啦！

Royce potato chip chocolate

聽過人推介 Royce potato chip chocolate，今次第一次食。

盒裝嘅佢，包裝設計唔馬虎。裡面有一鍚紙包，打開就係主角了。一塊有齊朱古力及薯片，兩種口味與口感，相映成趣。薯片味有 D 似卡樂 B 的鹽薯片；至於朱古力果面，雪凍左冇咁易溶，味道我覺得 OK 唔太甜 (不過家人說它頗甜膩)。

咁快買 2017 記事簿及年曆?

咁快買 2017 記事簿及年曆，會唔會快左 D？岩架啦，根據以往個人經歷，如果十月前唔買定，之後就好難搵，特別係它是 "香港假期" 款，以及自己心儀的卡通人物和款式。

白粟米 (北海道直送)

一切都是物以罕為貴，好似白色士多啤梨，方形西瓜，白色苦瓜，粉紅色肉的奇異果等等；呢條北海道直送的白粟米 ($50)，香甜少渣，雪凍後食仲爽。

大吉居酒屋放題

中秋節做節，今年就揀左去<大吉居酒屋放題>。BOOK 位食 7 - 9 呢段時間，入座冇耐就開始多人！

佢野食選擇好多，飲品也有 2 大 1 細的凍櫃可選，甜品 (木糠布甸，豆腐花，楊枝金露等) 雪糕 (Haagen-Dazs，Dreyers，Apollo，牛奶公司) 雪條 (布丁味，水果味等) 齊備；我最 "心心眼" 係佢嘅蒜容開邊蝦，大大隻而且非常入味，淨係佢我都食左 3 隻。要嫌的話略嫌只有 2 小時，食得急左D。

beard papa 日式泡芙

最初係在旺角站入面見過，香噴噴排長龍......一直無緣試，今回一定要試下。

要了個做緊 PROMO 的黑酥皮泡芙 ($22)，從店員的手接過後便急不及待吃。泡芙皮好香，黑曲奇忌廉輕軟，呢件甜品果然好邪惡！

Essential CC oil

護髮用品越來越多，PANTENE / DOVE / Schwarzkopf...日系韓系產品大量引入，揀邊隻好？之前用過加拿大製造的天然太陽花護髮噴劑，不過用完好似噴左 HAIR SPRAY 咁，頭髮又乾又纏......後來又用過另一牌子髮尾防 UV 的護髮油，它的椰子味太濃......也用過乳霜狀的，半乾搽上後頭髮顯得黏答。

在萬寧貨架前停駐良久，因為用緊 Essential Shampoo & Conditioner，不如試埋佢隻 CC oil 啦。

Essential CC oil 細細支，係噴劑黎嘅，由於密封包裝，所以未能先聞一下它的味道。包裝上說它針對以下頭髮問題：乾旱，打結，斷髮，靜電，分叉。

暫時已用了 2 次覺得效果唔錯，頭髮 (尤其是髮尾) 沒那麼乾旱，變得柔順輕軟。通常我 PUMP 4 下 (依不同頭髮長度而 PUMP 出需要用量) ，於半心搓勻再直接塗上半乾頭髮上，然後吹頭便可。它的氣味清香，塗上時 (不論掌心或是頭髮上) 沒有黏膩感覺，而且修護效 ok 喎。

又一城 Pizza Express

又一城 Pizza Express，好在已訂檯，因為出面至少有廿人在輪候... ...

叫了個 2 人餐，前菜係凱撒沙律，小食係炸粉團之類的東東 (附有 3 款醬料：泰式酸辣，蒜容香葉，牛油)，以及主菜羅勒葉芝士辣肉 PIZZA，餐飲要了可樂 (樽裝，連檸檬冰杯跟上)。

個沙律好大兜，食完已半飽。留肚食 PIZZA，一人吃了一件再飲下可樂，飽晒 (PIZZA 水準大失，唔好話同 PIZZA HUT 或意粉屋比，就連麵包店的 "PIZZA 包" 也高班過佢)... ...至於個小食，冇理由唔試下唧！好，試左一粒半，飽晒......冇計，打包番去囉！

第二次食 PIZZA EXPRESS (第一次係 7 年前，中環行人電梯旁那間)，佢上菜快，不過張餐檯大細，除左本身 2 位的用餐碟子及餐具外，擺了一碟前菜沙律已幾乎滿位，連鹽與胡椒等調味料也要 "開心SHARE"，要 "過檯拎" ！而且檯與檯之間好近，其實如果地方太細，不要勉強設計成這樣，令顧客坐得迫夾，食得唔舒適.......仲有，D侍應禮貌麻麻......話晒都係大 MALL 吖...

天線蜜瓜山

天線蜜瓜山 @ AEON 超市，好似保齡球集合處，有趣有趣！

堅。脫毛膏 (唔痕唔痛唔敏感)

無意中聽到收音機某節目，MIMI 講這隻脫毛膏，話十分鐘攪掂，乾淨之餘一抹就得，唔駛沖水。仲即場搵左男主持及男職員試用。

有冇咁勁先？

N年前我都試過 VEET 脫毛膏，一搽上去即感到刺痛及刺激，好乸呀... ... 沖水後脫毛效果唔理想，之後皮膚仲又紅又痛...用左一次唔敢再用。之後過幾年，VEET 新出玫瑰防敏版，仲用 ELLA 做代言，我唔抵得頸又試下，點知又同上次經驗一樣...冇效之餘又攪到刺痛發紅！經過呢 2 次親身經歷之後，VEET 已被我 BLACKLIST，再引申至脫毛膏類，不會再用！

咁呢隻 HOUSE DR 呢？又如何？

睇 FB LIVE，男主持及其他的男試用者都成功 "脫了毛"，搽上要脫毛位置，等十分鐘，唔駛沖水只係用紙巾抹走已脫的毛毛就 OK，超方便乾淨又有效啊。MIMI 訪問試用者的感覺，他們都說由搽膏至完成整個過程，都唔痛，唔刺激，唔痕，唔發紅，唔敏感，沒有任何不適；而且這膏的氣味討好。

隔日我便去買來試試，一支我一支姐姐...幸好店內賣剩 2 支 (我已全買下)，而且老闆也相當 NICE，給我看片也教我使用方法，還送了他獨家代理的面膜+磨砂+CREAM SET 裝給我呢。

回家後即晚試用。因我仍有存疑，就係：從未脫過毛的男人，佢地的腳毛幼長，梗係脫得乾淨啦！咁如果平時用開刮刀，因夏天穿背心之故要隔日刮的呢？剛長出來的，短短的，硬身的毛毛呢？

Before：剛長出、較短、粗糙、硬！

After：甩晒！小腿乾淨、白滑！

先塗上在要脫毛的位置，等十分鐘再以紙巾抹！(唔駛沖水，真係好方便) 嘩，連只有 2 天的短小毛髮也脫到啊。真係唔痕唔痛唔刺激，唔發紅唔敏感之餘，脫毛效果相當理想。脫後我立即跟姐姐分享，這脫毛膏真係靠得住！

*補加一句，自星期二晚用佢黎脫小腿腳毛之後，今天（星期日）再長出的毛毛沒有粗左。（平時用刮刀脫完後d毛毛會粗左硬左）

<睇多d，可以參考以下的產品相關資料及VIDEO>
https://ewhablog.com/2016/06/30/bodyhair-removal/#more-1825

鐵板燒炒麵

日式超市有售，一包有3 個麵餅同埋所需醬料。落油燒熱隻鑊，放麵搗散再加入醬料兜幾兜即成，仲可以按個人喜好加入配菜，今次就加入金菇。快靚正又夠飽，茹素日子食佢岩晒！

硬骨頭

人大了，骨頭也硬了！一直心思思想試 YOGA，但本身又有舊患，做唔到D動作，弄傷了仲煩仲手尾長；於是轉試 Pilates。初試玩，為免 join 入會及怕被游說買會籍，不如就試工聯會的，價錢相宜而且係一季的課程，五百零蚊有 12 堂，玩三個月也好！

每星期一堂的 Pilates，主力拉筋仲展和訓練呼吸，上了一半，感覺良好；當一星期做一小時運動也不錯。要挑剔的就是地方太細，撞手撞腳又頂天花板。

上完堂去兒時舊居附近的舊底咖啡廳食野，可是招呼，食物質和量已大不如前... ...今回隻匙羹仲有好多紅毛泥添... ...末端果d抹極都抹吾甩，唉！

麥記紫米豆漿

去麥記食早餐，如果晨早流流唔想飲汽水，又唔想飲咖啡奶茶，可以考慮加 $1，轉杯暖笠笠的紫米豆漿。

我都係第一次試！外賣一個靚早回家，先打開蓋子散散熱，眼見白色的？係咪店員俾錯呢？(我心在忖度著) 飲一啖，咦，跟普通豆漿有咩分別？ (心諗：回水呀！) 於是食下飲下，直至飲淨 4 分之 1 左右，用支攪攪棒攪下個底，開始見到紫色化開，啊，原來是紫米沉底了... ...攪了一會便喝著，好香的紫米豆漿啊！（只有一啖而已）味道不太濃，襯早餐岩岩好... ...(唔知係咪已溝稀，所以飲到差唔多見底才發現它是紫米豆漿)

又到中秋

見到家中擺著柿子，中秋快到了！在銀杏館購了月餅捐贈給有需要人士，希望受惠者及銀杏館上下員工身體健康，快快樂樂！

東京過江龍 BAKE cheese tart

初來香港，大排長龍是這芝士撻的指定動作。前晚約十時左右經過 SOGO，去超市諗住睇下有咩試食，赫見 BAKE 冇人排隊，而在爐架子上的芝士撻們像跟我招手，好吧，帶你們回家吧！(當時還聽到店員著廚子焗多兩底出來...下？不是快要關門了嗎？)

我要了 6 個 ($20 / 1 個；$110 / 6 個)，店員小心奕奕以盒子盛載。日本人貼心的設計，連盒子也體貼過人！它分上下兩層，每層可放三個撻，而撻與撻之間也有紙樣相隔固定，那就不用你撞我我撞你而撞散晒！盒外也用上 LOGO 貼紙封好，不是一般餅店的用尼龍繩，夠簡約兼且乾淨俐落！

回家後便放入雪櫃，食時取出用微波爐叮 15 秒，或以多士爐烘 5 分鐘左右，便可食到熱辣辣流心芝士撻！

Fortnum & Mason 紫羅蘭茶餅

要數下午茶的先驅，非英國莫屬。早前有幸到倫敦，拜訪這連英女皇都品嚐的 "指定" 品牌 Fortnum & Mason。典雅愜意的用色及設計， Tiffany Blue 與白色的拼湊，令進去的人感到舒服自在，也彌漫著浸浸皇室貴氣，非凡脫俗；而它售賣的茶包，茶餅，果醬，朱古力等，包裝精緻一絲不拘，十分討人喜歡。

這款 Violet biscuit (官網售價 $11 英鎊一罐) ，圓柱型的罐子上有凸起的花卉圖案，個蓋不是扭不是塞，而是設計成 "內層" 入篏，這就讓餅乾不致入氣或受潮，挺窩心。

罐子裡是一層透明袋子，裡面的餅乾有一個吸塑盛著。小買餅乾，有點像牛油曲奇，比馬利餅還要厚身，一口一個剛剛好。驚喜的是它的味道，紫羅蘭究竟是咩味？會否像花茶般突兀？...關於這方面，請恕我不懂形容，只能用 "齒頰留香" 更貼切！我只食了一塊，一整晚口腔內也充滿著茶餅的幽香，不濃不嗆不誇張，就是那種剛剛好的味道。而餅子本身不太油膩造作，平時我怕花茶那種 "太入味太嗆" 的感覺，估唔到這花味餅卻與我 sing-in，是味蕾的幸福。