MUJI 空氣循環風扇

先係姐姐買左把大嘅，未幾，媽媽心思思之下再買把細嘅。呢款 MUJI 白色圓形風扇，顏色設計簡約，十分美觀。先唔講佢嘅功效有幾了得，單係個樣已經好靚仔！

產品小資訊：空氣循環，排走悶熱濕氣+熱氣，輔助冷氣，低噪音，大風量扇葉.......

《有片睇》https://youtu.be/lBTXjE3bcec

好 "船襪" 難求！

大大話話都試過好多牌子的船襪：$12 店，Adidas，Baleno，Catalogue，Cotton On，H&M，Uniqlo，Maple，Isai，日本買的，淨色的，公仔的... ...曾幾何時 Isai 那款 ($6 一對) 淨色船襪很好著，價錢平之餘，個腳跟位又唔會 "縮" 左上去或甩腳，但之後再買時價錢和質地都大不如前，著完行 3 步已甩腳，"縮" 左去腳窩位置，邊行邊抽襪頭... ...此外，Baleno 間條那款也算可以，但洗了幾次開始 "走型"，腳跟位呈鬆拋拋的無力地 "下垂"，變相對襪大左兩個碼... ...

前天終於把之前買落的 ADIDAS YOGA 襪開封，反正待在抽屜裡，就開黎見我！佢有一條小橡筋 (當然有個招牌 LOGO)，腳板位置有防滑矽膠點，諗住 COOL 住腳面，對襪一定唔會走位啦，點知... ...依然走位，仲要係淨係左腳走位... ...唉，究竟天下間仲有咩牌子 / 邊度出嘅船襪靠得住？

小禮物。為生活添歡笑！

唔記得係邊間精品店的 slogan，"small gift big smile" ，說的也是！

這 2 款大口仔八達通套 (可放 SD 卡)，平時見到 $12 至 $20 不等，呢間賣 $8，仲有細佬佬款，魚與熊掌揀唔到，最後 2 個都帶回家！

免費轉粗薯條

星期六麥記優惠係免費轉粗身連皮薯條，反正未試過，又反正買個餐，轉啦！

味道冇平時嘅麥記薯條咁入味，也沒有以前哈迪斯的連皮薯條咁好食，新屎坑試過了，下次都係要番平時食開果隻薯條 LU。

樂敦 Melano CC 美白淡斑維 C 面膜

日本樂敦嘅 Melano CC 美白淡斑維 C 系列，係日本藥妝店人氣產品，傳聞佢含美白活性維他命 C 濃度卻極高，再配合維他命 E 誘導體，美白去班好正。見萬寧有售，減價後 $88 一盒 (有20片)，試下先。

密封膠膜包裝，拆開是個小黃盒，拿取方式就如濕紙巾那樣。我拿出一片，即充滿柑橘香，但拎上手已感到它不太濕潤 (代表精華，成份不太豐富)，以及頂端和側邊 (即額頭位和面頰兩邊) 見到係呈乾涸狀的… …？！至於面膜本身質地，亦不如大家說的絲般輕軟。

打開敷上面，它的剪裁有點古怪！比平時敷開的面膜較為長，而且欠缺彈性；教人難以左右爭開，好好鋪上面上。此外，又因為佢偏長，鋪上面後下巴位仲有一大截面膜凸出來，我唯為幫佢解釋，就係可以敷埋頸位啦……由於面膜本身不夠豐潤，敷了 4 分鐘左右已乾身了。敷完沒有平時敷 MASK 後那種 “已急救”，覺得好舒服，好補水，好舒緩，好正的感覺。

只敷了一次，未知它的去斑效果如何；雖然味道討好，但它的設計，恐怕拿出三數次之後，就好似一般濕紙巾那樣乾晒了……(更遑論佢本身 / 第一片已有部份乾左…) 希望唔係盒盒都係咁啦… …(明明已密封包裝啦喎)

我個人認為，暫時它僅可當作 “SPARE 面膜” 用，你本身最好家裡還有一款 MAJOR MASK！

*產品小資訊：蘊含維他命C及E誘導體 ，配合葡萄柚及檸檬萃取4種美白保濕精華，為肌膚作深受美白及滋潤，集中修護曬後的暗啞乾燥問題，並抑制黑色素的生成，讓肌膚回復水潤透白。(網上來源)

帽仔？荷蘭撻？(@ 華爾登餅店)

是帽仔？是荷蘭撻？... ...

講起這款西餅，由 GRANDMA 開始已到美心買給我們姐弟們吃。它的形狀如一頂紳士帽，所以我地叫佢做 "帽仔"。前天跟媽媽談起，她說而家美心的 "帽仔" 外加了杏仁及一些 NUTS，味道口感大不如前之餘，價錢也由 $8 一件變成十幾廿蚊一件... ...很懷念以前傳統的 "帽仔" ！聽罷我就上網找傳統西餅店，找 "帽仔" ！

找到西營盤的華爾登餅店 (那怕已是一千零一間有 "帽仔" 賣)，照片中的 "帽仔" 就是我要找的那款，名字叫 "荷蘭撻"，於是星期六特登搭車去買。坐地鐵至西營盤站 B2 出口 (指示不太清晰，上完電梯要搭 LIFT，再走樓梯先上到地面)，向右行約 5 分鐘就到。

見餐盤內還有 3 件 "帽仔" ($6 一件)，其中一件上面的白糖霜已全溶掉，可能已擺得太久...於是我買下餘下 2 件，再加一條斑蘭蛋糕 ($14)。因它沒有用盒盛著，2 件 "帽仔" 接踵摩肩的擠在膠袋裡，我不得不小心奕奕的捧回家。

回家後，媽媽見狀十分開心，急不及待即場吃了一件。她說這店的 "帽仔" 比較硬身，口感和水準較美心以前的差，而上面的果占也是呈一 PAT 狀 (美心的 "帽仔" 頂端，是果占均勻填滿)。此外，她還試了斑蘭蛋糕，咦，好多蛋殼啊... ...希望該店製作時小心一點，話晒老店，又傳了幾代運作，也接受過報紙雜誌的訪問......尤其係這幾近失傳的傳統西餅，真的希望有人 / 有店能好好承傳製作下去，因為的確有人 / 有心人想食，特登來買的啊！

星期五買野好抵

有 MANN CARD，如果想抵D，唔駛等每月十號，其實星期五去萬寧買野抵之餘仲會有野送，起碼日用 / 個人護理品唔係水貨。

先前試過送 OLAY 系列試用裝，又試過送一PACK維他檸檬茶，濕紙巾，李錦記蠔油，豉油，即食栗子，牙膏牙刷等等... ...今次送壽桃牌特級瑤柱麵，個盒仲要係入得微波爐 (出去買都幾廿蚊啦)，又食又拎，仲想點喎！

純萃喝

台式咖啡純萃喝，之前試過幾好飲，個樽又可以用黎做筆筒，7-11 買兩支額外多一個印花，梗係買。

今次就試新出的茉綠奶茶及濃乳奶茶，前者有點似 Starbucks 的 Green Tea Latte，後者則是奶茶多奶，一貫台式味道，唔錯。

慈山寺

知道李嘉誠用十幾億起左間寺，又知道大埔有一個十幾米高觀音像的寺，但就正正唔知道原來兩者就係同一個地方！

一直想去，網上一個月前預約，上星期六終於一嘗心願去到了。(唔預約係入唔到的)

預約了 2:15 那段時間，12:30 坐地鐵去大埔墟站，再轉乘的士上去。(也可以在大埔墟站坐小巴，落車後行 20 分鐘左右) 去到門口先出示預約的電郵，然後會給你一個 "參學" 証掛上。

裡面環境清幽，像橫掂的古裝景，之前成個星期都下雨，當日天氣放晴。

參觀過各殿閣之後，偌大而慈悲美麗的觀音像即見，扚了勺水許願，參拜了後到了藏經閣抄經，抄完有義工蓋印，捲起貼上貼紙給人帶回家。本想去齋堂食點東西 (上網見到那禿竟有拉花咖啡及蛋糕)，可是當日有活動而謝絕入內。逗留了三小時，用自備水壺裝了水給家人便行出去路口坐車回大埔墟。

難得的好天氣，美麗的蓮花池，慈悲憫人的觀音娘娘，寧靜幽恬的感覺，彷彿天上人間。

半島酒店 Chesa

睇電視劇通常會叫海洋公園做海馬公園，半島酒店叫長島酒店，今勻我大鄉里出城，有機會去 "長島酒店" 的 Chesa 食晚飯，為隆重其事，我1早上十時許食過野後即留肚！

先在餐廳門口拍了張照片 (冇幾可嘛)，入去只見有兩檯客，侍應招待我們坐下，先替我們拉開些檯，好讓我們走進梳化位子；之後就問我們要暖水或熱水，再遞上餐牌......嘩，甫坐下已見出他們的細意和殷勤，語氣和態度都非常好。(可能我食得太多快餐 / 茶餐能吧，竟感到有點不自在)

在我們看餐牌時，他們即端來一籃子麵包！(FREE 的) 啊，不是籃，是一個類似過大禮那種盛載禮餅的器皿。配以圓形牛油，D 麵包真係好好食，那種好 pure 好有咬口的質地，未叫野食我已 KO 左 3 個！

CHESA 出名的芝士火鍋當然要試，另外仲點了 SET DINNER (銀鱈魚)，SPARE RIB，帶子大蝦 SHARE 食！

真係大鄉里出城！那兒係按次序上菜 (當然你可以調配食物的先後上菜次序，但你一定要示意侍應，如果唔係分分鐘成粒鐘之後先會端來給你)。我們決定個芝士火鍋先食，食完再上其他菜式！(個芝士火鍋食完之後，我們說可以上個 SET DINNER，點知等左一個鐘，再要叫侍應先端來個 SET 的.......餐湯！)

講番食物，個芝士火鍋入面有煙肉，所以好入味，芝味不太濃，點餐時可以叫佢 "少酒" (因個鍋會贊酒)。芝士火鍋的醮物有一大籃麵包 (切粒上)，連皮薯仔波，長通粉。此外佢地仲送左一碟粉團，就係上次去東歐時食過好彈牙又唔知係咩，令我一直回味果D，今回見番食番，真係好開心。所有用來佐芝士都好匹配，好芝味，份量又多，其實食完都好飽了！

SET DINNER：個餐湯不賴 (類似周打魚湯...忘記叫什麼名堂)，足料香滑 (送上兩片切成兔仔耳朵般的蒜容包)。但個 MAIN COURSE 銀鱈魚，賣相一流，見得出大廚的細心和功夫 ; 但味道偏鹹也帶點腥... ...甜品係云呢拿雪糕配 BERRY 醬，無論味道和賣相都係大師級出準。餐飲我們要了 MOCHA，淺嚐一口已不得了... ...酒店級真係酒店級！

一場黎到這裡，我已決定一定要試下牛扒，所以特意點了個無骨 BEEF SPARE RIB！我真係未食過入口即溶的牛扒！！！！(點餐時佢地冇問我要幾成熟，但已經唔重要了) 個汁好出色，D牛又出色，肉汁鮮嫩唔韌不特止，真係入口即溶。旁邊有 D 唔知係筋定膏，一樣係入口即溶，而且真係好入味，超級好食。配菜 D 西蘭花用蒜泥炒過，好入味！

新屎坑，本想試下佢地的 CAPPUCCINO，不過聽聞它的 TRADITIONAL CHOCOLATE 又係好出名，一定要試，好，又叫一杯先！(等左十五分鐘左右，有得飲了) 端來時，令我覺得自己好似皇室人員咁，因為個杯子暖暖的，杯上有朱古力掛邊，上檯後侍應才當著我面，把小壺子朱古力倒入杯，而可可及忌廉另上.....嘩，邊有咁好服侍，飲杯朱古力唧，邊有咁精緻架... ...味道方面，又係超讚......好飲過 COVA 同埋 GODIVA... ...

另外，佢地送上甜品，有杏仁肉桂小蛋糕，以及朱古力。連唔太好朱古力的我試了不禁又讚。佢好食過 AGNES B，LEONIDE，GODIVA 那種... ... 朱古力醇度好實在，唔係一般牛奶混，黑朱，酒心那種...我唔識形容啦，總之就係好食！

埋單，我們一行 4 人，加埋一係一千八百幾蚊... ...慢食 3 小時。氣氛，環境，服務一流 ; 食物賣相和水準超班！CHESA 最適合節日慶祝，重要人物生日飯，大日子黎食... ...不過打工仔，真係要儲定錢食先得！

韓式 Mocha

見 7 仔有 PROMO，這韓國 MOCHA 抵港，仲係期間限定，於是去買黎試。

唔好睇佢細細罐，其實都有 240 ML，即係比一包紙包維他奶細D。佢味道比較濃，但唔係朱古力咖啡的那種濃，又唔係森永或日本汽水機的那種香滑味道，入口後有D苦澀，而 after taste 有D酸，感覺有點 GEL 喉......可能我飲唔慣啦，試過一罐真係夠了。

福岡手信

弟弟去完福岡回來，送了我一片水怪面膜及日式小蛋糕 (朱古力及芝士蛋糕味)，日本人的包裝真的貼心精美，就連一片面膜也樂意為你包好，仲送一個小禮物添！(如果個 KT 屏幕抹布係大口仔就仲好)

Crabtree & Evelyn Damask Rose Brightening Serum

由於姐姐係會員，所以間唔中都會收到一D領取試用裝的通知卡，前幾日我就拎住去換，仲試埋添！

一直都對玫瑰有鍾愛情意結，呢支 Crabtree & Evelyn Damask Rose Brightening Serum 試用 2 天後更令我驚喜！其實除了 OLAY 外，我都好少試用 / 長用其他牌子的護膚品......可能係基於冇太大期望的心態去試，結果呢支小小試用裝，洗完臉塗了後，皮膚真係即時亮白左，係 "即時" 見到效果，如今第三日搽，面蛋仲白裡透紅添。(之前左臉顴骨位下，無啦啦好似黑左一撻咁)

試用裝細細支，打開蓋子係PUMP裝，塗上額面鼻下及下巴位置，不太油膩，幽幽的玫瑰香好雅緻清香，最緊要係真係提亮左膚色。以 serum 來說，它已經打敗了 Loreal 葡萄籽精華水及之前用過覺得唔錯的 Barrier Repair 米水，進佔 My List。睇產品小冊子介紹，這系列仲有出面膜，下次可以試下。

鴻福堂金牌奶茶

近排個胃有 D 唔舒服，唔知係咪又因飲咖啡太多太密之故 (惡性循環，耐唔耐就會咁樣... ...影響埋胃口，及有惡心感)，所以轉飲奶茶。除左維他果隻紙包奶茶令我上癮外 (是普通果隻，太濃那款我覺得有點澀口。上癮度每日凌晨 2 點都會心思思開包黎飲！)，呢款鴻福堂出品的，味道都唔錯！

佢冇台灣膠樽那隻咁重奶精味，口感細滑，茶味唔太澀，奶味幽香，整體味道很適中。(有點像 MILK TEA LATTE)

索柏 2012 萬聖節版

好得意好別緻，這款 2012 Halloween 金貼原裝日版的索柏貯金箱 / 糖果罐子，謝謝你！

iCREMERiA Dolce Giapponese 蜜瓜雪糕

見過雜誌介紹，見過 FB PO 相，知道黎左香港 (其實好一段日子)，我一直想試... ... 不過佢實在太貴啦... ...

星期六突如其來的提議，晚上接近 10 點毅然從灣仔競步似的急行去銅鑼灣，趕緊在 SOGO 關門前去食！

到達 SOGO 直奔地庫 iCREMERiA 店前，姐姐指著餐牌說要一個這蜜瓜雪糕。店員問我們要什麼味道的雪糕？ (有 3 款可選：云呢拿，抹茶，云+抹) 我倆覺得抹茶太濃太搶d蜜瓜，而云呢拿與蜜瓜比較夾，於是要了云呢拿味。

等了一會有得食了 (相機一定要食先)，先用匙羹畢+刮起蜜瓜肉，再畢下雪糕就送入口！嘩，D雪糕好滑，牛奶味好香；個蜜瓜好鮮甜 (見隔離超市貨架上一個天線蜜瓜要成 $400 起)......我們不停的畢呀畢，未幾上面的雪糕已塌下 (佢又未溶喎，因為雪糕有成 4 圈，內容太 "充實" 了。)

不用 15 分鐘已 KO 蜜瓜仔了，而 SOGO 差唔多關門了。

高露潔琺瑯健牙膏

膏身呈米漿色，沒有太嗆的薄荷味，這款新推的高露潔琺瑯健牙膏連好挑剔的媽媽都讚好！今次高露潔，抵讚！

佢有美白及抗敏兩款，除鞏固琺瑯質，去口氣，美白牙齒之外，還有防止蛀牙功效，用完可以再入貨。

今秋玩邊科？

如題，撇除佢地係咪內置 "接近" 走音的核突音樂之外 (因為包封了，問啟不到聽聽)，在超市見到這些小巧得意的 "戟絨" 燈籠，有直升機有兔仔有魚魚造型等，每個 $30有找，KAWAII 呢！

澳門 Palacio Lisboa cookie

澳門令我最回味的，就係 2012年母親節，姐姐提議去澳門2日1夜食玩遊時，甫到達去食的魚翅撈飯！(首次食，一入口即刻感到 "不得了" 啦！雖知道魚翅既殘忍又唔環保......) 除左堂食之外，如問我仲想食咩 "外賣"？我會說鳳凰卷 (原味果隻，上面冇肉鬆又冇紫菜) 和黃糖光酥餅。這個 WEEKEND，姐姐就買了它倆給我。

另外要講講的是，傳聞有隻曲奇，只有在葡京有售，而且仲係好早已大排長龍，賣晒就冇。今次父母買了 3 大 2 小罐回來，回家後即雀躍地跟我分享說好好彩買到！梗係啦，你地 9 點已排隊等買嘛。

這腰果曲奇，長方形的造型，好，等我試下你有幾巴閉！開罐拿了一塊，咬一口，係幾鬆化嘅，不過唔係我杯茶！(純粹個人意見) 因我覺得它牛油味欠奉，味道不太濃；鬆化但我覺得流於餅身太 "散" (但又未至於 "碎上" ！) 至於腰果味唔突出，彷彿普通市面的麵包舖自製之杏行粒曲奇... ...其實整體食唔到 "腰果曲奇" 的精髓。(所以我覺得 "大師姐"，甚至 JENNY COOKIE 或藍罐，都好食過佢)

美心西米撻+芝士撻

因為媽媽要到瑪麗醫院覆診，所以會經過中環美心！本來美心西餅沒太特別，不過這 2 款限時出爐，而且最近我們的只有戲院里這美心才有的西米撻和芝士撻就變成它的賣點！

我覺得好食，因為佢個牛油皮香濃鬆化，西米與吉士醬融為一體，不太甜膩；至於芝士撻也很出色，芝味濃郁但不是很臭很羶，也很挺滑，趁熱食或當下午茶一流。

Karadium 一支多用胭脂膏

睇片之下見到有一支胭脂膏，既可當胭脂又可當 eye shadow 同埋唇膏一支多用，我也心癢癢想試。但由於係睇片，只見佢係黑色管身，唔知咩牌子，於是網上搜尋一下，見到出來的搜尋結果係 Etude House play 101 stick，不過睇個包裝又同片中的唔太似... ...後來俾我搵到係 Karadium #02 款，格價之下最平 $115一支，郵購一支試試。

喺未正式試上面時 (還未有機會用)，又卻俾我知道，原來上次睇片中 model 用的，係 Chanel ... ...唔緊要啦，如果 K 字頭好用的話我已算賺了，因為它的價錢已是 Chanel 的 "一開三" 。

蘭芳園蔥油雞扒撈丁

好耐都冇食過蘭芳園的蔥油雞扒撈丁了，知佢喺上環信德開左分店 (其實人地開左好耐啦)，地鐵一程就到，一於去食！

之前喺中環本店食過，雖然坐得唔太舒服，而且下午4點左右就賣晒，不過可能果時出 CREW 經過搵食，成3點半先食 lunch，太肚餓之故覺得特別美味。而家喺新店，地方闊落左，侍應人手多左，又有冷氣... ...不過味道大不如前... ...

雞扒太乾身太老，蔥油份量唔太夠而且得陣油味冇蔥香...D麵未完全熟，有一邊甚至仲食呈 "麵餅" 狀態... ...不過配菜份量OK，杯鴛鴦稀左D囉... ...連埋飲野，$52 都幾貴！一次夠了！

壽桃牌吉品即食鮑魚

半夜三更聽人講煮公仔麵食，順便開罐鮑魚送麵，有冇咁豪先？原來真係可以，仲好好味添！

(*忘記影相，於是借用網上圖片)

話說端午節時，姐姐送來 <壽桃牌吉品即食鮑魚>，前幾日弟弟和弟婦來食飯，於是好豪咁開黎食！真係方便，快趣，好食；媽媽說，食這些即食鮑魚小貼士，就係唔好鮑魚連汁都整熱，因為會令到鮑魚好硬和韌；應該喺飯熟時將隻鮑魚放入飯煲輕輕 "焗" 熱，至於D汁就用微波爐叮熱，之後淋上鮑魚就食得。(當然，即開即食也可以啦)

雖則就即食，佢真係唔韌兼彈牙，D汁又入味，下次試下好豪咁，送公仔麵黎食先！

OLAY 美白油

好多 V-BLOGGER 和 stylist 都推介這走 OLAY 美白油 (原名叫 "高效透白光塑清瀅精粹油" )，光感透白，去乾燥暗啞，保持皮膚水油平衡唔甩皮，作打底用或修護用，也可溝 foundation 用，又係一支多效，只不過 $150，可以一試！(更何況我覺得 OLAY 產品不論功效，價錢，質量，效果方面都不賴)

之前就咁滴在手指頭分別搽上額面和下巴位，好像份量過多；於是之後就索性滴 3 滴左右在手心，搓搓便用 "拍" 的方底抿上面部皮膚，塗時一陣討好的柑橘香，上面後不太油膩，塗了3日左右，皮膚乾燥甩皮情況改善，上 foundation mousse 時也很貼。色澤方面也冇咁暗黃，岩晒勁通頂的我。

翻出熱狗餐

上星期，大家樂和美心都先後翻出熱狗餐！$27 至 $29 起... ...

大家樂：一條豬肉脆皮腸，熱狗包身大而長，有搽牛油，配以滿滿的焦糖沙拉醬，連野飲！

美心：2條細腸（豬肉＋雞肉各一），熱狗包身較短，冇牛油又冇乜醬，有生菜絲，連野飲！隻熱狗好乾好笠口... ...成個餐唯一可取的，就係跟餐的香草薯條比較好食 (但勁油) ！

桂格 oat diary drink

桂格新出的 oat diary drink，有原味同埋榛子味，我買了原味試試。

杰杰地的，有點像杏仁露般；味道像淡味麥精！飲完一支，有飽肚感，都 OK 的。

峇里都有大口仔

弟弟給我的峇里手信，是條大口仔毛巾！峇里都有大口仔？而且仲係微笑而不是 O 咀的，很可愛！

白飯都要成 $22

佛誕時去維園順便在天后食野，赫見某茶餐廳的西多士要成 $38 之後，我以為已經好 "經典" 啦，點知一山還有一山高......今日初一食齋，加上落大雨，諗住落樓下的舊式茶餐廳食蛋治，一睇餐牌俾我見到比 $38 西多士的價錢！

支裝維他奶，7-11可按樽都唔駛十蚊，呢度要成 $15 一支......惠康 $12.9 已有一 pack 六包了！另外，白飯幾錢碗？要成 $22......家常菜蝦仁炒蛋要 $72......清炒時蔬要 $55... ...照咁睇，翠華其實唔係好貴架咋，起碼人地俾你食番咁上下野。

我只係要左單拼三文治嘅下午茶餐 ($25) ，老懷安慰的，就係呢度份蛋治至少熱過同埋 「厚dd」過上次食果間北海道牧場餐廳！同埋杯咖啡唔係北牧咁，衰過即沖三合一先啦！

有矽無矽....都甩好多頭髮?!

有矽洗頭水，洗時好爽，吹頭後也很易梳唔會 click 梳。不過就要忍受半濕髮 / 乾髮後頭髮像未過淨一樣，摸上去仍有點黏手。

近排好興無矽洗頭水，幾乎各品牌都轉成 "無矽"，對於喜歡試唔同洗頭水的媽媽 (其實佢覺得冇款岩用，所以成日買回來用了一兩次就嚷著要丟要俾人，跟手又買另一款回來)，當然也買過好幾隻牌子的無矽洗髮系列，不論日本的，韓國的，地道的，外國的......

有說含矽的洗頭水會阻塞毛孔和脫髮，不過以我親身經驗，無論有矽無矽的，都會甩好多頭髮...洗頭 (濕髮) 時一定甩，乾髮時就算唔抓唔R頭，都一樣自然甩... ...

而家行超市或萬寧，來來去去都係得幾個牌子：pantene，essential，Dove，head & sholder，tsubaki，shiseido，syoss，tresemme，vidal sasoon，rejoyce 等等，全都試過了，結果都係甩...有冇一款唔勁甩頭髮的呢？