捱著幹

今日才星期三，但這個星期的放工時間不一，前兩晚九點幾，今晚六時許！。。。

或許有人會說：＂啊！六時許，好早啊！＂冇錯，因為喉嚨有點不適又頭重重，好似作病咁，於是我趁老闆飛左，就拿拿聲執好野，唔想 OT！－－然而，這三天我都帶野回家做，做到凌晨２點，陪伴著我的，就是重播的＜溏心風暴＞！

每天返工，踏入地鐵站前我都會在家樓下抬頭望望天，看看雲；我都知道這世上根本沒有＂笑雲＂，除非你用 photoshop。。。

The Key 程式小遊戲

上星期買了 Eason 新大碟一直冇機會/時間啟播，今天特意再帶番公司，他幫我將所有歌曲轉成 MP3，好讓我用手提聽！

我打開歌詞及看過大碟入面的設計，裡面有個下載程式小遊戲（會不會像森美那個一樣呢？），我下載了並請來巴斯試玩！得出幾幀有趣相片！

Pixar

因為找了好幾間 7-11 知道全線都冇得換公仔，要先俾錢訂，約一個月後取貨！（我以前試過訂貨，事隔成個幾2個月佢先打來叫你取貨。又因為7-11冇來電顕示、及我吾見左張單。仲要係未必抽中你想要的那款，所以呢個「訂貨」方法真係吾OK！

昨天和他打趣說，６個印花即係要在7-11買 $70野，再加 $20 換，即是 最「便宜」之法係要付出 $90 才有一個＂換購＂機會，仲要係未必抽中想要的（我和他手上都有一張儲滿6個印花的卡）；所以，我打趣說今天會去信和／兆萬的箱仔舖睇下，假如 $90 一個巴斯，也算係咁！。。。他問我如果買唔到咁點？我話星期一我就 sick leave！今天，他 whatsapp 我，說他已 bid 了巴斯俾我，明天我唔駛 sick leave！收到這訊息，我很開心！

今天去睇了＜怪大＞，可能太多人讚，坊間一下子太多＜怪大＞精品，有點煩人！然而，整套戲我只覺得 ok 啦，還可以， Toy Story 比較好看耐看！看完在超市買了一兜減價後只係廿元的麻醬冷麵回家作 dinner！

好波！

四點九，約好在時代廣場等！他又係著我在日本買的波衫＋波褲！

沿途行去大球場，好多人，氣氛熱烈！我地坐喺第２行，睇左２場精彩球賽，２場波之間食左肯德基！完場，我地又魚貫行去天后那邊，仲搵 7-11 睇下有冇得換公仔！之後就坐叮叮走人！

估唔到我地呢２個球迷，都會歡呼，拍掌，照相拍片，仲同大公仔（吉祥物）影相，初時我仲估我先會咁失禮！

快樂，真的不在乎長久嗎？

攞獎的菠蘿油！

連日來的大雨，昨天仲黃雨，除左風濕之外，仲令到個人好奄悶又易倦。。。因為今晚要去大球場睇波，所以我在 facebook 留了個 status，就係：＂老天爺，please！如果明天一定要落雨的話，可唔可以唔好係大雨／黃雨／勁大雨果種？？？＂另加上＜師父明白了＞的偈語：好想好想。好信好信！

今天醒來，真的放晴，仲係個熱頭好曬果種，我不禁掛上笑臉！由於買了保險，要取回一些病歷紀錄，所以一早就去旺角！約了十點半，本來即取便可，不用見醫生；可是我去到，說明來意，姑娘竟說負責的醫生遲遲未番，又冇交低任何野。。。著我等候！我等到十一點，醫生回來了，我以為姑娘會向她說項（明明我星期三已打電話來，說好今早會來取的），但姑娘竟沒當一回事！我見那位醫生開始睇症，我豈不是一等再等？究竟姑娘有冇留下memo？？？如是者，我又上前櫃檯，著姑娘打內線給那醫生！未幾，姑娘就 print 我的病歷，整個過程只是兩，三分鐘。。。其實，又唔駛醫生簽名，佢未番黎，你地可以打印給我便是了嗎？吹脹！

拿了病歷，我就去金魚街那邊，好出名的金華冰廳食野！平時下午去，真係好多人，我估而家咁早，應該不難搵位吧！

入到去，我要了個早餐（等於出面茶仔的常餐那種），$27 又夠飽！之後我再叫了一個攞獎的菠蘿油（$8）！這個包好鬆軟，上面Ｄ＂菠蘿皮＂又厚身又有牛油香，仲唔會好易散開跌晒出黎！（但我覺得都係翠華的菠蘿包較好食）食完就行左一陣，因為好多舖頭都未開，所以就回家了！抖足精神，晚上和他去睇波！～

香蕉朱古力蛋糕麥旋風

今日 lunch 食麥記，要了個魚柳包餐加一個新出的香蕉朱古力蛋糕麥旋風。個麥旋風雪糕保持麥記新地的一貫水準，上有朱古力醬，另加一舊 tiramisu！味道唔錯，有雪糕有蛋糕，好似食緊雀目牌一盒果Ｄ雪糕蛋糕咁！

唔知係咪個餐有杯可樂，加早餐那杯奶茶，再加杯雪糕，下午５點幾有Ｄ肚痛，之後痀了３次。。。

麻辣鷄

雲南食物惹味吸引，尤其是一路麻一路嗆一路咳一路食的感覺，真是超正！今日，我就係俾呢碗麻辣鷄小鍋米線吸引、嗆親、咳親！

森美動畫

睇＜森美要滾＞時下載了 AR code，當晚看見驚喜，激起全場氣氛，真係好正！今早聽＜早霸王＞，主持說昨晚再啟動 AR code，對準大會 logo 亦可見回那組動畫，有摩天輪，彩虹，恐龍等公仔！我聽到即刻試下，因為那些動畫實在太得意，想再看！從網上搜尋到那個大 logo，然後啟動 AR code，嘩，不得了，真係睇到，好我意呀！我急不及待展示給同事看，他們都嘖嘖稱奇！

慶幸，咁都記得買早餐俾我！

今早佢笑住番黎…..我問佢笑乜佢又唔肯講！跟住佢拎左一袋野俾我，說：＂不如今日食呢d吖！＂我一睇，係腸粉＋奶茶！跟住我望望佢桌面，佢冇早餐？？？？佢話食左！我問係咪真係食左，還是減肥？佢溫柔地答：＂唔食早餐係減唔到肥架！唔記得我講過啦咩？＂我就答：＂係！唔食早餐減唔到肥，但食早餐就會增肥！（我唔係講笑亦唔係駁咀，因係我自己親身經歷－－我三十幾年都冇食早餐習慣，係近呢 7 個月先日日食早餐！約 2006 年曾經試過食早餐，但我本身腸胃郁得慢，因早上 9 點幾食完早餐：一份多士而已，到下午 1 點仲頂住頂住，胃脹到不得了！加埋個 lunch 真係谷上加谷，胃腩膨脹。。。甚至脹到成 33寸，唔係講笑，真係好難消減！當然，磅數也急升！）

之後佢話今早同老婆食早餐。。。或者我應該開心嘅係，佢同老婆食左早餐，都記得買早餐俾我！同埋，佢今日的波衫波褲，係我喺日本幫佢買嘅！

 

平安過渡

昨天好友帶了翠絲給我的胡迪，今天他竟帶了巴斯！我老實不客氣地將巴斯搶了過來我桌面，就當正它是我的！他說：＂巴斯過來旅行，２日１夜之後就回家了！＂哼哼，睇下點！

午飯後陪他到 PCCW 問英超台的 plan，然後去買 Eason new album！原來新碟明天先正式發售，今天的是全球限量Ｔ shirt 版！想也不想我就要了一套，本來他都想要，可惜唱片舖只剩一套！行返公司途中，我已急不及待打開件 tee，他就一直幫我拿著唱片及雜物！之後，唱片一直擱在他桌上，直到放工才物歸原主。今天總算無事無幹結束！

第一次睇 talk show

第一次睇 talk show，第一次現場睇森美！

我覺得成個 show 氣氛好好，伊館個場好適合，最重要係＜森美要滾＞真係幾好睇！無論內容，演繹等方面都好好，當中亦有不少笑位同埋驚喜位，真係冇買錯飛入場睇！另外，最驚喜係，森美唱歌原來都幾好聽，佢唱張學友，甚至於 show 末唱主題曲，佢唱 live 的水準不俗於全職歌手！

是晚，看得投入，看得開心，good show！

自學吧

上完堂同 3 個師兄去食 TEA，其中一個師兄係詠春同學會的活動攪手，佢話８月１０日有大食會，叫我簽名參加，我遲遲唔肯答允（我從未參與過任何活動，因為他們大多數是攪深圳交流會，我根本唔鐘意大陸亦唔會去大陸，所以冇參加過！），至於今次大食會，我唔答允的原因，是因為今次除左大食會之外，仲係鋤Ｄ大會。。。我唔鐘意賭！！！

此外，７月頭師傅說會教我尋橋，但事隔２星期佢都冇再表態，我狐疑著！後來聽師兄說（唔知佢地講真定講笑），我要同師傅食飯，參與聚會，要識做先可以在學習上再下一乘。。。什麼？要這樣嗎？咁我寧願自學！

和師兄們散了後，我又去了 adidas，之後去旺角，因我要買 2012-13 日本國家隊女裝版！我實在後悔在日本旅行時冇買，因為我搵了起碼十間店舖，都說香港少／冇入 J-league／日本足球／女裝版的貨。。。唉！

行到倦在女人街旁邊的食肆食晚飯，見到呢間焗飯只係廿多元，嘩，咁平？就入去食！我要了卡邦尼焗海鮮飯（$28）＋凍奶茶（+$3）！等左一陣就有得食！

個飯似有睇頭，但食落完全冇味，所謂海鮮只係蝦２只，幼幼的魷魚圈Ｘ２，獅子狗２粒仔。。。連魚柳都冇一舊！杯凍奶茶不過不失啦！食完埋單，我以為係 $31，點知佢話係 $34？？？下，又話如果叫焗飯就可以 +$3 有野飲架咩？？？唉。。。

Pizzaholic

今日去東廣場食 lunch，揀了 pizza！這個３－４人餐（$188）真係好足料，好味又夠飽！

先黎個芝士蒜容包，水準級傑作。個忌廉湯有容有咬口，味道出奇地好，上加一小粒麵包脆，好有睇頭！個夏威夷 pizza，內餡全是肉腸，芝士唔吝嗇，熱辣辣，入味又鬆軟！個螺肉薯容好大兜，整得軟滑唔 heavy，又係好好味！雜菇意粉，帶點黨參味，我以為係藥膳！唯一個雞翼差Ｄ。

文字獄

新修訂的＜商品說明條例＞無疑對市民提供適切的保障，但同時亦對撰稿人／同業造成巨大壓力及「文字獄」的計時炸彈！刑事喎！講真，大家根本唔知邊ｄ字得邊ｄ字唔得，靠估！

 

另外，好多時好多橋好多字都係老闆意思，照做又死唔照做又死，咁點？一ｄ看以為冇事的字，例如“原價：$ｘｘｘ”，原來連“原價”呢兩個字都唔出得？！冇人講，點會知？（我地已經冇用“減價，至抵價”等字眼架啦！．．．）咁你話啦，你又唔係出左一本“禁字／禁語／禁句”字典，又含糊，就算好有經驗的撰稿／記者／文案，真係隨時中招！當然，冇人想干犯刑事，冇人想坐「文字獄」，冇人想因為咁而唱「友誼之光」！事實上，係覺得無所適從！我，亦唔想因為咁而造就壓力原氣彈──爆煲──抑鬱！仲有，我又會諗，寫左野成十幾年，唔通，呢次係個天想我轉行？想我離開呢度？？？

今日，又因為呢條條例，喺做稿砌稿出稿對稿方面，令我快要爆炸！．．．點解我要做埋　AE　的工作？點解我俾ｄ字你地你地唔用？翻來覆去對極都係錯！！！咁我俾ｄ字你地托呀？？？

ｄ字不停改，改完你地又唔用，不停 reivse 又 revise，明明第一稿冇錯的，就在第二稿時出錯。改好了，又到第三稿有第三稿的“新錯”！咁樣，我不停 proofread 又 proofread 十幾次．．．

你地知唔知，你地一路改唔好，我 send 唔到俾老闆！send 唔到俾老闆，又唔知佢幾時會睇會覆！到佢覆左之後，我又要 send 俾萬寧睇，之後又要等佢地覆！如果有野 revise，所有步驟又要由頭黎過！（brief 你地點改，改完又要對，對完再 send 俾老闆，老闆ｏｋ完又再 send 俾萬寧．．．）我覺得自己好似不停因為你地而“輪迴”！．．．打唔夠幾個字，又要跟你地ｄ稿，我唔可以專心做自己野！

情緒被牽動！快瘋了，好想講粗口！

早餐

今天的早餐是這樣的！～

開心事Ｘ３

聽聽下收音機，講起森美星期六個 show，我乍醒，急急打開銀包睇下張飛，點知唔見左。。。我驚平時拎出拎入付款，唔覺意跌左或連埋紙幣找左俾人。。。冇左森美張飛，有個 model agency 員工派人送了４張＜叮噹＞電影的換票証俾我！當時我心諗，唔通我真係無緣睇森美，有緣睇叮噹？（回家後即找找抽屜，因我今早因銀包大爆，逕自把一疊醫生卡拎出來），找著找著，原來森美張飛夾左入去放了在抽屜，失而復得，很開心！

第二樁開心事，就係佢今日見我抽到隻 7-11三眼仔，佢就話用大眼仔同我換！我笑說他用一隻眼換三隻眼？想換我隻三眼仔？胡迪就差唔多！（但我想要巴斯光年，可惜大家都抽唔到）。未幾，佢突然給我遞上胡迪，佢仲話＂俾個動力我抽胡迪個 friend－－巴斯！＂哈哈，明知係個藉口，但我真係好開心！

第三樁開心事，就係講左一年，今日 lunch 終於實現－－就係我地去左打籃球！１２點幾時，我見佢換了一件白 tee，一條黑底藍邊波褲，背上個大背包，我不禁說他＂好得意＂！仲講左好幾次！（因為這樣的他，真係好可愛！）出了一身汗（打了半個鐘，流汗量竟同我在冷氣地方玩３個鐘頭詠春一樣！）打到一點半就去食飯！食半個鐘再番公司！

今日真係好開心！

三文魚薯片

是日 Tea time 有蜜瓜豆奶加三文魚薯片！

花膠湯

他說了幾次想飲花膠湯，我今早煲好就畢了幾壺拎番公司！

今次煲的是花膠鮑魚煲雞，好夠火喉，昨日先將花膠鮑魚拎出來解凍，今早4點起身，先把鮑魚出水煮熟，再加入所有材料，煲了３個鐘，放鹽便完成！之後我又撇晒Ｄ油，又清又入味。這款湯滋補養顏，益氣補胃，好岩大家飲！今次每人一隻大花膠＋鮑魚＋雞肉，大家飲得津津有味，還好有＂屋企 feel＂！

take care，Eason！

連續兩日去睇平戲，所以要早起！今早７點半起身，睇完戲食了個常餐就 home office，之後等到 5:30 就出去 The One，先跟友人在別府 dinner（可能未到晚飯時間，客人不多，縱使沒有訂檯，侍應就安排了落地玻璃＋景觀一流的二人檯俾我地，真好！），然後過紅館去看 Eason 演唱會！（我成個人像沒電的電池，整天都擔心自己精神和體力不支）

看紅館內，全場爆滿，大家都是為他而來！～

演唱會裡，雖然他有點就住就住，但都瞥不了跳跳紮，看得我很肉緊！除了膝蓋做了手小術外，他都病倒了！雖然有好幾首歌都忘記歌詞和甩咀又冇 encore，但不減大家熱情，還繼續落力拍和；當他２次忍不了地咳時，全場唱得更是大聲。我想說，您穿藍色西裝好好睇，好可愛啊！

臣，請您好好 take care，準時食藥，不要您的 fans 擔心！

盲探

今早繼續去睇早場，揀了＜盲探＞！上畫咁耐依然係爆場，我買飛時得番第一行同埋第五行的單丁位，我揀了呢個單丁位！好多人入場看這片或多或少是兩位主角的 fans，但我卻是因為杜琪峰＋韋家輝！整套戲有著＜神探＞，＜孤男寡女＞以及＜大隻佬＞的影子，很杜sir＋韋家輝的戲路和劇情，值得一看！

全港３分之２個音樂盒已俾我買左！

今日終於有時間去睇恐怕就快會落畫的＜地球末日戰＞，由於劇情上無必要睇 3D，所以揀了 2D；3D 個 quota 就留番俾＜怪獸大學＞啦！

我又去 The One 睇早場，$45 坐得又舒服，非常好！睇到 1:30 去隔離香港仔魚蛋粉食左碗牛肚麵＋熱咖啡，食完岩岩好 2:00 就去上堂！

今日玩足３個幾鐘，雖然又係對手瘀晒，但感覺好爽！當師傅捉我同佢黐手時，旁邊立即有好多人圍觀，包括５個鬼佬，可能佢地以為我身為女子，竟敢同師傅對打，肯定好勁。。。其實我只有對住師傅先可以放心豁出去出手打打打，同時我又幻想佢係我超憎嘅人，所以唔會留力（當然我出盡力出盡招數，最後都會輸！），今日我仲抓甩佢副眼鏡添！

上完堂去了 Adidas 之後就去買笑雲音樂盒給姐姐！我知道全港只有３間店舖有售，今日我去云３間，發覺佢地標價不一，分別係 $398，$430 和 $428！而且，呢３間分店都只有最後一個，計埋之前我買了果個，應該說，而家全香港仲有一個笑雲音樂盒未俾人買！（有心人希望你好彩啦！）

羅漢果水與可樂

lunch食苟菜餃麵，落得太多蒜容，雖有豆漿作餐飲，但仍心思思想飲可樂！於是，食完就去了7-11！返回公司，面對帶了番公司的羅漢果水及剛買回來的可樂，飲邊樣好？答案係：可樂！

OT

是日OT到10點... ...倦!

笑雲

今早唔見你，我以為你遲到！到 lunch time 唔見你，我以為你去睇醫生，下午才番工！放工都不見你，你應該今天唔番！

今日係你第一日冇告之我你請假或什麼原因而唔見人（平時你唔知醒／睇醫生才回公司／自己放自己假／通宵排隊買波飛而翌日遲Ｄ番等原因，你都只係告訴我！我彷彿就是你的秘書／代言人，所以其他同事見唔到你，都第一個走黎問我，老闆亦然！－－今非昔比了！）。。。或許，我的眷戀與執著是時候停了！

昨晚看＜好心作怪＞，小姚哥暗自到醫院探望小吉，還送她一個笑雲音樂盒！它是一個象徵，因為日山曾send一張笑雲相給小吉，告訴她如果有不開心就打開來睇；如今日山已身故，當小吉唔開心，覺得孤獨就會望上天，睇下有冇笑雲，彷彿日山就在不遠處，看顧她支持她！。。。我好想有這樣的一個關心我，懂我的人，所以上網找笑雲！幾經辛苦搵到了它的代理，我膽粗粗給他們電郵查詢！等了一陣還未見回覆，我同自己講這次我準要失望了，點知再過了十五分鐘，他們詳細地回覆，還幫我查埋邊間分銷店仲有＂笑雲＂呢個款式！真好，真感謝！

放工後我飛奔去油麻地，那裡只剩下display呢個，我想也不想就買下，縱使它很貴。。。

但願在我的天空裡，都有著這樣的一朵＂笑雲＂，會伴著我，支持我，眷顧我！

計仔

今日 shooting，我由 11:00 企到 7:30，期間仲要兼顧熨晒所有衫褲裙，叫外賣＋俾錢，計時間，幫 model 著衫，整理衫，幫佢防走光，整頭髮，記得所有 rundown＋配飾和鞋兼造型！仲要 send 相俾老闆。。。做場記兼 PA 般，一腳踢又冇人幫。。。好倦！加上昨晚失眠。。。

其實間 studio 喺我屋企隔離街，本來我可以影完相就行番屋企，點知老闆４點 whatsapp 我，叫我完畢後回公司，有事相討！如是者，我又返公司一趟，到 8:30 先走！。。。明天仲有大把野要跟進！煩！

話說星期五我同佢去 sourcing，之後得我一人拎晒所有野回家（今天一早拎返公司）！點知今早佢打俾我問我出左門口未？佢話記得我要拎好多野，所以約我喺地鐵月台等，佢幫我拎！其實我已將所有衫袋成一大袋，星期五我都係自己一個人由尖沙咀拎番屋企，而家拎番公司，說實在，我自己都拎到喎！。。。

番到公司，隔左一陣，老闆召我入房，仲叫我關門！我狐疑，原來佢想炒喺公司織冷衫＋瞓覺果位同事！老闆諗好晒＂分場＂，佢叫我藉口叫那同事買一件細碼衫（上次我地去買，check 過全線分店都冇晒貨），apm 分店冇就去又一城果間，話就話趕住影相用，實情係駛開佢；與此同事，一位外判的電腦人員上來，目的係趁那位同事唔喺度就 backup 晒佢電腦入面Ｄ野。。。嘩，好橋！

但人算不如天算，這計劃進行至半個鐘左右，但見那位同事折返！！！原來 apm 分店已入貨。。。話咁快就買到番黎！。。。當下場面／情景真係。。。超尷尬！（唔知佢知唔知呢個係個局？！）


PS：今日再俾我發現一樣野。。。哼！！！

呢Ｄ叫肉絲，好牽強唧！！！

聽聞大家樂新出了幾款鐵板下午茶餐，今日特別黎試試！

我叫了呢款黑椒鐵板肉絲炒烏冬，＄２５包餐飲！之前食過美心同款的下午茶餐，我估大家樂應該不賴吧！點知，真係火滾！

捧餐時見到鐵板上只有烏冬和幾粒蟹柳，我覺得奇怪？唔通冇晒肉絲所以職員逕自轉了做蟹柳？又或者，呢個鐵板唔係我嘅？在滿心問號的情況下，我忍唔住問下個經理！

 

我：＂呢個就係肉絲炒烏冬？＂

經理：（邊看邊用隻匙羹撩撩下，撩到一條小肉絲就對我說）我地Ｄ肉絲喺底，睇下！Ｄ肉絲唔會係豬扒咁大塊架，只係肉絲黎咋！

 

我捧住呢個鐵板烏冬搵個位坐底，再睇下究竟＂有幾多肉絲喺底＂！

 

點知全個鐵板只有４小條＂肉絲粒＂（如照片左下角）！！！咩話，我知唔會好似豬扒咁大塊，但都唔會係只有＂咁多＂肉絲＂粒＂吧！！！經理個答案，都好牽強唧！

 

味道方面，黑椒味夠，炒得尚算入味，唔太油，但細碟左Ｄ！最激氣係，Ｄ配料少成咁，仲要俾個咁嘅＂回應＂客人，唔該貴餐飲集團可以注意一下！

 

另外，座位方面都有Ｄ意見！當時好多人，有一家大細，有老人家等；我搵到呢個單丁位坐！但呢個位本身好狹窄，椅貼椅，我只有喺後面個窄位側身行入黎！但呢個＂空間＂仲要俾隔離＂飛開左嘅＂牆貼擋住，又尖又吊吊ＦＩＮＧ，如果小朋友或老人家行過可能會整到或刮傷，請呢間分店職員可以處理一下！

 

 

生日願望成真

又到星期六，我又可以上堂！今日其實好多事要處理，例如：早上有人整媒氣，下午姐夫來幫我重新安裝電腦，我要去北角拎番改短的裙，我又要買除隱形眼鏡蛋白藥水，我仲要上堂；所以，今日應該好忙！

一早起來就去麥記食沙律，然後等媒氣人員來，之後就上堂！今日同幾位師兄黐手，我覺得自己有Ｄ進步；我也跟一位師弟切磋，指點一下他的手法，約５點就走人！我先去北角拎裙，再回家睇下部電腦！好開心，姐夫幫我生日願望成真，至少我唔駛花錢買過部 notebook，因為６，７月我用了很多錢，包括幫公司墊支成萬幾蚊的 pretty cash，未 claim 到的 medical！加上去了個旅行，黎緊的 Eason concert＋森美 talk show＋曼城訪港對壘＋換新手提。。。真係出晒血！

折騰

因為保險需要問番過往的病歷，加上要加簽名，所以今日又同舊呀頭食 lunch，還去了我喜愛的＜99 Factory＞！我點了芝士鮮茄扒大菇配鮮果沙律，連餐湯和餐飲係 $55，呢餐又係呀頭請！

約下午４時，我和他又為到星期一的 shooting 去尖沙咀買衫買配飾，如是者我地又奉旨行街！今次買了一千二百蚊左右。。。唉，上次萬幾蚊都未 claim 得到。。。由於今次涉及內衣泳衣類衣服，佢係第一個和我一起 shopping 的男人！（以前的男朋友，一個都冇同過我去行街買衫，　莫說試衫。。。）

逛至６點半，差不多買完，下一站我去北角改衣，佢在銅鑼灣落車，佢話睇下仲有冇岩用的配飾。。。我知佢去 CWB 唔係為左睇配飾，當然我冇說穿！因為我見佢頭先將近散 band 時 whatsapp 了她，應該係約她去 CWB 行街拍拖二人世界。結果，我地頭先所買的大包細包，全部由我一人拎番去，星期一再拎番公司！。。。

手上的重量唔及心入面的傷感重。。。

我去到北角，搵唔番間改衣店，行了幾圈終於搵到一檔，但那人說改不到。。。因為改唔到，所以我要轉 plan B，要去 H&M 買一條用得著的豹紋裙。。。我一個人折騰著，我盡量唔諗唔開心的東西，我怕會影響情緒！。。。但講真，我有唔開心！

熟男有惑

講開劇集，我話熟男有惑飾演細佬的小朋友超得意，但昨晚傾保險冇睇到，你竟然真的開myTV重播俾我睇！

我一路睇一路笑，因你手機擱起在你右端，變相我向你方向望去，當然有瞥見你、偷看你！期間你去開會，我就獨佔你手機睇電視！

保險與過去

約了舊呀頭晚飯，順道買了保險！在這間日式＋西式的 fusion 食肆，眼闊肚窄的我心儀好幾款食物，最後我點了個牛油果雞肉菠菜汁意大利飯，成百元一個，未計加一，這餐當然又係佢請。。。

傾下傾下，講到我的病歷講到抑鬱，原來他的前度也有相同經歷，他明白我，他了解我為什麼會做出自殘自殺等行為。。。我還道出這陣子工作上＋感情上的事，因兩者直接影響，他竟然說回，之前與他一起共事那公司的事。。。原來，他知道我當時喜歡的那位及種種影響我情緒的事。

他跟我談了很久，也提供了一些方法！我們傾至晚上十時許就散了！

我，應該要擴闊生活圈子，社交圈子，識多Ｄ朋友。。。或者，盡量諗一Ｄ旁端方法，來分散自己注意力！

置裝

趁未落狗屎拿拿臨幫我嘅「新小白」置裝，包括：adaptor，傳輸線，軟機殻！出一出去，用左二百元！