食肆加二，三

每逢農曆新年果幾日，食肆都會加二，加三......(尖沙咀世華茶餐廳，埋單時赫見總數吾岩，睇單先知原來平時都要收加一？！...下？！茶仔咋喎！而且d野食已是中上價錢！翠華都吾駛加一啦！好貴) 如果想出去食團年 / 開年 / 春茗飯更要預早一個月 BOOK 位，免得冇檯。

年初二晚出去食開年飯，難 BOOK 位之餘，限時交檯已係 "例行公事"，難得搵到一間，只係加一，而且上菜快，個芝士龍蝦伊麵 ($288) 仲好好食添。(我地今次散嗌冇叫 SET 餐，因為計落頗唔抵，而且媽媽有好多野都唔食得...) 話時話，佢有兩個餐牌，一個係 SET 餐，另一個係 "預先 SET 好" 的 "散嗌" 餐牌，通通 $88，$98，OVER $118 一碟，我諗係專 FOR 大家快 D 揀好，廚房只係專門整呢幾樣，唔駛咁多步驟唔駛整咁耐。

另外，今次冇影食物相，因為呢度上菜快趕交檯，大家拿拿臨快手夾快手食；而且食物都幾細碟......尤其係碟脆燒雞！我地叫左半隻，上菜時見到隻髀仲大隻個其餘的所有肉加埋，難道隻雞本身已唔合比例地成長？？？總共叫左 5 樣野，埋單都要成 $900，嘩如果佢加二真係過千蚊！

有枝有葉的橙

平時見到D橙就咁一個個，好少有椗，有枝有葉則更少見。

六餸賀初一

大年初一，弟弟和弟婦回來拜年。今餐由媽媽操刀，由於傳統說初一不許有湯，所以係六個餸！另外，由於我初一十五食齋，所以我主要食齋菜和豆胚 (豆胚價錢雖比豆苗貴，但就更鮮嫩而且冇咁多根莖，唔會懾牙罅)。蝦，魚和豬手就交收大家拆掂佢！

六個餸分別係：蒸魚，髮菜豬手，茄汁蝦碌，南乳齋，蒸臘腸，瑤柱豆胚。

紅底？咪攪！

買新衫新鞋新底底，年廿八洗邋遢，執野大掃除，剪頭髪，換新睡衣新拖鞋......過年傳統事項，你做了幾多項？

之前 (唔記得邊一年) 真係走去買紅底 (我一向都冇呢個習慣)，年廿八沖完椂柚葉即換上，不過......之後果一年反而仲黑仔仲衰，倒楣到一個點！......經過果一年的經驗，我唔會再 "紅底迎新年"。

迎接丁酉年，我只是做番慣常的 "習慣"，沒有刻意買新衫新鞋；只是沖完椂柚葉之後，換過了床單被舖，換了新拖鞋而已。這對新拖鞋出自皇都戲院入面巷仔的 "英皇"，媽媽總愛來這裡買拖鞋，雖然價錢唔平，款式唔多 (幾近老土不變)，不過著過好多款拖鞋之後，英皇的拖鞋某程度上算好著。因為佢個鞋型似 "人腳型"；內底，面覆等位置都加有軟墊，著落腳好舒服，最重要係鞋底唔跣，出入廁所都唔怕而且保護到對腳。還有，它是 Made in Hong Kong 架！

Mrs Field 有罐罐

Mrs Field 賣曲奇大家都知，原來佢都有罐罐賣。有大中細 SIZE，平至 $8 都有。佢個罐好實用，而且個蓋設計幾好，好 "存氣"！媽媽就貪佢顏色唔錯，大紅色加金蓋栓，用佢黎放 "補給" 全盒用的糖果朱古力最岩。

預備材料

辦年貨 (海味，糕品，送禮禮盒，"樣樣齊")，買生果，買桔仔，買椂柚葉...

年初一食齋，其實年三十就要煮好，因為搭正凌晨 12 點要用齋拜神。於是，年廿九晚就要預備定材料，例如要浸冬菇和發菜，蠔豉要解凍......

油髀上海麵 @ 大快活

下午茶時段，大快活的雞髀麵餐，雞髀可選燒烤或油髀，而麵款可揀米線或上海麵，配少許椰菜和紅蘿蔔，大大碗連飲品 $30。

年年有魚 3D 藝術展

《年年有魚 3D 藝術展》•日本藝術家深堀隆介先生 (Riusuke Fukahori) 展出多件3D立體樹脂金魚藝術作品！

這「3D金魚繪圖互動裝置」容許尾尾魚兒在偌大的幕牆中暢游，也造就小朋友忙著撲東撲西捉魚魚，就像貓咪撲捉鐳射筆之激光紅點那樣。冷不防魚兒游去了，小朋友撲個空，就堵氣的伏在幕牆。魚兒的自在，跟小朋友的萬般無奈，或許你也可以解讀成：其實小朋友正在跟魚魚玩躲貓貓呢。

維園年宵 2016

細個行年宵，乾貨賣的以吹氣玩具和汽球最多，行著行著總會見到  / 忌到 "咦，又飛了一個波上天！" 現在的年宵，乾貨則以毛毛類公仔為多，仲有以政治為題的製品和擺設。不說吹氣玩具，就連風車也鮮見......

連續幾年都是下午時段逛花市，記得前年齋行，上年買了件糖蔥薄餅來食；要數對上一次的 "年宵戰利品"，應該是 2012 年買了一個 "小布龍" (以布料拼製而成的龍公仔"。

人大了逛年宵目的不在要買什麼，只是想湊下熱鬧，感染一下新年氣氛。主要目的，由乾貨玩具變了想行濕貨，睇下年花，燦爛而美麗盛放。今年，乘著不太好的心情，選下午時段逛逛年宵，就在某檔蘭花中，見到一群 "草皮熊仔"，它本是盆栽的擺設，但也作零售，於是挑了一隻帶回家。

麥提莎抹茶

前陣子講開大麥若葉，忽發奇想，吾知道將佢同麥提莎粉溝埋，會點呢？

結果係，佢地變了「麥提莎抹茶」！

味道出奇地夾，誰也不搶誰的味。一個口感兩種味道，雖然混合後的顔色不太好看......有d似青苔...

博多豚骨杯麵

好多人去日本旅行，跟團的怕冇野岩食會帶杯麵去，自遊行的也會到當地買杯麵當宵夜。我去過幾次日本，都未食過當地杯麵，日頭梗係周圍食當地美食，就算宵夜或 "口立濕"，也會食天線蜜瓜，便利店飯團，雪糕或趁黃昏減價時在百貨公司樓下超市買蛋糕。

不過對上一次去東京，見個喼還有少少許位置，就索性買兩個杯麵回港。蕃茄濃湯撈麵已食完，味道濃香而麵質彈牙，大大碗。今晚試埋最後呢個博多豚骨杯麵。價錢約 $7 港元。

博多拉麵都幾出名，唔知杯麵又點呢？

拉開封蓋已見滿滿一杯，豚骨湯料另外獨立一包，加水等三分鐘就食得！麵質豐厚彈牙，有咬口。豚骨湯底好濃，食落仲有香香的薑味。

鬆弛熊扭扭薯

今年新年麥記出鬆弛熊，不過造型有 D 似之前 7-11 果款，唔太吸引。反觀佢重出扭扭薯，忍唔住要食。

失望...原來你地有 "分別心"！

舊公司後街開左間素食店，地方闊落，食物款式夠多夠破格，同平時的素食店 / 齋舖更新穎美味。之前 <東限西望> 也介紹過，尤其下午茶時段夠平，凍飲唔駛加錢，仲免費加大，抵！

素腸仔炒蛋雪菜酸辣湯麵 (可選淮山麵)+凍飲  $25

上網睇這素食店的背景，它的開舖動機好有心好有緣，而我也 WALK IN 食過幾次，覺得味道不錯，款式眾多。於是我就 FOLLOW 了這素食店的 FACEBOOK PAGE，還睇晒佢自開業以來的所有 TIMELINE 和留言，因而得知佢地逢星期三，四有個善心活動，就係俾大家出錢贊助老人家食野，它有 2 種方式可揀，豐儉由人-----星期三 (下午3至5點，贊助 $2900，可請 60 位老人家食野)；星期四 (下午3至5點，贊助 $500，可請 20 位老人家食野)。

就在前陣子，我又 WALK IN 去這素食店，食野之餘仲想請老人家食野做善事。(雖則我失業至今已屆 9 個月，期間上網賣一些精品玩具及一些從日本買來的護膚品，剛好賺了 $1000！我一心只想用這 $1000 來請老人家食野，於是打算請 2 次的 "星期四贊助"：一次是以我新開的 FACEBOOK 專頁為名贊助，另一次是以我媽媽名義贊助。) 但，不快的事由此發生......

我 WALK IN 上去素食店，先問收銀處的店員A...
我：你好呀，我想問下係咪可以出錢請老人家食野？
店A：(面帶笑容) 係呀，我地個個禮拜都有架，$2900就可以請老人家食......BLABLABLA....
(待店員A一輪咀講完，我就尷尬問道)
我：ER...唔好意思，你地係咪有一種係 $500 架？
店員A聞言即黑面，態度180度轉變兼語氣倔倔：... ...好似有！...
(隨即，店員A即問同樣坐在收銀處的店員B)
店B：(由始而終都冇望著我回話) 好似有呀！不過我地話唔到事架，要問老闆！你係咪想贊助呀？留電話啦！
 (語畢，我們三人突然 DEAD AIR......我心諗，言下之意即係星期三你地就話到事，星期四就唔知兼夾話唔到事。仲有，如果我唔問，你地根本唔會講出有 "星期四 $500" 這種贊助！)

我見店員A和B咁嘅態度和面口，於是留低電話就搭 LIFT 落樓下離開......

剛到達樓下，佢地老闆就打俾我，問我係咪贊助 $500 果種，我話係！老闆又說我可以揀日子，贊助人會出咩名 (因為佢地收銀處後有一塊黑板，如有人贊助那天就會 "上板"，列有贊助人的名稱，還會於贊助 "當日" 拍照 PO 上佢地 FB)，仲叫我得閒可以再 WALK IN 付款。我回答他我就在佢地樓下，可以折返處理所有程序。

收線後我再上去那素食店，寫好了 2 個日子，寫好了 2 個贊助人的名字，付款後就離開了，一心等著接連的 2 個星期四，一心等著 "上板"......

如是者，"法定的" 星期四到了...等左一日仲未見個 POST，我再等！等左 6 日都冇喎......咁究竟有冇請老人家食野？不是 "警訊事件" 吧？！...嗯，可能佢地忙唧，可能佢地唔記得唧...我不斷幫佢地搵藉口......正正因為我睇晒佢地開業以來的 FB POST，明明之前有人贊助，佢地都即日影相 +上板+ POST 文...點解我冇呢？係咪我只贊助 $500 而唔係 $2900 所以大細超呢？我更唔想怪錯好人...但是越諗越唔對路，於是我再次 WALK IN，就如 "SPY 食客" 咁自己求證。(唔係話想貪咩功名，正如編劇那樣，總想在劇集做完出 ROLLER 時看到自己個名一樣。更何況，其實我挺拮据也想做這善事，我實在唔想連呢 D 都俾人呃囉！)

終於，8天後（星期五）佢地先 post 出來！仲要係佢地居然連同星期四的另一贊助人一同出 POST（亦即，我之後的那位，翌日就「上板」兼post 了），照片仲要係有 "先後次序"，攪到我個專頁 (第一個星期四所用的 "贊助人" 名稱) 好似拉人衫尾咁......其實，開多個 POST 唔係好麻煩唧！...點解要 "搭單" 呢？你地之前次次贊助都係自己獨立一個 POST 架喎...???!!!

再隔了一星期，今次的 "星期四" 輪到我媽媽名義贊助了！....我沒抱多大信心和期望！好景不常，佢地又冇 PO 出這次的贊助......攪咩呀，一次係咁兩次都係咁！！！翌日，星期五，我再次 "SPY 食客" 咁自己上去求證。

每次 WALK IN 我都有幫襯，付款後就逕自影低收銀處後面的黑板---板上的善心贊助紀錄！......儘管你地開這素食店的動機和出心係咩，食物有幾好食，有幾多款式都好，你地咁樣，以佛門角度說係有 "分別心" 囉，仲撩起了客人 / 有心贊助人的瞋心和喜惡情緒......我對你地已好失望！

三聯呀三聯，究竟幾多折唧？？？

唔知大家有冇類似經驗，就係拎住張 COUPON，睇埋佢背面的 "使用條款" ，真係搲爆頭，列明咁多野咁究竟即係買咩先可以有折頭？個折頭又係幾多唧？

好似我呢張三聯書店的 COUPON，正面寫上有 9-95 折購物優惠，咁即係幾多折唧？9折？91折？92折？93折？94折？95折？...呢度有成 6 個可能，真係要去到 CASHIER 前先知我可以有幾多折？？？......咁樣，疑似抵觸商品說明條例喎！

睇埋背面仲勞氣，佢話 "不適用於" 購買影音光碟，電腦軟件，公價品，特價品，黃色標籤貨品，圖書禮券，儲值卡，工作坊，活動報名費，特約商戶貨品，CAFE餐飲項目，繳交塑膠購物袋環保徵費。選購以上一大抽野都唔用得，咁係咪即係買書，工具書，課本，小說，參考書先用得？如果係，咁點解唔清清楚楚寫 "只限購買書籍" 方可享有優惠？

咁你又話 "公價品，特價品，黃色標籤貨品" 都唔用得，你 D 書的價錢牌已經唔係標明正價，特價，公價，標準價架啦...(有時仲要係貼住人地書店 / 書局的 LABEL 添喎)，咁混亂，客人又點知果本書係 "咩價" 唧......

一大爛餐的 "規條" 先可以享用你 "唔知 9 咩折" 的優惠......嘥氣！！！

淨薈 @ 香港大會堂

《佛說觀無量壽經》裡面描述到西方極樂世界，自年多前起，每晚入睡前我總會觀想一遍：水變成冰、冰變成琉璃地、琉璃地充滿五彩繽紛的光，因其下有一金色八角柱(上有八種不同寶石鑲著)頂著、那裡所有的建築物都以金造成、還有兩棵琉璃寶樹……「七寶池內，勝蓮花中，花開見佛，見諸菩薩，聞妙法音，獲無生忍。」

機緣下得知大會堂有個畫展「淨薈美術展覽．2017 — 不思議界」，由香港著名藝術家吳炫樺透過視覺藝術把西方淨土世界活現眼前，當中更包括《佛說觀無量壽佛經》的前九觀，是次畫展更以多媒體動畫形式展現部分作品。看著看著，跟我觀想的模樣相近，臨離開時更獲贈了本畫冊，還要是硬皮裱裝，很珍貴。

大麥若葉

執野時赫見 2013 年在東京買的一盒大麥若葉，見還未過期，一於將佢開封！

大大盒，日本原裝正貨，一盒有 44 小包，每包獨立包裝。先畢 2 茶匙煉奶，再倒入一小包大麥若葉，加水攪勻就飲得。一杯滿滿粉綠色的 (飲了幾啖才記得拍照)，味道極像星巴克的鮮奶抹茶。

已忘了 EXACTLY 價錢 ，只記得好平，平過香港。平均大約 $2 港幣一杯足料夠味又夠滑的鮮奶抹茶，係咪抵先！仲送左包脂流茶添！

唔搵唔知咁難搵！

賀年語句，潮語，卡通，祝福語......等等的利是封都有，唯獨是搵唔到 "開工大吉" 的利是封！......聽媽媽這樣說，不是嘛？！"開工大吉" 好普通好平常咋喎，咁都冇？

日前媽媽已走訪 AEON，永安，文具店，精品店，搵來搵去都冇一款上面印有 "開工大吉" 四字的利是封。今天會去灣仔，順便到喜帖街望望。

有一間名為 "百家姓" 的利是封地舖，甫進去見各式的各色的，正經的玩野的利是封；望望下，咦，真係唔覺有 "開工大吉" 喎！問過店員，她說 "開工大吉" 只有一個款式 (不像其他語句般，既多款，又多色揀)，賣淨兩盒：一細 ($80 / 50 個) 一大 ($95 / 50 個)。我要了盒細的，付款後便行落銅鑼灣方向搭巴士。期間在時代廣場轉入利園山道見有兩間利是封舖頭，八卦入去望望，佢地都冇 "開工大吉" 款！好彩之前買定唧。

回家把利是封遞給媽媽，她一見即說好靚，然後問幾多錢？我說 $80，她即嘩了一聲......其實，我也覺得有點貴。

搵工難，搵 "開工大吉" 都咁難，真係唔搵唔知咁難搵！有了是次經驗，原來坊間真係極少  "開工大吉" 款的利是封架！

蠔仔肉碎湯飯 @ 旺角喜運

一般茶仔好少有湯飯，仲要係蠔仔肉碎湯飯。DINNER TIME 因為行左好耐，途經呢間見有卡位就入去。

見餐牌來來去去都係果 D，而且都要 6 字頭起標......赫見有呢個蠔仔肉碎湯飯，只係 $45？？？晚市呢個價錢，其實算平了。 好，就要呢個！

一上檯嚇了一跳！不是嘛，呢個唔係碗，係一窩黎架喎！味道方面都要讚。湯底好入味，肉碎和蠔仔都超多，加埋蔥和芫茜吊味，D 蠔仔仲要係粒粒脤卜卜，鮮甜得黎唔腥又冇沙。太大碗，我最後食唔晒... ...

薰衣草枕頭

話說 11 月中先喺 AEON 買左個日本西川枕頭 (網文可看回https://www.blogger.com/blogger.g?blogID=990555350945751550#editor/target=post;postID=494361472746844092;onPublishedMenu=allposts;onClosedMenu=allposts;postNum=22;src=postname)，忍受了個半月，終於頂唔順要換過一個......

一直心儀薰衣草枕頭，上網睇過有幾個牌子有出：Casablanca (減價後 $119)，雅蘭 ($159)，Cottex (減價後 $199)，Soho Novo (減價後 $109)。見實惠有齊晒呢 4 個牌子，就去實惠睇下實物再決定。

去到見 Casablanca 做緊攤位，就睇佢先！問過店員佢係薰衣草乾花，還是精油？她就索性打開俾我睇睇。原來成個枕頭有一拉鍊位 (像女士手袋裡的 "暗格" 般)，放薰衣草乾花。店員說如果瞓左一排冇味，就可以換過一包乾花入去。我一聽見是 "乾花" 就行開了，因為聞說當潮濕天氣，D 乾花會長出蟲......好多 FORUM 都有人分享過這經歷。

之後睇埋其他牌子。

Soho Novo：一打開就勁香薰衣草味，不過個枕頭本身質地好硬......

Cottex：成個枕頭係粉紫色的，質地係軟珊瑚絨，摸上手好軟熟。薰衣草味不太濃，要好近大力嗅先聞到。

至於雅蘭，佢只有喬麥那款，薰衣草售罄。

論枕頭本身，雅蘭係最脹最軟彈，可惜沒有我心儀的薰衣草......冇計，最後我買了 Cottex，瞓左一晚覺得不俗。

團年飯 @ 深水埗利星

配合各人的 SCHEDULE，今年例牌提早食團年飯，地點係深水埗的利星！原來它的老闆之一，係前兒童節目主持羅貫峰哥哥，唔怪之得門口咁多藝人合照啦！

一早訂左檯，所以去到就可入座。睇過 OPENRICE，知道有咩 "必試" 菜式，由於父母都是長期病患者，篩選一輪之後就決定 6 款大家岩食的菜式。當中，賣相一流，一上檯已嘩嘩聲，咁相機食先就梗架啦！整體黎講全部菜式都唔太油膩，又冇好重的味精味，鑊氣好夠，火喉十足又足料！

6 個菜分別係：杏汁燉豬肺湯，冰梅欖角骨，粟米斑塊，海皇一品菜 (豆苗)，星星海膽炒飯，千葉乾坤豆腐。甜品有桂花糕同埋炸蕃薯芋容。

• 杏汁燉豬肺湯：成盅上，超級足料，D湯渣畢極都有！白色的湯清潤得黎好入味，充滿好香的杏仁味，唔羶。
• 冰梅欖角骨：甜甜地又唔酸，啖啖肉又少骨。平時鍾意食咕嚕骨或甜酸骨的人士，可以試下呢個。
• 粟米斑塊：個獻打得幾好，斑塊好鮮，炸漿唔會太厚。
• 海皇一品菜 (豆苗)：賣相一流！仲有蟹籽添！海皇羹配鮮豆苗，鮮嫩滑溜，味道好夾。
• 星星海膽炒飯：賣相一流！似欖角菜粒炒飯，加海膽。飯粒乾濕度適中，炒得好靚。味道有D似糯米飯但又冇咁油膩，而且仲好大碟，7 個人每人畢了兩碗，都仲可以打包成兩個外賣飯盒，勁！
• 千葉乾坤豆腐：賣相一流！豆腐輕軟夠滑，個獻唔厚唔味精。上有瓜粒肉粒和蟹籽，送飯一流。
• 桂花糕：唔太甜，食得出桂花清香。
• 炸蕃薯芋容：超好味，夠驚喜！皮脆內軟唔在講，兩款餡料黃紫雙輝又夠多，梗係要趁熱食。

團購直髮梳

之前說姐姐聖誕派對抽到個 PHILLIP 負離子直髮梳，轉贈給我之後，原來佢一早在團購買左一把直髮梳 ($299)，星期六幫佢去皇室堡取貨，唔知呢把又得唔得呢？

麥提莎沖劑

在團購見過，但自取地點好旮旯...擱置！某天在灣仔的優品 360 見到，有麥提莎味 (膠樽裝)，及白麥提莎味 (袋裝，像補充裝那樣)，於是買了一樽原味 ($22) 試試。

買佢除左想試下麥提莎飲品似唔似圓粒的麥提莎，抑或似阿華田美祿之外，個膠樽可以用黎當筆插；同埋，貪佢即畢沖水就飲得，唔駛加糖加奶咁麻煩。

今晚終於開齋，照樽上提議，先畢 3 茶匙入杯，再加熱水攪勻就飲得！味道挺像圓粒麥提莎，佢又唔太甜，媽媽試了一小匙之後，即急不及待拿杯子又沖一杯嘆！唔，下次試埋佢個白麥提莎味先！

Phillip easyshine 負離子造型髮梳

這個 Phillip easyshine 負離子造型髮梳，好耐之前甫推出時，心思思有想過買一把，不過嫌它定價太貴 ($298)；最近團購有，但都要接近 $200......未幾便擱置了。

前兩天講開，姐姐說佢公司聖誕抽獎抽到了這梳，仲諗住睇下有冇人要！咦，咁岩嘅？

產品資料參考：http://www.philips.com.hk/c-p/HP4596_00/easyshine

蘋果藝術

不是說手機，我講的是生果果 D 蘋果！果皮雕上竹，福，平安等字樣及圖案，成了 "蘋果藝術"。臨近新年，既生活化又有祝願意味，有 D 唔捨得食落肚。

三角蛋白蛋糕

屋村小店有時都有亮點！呢件三角形的蛋白蛋糕，鬆軟綿滑，又大又厚，只係 $6。

車仔麵食出大三元！

偶爾行過見到 (由於它位處在內街，在花牌花圏店轉入，平時鮮會行進)，今天心血來潮想食車仔麵，於是特地去試下。

大三元，一個以 "麻雀叫糊" 做店名，裡面裝潢亦有麻雀 (唔知齊唔齊 144 隻)，甚至用燈管拗成 "一索"，就如兒童玩具那種，當你手拿一支電極棒，沿著 "雀形" 去繞，當電極棒碰到 "雀形" 便會亮燈兼發聲...

我點了三餸麵：油麵 + 豬骨濃湯底，配辣汁豬皮，牛筋，沙律丸。麵的份量算少，女仔食尚可。豬骨湯夠味，豬皮和牛筋醃得好入味，混了在整碗麵的湯底，彷彿變了 "小辣" 咁。豬皮好腍 (有一片有少許沙)，牛筋略嫌碎濕濕，不過都好彈牙易咬開。沙律丸是橙色粒狀，外皮像炸魚蛋，裡面則是千島醬 + 少許 WASABI 混成的內餡，幾得意特別。

餐飲杯奶茶卻是驚喜！唔止水滾茶靚，茶膽唔錯 (濃滑而唔苦澀)，只是落一包糖 (平時我總是落 2 包糖的) 已令杯奶茶好出。令我今日 "食之 QUOTA" 加分！

*後話：當時只有一位客人(差不多食完)，我入去就座見檯面乜都冇，就問店員拎餐紙點餐。樓面冇人，我要走到入佢地廚房先見到 2 名員工...剔選好想要的麵款和菜料後又再拎住張餐紙走入番去搵店員落柯打...等左一陣碗車仔麵來了，可是餐飲竟漏單??!!...又再搵店員提醒仲有杯野飲未黎...唉，員工要打醒十二分精神嘛，要留意店面情況和客人需要嘛！雖然係 2:30 唧，但都唔可以擺個 "空城計" 咁，客人入到黎得 D 吉嘅檯檯櫈櫈，又冇人招呼一下，分分鐘入左黎即刻掉頭走架！...冇客已係咁，難以想像 lunch time 時段......

***佢地營業時間係 11:30 至 17:30，星期六日公假休息。另外，下午 2 點後去食免費送野飲一杯！

菩提樹 @ 荔枝角公園

「菩提本無樹」突然忽發奇想，到底現實中有沒有菩提樹呢？上網找尋下得知真有其樹，而且香港都有！當下心情難免雀躍，急不及待翌日就去荔枝角公園，看看真的菩提樹。

由於公園太大而且我沒有樹的確實位置，只憑著它尖長尾的葉子做「憑證」，像玩躲貓貓般邊行邊找；走了一會終於皇天不負有心人，率先見到這尖長尾葉子！在菩提樹下逗留了會，顯然我未夠慧根在它下得道；拜別時，我不禁把地上的幾片落葉帶回家，當中一片竟有點像個葫蘆呢。

精油金盞花膏 @ HKID Gallery

忘記了在那裡見到，本地自家製店子 "森林之家 Naturalland" 有 2 種產品都吸引我，分別係：助眠的噴劑以及金盞花膏 $48。經過見到有 HKID 檔攤，入去睇下先。

架子上有好多係本地自家製的護膚 / 香薰品牌，終於見到那支助眠噴劑 tester，遂叫店員拿支新的給我，還有成份全更然的金盞花膏 (睇下對我的蕁麻疹有冇效，如果有效就唔駛特登去日本買那支曼秀雷敦出的，專 for 蕁麻疹的藥膏了 )。

店員先拎了支新的金盞花膏俾我，然後來來回回找了一會，對我說：＂我而家搵唔到支噴劑呀！＂見她那無助模樣，算了，就只要支膏吧。

真心推介！超群阿華田糕品，超好食！

唔知限定到幾時，可能隨時 SHARP CUT......超群呢期推出的阿華田糕品，真係好好食，真心推介！

走入店舖已有幾名剛放學的學生來買阿華田珍珠撻，心諗這新產品味道應該不賴吧。至少，佢地唔係去地鐵站入面間 Pie & Tart 買奶撻。等左一陣到我了，我要了阿華田大福，阿華田珍珠撻，阿華田黃金蛋糕。(佢地仲有圓形的阿華田芝士蛋糕，$30 一個)

回家即急不及待與父母分享。味道方面，整體來說全部都唔太甜，阿華田味又出到，三高的爸爸和糖尿的媽媽都食到。

- 阿華田大福：$8 一個，大大粒，裡面的餡係阿華田製成的吉士，塞滿成個大福 8 成以上，唔會好似出面的糯米茲或茶果咁，D 餡得個壹蚊銀咁上下多。外皮厚薄適中，煙韌得黎唔黐牙。上面仲有可可粉全面覆蓋。
- 阿華田珍珠撻：$9 一個，本身超群的蛋撻已具水準，呢款阿華田製成的蛋漿，好夠滑。食到咁上下，仲有珍珠奶茶果 D 珍珠添，有綽頭！
- 阿華田黃金蛋糕：$25 一個，可幫你切開包走。沒有過嗆的牛油味和阿華田味，唔太甜唔太膩，好軟熟好滑，當茶點一流。

***原來淘大商場間超群叫 "芳叔"！話說我去到搵來搵去，行左兩個圈都搵唔到超群...於是按舖子號碼搵，原來就係 "芳叔"！話時話，超群幾時有間姊妹店叫芳叔？超群...不是李曾超群嗎？有個芳字咩？芳叔，又同超群有咩關係呢？？？...