聚

懷念英國之旅的 Pret A Manger 熱湯，仲有 Borough Market（西班牙海鮮炒飯＋芝士＋足料魚湯）！

好友共聚，訴說工作上的不快，談過旅行！第一次去以 Snoopy & friends 的主題 cafe，估唔到它的榛子咖啡挺不錯，香濃的榛子味早已與咖啡混為一體，味道有點像白咖啡！上面那層泡沫，厚厚的，細滑綿密，伴以＂Lucy＂模樣，很別緻！除了咖啡，這裡的香草雞翼也不錯，很入味，旁端還有一小球薯蓉（上面灑有煙肉碎），唯獨是油多Ｄ！～

期待東歐之旅及謝謝妳的陶笛及 line bear！

今日戰績

今日戰績.......

nice

現在答你下午的問題，我很開心！（今日）

多謝你的橙！

忌廉溝芬達，是我教你飲的！

第二次哭

今日又 OT 到 10 點幾，總共收發／處理四十幾個電郵！約 5:30 後全部野一次過堆埋黎，樣樣都話急，仲要臨放工時間先講！

我同步處理６，７樣野，整整下，澳洲果邊又話有野改，又話急，個 product manager 仲拋左個波叫我自己同佢地果邊廣告公司 deal！Deal 咩，成個星期唔講，而家先話 d file 開唔到，仲叫我一個鐘頭內攪掂要趕出街！

樣樣都變相 urgent，我唔可以靜心地整Ｄ字，得我一個人整。。。四圍係咁俾老闆催，佢明明叫我先整 leaflet d字，話最急！可是５分鐘後出黎催我第二樣野！明明佢 brief 錯，又好似攪到我整錯咁！情急之下我哭了，今次係我第２次喺呢間公司喊！。。。又因為咁，我對佢發脾氣，攪到佢都走唔到。。。我知佢係唔忍心走先，但佢口裡卻說係另外２位同事手腳慢（雖然都係其中之一個原因）導致大家冇得走！。。。

根據以往經驗，如果我在那間公司開始有哭的跡象，我就開始會離開那公司！係情緒影響？係抑鬱導致？係私人理由？係因為你？。。。太多原因了！我係咪真係要離開呢？

*題外話，今日有個舊同事打黎，問我有冇興趣轉工？計埋佢，今次係呢個月內第３個問我有冇興趣轉工的電話！由於我趕緊工，唔方便／唔想在電話講，於是在 whatsapp 問他係咩公司和地點！他回覆說，又係美容公司。。。唉，一個地獄去另一個地獄，最後我都冇回電佢！

睏

右手手背的瘀散得七七八八，可是手肘痛得像風濕，而且扭痛仍在！另外，我發現手指尾對落位置的手掌側骨腫了起來，就像之前抑鬱病發，自殘以手大力打鋁窗邊及牆那種痛。。。原來，詠春碰撞捱打也是另一種自殘。。。至於兩隻前臂的瘀，則仍然在仍然痛。手臂肌肉也痛。。。嗯，睇黎今次黐手黐得都幾甘！

本來他說放工後去我家對面的球場打波，我說如果我父母知道，他們準會看閉路電視，用望遠鏡看我們，之後又會問長問短，或自說自話，加鹽加醋自圓，挺煩人！之後一直無恙，放工時我們一起離開公司，坐電梯下樓，之後你就說往另邊走。。。即是，不打波了嗎？（雖然我都無意打，因昨晚通宵睇巴塞，加埋整個月的失眠，我整個人好睏！）點解唔說清楚呢？

算了吧，不要再跟自己過唔去！放生自己吧，不要想不要問，不要為你想藉口，不要猜你的突然轉軚原因，不要祈求什麼。。。

無題

自從上次（８月６日，亦即是我確定佢老婆有左那日）同師傅黐手超過半個鐘，大戰至十點半後，我彷彿＂出了名＂！今日番到拳館，好幾位師兄見到我都排隊要同我切磋！一路黐手佢地一路說：＂妳，剩係星期六黎咋？＂／＂我認得妳，上次打贏師傅果個嘛！＂／＂嘩，真係好快！＂／＂原來同妳黐都會出汗架喎！＂（即係話，佢地本來睇少我，以為同我黐手只係玩玩下，根本唔駛出汗出力！）／＂嘩，妳又 KO 一個啦？！＂；有３個師兄因費力和出汗太勁，令佢地率先說暫停／抖抖！

我咁講唔係想認叻或者什麼，因為我好清楚自己實力，我資歷唔深，論功夫和力度真係如幼稚園學生！又因為我唔夠力又係女仔，所以我先至要快手快腳出招；同埋，我對手比一般女仔長，所以更要好好利用，以速度對抗力度！約 4:30，大家已散水，留下一位剛到步不久的師姐，加上師傅叫到，我地唯有切磋一下，玩到５點我就換衫走人！今日嘅戰績，就係：右手手背瘀晒，兩隻前臂又係瘀晒，右手手肘有點扭痛！

離開拳館之後就去了 Adidas Flagship 打個圈！我問了 sales 十月七日個 party 仲有冇飛，佢話冇晒之後，就離開了！記得初時知道 Adidas+Eason 於十月七日有個 party 之後，我有諗過購物換飛，不過，當我諗到換左飛又點，好難搵人同我去，舉行日期仲要係星期一添！。。。佢曾經話過，如果我真係想購物換飛，可以預佢一對鞋！講真，今時今日 adidas 的東西幾貴價，買２對鞋基本上已夠換飛了，可是。。。雖則我係 Adidas 和 Eason 的 fans，都唔想特登為買而買囉！。。。掙扎了一會，今日總算了結左呢個點子，因為尖咀旗艦店只分配 40 個 quota，而朗豪坊店則分配了 48 個 quota，佢地都係喺消息公佈之後２天，所有飛已被換購了！

因為腰骨有點痛所以唔打算流連，打消了去租＜怪獸公司＞的念頭便坐地鐵回家！回到家，見到佢地打緊牌。。。

我當然變成黑面！沖個涼換了衣服就睇佢借左俾我３星期而又冇時間睇嘅＜天生愛情狂＞，睇完就落街買野食！好耐都冇食過三文魚啦，於是我去了百佳買減價壽司， $39.8 有 12 件，最重要係有花之戀喎！抵！

我躡手躡腳回家開餐，撞正佢地＂執位＂！我將壽司拎入廚房食時，老豆一個唔客氣走入黎，逕自夾了我兩舊三文魚走！。。。唔係我小器，因為你地打成日牌，又買晒麵包西餅，叫晒外賣又煲左鹹湯丸黎＂招呼＂麻雀腳 only，有冇煮飯不嬲都唔通知聲，打牌大過天，對雀友仲好過自己仔女，一打牌你地就變左另外一個人，樣貌咀臉極其猙獰！而家我去買野食番黎，你問都唔問，老奉咁夾左去！（仲要係我想食嘅三文魚）。。。真係好尊重同好有禮貌囉！

健康週

今日他睇完醫生先番黎，lunch 後未幾佢就番，佢仲買左杯五青汁俾我！呢幾日 lunch 我都係食沙律，加埋呢杯果汁，今週好像健康週！

牙骹痛

今日如常 lunch basketball，有一下我站在籃底，當個波擦板跌下時，剛好撞落我個咀度（上唇和門牙即時受到一下撞擊），有點痛！我沒有理會如常打波，誰不知過了一會，我想張口說話時，突然覺得個牙骹有點痛！個口又開唔到！。。。

以前我試過甩牙骹，那是我大約十三歲左右的事！一直以來，我張合口都要小心，因為牙骹位好易移甩；所以每當我開口說話／笑時，牙骹總要先往左邊少少移過，先可以張開口！。。。又小心又辛苦！今日受撞擊導致牙骹痛，而且張口／食菜葉等簡單動作都要小心奕奕＋ slow motion，而且個口只可以開到少少。。。我檯頭的一瓶花生，百力滋也不能食。。。牙骹一事佢知道後問我為什麼撞親時唔出聲？我說我認真地打波，打完後才雪雪叫痛！

放工他和我一起坐地鐵，期間她致電他，我聽到他回應說叫她在出口等。。。兩口子 dinner，多溫馨！臨別，他說豈不是今晚我只能食粥？我說我想食三文魚！他聽到後喜孜孜說：＂咁去太古啦！＂（我知道佢地會在那兒食飯！我又回想起上次同佢去吉之島超市，他買他倆的晚餐：牛扒＋鮮奶＋椰子花膠湯。。。而我就買唔到我想買的刺身。。。）所以，我拒絕了！我唔想跟他一起坐至太古站，見到她在接他；唔想見到他們開開心心去食飯。。。我唔想自己唔開心！我寧願回家，沖個涼，home office！。。。

沙律

昨晚食麥記的雞扒沙律，今日下午繼續我地嘅 lunch basketball，然後食了個凱撒沙律！連續２餐都係沙律，多菜少肉，健康Ｄ！

英超開鑼

昨天佢突然問我屋企有冇 wifi？ 原來英超開鑼，佢想幫我裝 ”now app”---英超台，之後因為要輸入”裝置名稱”佢唔知 enter d 乜，所以整唔到！。。。佢遞番個電話俾我之後，我八卦之下，求其輸入我個名就 load 到啦！我仲遞番俾佢睇，佢有d莫名其妙，佢輸入佢個 psd，我就可以用佢個 acc 睇波！

很多謝你特意咁做，因為你知我想睇英超！而家，我就可以用手機登入就睇到。。。不過，當我知道唔鐘意足球，當初唔贊成你裝 now，唔贊成你裝有線嘅佢，都有陪你安坐家中凌晨睇波，我就渺小得唔知似Ｄ咩。。。

願我可以放低你！

shiseido 卸妝棉

姐姐同事托她在日本之旅買 shiseido 卸妝棉，日遊期間我與姐姐一起到＂藥妝＂找找看！見是盒裝，正在減價！嘩，只售 $17 港幣一盒，有 108 片，仲係 made in Japan ？！咁抵，真係咁好用？

聽姐姐說，她的同事話夠大塊，最緊要夠厚，而且質地很好，就算沾上卸妝水又或是卸了一兩下，Ｄ棉都唔會化開一絲絲！基於好奇＋平，我就買了一盒！

手上呢一盒已開始用緊，發覺真係幾好！厚而絲滑，就算正、反兩面都用埋，佢唔會化開爛開！我用過的卸妝棉牌子不多，只求購買方便就算，所以只用過 select 牌，和萬寧牌。論價錢和質量，shiseido 的確唔錯，大家（各位 sis）如果有朋友去開日本，記得叫佢入貨！

復出，再戰一萬米！

自從上次手提跌落馬桶壞了，轉了 iphone5 之後，再加上連日來落雨又打風，成個７月都冇跑過步，縱使一星期打了４日 lunch basketball，一星期玩了３個鐘詠春，那種出汗的爽和減壓心情仍有不足！

今日，終於都有機會再戰一萬米了！

我在網上終於找到一個適合 ihpone5，又岩我手臂圍的 arm bag，只係 $38！星期四寄到黎，今日我就同佢一齊＂落場＂！呢個 arm bag 唔止岩我手臂，又有個小隔位用黎裝鎖匙，下面仲有個窿位 for headphone 線，真好真合用！

激戰

訂左飛今早去 The One 睇＜激戰＞早場，10:45 落樓去到剛剛好 11:15 拎了飛之後就入得場！講真我係因為張家輝而咁快去睇套戲，不過睇睇下，我覺得彭于晏演得唔錯！成套戲有笑位有肉緊位，當拳賽時真係睇到人咬牙切齒，亦膽戰心驚。。。我隔離位個女仔，一路嗌一路掩眼一路睇。。。

睇完過隔離香港仔魚蛋粉食左碗牛筋瀨＋熱央就去上堂！

除左同幾個勁人師兄黐過手之外，今日係德國人師兄最後一日留港，所以都有同佢黐手，之後大家仲影相添！玩到 5 點幾，本來幾位師兄叫我一齊食 tea，可是我想去旺角買野，所以就推了！行街行到８點就回家，成個人都好倦，尤其係左腳，可能拗親，有Ｄ痛！

菠蘿啤

未計早餐和 lunch，今日食左飲左好多野：蜜瓜豆奶，M&M cripsy，星巴克彩虹椰絲小蛋糕！

Lunch 去左叫餸食飯，餐飲居然有菠蘿啤，我心思思想試，但又怕佢酒精高，冇理由面紅紅又 wing wing 地番公司。。。不過結果我都叫了！（預先叫一位同事幫我＂包底＂！）

試飲了一啖，覺得好似 fruit punch，又似有汽的菠蘿汁，幾好飲！而且佢酒精濃度只有 0.6-1%，唔錯！可能初頭飲得急，有Ｄ wing，但好快就適應了，連唔飲得的我都冇醉。

尾指受傷

昨晚仍然失眠，早上４點幾先瞓得入眼，發了個夢，夢中又係見到＂她＂。。。夢入面我地係同事，到７點都唔見佢走，原來佢叫左小演員上來，所有同事都擁著她，我依然是冇人理冇人睬果個！夢中佢又 show 領養的小朋友張相俾大家睇，我忖度乜佢唔係有左嗎？。。。紮醒已是七點半，要起身！

８號風球翌日番工，仍然 OT，仲要成十點先放工！連日來失眠，精神透支，強撐著，好辛苦！加上星期二練詠春，被對方剷損我左邊上唇，紅腫了一點！另外，又拉傷右手手指尾，握唔到拳頭，手掌右邊冇力，尾指又冇又冇力，拿筷子夾菜都吃力！。。。佢整天問我點樣整親？我冇答到，佢就成日係咁估！佢以為星期一我地 lunch 打籃球整親冇出聲，又問我係咪昨天煮飯洗衫做家務時弄傷？。。。最後，晚上佢再問我，我說：＂講左你一定會話我嘅！＂此話一出，佢就意會，說：＂又去打交！叫左你唔好再玩架啦，成日整親！＂

我冇諗過佢仲會咁緊張！當佢以為係同我打波時整親，我見到佢有種發自內心的唔開心和自責，不過，我不停提醒著自己，不要因為佢對我的關心問候或細心而心軟，說到底，佢將為人父，佢地有個美滿幸福家庭，我只係佢同事而已。。。不要再諗多左令自己情緒起伏！最後辛苦的只會係自己！。。。我唔知再要自殘。傷害自己幾多次來填補和取締心入面的痛！

８號波開工

我都預左早上會未落波！但我一早就收到老闆 whatsapp，佢問我 creative team 有冇野 urgent？我答冇！當時心諗，佢會唔會好好人咁，叫我地下午唔駛番工？點知過左十分鐘佢再 whatsapp 我，說有份重慶野急趕，星期五要！仲話下午會 brief 我！（即係今，明兩日要攪掂啦！！！）

連環收到老闆的 whatsapp，我再也睡不了！起身梳洗後，就接到 admin whatsapp，內容係：＂如果一點後仍未落波，則下午唔駛番！。。。仲問我有冇野要做？＂其實，佢咁問，係怕要特登番公司開門俾我（佢唔知我已 keep 左公司鎖匙好耐）！我答她說：＂老闆有 urgent job 要我做，睇下佢 brief 成點，我再決定番唔番公司！＂之後，就冇再收到佢嘅回覆！

一點左右，老闆打俾我 brief 份 job，仲話大陸同事 send 緊野過黎，又問我幾點番公司？仲＂好人地＂話唔想我一個人番去，如果我番去佢都會番！－－嘩，皇恩浩蕩呀！！！其實所有資料都喺公司，我番去可以整定Ｄ字，聽日佢地就可以砌稿！。。。但我唔想成日都好似 "on call" 隨時候命咁，於是我就話我明早可以整字，下午佢地砌 layout，應該放工前攪掂！咁樣，叫做打發左老闆收線！

可是，收左線後十五分鐘左右，老闆又 whatsapp 我問我番唔番公司？我就＂再一次＂覆她唔番！

喺同老闆拉鋸時，＂他＂打俾我問今日係咪唔駛番？我講左老闆要我番去的事佢知，佢聽到又如常地叫我唔好俾老闆得寸進尺，又話我太＂林＂，俾老闆食住！又話已經唔係第一次咁樣叫我貿貿然番公司做野！。。。佢又再次講佢嘅＂team work＂理論！。。。我夠知咯，咁點唧？我又冇預過你地番去？（有邊次老闆 weekend 叫我番公司，出完 shooting 都要特登番公司唔係得我一個人？）

講真，如果唔係我每日帶野番屋企做，第二朝你地有冇砌稿咩？如果唔係我犧牲我的私人時間／放工時間，所有野會 on schedule咩？群體生活，總要有一個人＂冇咁自私＂，冇咁＂按章工作＂先可以令其餘人 on working routine！只不過，呢間公司得我一個係呢Ｄ人唧！。。。仲有，你說你怕老闆叫得我番去／點得我喺非辦公時間做野，你地就會一併番黎幫我／同我一齊做－－齊上齊落（你口中所講的 "team work"！）我都估到老闆係咁諗，因為佢叫唔郁你地，唯有向我埋手囉！。。。換個角度黎睇，你，都係驚你地會受牽連而番公司唧！。。。同埋，所謂的 team work 是什麼？有野做果時就行駛＂team work＂？其他就只有我一個去趕忙，去處理！我只知每日我係最早一個番公司，最遲一個走人！本來我唔應該 keep 公司鎖匙，點解而家我會有你條鎖匙呢？

今日，我都喺度 home office... ...

越來越唔開心！

七夕。療傷

昨晚我始終喊唔出，但個心緊揪著！成晚紮醒４至５次，每次都成身汗。睁開眼我又諗起佢地，中途有一回，夢到佢懷的是個男孩！由於仍屬小器階段，佢未講得所以寫出黎，我見到個＂pencil＂字。。。

原來今日係七夕！... …今夕是何年？...

 

今天他比我早番到公司，還好端端放了早餐在我桌面！他說今晨５點幾已醒來，仲睇日出，橙黃色的天好靚！我說：＂係咩？我都見唔到！＂他奇怪，問我點解咁早就起身？我說我冇乜點瞓！

 

我冇再好雀躍咁同佢傾計，望到佢我會諗起她，諗起佢地，諗起她條命有多好：孻女，出身中產家庭，可以學琴可以出國讀書，做 4AS，識到個咁鍚佢嘅好老公。。。她，可能一生都會活在幸福和好運之中！家庭美滿。。。

 

雖然佢唔知我做乜，可能真係以為我失眠之故所以抿語！雖然佢仍然好努力咁逗我傾計逗我笑。。。

 

＃＃＃　　　＃＃＃　　　＃＃＃　　　＃＃＃

 

如常的 OT，之後我去了拳館！（有掙扎過究竟回家 home office 好，還是去發洩好）我知道今晚師父還神，有燒豬食！剛到步，師父見到我就問我食左飯未？。。。好耐都冇人咁問過我，那一刻我感動！我換了衫熱身，師兄就說拜神啦！我地成三十幾人圍攏著，由於我通常星期六先上黎，對於星期二的師兄們，我一個都唔識！而且，今日得我一個女仔，萬綠叢中一點紅，好多師兄對我眼望望，有的會靦腆撩我傾計，有的尷尬地打開匣子。。。

 

我食完燒豬和雞，再飲了一包檸檬茶就開始練習！未幾，找來一個師兄同我黐手，他指點過我，不一會他推說抖一陣就行開了！（通常那人咁講，即是唔想同我黐，這是我的經驗）果然，轉個頭他就同一位師兄黐！算了，我都慣了冇人同我玩！

 

9:30pm 左右，冇人再同我練，於是我站在旁邊睇勁人對練，時師父走來叫我唔好走住，還塞了兩個拜過神的月餅俾我，然後說要同我黐手半個鐘！我當然答允！

 

我地一路黐師父間加指點和糾正我的手法和姿勢，我知有好幾位資歷較長的大師兄在觀看！他們都驚訝我意志力咁好，耐力夠，因為唔係好多人可以和師父黐手咁長時間，莫說我仲係女仔！有某師兄更說，如果我日日咁樣操，他日必成勁人！玩到十點幾，我就換衫走人了！

 

雖然我帶了一綑工作回家做，但最後我都揀了＂油麻地線＂！我知道我點解最後都上黎拳館，因為我唔開心！藉著詠春，我可以唔諗其他野，唔諗佢，唔諗佢地！挨打或弄瘀弄損，就是另一種自殘，藉住身體的痛楚來麻醉心入面的痛，來提醒自己受傷了！

恕我不能祝福你！

這篇日記，係回應我8月6日，一篇用「放下」為題及內容的日記！

俾我估中左，佢老婆有左!．．．

 

8月6日那天早上，佢外母打俾佢，聽佢地對話內容，他說：＂昨天只係抽血！又話唐氏綜合症遲ｄ先云云！。。。＂要外母特登打俾佢問，又涉及唐氏，又驗身，聽著聽著當下我想到的目的只係得一個！－－就係產檢！．．．加埋前２日佢老婆去友人 house warming 的相，咁熱天氣以佢之前的案例，佢冇理由唔著背心，反而著闊身中袖黑色及膝長衫．．．加埋，我問過佢，佢話佢地今年應該唔去旅行．．．

之後再聽到他回應外母，說老婆早上唔番工下午先番！又叫外母可以打俾佢，因為佢已醒左只是賴在床上．．．又話隔日食雞蛋，講左一ｄ食野方面的習慣！

諗番轉頭，佢一直都唔贊成生ＢＢ（而且係態度極度強硬果種），因為他覺得呢個世界太可惡，又要湊又要養，又怕佢學壞。。。佢地兩公婆為左生ＢＢ都一直意見分歧，最終老婆都被遊說過來！如今。。。

 

最近，佢話 join 左 california，為的是想練體能想減肥！而家又成日同我打籃球，可能，我已𣎴知不覺成了他鍛鍊身體的代替品／陪伴者！

說實在，一個咁想生ＢＢ咁鍾意ＢＢ的女人，況且黎緊佢老婆 32 歲，都係時候生！．．．唔通等“高齡”咩！

今日，她就 forward 左一Ｄ關於ＢＢ房佈置的相片俾他。。。我就更加確定她真係有左，他真係生ＢＢ！

 

上網查看，知道關於產檢的種種：

10w2d（２個半月）---害喜反應：比較攰同埋食多咗嘢

12w5d（３個月）---唐氏綜合症產前篩選檢查

 

所以，佢老婆應該有左３個月，預產期應該係出年2、３月左右！。。。我又睇下，你幾時會同我講！

 

可恨我一直投放感情落去，因他喜而喜，因他悲而悲！我要想想將來，迫切的，就是想想辭職的事了！再對著，只會令自己越來越放唔低，情緒越來越不穩。天要我遇上一個好夾好投契好投緣，但又不可能一起的人，這，還有什麼意思呢？

對於我，真是一個好諷刺、好滑䅲的命運！

小公主

我認識了一位小公主，她的名叫 Chloe！

她是我姐夫個呀哥個女，唔知點解，佢特別黐她的叔叔嬸嬸（即是我家姐姐夫），而且好多時我家姐與我們家聚會食飯，她都跟來，這位小公主和我家上下相處融洽。然而，我姐夫跟他呀哥都幾似樣，而小公主個樣好似佢老豆，換句話說，她與我姐夫都好似樣，走到街上，好多人都以為她是我家姐姐夫的女兒！

點解叫佢做小公主？因為佢好鍾意迪士尼的公主，特別是 Cinderella！我家姐手機以及姐夫部 ipad 入面裝左幾個公主遊戲程式／兒歌／換衫遊戲等等，都是給她玩的！今日，我地去飲茶，小公主也有跟來！佢仲送左個 Circus Hello Kitty 公仔俾我！雖然我唔係鍾意 Hello Kitty，不過因為這是小公主的心意，所以我都收下！

見到她，有時我會諗，好多人話生女黐人Ｄ，爹Ｄ，係真架！看著她忸怩，挨著你，拖著你，挽著你，親你臉。。。多可愛多令人疼鍚！

大食會

今日 4:30 在拳館開大食會，幾經遊說下我終於參加！今日真係好多野食，多到食唔晒，最後每人要拎２盒帶走！其中一樣，係某師兄呀媽自己炸的腰果，我知媽媽鍾意食，我就問師兄可唔可以要左佢，佢聽到好開心，叫我成罌拎走！此外，我仲拎左沙律＋春卷＋咖哩角＋雞翼，每一樣師父都大扚大扚畢俾我！雖然Ｄ師姐師妹唔睬我又唔同我玩，但至少有好幾個師兄同埋師父鍚我！

曾經諗過放棄唔繼續學，因為玩詠春，唔計會受傷撞瘀之外，真係會練到手臂粗，頸＋膊位變厚（佢話過我變了＂魔童叔叔＂，因為他說我的肩膊位，頸側的肌肉比起我初入職時厚了！），仲唔可以減肥；不過，為了擴闊圈子，多一點自己的生活，識多Ｄ人，暫時我都唔會放棄！

不特止

好激氣好激氣，都不特止！是夜 OT 到十點。。。冇得揀情況下，要了魚香茄子飯。

回家，媽媽問我為什麼每日都有件 tee 洗？問我係咪又打波？仲一口咬定我唔係 OT 去左玩。。。極度氣結！

出來工作十多年，份份工都要 OT，而且係勁 OT 果種，都不特止，每晚及假日都在 home office，未計隨時被徵召番公司。。。另一方面，就算我放工，仲要係星期五放工後，去玩下去打下波，又係罪嗎？

付旦

今日有驚無險，份稿終於在 9:00pm  upload，所以，今日又番了一個＂對＂，很疲累！Lunch 又去打籃球，之後食蛋包飯！可能間餐廳認我我地，今次特登搵左個冷氣勁Ｄ嘅卡位俾我地！之前我都懶換褲，著牛仔褲打波，出了一身汗，每次都連底褲都濕埋，超熱，但好爽！今日我換了 tee＋跑褲，在工廠區大模私樣走著，好醒神，好 sportive，賺到好多途人目光，可能，大家都渴望好似我咁，著短褲在工廠區，在滿是 formal dressing 的地方遊走！

４點幾５點，叫 tea！我又係食腐竹雞蛋意米糖水！外賣送來時，我同佢一齊出去拎，佢問我食咩，我指指某兜糖水（上面寫著＂付旦＂！），佢意會，笑說：＂岩晒你啦，你係父父！（付付）＂我笑笑。

其實，只有屋企人先會叫我＂父父＂呢個暱稱！

凝住快樂

昨天 lunch 我地先去打籃球，打了半個鐘再食飯，盡興！今天 lunch 本來都去打籃球，可是你想叫餸食飯，於是擱置。點知 lunch 後，你說不如放工去打！我狐疑著。。。係咪真架？你唔好大我喎！

由於我個位背面是落地大玻璃，所以有時偷閒一刻，我都會望下天望下雲！自從＂笑雲＂出現，我就好想親眼見到！今日下午，突然望街，赫見彩虹！我未試過親眼見到彩虹！可能太過驚喜，我就大叫起來，其餘同事都應聲望向我，然後拿著手機走來我個位附近影彩虹！我當然都有影啦，手機影完正想用相機影，可是當我打開鏡頭蓋時，一瞥，彩虹已消失了！未幾，我收到個 whatsapp，原來係你 send 張相片俾我－－相片入面，係我影緊彩虹的樣子，你偷影我囉！我以一句：＂無聊人！＂回應！

放工，你著我快Ｄ關機？！為什麼呢？原來真係去打籃球！

去到球場，你見到每個 quarter 都有人打緊，想離去。。。但附近再冇球場！我說一場黎到，點解唔打？說罷我逕自從你的背包把籃球拿出來，自己走去某一個 quarter 打！我連入３球，看看你，又叫你一齊玩，可是你倦了吧，坐下來！如是者，你就幫我看管袋子，我自己一個打，打得好開心！－－冇人真心陪我打波，今次仲係你睇住我玩，我覺得好開心，好有安全感！

打了一個鐘，夠皮了！我們去７仔買野飲，可能係＜衝上雲霄２＞關係， Vitamin Water 死已復生，曾經紅過一時的飲品，而家又再次熱鬧起來！你要了火龍果味，我要了 lemonade！哈哈，就像＜衝２＞的夏晨與呀風一樣！

謝謝你，我真的很開心！我希望快樂的時間可以凝住！

放下

人生八苦，我知我懂，但我執！

 

決定是難，可是面對又痛苦！

知道了，猜中了，影響了，決定了，

 

是要走了嗎？

 

可是之後的生活，之後的影響

 

既動盪、不安又不快！

 

命運，究竟會怎樣？

 

 

想學就去學

有一個來自日本的新產品，我地拎番黎轉裝推出，由於包裝盒及 leaflet 要日譯英，所以我就將全部日文從 google translate，然後再逐個字逐個意思意譯成中文及英文版本！因老闆想英文部份 native 些，所以叫我搵人做。。。佢又唔鐘意翻譯公司的專業人員，我唯有請我舊呀頭幫手（佢識得人多），佢搵左個識得日本的男仔，而這男仔的女友識英文，所以報了價後就用佢！點知。。。

明明佢話要６日，我俾夠８日，都仲要三催四請先 send 俾我！我睇番佢篇翻譯的完成時間，佢明明今日下午 2:39 先整好，之前星期六問佢 status，仲口口聲聲話星期日早上可以 send 俾我。。。都算！佢 send 完即刻問我係咪已過數？？！！嘩，你第一日出黎做，第一日接 job 嗎？行規係一個月找數的！仲有，我睇番佢Ｄ翻譯，不外如是，又唔 native 又要我自己重新執過晒！。。。咁就收Ｘ咁多元，真係。。。我同會計傾過，最快都要月中先入數；佢竟然話，因為朋友介紹，今次算數，月中先收錢！仲話呢Ｄ係知識產權云云。。。我夠知咯，我都係寫野的人，都係文字工作者；我先俾晒份 master task 你，我都驚係放出街啦！。。。知識產權！另外，我都係因為你係＂朋友介紹＂先信你，點知，一肚氣！我仲要同我老闆說項，拖延時間俾你＂翻譯＂！。。。

呢個人，咁做野，咁嘅態度，冇下次囉！（仲有，我自己由冇到有進行翻譯，又 research 又搵專門用語，做晒中及英版本，都只係用左一晚咋！）

Lunch 去對面工聯會報 course，我準時１點出發，行行人隧道過到對面５分鐘左右，去到見成廿幾人排緊隊，沿住條樓梯係咁排！期間有個呀姐，佢負責 check 排隊報名人士的資料，這位職員不知所謂，佢問完又問我係咪想入會？我答左佢３次佢仲要問！．．．另外，我好在冇聽佢講：先排“入會”條隊，然後再番黎排“報 course”條隊！如果唔係，入完會我實報唔到 course 啦！（因為我由入去工聯會至報名完成，總共用了 55 分鐘，我得番５分鐘食lunch＋折返公司！）

 九月中開始我的日文班啦，希望可以好好學習，話晒自從離開學校以來，修讀語言類的課程，都係第一次！人大了腦筋唔夠靈活，記性唔夠好，希望唔會係成績差果個啦！

美食天堂，都要練好Ｄ英文！（尤其服務性行業）

話說我和父母３人去茶仔食晚飯，後面卡位坐有３位外國人，佢地要了黑椒牛柳粒飯＋生炒牛飯＋青島一支！先黎了個黑椒牛柳飯，其中一位外國女士即問個侍應有冇木筷子，個侍應竟然冇理會走左去！３位外國人不得要領，之後誤打誤撞拉開了桌側的抽屜，看見了食具之後便拎了筷子出來食飯！

我八卦之下，看佢地那碟飯，只得白飯一勺，少許牛柳粒，乾爭爭點食？？？。。。未幾，他們又問侍應想要豉油！那位侍應不明所以，端來一支辣椒醬，那位外國人說ＮＯ，侍應隨即拿走了辣椒醬又行了去！我聽到３位外國人不明所以，覺得奇怪！

又等了一會，她再次叫來侍應，說要豉油！這次我終於忍不住，向侍應說他們想要豉油！點知個侍應成＂壺＂上檯！外國人看了大吃一驚，以＂求救＂眼神望著我，我便向他們說，放心，這不是茶，是豉油！外國人笑了！

隔左廿分鐘，他們問侍應點了的食物只來了一樣，其餘食物未來？？那侍應看了看便拋下一句：＂One more！＂外國人不知道，點了點頭！（可能他們以為侍應明白，＂仲有一個食物＂未來！其實，侍應誤會了，以為外國人要多一碟炒飯，所以說＂one more＂！）之後，那侍應竟然再打單，變成再叫多一個生炒牛飯。。。。

以為有得食，點知又過了廿分鐘也未到！其中一個外國人轉個頭來求救！這時，戲肉來了。。。父母見那位外國人走來，即不約而同指向我。。。（情況就如電視劇般攪笑）我含著未咬碎的炒麵，說：＂anything help？＂外國人即把單據遞向我，問上面寫著什麼？我逐一解釋了，知道仲有個生炒牛飯未來（單上面真的打了兩碟生炒牛飯），連忙請侍應過來跟進！之後，碟炒飯就來了！

我地食完後就離開，臨走前我跟那３位外國人 say bye！見外國人由坐低到有得食，總共曾經叫來４位侍應，他們全部都唔識英文，而佢地嘅反應竟然係：一個閃開，一個扮知，一個扮明其實拎錯，一個直頭聽完走左去唔跟進！。。。咁嘅服務態度，我身為香港人都睇唔過眼！

唉，我估那３位外國人回國後，一定會覺得香港很不濟！。。。

iphone5 arm bag

睇了這個西醫都有廿幾年（由我們搬入來開始已睇呢個醫生），我發現佢醫術越來越。。。因最近幾次睇佢，都把我的病嚴重化，明明少少鼻水和喉嚨痕，變成鼻塞＋勁咳＋綠色杰痰！另外，有好幾次更開了一Ｄ唔係我個病對症的藥（我會根據藥袋個名，上網查係Ｄ咩藥），結果，仲衰過用醫療卡睇果Ｄ醫生，次次都要睇幾次／轉醫生先叫做好Ｄ！

既然食西藥會令到個人散晒，又倦又 wing 又昏睡，我決定轉睇中醫！由於家中不便煲藥，所以我索性去涼茶舖，飲現成的感冒茶！繼昨天飲了恭和堂（$20／一杯）的感冒藥，今天飲了養和堂（$22／一杯）的！比較下，後者帶有更多的薄荷味，而且味道更苦！雖然唔知Ｄ感冒藥係咪咁掂，但至少飲完藥個人唔會冇力想沉睡，冇精神，咩都做唔到！

＊＊＊　　　＊＊＊　　　＊＊＊　　　＊＊＊

因為我轉了 iphone5，所以舊有的 arm bag 不合用了！（其實本來那個都唔係咁岩用，因為我手臂太瘦，之前果個的魔術貼叫做勉強貼到ＤＤ！）於是我走到藍田，去匯景及啟田商場呢２個屋村商場，希望會搵到個合適的 arm bag！（之前去過旺角，太子，尖沙咀，鰂魚涌，銅鑼灣都買唔到）

終於在一間賣手機殼的舖頭見到有 for iphone5 的那種（其他店舖，只有 S4 的），雖然它沒有 earphone 孔設計，亦只有黑色而沒有其他顏色可選擇，但如果價錢岩的話，我都會買下，頂多把手機倒轉放入！（因 iphone5 的 earphone 位是在下面；iphone4 的 earphone 是在頂端）

我問店員可唔可以打開看看，試下岩唔岩入？那店員就幫我把手機套入去（勸各位想買 arm bag 的朋友，要真正親身現場試，見手機真的能夠套入去才可購買！），之後又示範就算套上了後，仍可隔住個袋面按動屏幕！那一刻我以為終於都買到了，可以邊聽歌邊跑步了。。可是開心得太早！

因為，當我嘗試把 arm bag 套上手臂時，問題就出現了！－－它的魔術貼設計，拉盡都仍然 cool 唔實我手臂，因我手臂太瘦了！－－唉，照咁睇，係咪即係我冇可能會買到個岩用的 arm bag？（見拍賣網有好多顏色好靚的 iphone5 arm bag，只係 $30--$50，我諗我都唔敢 bid 啦，因為睇佢地個款，應該個魔術貼位都唔岩我的，平又點喎！）

各位，如果知邊到有 iphone5 arm bag，而 cool 上手臂之後個「魔術貼圍」是在7寸（18cm）的話，亦即可以完全cool緊這個size的話，請告訴我喺邊度買及其價錢！謝謝！

尋橋

保險 body check，所以今日都要早起！一早飲了３杯水加一罐咖啡，去到化驗所再飲２杯水，點知留小便時都只有＂驗尿杯＂的三分之一。。。成個驗身過程，計埋見醫生，用了一個鐘。期間，在等候時，居然有人前來兜生意－－話說上面那層係這化驗中心的美容部，佢問我有冇興趣上去睇下，有冇興趣做下機。。。咩話，我唔駛纖體了吧？！

完成 body check 後見仲有時間，就去時代廣場打個圈，然後去附近恭和堂飲了杯感冒茶（$20）及在健康工房食了兜燒賣（$10／8粒，唔錯喎！） ，之後就去上堂！

今堂終於都有機會學尋橋了！師傅叫佢個仔教我和一個鬼佬！講真，個＂師傅仔＂係好叻（真係有掌風和拳聲的，絕不是電視劇那種 key 罐頭聲音！好勁！），但佢唔識教囉！我同個鬼佬跟住一齊學，每一個 step 每一個動作都要記實！由於係一下一下咁駛出黎，我做了一下，當然下意識就望下個鬼佬，睇下佢跟唔跟得上。。。結果，我就俾人話我掛住望靚仔，覺得我唔認真！。。。好似咁樣的誤會唔止一次！好似以前公司咁，好多女同事唔妥我，甚至有Ｄ講了好侮辱的說話，根本佢地唔了解我，亦係佢地自己主觀的＂長舌＂！。。。我當然有唔開心，不過，我唔會理佢地！

飲了杯感冒茶感覺好點，不過個頭仲係覺得重重贅贅，落堂後在尖沙咀行了個圈就回家！

請左病假等如冇請！

病了有點 wing，所以請了 sick leave！可是由９點開始，一直收到老闆電話，最後她叫我番公司。。。因為佢要飛，下星期四先番，而且有２份野星期一要 output。。。

２點半番到去，同事驚訝我做乜番去，唔係請左病假咩？。。。如是者，我又做做做，直到８點先放得工！期間，當然又發生一Ｄ激氣野，就係Ｄ人唔睇電郵，成日要我三催四請，都仲要做錯，錯了又唔認，結果要一Ｄ vendor打來找我打完場！我這個＂危機處理小組組員＂又出動攪番掂！

係咪全公司得我一個人呢？係咪我出埋你地份糧呢？你已經唔係處理好多野，都仲要唔知唔記和做錯，我不停為你們包底！受夠啦！

是忙到病嗎？

今早番工途中，已收到老闆連環 whatsapp，交帶呢樣交帶果樣，又要我 brief 佢地做Ｄ乜做Ｄ物，好多野跟！今日星期四，本想請病假，可是記得明天和後天都有稿出，今天絕不能請假，所以就撐住番去！

今日依然沾寒沾凍，我著了４件衫加一條茄士咩披肩，仲覺得凍！而且，個人好 wing，個胃頂住頂住，想作嘔，唔通感冒菌入胃？。。。襯未真正發起燒來，放工即刻去睇醫生，等到８點先有得睇，睇完再去買幾個麵包就回家！但，番到屋企竟然冇飯食。。。都唔係第一次了！幸好，我買了麵包（媽媽看見，仲責怪我做乜買麵包！我說送藥她才抿咀！）

食了麵包食了藥，今晚開唔到工了，好倦要休息！