行過

行過見到呢個香港攝影師公會展！

行過見到＂驚訝中＂的巴斯同埋胡迪！

行過順便換公仔，竟然換到主角＂路飛＂！

行過＂有緣地＂見到仲有＂烈陽號＂賣，最後兩個已俾我買回家！

早餐。牙刷。記事簿

今日趁熱鬧，買了麥記早晨全餐，剛巧送適齒美牙刷，我更換了藍色那支！我想說這牌子這款牙刷幾好用，刷毛軟硬度適中，刷牙縫或近牙肉邊緣唔會刷損牙肉。手柄長度岩岩好，唔會太細支，又唔會滑手。

另外，上班途中姐姐和弟弟分別傳了一張相片俾我，原來是今期新蚊地送 Adidas 硬皮記事簿，仲有藍，白兩色任擇。出了地鐵即刻去冇乜人知的 7-11（位置在一個停車場的出入口，平時人都唔會轉入去，經過的僅是取車人士！不過如果取車都會從商場那邊坐電梯直達，所以我覺得呢間 7-11 大機會有囉！）好好彩，我去到每種顏色仲有一本，我想也不想就買了兩本！行番公司，等電梯時我已急不及待打開來看，原來今年呢款入面你橫間，唔似之前的有日曆，而且今年這本的紙質和外皮很好，我唔捨得用啊！

折返座位未幾佢就回來，佢見到我把玩著記事簿，一看就說：＂嘩，完全係為你而設！＂係呀，我想買多一 set 囉！於是，落去買早餐時再行去另一間 7-11，裡面只剩下２本藍色，我不由分說就又買多一本，放工時竟然在屋企地鐵站仲有一本白色，我又買了！好野，我有 2 sets Adidas diary！

緣滅預習

天兔快黎快去，好彩吹西北－－西南風，所以我家未受影響！如果佢吹東風就慘啦，滲水＋牆濕＋窗濕床濕。。。諗起頭都痕！

早上 9:15 左右落波，法定時間２個鐘頭之內要番到公司，即係 11:15 前番到去就可，我就用盡佢，番到去岩岩好 11:12！當我簽到時，已見佢番左，佢簽到的時間，我應該剛剛起床梳洗緊！（後來佢話佢同老婆一齊番工，況且佢通宵睇波，睇完都天光，又冇野做，咪早Ｄ番黎囉！。。。一言一語都打入我心！）

我番埋位，除下耳塞時，佢望著我（但我眼尾都冇望佢），然後第一句同我講嘅就係：“你冇帶遮？”我話有縮骨遮，不過根本冇落雨！．．．之後我就一直埋首處理工作，用工作黎麻醉，完全冇理過佢！

未幾佢終於忍唔住，開了包百力滋，但佢唔敢遞俾我！（平時我地都係 share 零食，佢開百力滋就會遞上３條俾我）佢站起身望望我，佢見我的眼光跟佢相接時，才敢戰競遞上！我接過並沒有說什麼，也沒有報以微笑。。。佢繼續努力同我打開匣子，說佢睇左＜JOBS＞，又問我有冇見到大月亮？（我知星期四那天，佢地安坐家中邊賞月邊溫馨 dinner，一路追住大圓月亮拍照）之後問我去邊度食 lunch 好。。。不過我冇笑容亦冇望佢，或者佢都覺得我有古怪。。。

lunch time，行去食肆時佢又撩我傾計，佢問我有冇上詠春，有冇上日文？又問我係咪失眠？我笑說係咪因為我唔出聲，好似黑面咁？佢話因為見我今日個人好＂陰＂，好冇精神又黑眼圈。我答話呢幾日都瞓唔到，成個人叉唔到電！之後我又低著頭行。

 

食肆裡，雖然我地對著坐，但我整個人已側身向另一端，雙眼空洞的望街望車。。。佢還以為我又係因為屋企／私人空間而瞓唔到。

 

放工佢話去廁所先，就先行了。我唔知佢會唔會等我，所以我放慢腳步，執好Ｄ野 for home office 先走，出到去原來佢等緊我！我知佢要去牛頭角果邊交收，所以我地在公司樓下分道揚鑣。可是，到達鰂魚涌站，我步出車廂就見到佢，當時佢正埋首專注地 whatsapp！同邊個？唔駛問吧！。。。月台上，我一揚手，佢抬頭見是我就說：＂原來我地同一架車！＂我點點頭就直行去我要出的出口了！而佢，就向另一個出口方向行去！

 

鰂魚涌站好奇怪，出口唔相通，所以你一定要先在月台揀好出口方向；如果唔係出錯左要在地面行！另外，其實我地都在觀塘線月台，就算去邊，都先要上一層先可以分左分右轉車，如今佢行去另一端，明明係咪都要上一層架啦，點解唔同我一齊行呢。。。

 

算了吧！緣盡了！之後我都會板著臉，因為我知道而家先係開始，之後的日子／遭遇／情節，都會像刀般直插我心！

 

 

脹痛，沉重！

再次失眠，3 點幾入睡 7 點幾紮醒，先看看幾多號風球，見仲係三號即係可以上堂！於是起身梳洗換衫，飲包咖啡再坐地鐵上日文班！

 

由於上堂位置在佢屋企對面，我落車至課堂大廈沿途，我都有東張西望。。。第二堂日文，前半個鐘 recap 番上一堂嘅野，之後果Ｄ好速咁教，臨尾果Ｄ生字只係讀左就算，我覺得好難，有Ｄ連譯音都唔知點 mark 好！。。。

 

落堂後我站在樓下良久，當時正下落毛毛雨，我好似失神咁唔知方向，稍稍定過心神，唔知屋企又會唔會開檯，所以我就去左華星冰室食野！去到已有一條人龍在等候入座，我唔趕時間，等就等！我怔怔站著，未幾就有位！（可能一個人，好容易 for 搭檯！）食完再喺東大街打左個圈就回家！番到屋企入門口那刻，我見到佢地剛食完飯，Ｄ碗筷未執擱著。。。佢地再一次煮飯冇通知亦冇預我！。。。

 

回想上個月中打８號風球，老闆晨咁早就車輪打俾我叫我番公司做野，有一回我跟老闆通電話 briefing 一Ｄ重慶活動細節時，我聽到媽媽說煮麵食！當我跟老闆掛線後，喜孜孜正欲埋位食麵時，我見到檯面只有３碗腸蛋麵！－－冇錯，係３碗。。。那一刻我心情急轉直下，執好一Ｄ notes，就換衫落樓下美心，等 lift 時佢打來。。。

冇架啦！咩付出咩期望咩一家人，眨時間好似好多餘咁！

今日個頭依然脹痛，心情依然沉重！

神的旨意？！

帶著絕望的心情做公司野，至 3 點先走上床，其實唔係咁瞓得到，漆黑之中我有窒息和傷心心痛但喊唔出的感覺，就好似曾經經歷過的失戀揪心感覺；我唔知自己幾時倦極入睡，就喺 5:47 紮醒，成頭成身汗。。。

 

今日冇上詠春，連續兩星期冇練習了！

 

下午３時，明明冇乜胃口，但如果再唔食野我就會暈！（由昨日下午 2:30 食過一件多士之後，我再冇食過野！）所以去對面大家樂食左個 $21 的下午茶餐，折返家中，見食飯檯已變身成＂四方城＂！我心下一沉然後 web surfing，我上左 jobsdb 一會，不得已，便換衫去跑步！我有感自己精神和體力不佳，成個人都 long long 下咁，但唯有跑步，可以唔駛用錢又可以逃離現場！仲有，如果明天8號風球就冇得跑了！

今日冇特意計時，一心只想 keep 住至少跑十公里，以及採取＂拖得幾耐得姆耐＂的心態在這個公園蹓躂。跑著跑著，我一路都有諗住佢地，一路諗住＂幸福＂和＂快樂＂呢兩個詞；我又諗過一路以黎自己的經歷－－成長，家人，朋友，工作，感情。。。之後又諗過＂back up＂，＂溫暖＂和＂支持＂呢幾組詞。

呢一世，我一Ｄ都唔開心！

未試過呢段時間仍然在公園跑步！我看到日落－－天空窄現橙色餘暉，於是我停了腳步，用手機拍了幀照片！那一刻我看著想著，然後諗：＂夕陽無限好，只是近黃昏！如果我喺中秋節當日死左，咁我就見唔到呢個世界，不過就算俾我日日見，咁又點。。。＂

逗留至晚上８時許，汗濕 up 住背脊，加上風勢有點不對勁，熠熠得乖張，我要走了！我步出公園入口，見到一輛掛有＂RY＂車牌的車子，然後再見到掛有＂RA＂車牌的車子，呢兩個車牌都不約而同地同我個名有關。。。我再行多一個街口，竟見到一個掛有＂HAVEN＂車牌的白色 Benz 停駐，真係好邪！。。。究竟，係咪有Ｄ咩意思呢？

不如就咁解脫吧！

中秋節，我特別唔開心！

７年前中秋夜，和對上的一個 ex first dating！那天公司放早，佢 sms 我約我先在又一城逛逛，然後坐小巴去九龍城食泰國野。晚飯後佢提議玩燈籠，我說好，因為我未玩過燈籠，加上我對佢都有好感，我想，可能我地會好好發展，所以應約了！那晚，他買了個兔仔燈籠俾我玩，又幫我用 candle 點著小兔，期間有落雨，我地在九龍城寨公園換了幾個位置＂賞月＂。記得那夜，他問過我係咪一定要番屋企，我冇為意，答他：＂當然啦！＂結果那晚我地玩了一盒子 candle，然後聽 MP3 至早上６點左右就各自回家！。。。及後，我地成為情侶，聽他說當晚其實佢想帶我去附近的啟德機場富豪酒店過夜。。。（幸好當晚傻更更的我拒絕，另外，我恍然原來當晚／初次約會，佢係另有目的！。。。）同他開始，成了我的惡夢，抑鬱復發比前嚴重，要食驚要見心理醫生；正式黎講我們只維持了３個月，分手後心入面的傷痕一直冇復元！。。。

今年中秋，新仇舊恨一次過！

他著緊為她籌謀籌備，送了個大兔仔燈籠俾佢，晚飯＋賞月玩燈籠，翌日去跑馬地某高級西班牙／意大利餐廳慶祝！（聽說這餐廳要一個月前訂位）有２位侍應為他們的結婚４週年服務，高級西餐＋別緻朱古力波蛋糕，一切一切彷如刀割！本來的一對 precious moment 陶瓷結婚公仔擺設，如今多了一個同系列但係 bb 造型的公仔。

中秋節，本來係我的拍拖紀念日／惡夢紀念日；又係你地結婚週年，如今再將會有新成員！她嘅幸福令我一直唔能夠釋懷！今年的中秋節，我好努力叫自己忘記，叫自己開心，可惜我做唔到！－－由初時你冇正面承認，至知道你結左婚；接著得悉你們的一切，再知道一直反對生小朋友，一直對呢方面都好固執堅持的你原來已有生小朋友的打算；以及你們如何迎接小生命來臨，所有所有我都感到難受！我知係自找，但我真係放唔低！

呢兩日我好辛苦！今年的中秋節，係我最想了結生命的一日！


我好想離開！

中秋快樂？！

６點幾佢叫左底下的下屬放工，然後我同佢 OT 至８點，７點幾時佢老婆致電，佢應該在附近，我聽到佢答道５分鐘後離開公司，喺 apm 等。我同佢一齊走，我說我要去廁所，著他先行（因為我知有人等緊佢），但佢話等埋我先！我地沿途行去 apm，佢問附近邊度有傳統燈籠賣？（記得昨天我說過今年有一款 BB 兔仔 LED 燈籠，好可愛）我唔知道公司附近邊度有呢類舖頭，而且，佢應該唔會陪我睇／買。。。到達 apm 我地就散了！

之後我自己去睇舞火龍，拍照，睇到十點半先離開，臨行前在檔口仔買了一尾的骰的金魚燈籠俾自己（果度有 BB 兔，但顏色好核突，一撻撻的，所以買唔落手），再坐地鐵回家！回到家又有說話聽。。。佢地留左２日前的烏冬俾我，又話我唔係 OT 去左玩，又話等洗碗真係慘！。。。其實每日我都唔知會唁會有飯食，而且我日日都要 OT，我都唔知自己每日幾點放工！我曾不下數十次叫佢地，如果果日會煮飯／有野食的話就給我訊息，一直以來佢地都冇做到！我唔想再咁樣估估下，番十幾個鐘頭工已很累，仲唔知會唔會有飯食，咁我每個月俾咁多錢家用做咩？。。。點解弟弟番黎食飯就又煲靚湯又大魚大肉？佢唔番黎食飯就一定冇野食？另外，就算你地有煮飯，都唔會預我！有事就鍾無艷，無事夏迎春！你地咁＂彈性＂，我真係無所適從，我真係好攰啦！

食飯呢個問題，恐怕呢一世都唔會解決！

ＯＴ

是日 OT 到十點。。。倦！本來屋企有炒烏冬我都食唔到了！

爸爸終於出院，由於我分身不暇，只好預先交低了些錢俾媽媽 for 住院＋拎藥等費用，我仲千叮萬囑叫佢地回程時搭的士，唔好轉來轉去搵車搭！往後的日子，希望爸爸的高血壓可以改善（我都唔明，佢血壓高到 190 但醫生仲叫佢出院？！正常成年人的血壓係 120--140，高過 140 已好勁，我爸因為暈和血壓飊升到 174 先入急症室架喎！），唔好再飲酒，唔好晨運完熱辣辣再飲一支咖啡，咁樣只會令心跳加速，解唔到口喝亦解唔到體渴。其實佢唔係一個咖啡人，就是貪得意就地取材，拎了屋企的咖啡存貨去晨運之故！

奢侈

今日異常地倦，可能昨日走笛了幾轉，又上堂又急症室又回家買飯俾弟弟，又出去醫院，拉媽媽著她吃點東西，再回家，之後換衫出去跑步！。。。今日收到弟弟叫 courier send 過來的 TVB 月餅＋半島酒店奶皇月，個盒好靚，我仲以為個月餅樣子會係 TVBuddy 添！（以前身為 TVB 員工，都吾會有呢d福利，連 TVBuddy、或鎖匙扣都冇！）從未試過有人 send 野黎公司，特登 for 我而送過黎，所以又興奮又緊張！未幾，我又收到一間 model agency 寄過黎私 Haagen-Daz 雪糕月餅，淨係得我有，我又好開心！（agency 員工還附上了一張熊仔小書簽，上面寫有祝我＂人月兩團圓＂，我心緊揪了一下，團圓？回想拍拖時，我也是自己一個過；屋企人只會帶弟弟去賞月，只係買一個燈籠俾佢玩，我和姐姐只有望梅止渴。。。）

今日番工時同埋 lunch 開始隻右腳腳眼對下連腳踝腳踭位好痛， lunch 冇打波，我地行去食 lunch 時，痛到我一路行著拐拐下，我話俾佢聽，佢奇怪詠春只係用手唔係用腳！我說我星期六冇去啦！佢就問我有冇腫，係咪關尿酸事？我說我做過身體檢查，冇尿酸又冇蛋白尿等問題。。。可能係星期日跑步抽筋時整親！

儘管收到２個驚喜，但唔知點解，我今日心情唔太好，有點心淡心灰的感覺！

放工時查私人電郵，見渣馬那邊有消息，說下個月中開始接受渣馬報名，我看著笑著，佢問我有咩睇？我說可以報名了！佢反問我係咪真係報名？我說係，我想跑番自己成績，可以的話我要拎獎！－－因為只要完成賽事的參加者，都有獎狀證明！佢說唔係質疑我拎唔到獎，最後拋下一句：＂你記住留番條命番工！＂之後我地就分道揚鑣。

佢呢一句，我再感到心淡。唔理係講笑又好，唔相信又好，我最想聽到的，就係一句簡單的＂加油！＂或＂盡力而為！＂我冇諗過佢會咁講，唔通我條命真係咁賤，只係＂適用於＂工作而已？！我冇要求過有人會陪我參加，為我打氣，甚至到場支持，或者係喺終點站等我完成我人生的第一個馬拉松；只是一句鼓勵說話，原來對我黎講，都係咁奢侈！

回程途中，我不斷想著他那一句話，我感到失落！。。。渣馬比賽當日係２月１６日，那怕係你做爸爸之時！。。。

學日文

今日第一堂日文初班，聽好多人講都話工聯會其實唔差，而且又平，可以試下自己岩唔岩先再報中班高班，或者去Ｄ專門Ｄ嘅日語學校繼續學。

由於早上９點幾上堂，我一早就要起身，去到又冇標示，我行了一圈，見有一個班房坐了人似在點名，我就入去問係咪上日文初班？點完名買了一份 $25 的 notes+CD 便搵位坐下。我呢班有 22 人，好耐都冇番過學，所以都有Ｄ緊張！之前我已上網略略睇過一Ｄ初學日文的網站，了解過平假名片假名是什麼東東，又稍稍記了幾個平假名，叫做打了個底！

老師講得好快，期間佢又唱歌又舉例，都算幾生鬼！今堂目標係教１５個字／詞，我一面睇白板一面 drop notes，一面寫下 for 自己知道的讀音譯音，總之就係好忙碌！昨天買的小簿子和大口仔三色筆今日大派用場！

我有諗過錄音，但下課後我覺我多餘，因為老師對住白板上的字讀，快來快去，就算錄左音都唔知佢講緊邊個字！日文嘛，唔似普通話，就算唔識都可以借Ｄ義將個漢字讀咩Ｄ就過骨，所以真係幾難！一方面要知道Ｄ日文係咩，點樣讀之外，仲要知道果個中文字／詞的日文點寫，真係考起我！希望我可以有所得著，唔好半途而廢啦！

做節

昨晚提早做節，出去食唔駛煩唔駛做餐懵！成個餐臨時加二百元，Ｄ菜好快出，因為要趕下一輪客！都慣了，大時大節係咁嘅，訂到檯已算好好！我地８個人迫在一張細檯，成個套餐之中，最期待嘅係芝士龍蝦伊麵底，因為平時 lunch 時已想食，而且平時唔係容易食到！

繼續 OR 不繼續？

呢幾日食左西藥，到 9:30 左右便走上床，倒頭大睡至翌日！今日冇去上詠春，和爸媽去食 lunch 然後去文具店！

呢間文具店＋玩具店我可以行成個半鐘頭，買了本簿仔 for 明天上日文班，又買了 2014 的座檯（大及細）年曆和 schedule，另外再加一Ｄ file等文具，埋單係二百幾蚊，估唔到喺文具舖買野都要碌卡！

買完野，在附近涼茶舖飲了碗特效感冒茶（個呀姐好細心，問我有冇喉嚨痛？我話有，她便放了少許梅粉落碗茶度，再俾一筒山楂餅我），然後在翠苑買左碗只在星期六、日有售的腰果糊俾媽媽就回家了！

唔上詠春，好壞參半：我唔駛個個禮拜整到兩隻手瘀晒＋受傷，又唔駛肌肉怨痛，又唔會雙臂＋頸膊變大隻，又唔會俾人打面。唔上詠春，星期六就可以省回一日俾自己，留番Ｄ時間精神 for 星期日的日文班／做自己野。不過，唔上詠春，每星期我就少了３個鐘頭的運動量，以後我冇途徑可以釋放壓力情緒，又開始自閉，又避唔到屋企＋打牌！

小食

今日係黑色星期五，對我黎講沒舍幸運與不幸運！５點幾 Print shop 打黎有得拎Ｄ poster，落去順道過對面買小食。

運動 VS 病

病了！本來唔想食藥，但佢叫到就食啦，因為西藥好散，食完基本上成個人散晒，精神集中唔到，做唔到野！。。。今日老闆又喺度！（我都知道，睇左醫生唔食藥等於冇睇！咁要番工又點食藥呢？病－睇醫生－食藥－休息，永遠充滿著矛盾！）

食完早餐食第一次藥，食完成個人好 wing，好似俾人打左懵仔針咁，呆呆滯滯。之後同老闆開會，精神約有 40%，尚可以支持。。。lunch 後食第二次藥，又係好 wing，好似大笨象俾人打左麻醉針咁，少少力都用唔到，成個人簡直係 low battery 到自動關機咁，我冇法做野，就算用 mouse 上上落落，開 window 也好，都遲鈍。。。期間有中眼瞓又紮醒（分分秒秒只係用意志力支持著）！我感冒，鼻塞，耳仔塞，骨痛，著左外套都間歇地打冷顫，有點反胃！

好容易才等到６點，執好Ｄ野再關機就走人，因為我實在支持唔到！同事問我點解唔請 sick leave，點解唔下午走人？政府宣傳片又話＂有病就唔好番工＂！唉，打工仔，話請就請，就算唔舒服都要頂！加上我諗番起８月頭果次病，請了 sick leave，老闆狂打俾我叫我番公司。。。試問我又點敢請呢？！

人地話運動多身體好！我發覺呢個理論唔適合我。因為呢段時間係我人生之中做得最多，做得最有規律運動的時刻，又食多左菜飲多左鮮果汁。但這一年，我幾乎一個月病一次！身體唔見得強壯左，精神唔見得好左。。。

兩隻日本蛋都係我嘅！

今日有３支菠蘿芒果味百力滋及２隻日本蛋，tea time 我把一隻遞給你，你說你食左，我設問：＂咁２隻都係我嘅？好野！＂我喜孜孜打開一隻，你說你昨晚通宵睇波時煮的，唔知熟未！我一口氣食晒２隻蛋，再食埋 vendor 送俾我地的雙黃蓮容月，老闆經過，問我係咪冇食飯？！

我地冇打波，因為我唔舒服！去了裕民坊的太興食 lunch，因為陣間要去後面街的美心換月餅。你要了乳豬燒肉飯，我要了油雞瀨！我好鐘意食油雞瀨，平時好少地方有，就算有都未必好食！雖然太興的燒味出名，但我覺得美心的 tea set 油髀瀨好食和大碗得多；另外太興亦出名貴！一碗單拼瀨粉要成 $51，油雞雖然係隻髀，但冇乜肉，令我不我不和美心比較（美心果Ｄ大啖肉，又多薑蓉，只係 $19）！ 侍應端來了我們的食物，見你看看我的油雞瀨，我笑說你係咪想用舊燒肉同我換舊雞？你說不是，然後認真的說：＂你要食多Ｄ野！＂

個胃一直拃住拃住，又沾寒沾凍，件外套著下除下又披著，但仍然打冷顫，好容易才放得工，急急腳去睇醫生！雖然醫生收９點，但等的時間又係比睇嘅耐，等埋拎藥，唔放心屋企有冇野食，所以我就喺７仔買了個麵包 for 送藥就回家！回到家我瞥了瞥食飯檯－－空無一物，只有老豆正在翻掀的馬報；而廚房則烏燈黑火，即係冇野食！。。。媽媽裝我買咩回來，見是一袋藥然後劈頭就開口鬧我。。。為什麼？我好失望，急急放下袋藥，然後洗澡平靜心神。

自溝新飲料

今日如常打波，可能太曬，公司冷氣又凍，個人 wing wing 地，打到一半已經覺得好似窒息咁，我亦冇再緊 mark 佢，我體力下降很多，唔知係咪因為天氣還是連日來睡得不好休息唔夠！我覺得打半個鐘頭 lunch basketball，比玩３個鐘詠春及跑一萬米還要費力，汗流浹背，焗住真係好辛苦！成個人都熱，之後廿分鐘的 lunch 好自然就會飲凍野，或者咁樣更加會導致病囉！

下午成個人戇居居，但 share 了２款新飲品：首先係忌廉溝提子汁（之前飲忌廉溝芬達）

之後係火龍果味維他命水（即係＜衝 II 入面夏晨飲果種＞）。

前者有Ｄ似甜味冇汽的菠蘿啤，後者則像少甜的小朋友 jelly（一Ｄ都唔似藥水味）！

大展鴻圖

一早起身梳洗，約 12:15 落樓坐地鐵去荔枝角，參與叔叔新公司開張！

 

去到好多人，和 Chloe 小妹妹玩了一陣然後食野，我食左乳豬，薯片，三文魚沙律，咖哩角，炸腸仔卷，大蝦三文治，咖哩串燒，可樂，白酒！我們逗留到 2:30 左右就走，搭 102 落筲箕灣，因為我今日未飲咖啡！

終於去到華星冰室！好好彩，竟然坐在 Eason’s life concert poster 前那張卡位，我當然立即影相啦！（因平時經過灣仔那間，就算一個人都冇位）我試了校長多士（$25）＋熱央，個多士係黑蒜香魚子醬＋芝士烘成，好香好脆；杯鴛鴦好好味，唔苦唔澀，我會再黎！食完就坐丁丁回家。途中經過佢屋企，愛秩序灣足球場，諗起佢，諗起佢地！。。。

我左面頰被打／擦傷，左下唇爆缸。說起詠春，媽叫我唔好再玩，又話一直欲來都唔贊成我玩，玩到手指粗晒冇人要，又受傷，佢仲叫我聽呀媽講唔好再玩，學費交左都算！其實，我玩係因為我要釋放負面情緒和壓力，我又要避開你地成日喺屋企打牌；另外避免自己自殘，我藉詠春的瘀傷來卸去那種自殘感！如果我唔玩詠春，我唔知仲有咩又平又就到時間，又可以一個人做，又避到你地打牌時間的活動可以發洩到，你認為我係犯賤？你認為我係鐘意自虐嗎？學詠春半年至今，當中的辛苦，費勁，和裡面人際上我都要克服，箇中滋味與真感覺外人係唔明！我想說就算我唔玩詠春，都唔係為左你！

Adidas Originals 3D 重塑經典

見到 200% Eason，雖然受傷，但心裡面感到一絲親切安慰。行了個圈影了Ｄ相，再叫人幫我揸機，好讓我同 Eason 有一幀＂合照＂！由於他太大，我可以挨著他大髀，好＂爸爸 feel＂啊！

爆缸

之前上堂，縱使遇上強手，只要一心諗住＂她＂，我就好容易 on fire，有時未必化到度力，至少唔會俾人打傷！可是今日，可能心入面唔開心＋積壓太多，我一度唔係咁集中到，成程處於捱打狀態。

有一回，有個師兄仲打爆我咀唇，即場流血爆缸！呢位師兄成日有意無意寸我，他說師傅剩係教女仔，同女仔黐手，佢又教左你Ｄ咩新招呀？（其實好多男師兄唔鐘意同女仔黐手，因為佢地高我幾班＋力度唔同唔過癮，有時師兄又會覺得費是同女仔黐，因為唔可以真打！咁樣師傅咪同女仔黐多Ｄ囉，唔通大家交學費，成堂剩係企喺度睇人黐咩）

之前，大約我學了一個月左右，呢個師兄就走黎懶係指教，其實佢野野都真打真用力，有時我仲覺得佢係特登出盡力，仲特登打面＋剁頸！果次佢俾佢整到我右手冇力＋遞唔起，傷左２星期先叫好Ｄ！今日，佢又走黎我面前寸寸貢！我唔同佢黐佢就夾硬出拳，咁我唯有擋！之後佢就咄咄逼人，野野向我面打＋出拳，同埋拃我左手，攪到我由頸+肩＋手臂扯著痛！然而成程我都係避，根本出唔到力！有一下，佢又打面，我咀唇當堂爆缸流血，佢竟然說：＂唔係我整到你咁架！＂說著就行開，而我就拎紙巾抹血。有３位師兄見狀都替我抱不平，一位即場代我同佢＂教量＂，另一位叫我用清水沖下，第３位就問點樣整到！。。。

我抹過血就換衫走人！果位自負的師兄真係。。。

定局

今日又有日本蛋食，你又摵橙我食，我們 share 一隻香蕉，你特登用你手機開番＜走過浮華大地＞我睇，又打 lunch basketball，可是。。。一切已成定局！裝修ＢＢ房，產檢，產前講座。。。一切你都 ongoing 進行中！

你這樣對我是否因為＂彌補＂性質，喺呢段時間陪我多Ｄ，陪我做我鍾意的事？又或者只係我＂幫你＂諗多左？我唔知你對我有冇一絲感覺，或有冇對我有好感／喜歡過我？那怕是我倆相逢恨晚，這一生都冇可能會一起，雖然大家一直以來都冇說穿，又或者你根本冇鍾意過我也好。。。所以呢段時間－－你喺你快將有＂新成員＂之前，陪我多Ｄ對我好Ｄ，讓你心裡得到適度平衡。

我諗我會捱多一陣，過埋年拎埋 bonus 先離開；又或者我仍然會因為你而唔會離開，不過當你的＂新成員＂來到這世界時，我準會再次抑鬱。

接受－－面對－－過度－－忍耐，我無法預計自己能否做到，能夠按奈得到情緒。我知道唔再對你上心，唔再鍾意你是令自己解脫的通道！

W Hotel 奶皇月餅

第一次試 W Hotel 的奶皇月餅，一盒６舊，個盒好靚好別緻，紙質一流，唔知有冇包在價格裡呢？

打開包裝，一捏，有點散，皮和餡分離！試一口，冇嘉麟樓咁香奶皇味，普通啦！不過，我發覺嘉麟樓近２年已失準，加上價錢又超貴，今年都唔打算買了！

日本蛋

我：（接過隻蛋）嘩，隻蛋好白好細隻啊！

你：梗係啦，日本蛋黎架！

我：日本蛋？！（邊捏邊看，突然跣手）哎呀，弊啦，跌裂左少少！。。。

你：咪岩囉，反正都食架啦！

我：（奇怪）下，呢隻俾我食架？

你笑著點頭！

我以巴斯光年的 side pen 在蛋上繪上 >_< 樣子遞給你看！，說：＂它跌穿了個頭，好痛！＂你邊看著邊把你那一只吃完！


第一次食日本蛋，味道像泰國／美國／中國雞蛋差唔多，蛋黃較細和偏淺色，很有趣！

工程繼續

扇了灰及重鋪石屎要等，所以今日先可以油漆！聽父母說今日要等到下午３點幾樓上個住客先回家，才可以上下兩個單位一齊＂試水＂！之後先再可以清潔露台，唉，真係大工程！

放工後先去買粥再去買特價壽司，然後回家！攪完一輪沖埋涼先食得！人地裝修變相我地又要裝修，做死人！

小籃子裡的紫羅蘭，被灰塵弄致白濛濛，仲有油漆添！由於紫羅蘭的葉唔可以濕水，如不便會枯死，所以我們都唔能夠同佢沖涼，變回翠綠原貌！可憐的紫羅蘭啊。。。

工程與大灰塵

因為樓上新租客大裝修又起地台，變相整爛埋我家屋頂（露台，廁所，廚房，廳），有很多處露鋼筋，跌石屎，靡爛不堪！上星期五連忙向房屋署備案，他們派人上來查看，立即又約了星期一（即今天）進行修葺工程！

由昨晚起，我們已用大黑色垃圾膠袋及紙皮舖滿一屋，左包右包，但凡處理過裝修的人都會知道，砂石塵的威力是何等巨大！縱使我地一切包妥，但當我剛才放工回家，一入門口我已想死！。。。

灰塵四野，伸手勉強見到５指，據說工程弄足９個鐘，父母正在收拾殘局！我見狀真想發脾氣！。。。因為下午打了波，成身汗臭（雖然我已帶衫帶褲帶埋 bra top 去換），真想快些沖涼洗衫！不得已，我見媽媽著手處理廁所，向來怕熱的她汗流浹背；那邊廂爸爸也行來行去唔知做乜（平時他都不會幫手做家務，就算肯做如抹下檯的動作，他都極其地 hea，抹左等於冇抹），算了！

至於我的僅餘＂私人空間＂，早已被灰塵圍封，除左大呼 oh my god 之外，我也心痛極了！我一手拿了幾張消毒濕紙巾，抹過我的電腦，書檯及書檯下的雜物；見情況開始受控制時，想起既然大家都未食飯，我就落去買外賣回來。我先去麵舖落了柯打，再過對面街麥記買 coupon 的 $16 餐！剛拿了矮麥記，就聽到門外嘩啦嘩啦聲響。。。噢，出面落狗屎！我半濕地拎著一袋麥記跑過對面折返麵舖，拎埋一袋雲吞麵等食物跑呀跑回家！汗臭加雨濕加霉味，我仍然想盡快沖涼換掉身上的一切衣物！

回到家，我爸率先食麵，媽媽仍在努力中！她有糖尿病，我怕她冇食野及勞動而暈，所以我把我那杯 coke zero 餐飲遞給她喝幾口，然後著她先食野！我處理埋餘下的廁所清潔就立即沖涼！洗了一身臭味，才敢站著食我的雙層芝士孖寶！食完又開工打掃！