曼谷手信

姐姐和父母四日三夜曼谷之旅回來，送我大口仔file和簿仔，以及一對鴨仔耳環做手信！

Ｏ仔和扭蛋

Lunch 時閒聊，我說星期六特意來 apm，為的是在 promotion 時買 EPL-5，同事即刻問我有冇在 facebook 裡面 LIKE Olympus PEN HK 個 page？因為有遊戲玩又有扭蛋！我說我以為買了部相機就有，但都冇。。。失望之際大家鼓勵我再去 apm，去拎扭蛋！

大家先回公司做紙牌人為我擋，而我就一人去 apm！原來要玩晒Ｄ遊戲，儲晒４個吸印先可以扭蛋！是次活動，我再贏多一隻＂Ｏ仔＂，以及２個扭蛋（一黑一銀）！我喜孜孜折返公司，急不及待把Ｏ仔取出攬著，然後打開扭蛋！

放工時途經 apm，我說現場添了許多個扭蛋，我想換走銀色！在車前倒後之際，你已幫我開聲，但我想換部白色，可是太搶手了！那位 counter 員工說有部紅色，你已給我拿主意，好就換紅色！我又喜孜孜的急不及待，邊行邊打開地把玩！

身旁的你看在眼裡，還莞爾的一句說我冇鬼用，還叫我請你食飯！

鋸扒撐檯腳

難得弟弟俾面，今晚出去茶仔鋸平民扒，$45一個有餐湯、大扒配大碟意粉加餐飲，平過連鎖快餐店，食到飽！

快樂攝影：由 EPL-3 到 EPL-5

為了下星期的 shooting，食完野就走去上海街搵廚師制服！步出地鐵，過條馬路，見兩條對街都係賣廚房／食肆用品，大小型都有，真係好壯觀！沿途仲見到一幢名為亞皆老街紅磚屋的建築物，唔知入面係Ｄ咩！。。。行完了，格過價兼偷影了幾張相就轉場去 apm！

一連３日都有 promotion pool，如果喺上面商店買 pen 系列相機就有禮品送，岩晒我！由於我心儀的 EPL-5 定價為 $5999，walk in 問過百老匯，佢地賣 $5899，而豐澤竟然係 $5600！嘩，相差咁遠！

豐澤個 sales 好好，不厭其煩教我用，講過部機的所有 function！唔單止幫我貼了塊保護貼，加了個 part，仲送左好多野俾我！買了相機再落去樓下 lobby 換禮品兼影相！除左本身 Olympus 的禮物包，個哥仔又係送多左個 pen 公仔俾我，仲要係粉藍色，可愛到不得了！

我拿著一大包＂禮物＂滿足地回家！拎住咁大袋具份量的東西，坐骨感到痛楚，但今日又係好開心！話說這系列的相機，由 EPL-3 開始我已想買，但一直不捨得。。。到而家新出的 EPL-5，咁岩做 promotion，我同自己講，鐘意左咁耐，自己又鍾意影相，其實分期都唔係好貴，我諗左好耐最後決定買下這頭好，而家佢仲成為我嘅伴＂旅＂，因我會帶埋佢去英國！

Happy Friday

星期五心情有點起伏，早上轉 sad，亂諗野，諗過 resign 的事；下午心情恢復過來，晚上依舊 OT，總括全日：朝 9 晚 11:30，連醫生都睇唔到但我好開心！

苦中一點甜

原來你係記得嘅......告別我的戀人們！I am pleased with that！

飯堂

每逢週六週日，包括公假我都會2：30後黎呢度食野，我食嘅都係獨孤一味，一個編號「0630」嘅下午茶餐：厚牛油多士、煎雙蛋、兩塊豬柳、熱飲！（$22）

翠華

星期六、日兩天的 tea time quota 都俾左翠華：星期六食常餐，大大份足料炮製，佢片麵包好得、d 蛋又滑，好似北海道牧場果d 咁！至於星期日則食經典嘅沙爹肥牛湯河配凍啡，好耐冇食過味道依然，very good！值得一讚是呢度嘅粟米汁，夠鮮甜！

The Library cafe @ Harbour City LaneCrawford

第一次試這裡的咖啡，我要了 Vanilla Bean Latte，呷一口咖啡醇滑吾澀，但冇 vanilla 味？！而好友那杯 mocha 就好得，濃厚的味道，似唂古！

等待康復

放工後去旺角睇醫生，book 7:15 終於等到 8 點先有得睇！入到去講左我的情況，以及上次施針後的感覺，之後醫師替我檢查，並按過腰骨，坐骨，尾龍骨等位置，他說今日唔建議我針灸，只是幫我經筋拉動，因為醫師說針灸後會恢復八，九成，餘下的要等佢自己康復！

會診後醫師教我３個拉筋動作，叫我唔好太遷就患處，咁樣會唔好！接著，醫師知我易抽筋，佢叮囑我唔好飲凍野，唔好食糯米和牛肉，因為這２種食物會令Ｄ筋縮，對筋脈唔好！其實我都唔太飲凍野，因為我會肚痛；至於牛肉，除左肥牛米線／金菇肥牛卷外，我都幾乎唔食牛；而糯米嗎，我都幾愛吃，恐怕以後食少Ｄ啦！

語畢，醫師說再過兩至三星期就會康復過來，然後著我可以放心離開，他還唔收我診金！另外，我又問他 12 月可否坐長途機？他笑說我去邊度都得，有他這一句，我安心了！在這裡，我想藉此機會，衷心多謝港恩中醫診所的李小莉醫師和陳練泉醫師！

離開醫館，離開這幢大廈，當下我好想告訴他。。。但，不可以！。。。

人生第一個在職的 annual leave

今日終於遞假紙，請人生第一個在職的 annual leave！早個半月，為的是請 12 月頭的假。。。可是，老闆唔批！。。。

希望佢只係說說笑，只係遲批而唔係唔批！

永遠懷念你！

為什麼為什麼，由得悉你的離去－查證－接受－惋惜，連日來都令我想起 TVB 的日子！我雖然沒有正式跟過你，但卻接手你最後一齣＂爛尾＂的劇集，參與＂救火＂；也，算是跟你有一點緣吧！而通過其他與你相熟的同事／朋友，也跟你有過幾面之緣、飯緣，一切一切，像memory！今天，從報章看到你的治喪安排，artists 們對你的憑弔，我心裡不是味兒，像未能接受也得接受那裡緊揪心感覺！

司徒，我不知道你是否信佛，但也祝願你早登極樂，一路好走，永遠懷念你！

Sweet 手信

多謝你的西班牙手信：Paleta Iberica Etomas＋巴塞扭扭筆！你說淨係我先有支筆，聽罷我珍而重之收埋；而包 ham 仲係最大包最貴嘅！我個咀冇笑，但我個心在笑！

放工去 market place 買蜜瓜（用來夾 ham 食），可惜那裡只有一個個的哈蜜瓜，於是我去後街惠康＋生果檔，都冇蜜瓜！我折返 market place，諗住買半個哈蜜瓜回家切件，點知俾我見到有生果盤賣，仲係 $16.9 一盒，裡面有齊蜜瓜和哈蜜瓜加西瓜，仲唔駛切添！我一口氣買了２盒回家！回到家 dinner 後就和父母食 ham，好好食，好開心！

風水解決

睇雅虎新聞睇到一段某風水師追討某集團主席 130 多萬，內容不值一提，最爆笑就係市民的 feedback，其中一個讀畢這新聞回應話：＂風水問題點解唔用風水解決！＂夠頂癒，我真心笑鳥！

大S 高露潔美白牙膏

終於試用了二個月！廣告說用一星期牙齒顏色會白一個色階，我用了八星期，照推論，齒色理應吾白四個色階，至少都白一、兩個色階呱，但結果，如之前用過的其他牌子美白牙膏般，冇白到！。。。吾通要好似代言人大S 般，著大紅色裙、大紅色唇膏、塊面化行晚妝，先「映得出」d牙係好白？。。。嘥氣！

咖啡迷之福

不起眼的茶餐廳、位於聖十字徑馬路邊，甫推開門裡面客人爆滿，幸好有一張卡位！

看了餐牌，我要了五香肉丁炒公仔麵＋熱咖啡這 tea set！等著時我看到檯面肥肥圓鼓的糖罌、挺得意可愛。過了一會，侍應先端來餐飲，一瞥我就時嚇了一跳！嘩，透明的杯碟，裡面漸變色的咖啡清晰可見，是即磨那種！我回頭望一望廚房水吧，見一部咖啡機，當時店員正在烹調另一杯咖啡，見她剛落了鮮奶，唔怪之得杯咖啡咁幼滑、咖啡味醇厚濃郁啦！一杯普通的餐飲熱咖啡，這裡竟用即磨咖啡機調製，嗯，此店實在誠意可嘉，是咖啡迷之福！

天意

暫時，我最想去的地方是：英國、捷克布拉格、西班牙＋馬德里＋巴塞隆拿、日本！

本來打算上年去日本，點知撞正地震，所以改去了韓國！今年本來打算請 annual 去英國＋法國 OR 布拉格，可惜撞岩跌親，連戲院坐位都咁辛苦咁痛，又點坐 12 鐘頭飛機？就算半個鐘企一企行一行，落機後我都冇力拉行李，冇法子拿大包細包，沒體力周圍跑跳碰。。。天意！

你與你的她 17 日的旅程快完了，玩的應該很開心吧！是次你們去的地方，正正就是西班牙＋馬德里＋巴塞隆拿。。。其中一個我想去的旅程，還可以現場看巴塞！這段時間，旅程中你有沒有想起我？午夜夢迴有沒有見到我？。。。沒有你在鄰坐，公事上我一人可以應付一切，包括所有危機和突發事件！而且，你個部門你的下屬們我都兼顧得好好，呢半個月沒事幹發生！你，可以安心了吧！就因為臨行前你的一句：＂交俾你啦！＂、臨上機前的通訊，我不敢病不敢請假，更不敢看醫生。。。我，很傻了吧！就是沒承諾的一切，我在堅守什麼堅持什麼？就是你的一句話？也許，天知我會想念你，所以這段期間要我跌親，讓身體的痛佔據我的腦海，無暇去多想什麼！的確，我整個人被痛楚和工作佔據，少想你的一切，接受沒有你在身邊的日子，過著我的活，情緒不會受你大小事情動靜影響！天意。。。

下星期一你就回來了，我，又要怎樣面對你呢？我唔敢奢望亦不由得我去奢望，只想你一直只當我是同事，甚至只當我是一個很有默契、能夠在事業協助你的伙伴，如是者，我就可以不沉迷於你、不迷戀於你。

食

這星期 lunch 食過幾好味的食物：日竜的辣味三文魚飯，以及佳閣的牛油大蝦米形意粉！

忍無可忍

如果要搬出來住，我有充足資格和原因，只欠缺的，就是錢！．．．

一直都冇一個屬於自己的天地、自己的空間（莫說房間）、自己的私隱及抖氣位！甚至連一張自己可以瞓覺的床，都要等家姐結了婚才可瞓佢張床！

自從ｎ年前，我們一家六口搬進這裡，一個四百餘尺的地方為家（每人約勉勉勉強 80 尺，僅符合政府的“標準”！．．．好諷刺）。我一直唔明，就算父母幾重男輕女都好，點解細佬可以由細到大擁有自己一張床，一個角落的位置，有玩具，有書檯＋椅，有自己的小天地？而我，一路要瞓廳，做廳長！對於女孩子來說真的真的十級不方便，莫說很容易被吵醒、睡得不好睡得不穩；觀乎這張“２座位”的梳化，長度根本不夠用來睡眠，瞓廳嗎？又冬凍夏熱．．．仲有，弟弟一路成長，又好客，成日帶眾男眾女上來（特別是暑假的２個月），打牌打機玩電腦吹水打邊爐飲野．．．屋企地方淺窄，容得下你們一班年少輕狂的青年人，卻苦了家人！．．．你地未走，我瞓唔到；你地未走，ｄ袋／手袋／籃球完全把我的床（沙發）霸佔，點瞓？！．．．）

除左瞓唔好瞓唔到之外，我又很多時 homeoffice；所以，一張電腦檯（我已唔敢用“書檯”來形容！），一張合適的椅子，對我來說，又是何等的一個“奢侈”！

我迄今仍然屈就在一張從走廊拾回來當書桌的東東（隔離屋唔要丟出來我拾回來用的灰色四方框“傢私”！），坐就坐在一張比一本雜誌還要矮還要細、那怕是供２、３歲小朋友用的小椅，不論大小、高度都強差人意；那小椅的 cushion 位，早已坐扁了好多年．．．長期“屈坐”在這個位置，加上舊患（其實是家暴，關於它的故事，可笑又可悲，或許日後再說出來），我的筋骨早已被殘害得深，加上最近呢次的跌傷，我已不能再“屈坐”在這個又細又窄、距離又短，對腳又伸唔到的“工作間”！我，實在受夠了！

受傷第廿一日

腰骨坐骨腫脹，我背下冇乜力又痛，行路又拐又慢之餘又坐吾得耐，連牛仔褲都著吾到，唯有著 legging 和布鞋！呢對 Adidas love strips 首度開齋！

佛鍊

星期六姐姐幫我去佛具店串番好條象牙佛珠，突然心血來潮去某元朗細廟，當時已差不多關門，但那細廟好似在等她的前去般。。。這條象牙佛珠我戴了 5 個年頭，大事化小，逢凶化吉。於 8 月 27 突然瞥見條佛珠繩子幼到快要斷，免得它真的斷掉，我就索性除下，然後用袋子袋好，放進手提包裡，實行換個方式，依然每天都＂戴＂著它！沒戴了後，9 月 19 日我就跌親了！

講番姐姐，她剛添了香油打算離去後，突然有位廟祝婆婆上前來，問所求何事？姐姐說我整親、幫我求健康，說罷那位婆婆說了句：＂與佛有緣！＂，隨即更在佛器抽屜蚡取出一條刻有象徵觀音娘娘的蓮花座圖案，一條黑瑪瑙手鍊送給姐姐，說：＂送給妳所祈求的人吧！＂

真的事有湊巧，那邊廂我正於荔枝角接受針炙治療，過程雖痛，但我腦海卻念起黃大仙的樣子來，而整個針炙過程很平安順利！

佛鍊珠數的意思：

廿一顆：表示十地、十波羅蜜、佛果。

十九顆：中間引出穗子那一顆，代表＂佛頭＂！餘下的十八顆，意義與 108 顆相同，表示永證百八三昧（又稱＂三摩地＂，意指專注於所緣境，而進入心不散亂的狀態；簡單點說，說即是止息雜念，使心神平靜）而斷除百八煩惱！

心藥

失守的心情，在這地見到這人，打從心裡笑出來！

轉場，再睇尾龍！

今日 11 點起身，因為本存摺滿晒，要去換簿！銀行勁多人，counter 只開了３個，換完簿都成 12:45！期間等候時，我坐著等，因為坐唔到所以要用手撐著，有Ｄ職員見狀即問我咩事。。。（可能我姿勢太騎呢）

換完簿，行去屋企附近的中醫綜合中心，見佢門口有４個醫生，當中３個係女醫師，所以我就入去問問！（以下用＂Ｒ＂簡稱果個 reception）

我：＂今日有冇女醫師應診？＂

Ｒ：＂冇喎！＂

我：＂咁幾時有？＂

Ｒ：＂星期一！＂

我：＂係咪得一日？仲有冇其他日子？＂

Ｒ：＂仲有一日＂

我：＂咁邊日？＂

（其實佢只要俾個更表我睇就得啦！）

Ｒ：＂你係咪想睇女醫師？＂

（我心想，這個當然啦，唔係問黎做咩？？？）

我：＂咁呢度有冇Ｘ光照？＂

Ｒ：＂冇喎！＂

我：＂咁你地可以轉介嗎？＂

Ｒ：＂可以！＂

我：＂Ｘ光在那裡照？＂

Ｒ：＂你住邊度？＂

我答完，佢就話：＂哦，好近唧，你坐丁丁去香港仔就得啦！＂

我不敢Ｏ咀：＂你係咪話，我坐丁丁去香港仔。。。？＂

Ｒ：＂係呀！＂

完全吹脹！！！個 recept 真係廢到爆，問一句答一句。。。

之後去對面麥記食野，人太多只剩下 bar 檯！這張 bar 檯椅真係考起我，我勉強半邊屁股坐下，都痛，坐唔到！冇心機，食完就買一pack安怡回家！

我上網搵港恩中醫！為了遷就睇女醫師這個 criteria，於是去荔枝角睇。。。坐了一個鐘地鐵終於都到！

呢個李醫師，人又靚，談吐欺文得體，真係好好人，可惜落針太 professional 又或者我太傷，所以好痛！當中，落腰針一煞，痛到左腳自動彈起，李醫師問係我自己郁定係Ｄ神經 detect 到然後自己反應彈？我說係佢自己彈！。。。之後繼續落腰針，痛到我忍唔到嗌左出黎，李醫師話係正常的痛，因入面有好多氣！（條腰完全承受晒尾龍和坐骨，乃至成個人的重量所致）15 分鐘後針完，條腰痛之餘仲梗晒！我坐在 lobby 等照 X ray 的轉介信，再見一見李醫師就走了！

由於我喺荔枝角睇的關係，所以佢轉介我去荃灣Ｘ光化驗中心，因果度都有港恩中醫，佢仲俾埋一個陳醫師的卡片我，說推拿男醫師會夠力Ｄ！。。。睇完，我心情低落，一方面諗起我請唔到假，另一方面又要去荃灣睇。。。實在太遠了。。。。我唔開心！

駱駝女

Web surfing 看到一篇＜男人討厭女人穿甚麼？＞，當中有３項都是香港女性近年的裝扮：

UGG Boots：鞋子沒有線條，走起路來像駱駝，而且很臭。

Leggings：襪褲太貼身，沒有神秘感。

Harem Pants：男人覺得人穿了低襠褲像尿布，看不到女性的線條美。

令我失笑的，就是「UGG」那個──「走起路來像駱駝，而且很臭。」實在到題而絕核，嘻嘻！

補鈣

特登買安怡和鈣思寶，希望補補骨補補鈣！

birthday k

Esther, happy birthday~

自己試下治療

睇完＜賤熊30＞跟住喺 misocool dinner，傾到打烊先走！

尾龍受傷11日，為 ready for my next flight，試下長時間於同一位置坐（所以揀睇戲），喺106分鐘吾郁吾企的情況下，結果係......痛！