新 CAFE

東廣場入面間＜早霸王＞執了，換了間新的 CAFE，星期四 LUNCH 前來一試！

它的 SET LUNCH 六十蚊以下，同出面的食肆差不多。。。 我要了白汁忌廉雞肉長通粉＋芝麻醬沙律＋熱檸茶！

 等左一陣（都幾耐）終於有得食！用紙製食具上檯跟之前的＜早霸王＞一樣？是易手了嗎？講番食物，個白汁稀左Ｄ（也如易手前的一樣！），但尚算入味！雞肉不多，但醃味欠奉，食到一陣雪肉味！長通粉很多很彈牙！至於個沙律，夠多沙律菜，芝麻醬好夾，都ＯＫ啦！杯熱檸茶，佢用英式茶包加檸檬製成，是另一種風味！

不倒杯

聽過不倒翁，而家有一只新專利家品，叫不倒杯！偶爾從網上見過，一直心思思，趁而家用緊果隻鬆弛熊保暖杯（用了３個月，佢對眼，鼻竟然甩色？！。。。）有點異樣，不如買兔一只保暖杯以備不時之需也好！（又一個很爛的藉口）

不論工作桌面或是電腦入面的＂桌面＂都堆得滿滿的我，成日冇位放杯，放了又打瀉，這個不倒杯真的合我何車！

它有幾掂，可以 CLICK 入下面條 LINK 睇下！（有解說有片）
http://www.themightymug.com/

它有多種顏色，其實白色，紫色都很美，新出的限家版橙色也很悅目。。。千揀萬揀之下，最後我要了像鰂魚涌地鐵站，也像 TIFFANY 深一點的藍綠色！從網上購買付款，只要５天就送到來了，折換港幣連運費，合共 HKD$250！價錢不平也不貴（我在台中買一只星巴完的保暖杯也要接近３００元港幣呢；一只 SANRIO 卡通人物保暖杯，也要＄２５０至＄２８０）。如果實用，也算抵！

收到後我立即試試它的不倒功能，好好玩！然後我用熱茶浸一晚清清它的簇新＋膠味，再以暖水沖洗便可飲用了！

***PS：它的保暖功能似乎不夠耐，斟了約９８度的熱水，只是２個小時便開始凍！鬆弛熊也有２小時以上，而 THEMOS 保暖杯則最勁，可以保溫成８小時！

山楂球

公司樓下某舊式工業大廈裡面，有一間批發零食舖，佢以廉價招徠，每逢午飯時段及放工後客人都絡繹不絕！之前買過 $8.5 一瓶的 ILLY 咖啡，$4 一罐可樂....各式平價朱古力薯片等等，都真係幾抵！前天又去，諗住買山楂球，可是已售罄；唯有買了芝士魚條（$35一大包，出面小包都要成 $28）、荔枝味香口糖（$6.5）及好立克糖小食！由於真係好想食（唔知係咪食得多西藥個口有Ｄ苦，所以特別想食？），於是特登搭多個站，去北角雞蛋仔拐彎的另一間零食店買！

 去到好彩仲有，$13 一瓶，我揀了滿滿的２瓶，如獲至寶的抱回家！其實，我真的好喜歡食山楂球，每粒外層被白砂糖包裹，薄薄的外層包著山楂糖心，當小吃真的一流，粒接粒咁食，不到２天就可以食完一瓶！

大寒

原來昨天是氣節---大寒！一直發冷兼沾寒沾凍，一連睇了２個西醫１個中醫，各醫生批的症狀都不同？！。。。

第一位西醫：冇野架，我幫你攪攪佢！（之前細個都睇這個醫生，當人地 $110 時，佢就收 $220 診金！一直都覺得他有耐性，Ｄ藥好夾！可是，當公司醫保名單中有佢時，由嗌名到出番黎，成個＂睇醫生＂過程只需８至１０秒，至於配藥方面。。。嗯，唔講了！）
批症：感冒！（$30，bupa）

第二位西醫：嘩，病左咁耐！有冇外遊？有冇咳？有冇痰？有冇發燒？冷親下唧，要戒煎炸熱氣野！（細心照鼻照咽喉，把脈＋聽診）
自從細個搬來這區就睇他，現在他因加租而喬遷至隔２條街，我都仍然睇他！因為他比較有耐性，會聽病人講病歷，唔會因為出面多病人等而馬虎，快速應診！
批症：上呼吸道感染！（$255）

第三位中醫：脾虛，氣虛！
睇他是姨丈介紹，當時我又係咳到半死，久咳未癒，睇他吃３日藥攪掂！（個人認為他只限於睇咳，之前睇過感冒，發燒，皮膚問題都欠奉！）
批症：上呼吸道感染！（$290／三日薬／每日2次）

我先是食了一日中藥，但發冷情況變本加厲，似乎柴胡和防風救不了我，於是轉食第一位醫生開的西藥先！食完個人好＂榮＂好＂吽＂，好似大象被打了麻醉劑咁。。。冇法啦，呢Ｄ一定要多休息的！

食了一日半的西藥，畏寒情況似有改善！又或者是，今日最高有成廿度，救了我唔少！但上午至午飯後，我背明，腰，手都先後發冷起毛管。。。希望晚上食多轉藥會好Ｄ！

和風板上燒

去美心食LUNCH，瞥見除左燒味／兩餸飯／咖哩什麼什麼飯之外，似有新選擇，就是：和風板上燒（$49，連餐飲）！它有牛肉，三文魚，芝士雞肉可選；今回我們要了後二者，SHARE 食！

它有點似 PEPPER LUNCH，用鐵板上，板上圍有紙條！飯有黑椒味，芝士一舊舊（仲以為係芝士汁／醬），醬汁唔夠多，不過味道令我驚訝！我覺得幾好食幾香口，但＂對食人＂則覺得唔好食。。。以這價錢（相比 PEPPER LUNCH）又包餐飲，算係咁了！我沒有帶優惠券，如果唔係，仲可以平兩蚊！

芋頭小叮噹餅

一向都食開紅豆餡，經過見到這些小叮噹餅，餡料是香芋，十蚊一包，買！

打開試食，其實食唔出香芋味！（唔知係咪食慣了紅豆？）不過，當小食茶點，而且獨立包裝，一口一餅，有意思有意思！

紅絨衣架

用一般鐵線衣架晾衫掛衫，有時真係會將Ｄ衫掛到兩個膊凸出兩隻牛角！之後轉用成個膠製的，下面兩個彎角總會把衫／褲撐大變型！一會兒見到日本城／實惠有一些小角膠衣架，可是上面個掛彎又固定的，不可轉動，使用上來比較麻煩，不夠靈活！

從團購看到這款絨製衣架，上面掛勾又可隨意轉動，掛衫唔會起＂牛角＂，仲要係 $69 兩打，挺划算！星期六特意去旺角取貨！

***唯一要挑剔的是，不可挑顏色！本來我想要天藍／洋紅／粉紫的，萬料不到我的兩打衣架是大紅。。。

小銀包

電影＜每當變幻時＞裡，呀妙說想要個＂似 PRADA 的 GUCCI＂銀包（銀包的背後意義請重看這電影細味）；我也曾借用這譬喻，說想搵個＂似 BOTTEGA VENETA 的 ADIDAS＂銀包！。。。

８年前我買了一個小巧可愛的 ADIDAS 銀包，只是 $180，一用就用了８年。。。

用著用著，日子過去，儘管它的 SIZE 比平常的細，所以我往往要把紙幣摺兩摺才可放入，付款是又要逐張取出再打開，其實有便麻煩和不便；不過，我也習慣了！

生日時曾經想給自己買個新銀包，但又冇特別心儀的款式，ADIDAS 的銀包款也未見驚喜，於是又擱置！後來找尋喜歡的 COMME DES GARCONS BLUE STARBRUST WALLET，找來找去就算有的，但價錢方面連運費也要 $1800，諗過度過又擱置了。雖說貴買平用，不過。。。

這個月，我的小 ADIDAS 銀包的外層甩了一塊塊，內籠好幾個位置也因＂年時已久＂而致出現＂龜裂＂，它是時候退下了！

新一年新開始，終於的起心肝再找心儀銀包！看了多個外國網站，我知道世界上根本不會找到＂似 BOTTEGA VENETA 的 ADIDAS＂銀包；於是，我就找 BOTTEGA VENETA，因它的織皮很愜意，顏色方面則考慮紫色和藍色！某個外國 OUTLET 網站裡，價錢方面比我想像中的便宜（撞正減價以及免運費，只是數百元）！終於，今天下午敲定了，落了柯打，希望一星期之後可以換新銀包！

口香糖

為消隔夜口氣，或有時作提神用，偶爾食粒香口膠都不為過！不過我最近就守食呢隻無糖口香糖，減價 $6.5 一盒，都唔錯！（為了儲便利店的印花，平平地搭買一盒，可以考慮下）

之前試過檸茶味，幾好！趁仲係減價，試埋另外的味道先－－士多啤梨味及藍莓味！

薑茶

之前說過我成日沾寒沾凍，就算著好多保暖衣物＋暖爐都仍然由心凍出來。。。星期五在公司又係咁，立即沖黑糖蜜糖薑茶，希望可以暖下個身暖下個胃！

唔知係咪個人本身虛，加上之前食了西藥，喝一口舌頭很辣但落到個胃雖暖但有Ｄ痛，喝完一杯，成個人似感到好點，不過又維持唔耐！嗯，我係咪要長期睇中醫調理一下身子呢？

GROVE團購－－意粉篇

上完中醫課，就拿著影印本去GROVE，今次要試它的意粉類！由於我是＂芝士焗控＂，所以就試意式芝士雜菜焗千層闊麵！跟餐有杯即磨咖啡！

 意式芝士雜菜焗千層闊麵：熱騰騰的，侍應端來已香噴噴！一貫的＂相機食先＂，然後我用叉子掀開面層，裡面的香菇大大隻，闊麵的汁料名夠又多，好JUICY！味道方面：很入味，芝士跟茄膏很夾很濃；香菇好滑好鮮甜；還有紅蘿蔔及西蘭花作伴；整體份量剛剛好，女仔食夠晒飽。。。差點我也吃不完！

個人認為，好食過PIZZA HUT，意粉屋及PIZZA EXPRESS！團購價來說，真的又抵又好味，值得推介！

懷舊小食

偶爾經過街邊又折返，原因係見到熟悉的銀色小鐵箱！它賣的是懷舊小食－－龍鬚糖及好耐冇見過的糖蔥餅！我毫不客氣，一口氣買了一盒龍鬚糖（$13）及２件糖蔥餅（@$7），準備等一會上佛課跟姐姐分享！

等伯伯整糖蔥餅時旁邊的外國人問我這是什麼，我就喜孜孜的介紹，她報以微笑，跟伯伯要了一件糖蔥餅試試！付款時，伯伯還打趣道：＂一盒龍鬚糖就夠啦？＂我說夠了！（其實我的主要目的，是糖蔥餅呢！）

廟街煲仔飯

好耐冇去廟街食煲仔飯了！由Ｎ年前的十八元一煲，現在普遍來說都要三十五元！放工後陪他去完深水埗腦場，然後搵食！我們點了田雞煲，鹹蛋肉餅潤腸煲，仲有豉椒炒蜆。如果不是腸胃不適，好想叫埋煎蠔餅及椒鹽鮮魷！（最好有埋青島！）

田雞煲有薑絲入饌，白飯滲出老薑味，仲有飯焦！如果多一點田雞仲好！鹹蛋肉餅潤腸煲：本身肉餅送飯好夾，加埋鹹蛋潤腸，HOME FEEL 的感覺，令我諗起呀＂女麻＂。不得不提豉椒炒蜆，佢Ｄ汁可以撈飯，一蜆一肉，唔似出面食肆７成肉３成殼！可惜係唔夠大碟！

是夜，天清見月亮！我們坐在店外大街中，旁人熙來攘往，耳朵傳來附近的粵曲聲／夜店的駐場歌手之丹田歌聲，很香港很地道風味；現今繁忙的都市人，能有幾回可以偷閒一刻，以夜幕當被，細味老香港／街坊的人和事？

將軍澳新都城布丁狗

下午後 JOIN 家姐姐夫及他的家姐姐夫 + CHLOE 妹妹，到將軍澳新都城布丁狗展！影完一輪相，＂濕平＂完再去 LEONIDAS 食布丁狗特色限定 TEA SET，盡興！

布丁狗 TIRAMISU 小杯：好好味，唔太甜！口感濃厚且滑！

布丁狗 HOT CAKE+雪糕：HOT CAKE 厚度夠（非薄薄求其一片），淡黃色的雪糕似奶油味，唔太甜！伴以雜果，朱古力醬和忌廉，小朋友至愛！

布丁狗雞肉凱撒沙律：份量和賣相一點也不賴，唔會因為係下午茶點而減產！

布丁狗 MOCHA LATTE：有點驚喜！成杯的溫度適中，不熨口！細滑的泡層混以濃濃的朱古力味，像谷古但唔澀唔苦，朱古力味好出，厚醇不膩，不似黑朱古力！

其實仲有布丁狗檸檬芝士餅及焦糖布丁兩款，可惜已售罄，如果唔係一定會試！

GROVE 團購－－三文治篇！

之前在團購買了幾張 COUPON，今日中午上完堂就去換三文治！（$26／一份三文治＋一杯即磨咖啡）

我要了煙三文魚那款，份量十足，好鮮好好味！杯即磨咖啡比想飲中好飲，烘焙及咖啡豆味比例均勻，不太＂火農＂不太澀！落一包糖便可！

下次再試佢嘅雞肉凱撒三文治先！