窮人最好唔好病！

中秋開始發燒.....退燒之後之後就變成感冒+咳嗽，一直都唔好！截至現時為止，睇左５個醫生啦，今個月花在醫療上已屆 $1500，呢筆醫療費，要在膳食交通上節流來 BALANCE 番至得！（記得上次４至６月睇皮膚，又係用上４位數字來作醫療睇醫生，加埋今次，我近排都用成 $1500 睇醫生）

一直病一直唔容許休息。。。昨天凌晨２時半放工，今天晚上１１點幾放工。前者冇車搭，要坐小巴再轉的士回家，番到屋企門口又＂如常＂落左＂裇＂，有家歸不得，因為太病太倦，我連環按了３次門鈴，驚動了隔離屋。。。我都唔想架！

以呢間公司的放工時間。。。我以為自己還在電視台當編劇的日子。。。什麼＂有能者居之＂，什麼＂能者多勞＂，講下就得，係咪咁樣一句就可以人工少少工時多多呢？我係人黎架！

中秋一病

唔知大家有冇同感，人大了睇醫生都唔會睇一次就好！特別是那些連鎖醫療診所。。。

中秋前一天發燒，連睇２個西醫，又係燒下退下又燒下，不得不＂先斬後奏＂請病假！（幸好我靖了病假，因為某些事，老闆又試突然要人上大陸跟LAYOUT跟印刷的事。。。情況就如上次我無啦啦喺紅色警告下要飛曼谷一樣！。。。那位同事即日來回，凌晨３點先可以番香港，翌日又要番９點！。。。噢！）

星期五才勉強番工，跟番果百幾個電郵。。。結果又係ＯＴ到晚上十點幾！（已很好，因為之前成個月都成凌晨１２點後先放工！）之後今天，上上下急救課已覺不適，放學即去睇中醫！甫坐下中醫先說感冒入少陽穴，於是我會有感冒＋咳＋暈；把脈時中醫覺得不得了，我的手和額很熱，就像發燒那樣！他立即取出探熱針，但冇燒？！之後他再摸摸我頸後，又是很熱，幾個位置的跡象都是發燒，於是再用電子探熱器，結果又係冇燒，他百思不我其解，我更不會知道是什麼啦！只見他開了小柴胡湯加唔知什麼的中藥給我！

上網查看，原來都有人係有齊發燒徵狀而探熱結果冇燒。。。有的說是身體免疫力問題，有的說是別的病潛伏先兆！

今年中秋一病，又睇了九百元醫生。。。。

中秋病了

一般公司中秋節都會放早，我果間都唔例外！但＂可唔可以＂放到，就。。。。

今日我都係ＯＴ，由於唔舒服，所以＂早走＂！飛地鐵去睇醫生，門口竟然反了個＂休息＂牌？？？明明今日唔係公眾假期，明明未到法定關門時間，明明醫生護士喺度，仲有２個等拎藥的病人。。。。都唔睇埋我！明天又是公眾假期，即係最快都要後日先有醫生睇，算！。。。

想轉睇中醫，點知某連鎖集團那間冇開，另一間街坊藥材舖＋中醫店，又落左閘。。。時也命也！算！。。。

行了一條街，搵到間涼茶舖，諗都唔諗入去要了杯感冒茶！一口喝盡，再去買麵包就回家！

因為某些私人原因，對上６年都會去睇舞火龍，影火龍，不過今年去唔到了，至少今天去唔到！。。。唔通，是天意？！

壁球

唔知幾時開始，我就想每年都學一樣野，興趣班又好，為將來又好，學來防身又好！之前學過詠春，學了日文（讀晒初，中，高班），學過有機耕種。而家學緊多媒體設計及網頁製作，同埋學急救！冇錯我的工作時間表已爆滿，weekday 放成凌晨十二點幾，唔計回家工作，的確冇時間；想學就要在 weekend 日子！

因為天雨關係，有時真係冇可能出去跑到步，我又唔想 JOIN 果D 連鎖 GYM & FITNESS 公司，唯有諗諗計，有咩可以一個人＋便宜＋架生不多不貴＋唔會因為天雨而影響的運動？於是我想起壁球！

前天決定扑搥打壁球，昨天早上去買拍買波，昨晚即刻上網 BOOK 場點知真係 BOOK 到，今天就去打波！（好彩今日打到波，因為成日都 KEEP 住落雨！）

一個人包場打波，估吾到半個鐘 non-stop 的運動量，流汗和體力消耗感覺媲美跑左 5 公里！呼~

大泥大白熊

有睇開大泥漫畫，有點＂香港幾米＂，很有意思很窩心很童話！知道大泥昨日有個工作坊／賣場，仲有＂皇冠版＂大白熊，真係忍唔住要帶佢番屋企！（質地／手工／毛質都非常好，而且價錢仲好平）

大白熊，您知道您好可愛嗎？希望您的快樂，樂天能夠影響我！

船襪

船襪的出現的確好方便，之前都買過襪檔（約$28左右）或出入口店（平至$6）果Ｄ船襪；什麼＂唔臭，全棉，有彈性＂等廣告字眼，其實質地和取貨地都差唔多（甚至同一地方拎貨），後來試過著 Catalog 減價 $100 四對果D，質地好之餘洗好耐都唔會變形或殘！不過過了一段日子，條橡筋就有Ｄ軟落黎，導致對襪會跣落腳板底，行起路黎有野ＵＮ住唔舒服！連 Catalog 都攪成咁，仲有咩牌子的船襪好著唔跣落黎呢？

昨天行過精品店見到有＂巴斯光年＂船襪，佢仲話有防跣矽膠喺襪後端，見只係 $29 一對，姑且一試！今日著去打波，真係冇跣落黎，話晒第一次著，又睇下著耐左，洗幾轉之後再作定論！如果好的話，心郁郁想買埋＂盧蘇＂果對！