亞加力膠 DISPLAY 層架 @ $12 店

之前見過係一倉倉的 (即是方型或長方型的亞加力膠 DISPLAY 盒)，某次見到 $12 店有一層層好似樓梯狀的。事隔幾個月，今天終於買了一個兩層和一個三層的，用來擺放小擺設。 是晚先將個三層的剪綵，放到書架上去，看來跟小擺設幾夾。

口健樂飛滋膏

爸爸下唇右邊生了三粒大飛滋，見佢講野唔得 (食野更加困難)，又合唔埋口......我以前用過一支淺綠+白色盒裝的飛滋膏好駛得，可是搵了好多區的藥房都搵唔到黎買，咁岩睇到電視廣告，於是喺萬寧買左廣告果支俾爸爸搽。

呢支口健樂 ($29.9) 細細盒，打開原來不是牙膏裝，而是好似藥丸般大小的鍚紙包封著。紅色的藥膏有點嚇人，不過唔理咁多，如果好嘅話，話之佢係咩色啦！

用它附上的棉花棒搽喺飛滋上，好快就變成米漿色的保護膜 (我覺得無論色澤和形狀，都似煲白合海底椰湯，D 白合甩離後那樣子)，一分鐘後用水漱口。漱口後乃至之後一天，飛滋位置都是 "白合片" 那樣，約 4、5 天後，飛滋就好了。問爸爸痛吾痛、乸吾乸？他說搽時乸乸地，被封住（即我說的「白合」狀態時）就 feel 到飛滋及周邊內唇肉化腫起左！（我和媽媽見到腫左情況都幾明顯！）頭一、兩日都覺得痛！（並不是包裝上寫的痛楚 5 秒即止！）

**由搽藥膏至 "白合" 狀態我都忘了影相 (冇理由飛滋都要 "手機食先" 嘛......)，未能 SHOW 俾大家睇。

苗柏

我：苗柏，你在燈上做什麼？

苗柏：吱吱〜

我：那兒很危險，你會變燒乳鴿！

苗柏：吱吱〜

這一分鐘，我看著苗柏看著我！……

或許，苗柏正在練習「『站』禪」呢〜

(*「苗柏」是我月中到東京玩夾娃娃機時得到的「新朋友」！那天剛巧香港刮颱風，風者命名為苗柏；有見及此，遂將「新朋友」取名「苗柏」！雖則依翅膀及尾巴的顏色推斷，牠比較像隻麻雀……翻查資料，原來「苗柏」Merbok是馬來西亞一種家鳥---頸部有斑點的鴿子，此鳥常見於郊外和荒地。)

Paul Lafayet Signature Crème brûlée，多謝 SMARTONE！

用了 SMARTONE 超過十年......今年終於 "第一次" 收到關於生日的 GREETING 和禮物！這禮物食得嘅，係老佛爺的法式焦糖燉蛋 (店售 $45 一件)。

今日係 LAST 一日換領，先 SEARCH 它的分店，再特登去 "最近的" SOGO B1 層換。出左地鐵，去到 B1 層，行了個圈都唔見，差 D 就想問人之際 (搵勻都唔見有職員或詢問處)，瞥見拐彎有人企 / 玩電話，咦，可能裡面仲有店舖喎！...於是就前去睇下，果然，老佛爺 COUNTER 就喺度！(它的兩位店員又係喺度玩電話...)

我遞上電話訊息，說來換 CREME BRULEE，職員輸入號碼後就著手整了！她先把一件，蓋上 2 匙黃糖，之後用火槍略略燒了 2 秒，就入盒遞俾我。還叮囑了句，叫我 45 分鐘內就要食！取過後我就離開了。

味道方面，由於我係 45 分鐘之後先食，所以上面層焦糖已經唔脆。個燉蛋尚算滑，但就唔係人人講到咁濃香......當然，它又唔係食評中所講的 "可能係世界上最好食的焦糖燉蛋"！總的來說，它不過不失啦！食完個兜洗淨之後仲可以盛小物，或作盆栽底盆！

手提吸塵蟎機

 姐姐拎來一部輕巧的手提吸塵蟎機，昨晚她來 DINNER 順道拎來給我！之前上網見到，心思思想買，不過它是連電線款 (即邊吸邊 LUNG 住條線，吸唔得遠...而且售價六百幾元，太貴了！) 新屎坑，我地於飯前時間又玩下先！

一盒包手提吸機一部，塵網一盒。先入兩粒中電，開機就試得！就以我張床為例，從東京返港換過床單至今，瞓了 2 星期！睇下有幾污糟先！

先吸床尾，再吸餘下位置+枕頭，最後當然要試下吸公仔......嘩，又幾污糟喎！希望 KEEP 住用，可以改善我的鼻敏感及蕁麻疹！

住家飯

姐姐姐夫來食 DINNER，菜式有：蘋果雪梨湯，蒸魚，金銀蛋莧菜，蒜頭豉椒蒸排骨，鹵水豆腐+蛋。

生活迫人以外的愜意

你有多久沒有好好看過周遭事物？-----蝴蝶採蜜、隙縫裡努力生長的小草、已長滿青苔的地階、地上的落葉、褪色的漆髹、鏽蝕的裝置、不同的雲霞、乍看還以為自己置身異地的棕櫚……所有的「存在與變遷」其實一直都在，就如一切的「起心動念」；不是歲月神偷作法，只是你有沒有「想要去」察看、想要去「覺」！

不用多，只要一星期抽十分鐘左右待在公園，親親花草樹木親親大自然看看綠，你就可以嚐到辦公室以外、冷氣房以外、生活迫人以外的愜意。

三十蚊樓下鐵板餐 @ 大家樂

香酥排骨炒烏冬鐵板餐，連餐飲只係 $29 (有 COUPON 減 $2)，即係盛惠 $27，又一拉上補下之選！

住家晚餐

有：青矮瓜蟹柳 (我仲以為係翠肉瓜添)，羅漢齋， 節瓜蠔豉湯

初一：煎蛋生菜麵

燻製魷魚

上機前買的包裝燻製魷魚，我這魷魚控一見就拿下入購物籃 (1050 yen，約港幣$70左右)。大大包，它以圈狀切片，少許煙燻味 (不是 "火農" 味那種) + 醬油味，魷魚肉質好彈牙。沒有類似金龜嘜果D又腥又乾又韌到咬唔開！唯一唔好嘅係，開封後不能封口，要轉用另一器皿盛載。呢包魷魚，真係令人食唔停，最岩送汽水！

東京藥妝平靚正推介-----撫子潔白牙膏

美白牙膏真係試過好多牌子，買下呢支牙膏係因為知佢加入蘇打粉 (我知本地團購曾經有賣日本某牌子的綠色小圓罐蘇打粉牙粉，不過價錢 $117，仲要等成個月先有得去拎，所以最後擱置了)，針對茶漬啡漬，藥妝賣 1200 yen，約港幣 $84 一支。

講番呢支牙膏，刷時有少少鹹味+薄荷味，唔多泡，漱口時感覺都OK。而家只係用左3日，等用完一支再話俾大家知佢美白牙齒效果O唔OK啦！

#東京 #藥妝 #撫子潔白牙膏 #撫子 #蘇打粉 #牙膏 #鹹 #薄荷 #美白 #茶漬 #啡漬 #Made in Japan

東京藥妝平靚正推介-----Avance Lash Serum EX 3ML

日本限定！呢支睫毛 serum，有 “育毛” 成份及 “長、濃、艷” 功效 (包裝上稱)，對於我睫毛 (其實眉毛都係) 疏落唔長又唔夠濃密，可以一試！(曾買過支裝的睫毛增密粉，形狀如指甲油，可以使用上比較麻煩，因佢係黑色纖維粉，使用時要合上眼，再用張紙巾墊住睫毛及眼袋位置，再倒D纖維粉出來，讓粉沾在睫毛上……對於大近視的我來說，未戴CON時睇唔到，戴左CON合眼又難對準控制…倒多了一手 / 一臉都係，眼瞼沾左反而變左熊貓黑眼圈…總之好難用…) 據說除可塗在睫毛，也可塗在眼眉。(1080 yen，約港幣 $70)

#東京 #藥妝 #Avance Lash Serum EX #睫毛 #育毛 #增長 #眉毛 #濃密 #Made in Japan

東京藥妝平靚正推介-----Shiseido Spotscover foundation (顏色：S100)

這Shiseido 遮瑕膏，貨架上寫可遮瘀傷、黑斑 (肝斑)、燙傷痕跡的粉底！有冇咁勁？帶了一盒亮色的 S100 回港。(佢有2色可揀：S100---light colour，S101---Dark colour)

質地係  Foundation mousse！包裝寫 1200 yen，藥妝賣907 yen (連稅)---正值減價，約港幣$56左右一盒。見佢講到咁勁，一於喺手背用黑色原子筆 (有點漏墨) 寫字，然後點少少 (真係好少，約四分一個一毫子咁多份量) 試下先！

質地好滑好易推開、而且唔 ”立” 身、好 smooth 冇龜裂紋，其實掃幾下已完全遮蓋原子筆跡，仲提亮了本身手背的膚色添。如果筆墨都得，咁我D斑斑同黑眼圈都應該得啦！又係一個平靚正之選！

試用分享：色斑，年齡斑都輕易遮到 (又係點小小塗搽而已)，仲均勻了膚色！連眼鏡托的印痕都遮了，勁！好似今日咁，我塗了十小時，依然冇甩粉冇龜裂情況出現。呢個將會成為遊日 must buy item，可以再入貨！(我知香港最平賣 $99，$108至$2XX 一盒都有)

#東京 #藥妝 # Shiseido # Shiseido Spotscover foundation #foundation #色斑 #黑眼圈 #遮瑕 #粉底 #龜裂 #Made in Japan

東京藥妝平靚正推介-----肌美精眼膜 Made in Japan

到日本去藥妝，那怕是指定動作！今趟東京之旅購入幾款美妝用品 (自用的)，率先試嘅就係呢款標明 “無著色，無香料” 的肌美精眼膜 (eye zone mask，wrinkle care)，一盒 1013 yen 連稅，約港幣 $70左右 (*現場有位女士一買買成十幾盒)。香港減價也要成 $11X一盒。這 eye mask一盒有 60 片，可敷 30 次 (每次敷一對眼，用 2 片)。

打開包裝盒，有一鍚紙袋 (像濕紙巾般)，打開封口貼，見有一膠片，它底下才是眼膜。(很細心的設計，為免開 / 闔封口次數加多而令眼膜乾涸掉)

試用分享：眼膜夠大片，基本上可完全包覆眼袋黑眼圈位置及上半的顴骨。這眼膜精華夠多，敷了廿分鐘也沒有變乾 (盒上使用方法說敷五分鐘，如自覺皮膚很乾燥可敷十分鐘)，而且沒有邊敷邊跣下 / 滑落的情況發生，非常緊貼固定。敷完眼周皮膚感到水潤了 (照鏡睇都見到水噹噹，不是乾到繃緊、皮膚不是死氣沉沉般 flat 的)，目測下瞇眼笑時眼角近鼻樑位的乾細紋 / 缺水紋得到改善，唔錯唔錯。個人認它平靚正、size細細，可作旅行用及皮膚急救補水用。

#東京 #藥妝 #肌美精 #眼膜 #補水 #缺水紋 #眼紋 #乾紋 #Made in Japan

DIY 生日禮物

儘管內餡是什麼也好，見到這個自製小封已覺得開心窩心。DIY 也是一種心意，至少那人知你喜歡什麼而去找尋製作。

兒童餐，大人見到都好開心！

起飛前在機場食個快飯，見到這個兒童餐已教我開心不已，約港幣 $54。飛機型餐盒，裡面有茄汁雞肉炒飯，炸蝦，肉餅，奄列，薯條，焦糖布丁和甜甜 CHERRY 一粒，配以粉紅色公仔餐具，好味賣相一流，兼夾 KAWAII 呢！

富士山上

有說回程時揀飛機右邊座位，起飛15分鐘左右便會見到富士山！有說，是真的！

米芝蓮一星拉麵---鳴龍擔擔麵

做足功課，預備好 BUY LIST，今趟東京之旅收鑊豐富 (但冇爆喼？！...之前去第二日已爆，今次有額外的 KG，反而未爆喼。)，其中一樣要買的，就係米芝蓮一星拉麵---鳴龍擔擔麵 ($216 YEN 連稅)。

帶了十個左右回港，在酒店已急不及待率先試食。打開麵蓋，加入熱水等 5 分鐘 (它建議 4 分鐘)，之後再倒入杯麵面頭那包醬料 (味道有點似午香肉丁的甜辣汁)，搗勻食得！

果然好好食！麵質彈牙有嚼勁，唔似一般 / 合味道 / 日清那種油泡麵質地。個湯底完成就係上海擔擔麵的花生醬湯底 (個人認為可以再濃一 D)，D 肉粒係雞肉和豚肉 (特登確認唔係牛肉才買咁多個，因為父母唔食牛！)，一句講晒，好好食！如果呢個杯麵鴞香港賣，恐怕好似之前個金槍魚麵，賣成三十幾蚊一個......

窩心炒飯

好耐冇食過 "屋企炒飯"......今次嘅炒飯有蔥有蛋，有下欄叉燒仲有少許薑，暖身飽肚之餘仲有鑊氣。一個最簡單的家常炒飯，滿載無限關愛。一家人齊齊整整便已足夠，寧吃開眉粥，莫吃愁眉飯！平淡是福。

菜肉魚

姐姐姐夫回來食晚飯，媽媽大展廚藝，菜式包括：蒸魚，鹹蛋蒸肉餅，蠔油鮑魚生菜，木瓜雪耳南北杏湯。

可樂個 fd？！自家足料羅漢果茶

媽媽應承了爸爸的晨運老友記，煲自家羅漢果茶，煲好後用平時儲落兼洗淨備用的膠樽，分別裝滿後放進雪櫃。驟眼睇，雪櫃內好似多左好多支可樂咁，有趣有趣！

紅磡冰室

回港後媽媽說好耐冇去過紅磡冰室，昨天我們仨一齊去食。去得果度，當然要食佢 "出名" 的瑞士雞翼麵常餐啦！(雖然要成 $46，不過一次咁多啦)

今次再食，個瑞士汁冇之前咁鹹；炒蛋好滑，蒜容包好足料好入味香口。至於個麵，如今有成 3 隻雞翼添 (之前好似得兩隻 )......杯鴛鴦飲得出佢個啡底係即磨果種，OKOK。

芝味蘑菇安格斯套餐 @ 麥記

有電子 COUPON，一於試下麥記嘅芝味蘑菇安格斯套餐 (原價 $41個幾，用 COUPON 減 $5)。

用牛油煎過的蘑菇幾香口，加埋半溶的白芝士，成件事同塊牛扒好夾；總括黎講呢個包唔錯！

父親節禮物---太極扇

早排聽爸爸說唔見左兩把太極扇，遍尋不獲.....於是上網搵，知觀塘有得賣，款多色多，而且仲有好多配套用品，昨天特地去睇下。

我揀了一把金色的太極扇 (平時只見到係紅色紫色的)，以及一對木蘭扇，爸爸見到笑不攏咀，仲即埸耍左幾下板斧。翌晨特登拿著新扇去晨運，他的晨運老友記紛紛說靚，又問佢邊度買，攪到老豆飄飄然。

元茜爆谷

睇過好多介紹，也找了地址等資料，到東京希望買到元茜薯片。結果只搵到一款，仲要唔係薯片，而係爆谷！都好，照殺。

回港後將佢開封！打開包裝袋勁大陣元茜味，心諗，正呀喂！初食覺得似鹽味的鹹爆谷，食入口反而元茜味不太勁，有點似紫菜味。不過食下食下，有 D 辛辣似的嗆，之後 FEEL 到左手前臂刺痛，繼而係左小腿位置刺痛......噢，蕁麻疹出來了......好辛苦。其實我只係食左約半杯 JELLY 杯的份量 (平時對於薯片類零食，一打開就會一下子食畢！)，我再唔敢繼續食了。

千人禪 2017

任何負能量，也能轉化成正能量！一直都想參加各式的禪修，但礙於種種情況下，最後只好自己在家坐禪，務求做到「寧可短，不可斷」。是日 (六月四日，感受和意義別有一番體會)，我第一次參與公開的禪修活動-----千人禪，還特地選坐墊區而非坐椅區，旨在「入鄉隨俗」用傳統的禪坐方式進行，以及看看自己的能耐。

是次活動假九龍灣國際展貿中心舉行，主題為「禪一禪，天地悠然」，場內一千五百多個位子幾近爆滿；藉著一天的禪修，放下雜念，好讓身心安住當下，長養慈悲喜捨「四無量心」，使自己身心好好沈澱下來。

在主持常霖法師簡單介紹後，再先後由德噶香港禪修中心及大覺福行中心多位法師帶領大家進行坐禪、開心禪、聲音禪、立禪、行禪、食飯禪、咀嚼禪、數息、等候禪等；讓我更明白「禪」、觀禪、禪修之作用、了悟「覺知」如實觀，通過坐姿來訓練身心安在當下、察覺「我」！完場還可把坐了一整天的充氣拜墊 (可放氣摺細放入小袋子裡！由於尊重大會故未能把場內充了氣的拜墊樣子拍照，見諒！)，以及常霖法師的圖文集《身心兩相安》帶回家呢。

今天禪修經驗殊勝，我欲以此經驗布施給家人朋友，以及一直與「苦瓜禪」專頁並肩同行的有情眾生。