矽膠鼻托

有戴眼鏡的朋友總會覺得不方便及不舒服，不是耳架壓損耳仔，就是因鼻樑不夠高而令個眼鏡成日跣落黎，影響視點！

我就有這煩惱，因為人天生不是伴隨近視的，而且耳仔和鼻位總不會有眼鏡是 3D 度身製造...上網見到團購有呢 D 矽膠鼻托，$12 一對，貼在眼鏡鼻托位便可，簡單方便。可是買了後要等 2 星期先有得去取，於是睇下有冇別的地方有售！搵下搵下搵到 YAHOO 拍賣場有，有的 $9 一對，有的 $8.5 一對，仲有黑色和透明，大碼中碼揀，再睇下睇下見到有 $7 一對，唔駛諗，落 BID。

過了數即晚賣家就寄出，翌日我便收到！即場給媽媽的太陽眼鏡及我的近視鏡貼好，果然湊效，眼鏡唔跣落黎，視點正中，又唔刮耳仔和壓損鼻樑，很好很好！

美心冰棕

水晶粽？冰粽？凍粽？照我睇，佢只係 JELLY 仔咋喎！

端午將至，美心呢個一盒 4 粒的 "冰粽"：有蘋果，芒果，楊枝金露，黑糖味。由於對 JELLY 仔及蒟蒻麻麻，只嚐了一顆楊枝金露味。

一打開是一陣魚膠粉味，冰棕厚而硬身，一D 都唔滑嘟嘟，似綠白相間的泰式椰汁糕那種質地 。咬落去中央，見餡料是一 PAT 深黃色 (約半個一毫子般大小)，味道係明顯的食用色素效果 (楊枝金露的代替味，又是 "假芒果味" ！)，伴著那 PAT 深黃，裡面只有 "3小條" 柚子肉而已......

呢 SET 冰棕，都係用黎應下節，攪下新意思，過下口癮咁啦！...噢，突然想起今日那條 "美心有虫腸仔包" 的新聞片......

外賣翠苑腰果糊

翠苑的腰果糊只在星期六及日發售，知媽媽愛吃，雖則那裡的價錢 / 態度 / 店內環境都欠奉，我也特地落早一個站去買！

媽媽有，冇理由爸爸冇！於是我買了外賣腰果糊及芝麻糊各一，共 $40！(俾錢後方知佢有分大，細...不過佢又係冇標明分別幾錢，以及外賣兜幾錢！算啦，2碗唧，多得幾多錢吖！)

番到去，媽媽一見即驚喜萬分，急住打開來吃！

擔擔麵 @ 翡翠拉麵

好想食擔擔麵，附近一帶唯一一間上海店子也轉成新釗記，搜尋之下只有北角某商場的 food court 有翡翠拉麵，下午 3 點就去食！

落柯打時付款後打了飛，就站著櫃檯跟前等！時，瞥見上方餐牌燈箱，明明寫著擔擔麵 $28，跟餐飲......為何頭先我付了 $34？？？諗諗下，就問回店員：

我：擔擔麵幾多錢一碗？
店：$28！
我：(邊出示單據) 為何剛才收我 $34？
店：(一窒) 下？哦，$34 係擔擔麵 "單收" 價錢！
我：(一指她後面偌大的餐牌燈箱) 單收？？？？那裡寫著 $28 連餐飲的！
店：(又是一窒) 是啊，有野飲跟架！(佢似乎答非所問...)
我：(重申店員的說話，以作一結論) 那麼，即是說，$28 係包一碗擔擔麵及一杯餐飲，對嗎？
店：對啊！
我：那為何收我 $34？(***因為成間店的餐牌，根本冇寫明係單價定係下午茶價！---咁你話幾錢都得架啦，個價錢 "在你地心中" 嘅；而成間店的 "明顯" 餐牌，只見到寫著 ---- "擔擔麵 $28, 包餐飲" 一項！顧客見到，梗係意會成一碗擔擔麵+野飲，就係 $28。理得你係咩時段吖！)
店：(似乎有點不滿和不耐煩) ...$28...哦，係下午茶價錢嘛！你幾時買？（嘩，又轉成是「下午茶價」）
我：(聞言更見可笑) 幾時？2分鐘前囉！(買完我就一直站著等廚房出餐，冇走開過！但店員不信，我又再次遞上張單據)
店：(嘀咕) 唉，咁我俾番 $6 你囉！

嘩，真係唔該晒喎！...你爭在未 "掟" 番 $6 俾我咋！

單價、餐價、正價、下午茶價、跟餐飲、吾跟餐飲...你地都吾知架咩？！

咁做生意？價錢唔清楚！餐牌又冇寫明！店員隨口嗡當秘笈；根據商品說明條例，這樣係誤導消費者！

講番個麵，蔥肉及花生醬料足夠，但鹹酸菜得 2 條仔左右，不過麵底份量以下午茶來說都夠飽嘅！至於餐飲，杯奶茶除左有D澀口之外都 OK 啦！

85度西餅·2件8折

dinner buffet @ Countryard by Marriot Hong Kong 團購

買了團購去  Countryard by Marriot Hong Kong食 dinner buffet (6：30食到9：00，$218一位，要加正價的加一費，另外加  $30  可任飲場內飲品…以為係彈性可加可唔加，因為本身個餐包一杯野飲，點知去到原來係”一定要加”？！…結果埋單要成$280一位，如果多野食就話唧，誰不知…) 兼慶祝父親節，去之前上去 openrice 望下有乜好野食先，點知搵來搵去都搵唔到，得九龍那間？原來這個自助餐係指入面  2  樓那間  MoMo Café！睇D人評語話佢有部自助整 pancake 機，人人大讚好玩又好食，令我呢個 pancake 迷都好期待！

-首輪：我拎三文魚，活蝦，魷魚，吞拿刺身，再加一個木魚豆腐。味道不過不失！

-次輪：我拎長腳蟹，大蝦。D蟹雪得太耐，只食到凍味，一D鮮味都冇，差過食雪藏蟹柳！至於D蝦，好多腸和屎，又係只食到凍味，蝦鮮味完全沒有！

-第三輪：我拎熱食---冬蔭公炒飯 (終於食到樣有水準的食物)，黑松露闊條麵 (味道不過不失)，以及 3 隻辣酒煮花螺！話就話熱食，但都只係微微地暖…

-第四輪：pancake+ movenpick雪糕！份 pancake我加了楓糖和煉奶，果然好玩又好食！按鍵等一分鐘，部機自動製成！而雪糕我就要了焦糖味，士多啤梨味，意大利芝士蛋糕味  3 款。焦糖味本人高度推介，但意大利芝士蛋糕味則有點嗆喉，因為味道太似火酒，我受不了那種烈+嗆的味道/感覺。

之後排隊要了  2  片和牛，有人幫你燒熟。(不過人手得一個，燒板只有 2 塊，形狀細過 A4 紙少少-----一塊燒和牛，一塊燒豚肉！你要預D時間排隊等拎！)

見人弄了杯檸七，我又新屎坑試了一杯！(那裡”加$30”的汽水類只有七喜，仲要係支裝，全部人像去BBQ般…輪住斟！其餘的飲品有蘋果汁，紅茶，咖啡，罐裝銀色唔知咩牌子的啤酒！)

我跟手又整多2塊 pancake，今次沾了花生醬 (這裡是用粗粒裝那種)，煉奶，牛油，就像格仔餅那樣。行過見到有紅豆冰，又弄了一杯。食到七七八八，當然要試埋杯咖啡啦！

至於自助餐必食甜品蛋糕的我，居然半件都冇拎到又冇試到！因為它只提供  3  款...咁多，包括意大利芝士蛋糕...見這味道的雪糕已中伏，我都唔敢試了！

唔知係咪我口太雜定係其他原因，回家即大瀉了  2  次，之後成晚 keep 住肚痛……

整體黎講，我覺得野食選擇唔太多，味道亦一般過一般；比較好食D嘅就係冬蔭公炒飯同埋 pancake！仲有，那裡的廁所得一格，如果有需要的話請早點行出去，免得排長龍忍唔到！…呢間我估我唔會翻炒！