麵包

沙翁紅豆包，雞尾包，提子包，全部都係送薬用！

紫星波

Lunch 在 apm 買了粒紫星波，係咪真係同我玩架？

拜拜天線

好多時Ｄ頭髮唔長唔短，特別是頭頂果Ｄ，形成天線！想告別＂天線得得Ｂ＂或＂Ｑ太郎＂，我在萬寧買了這個！（之前跟 shooting 時見過 stylist 用）除了＂天線＂問題，當你梳馬尾，紮辮子時，也可以用在＂ＢＢ毛＂，頸上的髮尾上，理順唔長唔短的頭髮！這膏膏備有粉紅色（soft）和綠色（super hard），悉隨尊便。

小包裝，很地道日本 design！

 它是一小圓瓶的理髮用品！

 打開蓋子，握著粉紅色底部，即席搽在＂天線＂位置便可！

鬆弛熊十歲啦

缽仔糕？nude bra？

似缽仔糕又似nude bra... ...

其實係芒果布丁！

午後另一口味

另一款口味的午後系列，是 berry + orange，飲落味道像桃茶，較甜；不過我覺得都係午後之檸茶好飲Ｄ！

早餐

冇食幾日早餐，因為個胃頂住之外，仲因為情緒問題，也要証明一些東西。結果是有的，不過今天，又再次食早餐！

今日食燒賣加熱央，仲有一杯午後之檸茶，挺豐富！

康鈣C與維多C

坐位頭上有2個出風口，冷得我騰騰震！枱面的紙都吹郁了，我退至後面落地大玻璃，左腳仲凍到抽筋了幾次！有點骨痛、個胃好似頂住，千祈吾好病，touch wood！地鐵幕門關上一刻，他說康鈣C，回家前在market place買了一樽！回到家，打了幾個噴嚏，打開抽屜見吾知幾時已購下一樽維多C！究竟，感冒初起有點骨痛，應該飲那個C好呢？

花

因公事我要搵一種花，這陣子搜尋查看了百幾個網頁，知道我要找的花只有在日本或台灣有花圃，而香港則只有香港動植物公園可以看到！為了這個唔知有定冇，有嘅話又唔肯定佢係咪會開花的楔子。。。與其狐疑，我索性趁今日去一趟，有又好冇又好，至少我盡過力！

對上一次去香港動植物公園可能是 15 年前的事！我先坐地鐵去中環，然後穿過戲院里，在喺世紀廣場對面等巴士，再坐 13 個站（聞似好耐，其實好近就一個站）左右就到了！下車後再依指示，行過一條行人天橋就到了！（由於動植物公園有幾個入口，我預先已看了官網，要去溫室就要在花園道那個入口進入便是了！）

經典牌坊式入口

這就是溫室！

這就是我來這裡的目的！

噴水池，相信五十至七十年代的港人，或多或少都有一幀照片在這裡拍攝！

每當見到米仔蘭我都會想起＂女麻＂＂女麻＂！

在溫室打了個圈，似乎＂有牌子＂的花花並未見到我想找的那種，不過我個心卻有著感應，覺得在這裡定會找到它！就在這時，我瞥見左手邊的一小朵白瓣黃花的花花－－嗯，係你了！我黎呢度就係為左見你＂真身＂！我連忙舉機拍照，每個角度，左呀右呀上呀下呀，top shop，side shot 等等的沙龍，我都不停的影，影了 2 個鐘頭，接近 200 張相，用完了一舊電池！

其實這花好難影，因為全場就只有這３朵，每朵花的 size 都好細（連張開的花瓣，它只有５毫子般大！），用了 marco 也挺難 focus！另外又因為它是白色又幼身，往往要找好角度（一定要有深色東西，如葉子等托一托底）才可完整的攝下它的模樣！影完已是下午 2:45，心入面踏實過來，這時才感到點點肚餓，啊，是時候吃點東西了！

午後之檸茶

不太甜，醇醇的檸檬味，近期受人影響，常飲！今天仲有特別版的維妮小熊及 tinkerbell 公仔，可愛度加分！

葵涌遊

逛葵涌廣場＋新都會廣場，那怕是十多年前的事！前三年我去過一次，那是去 site seeing for shooting 來去匆匆，只在那裡一間名叫＜草根飯堂＞的茶仔食左個早餐便走人！上星期六，約了姐姐，由於她住得遠，我們的＂中間點＂就是葵芳！

會合了後先去葵涌廣場行逛！那兒的店舖有點像淘大商場那些，很街坊又有Ｄ新創意店，所有的飾物，髮飾，衣服，鞋襪，內衣，手機配件等等都可以在這裡一次過買到，而且售價便宜，很大眾化！當然，最吸引的是間間的地道小食，一如掃街的甜，鹹食品，飲品一應俱全。可是，嚴格來說我買不到什麼，姐姐卻買了３件衫一對鞋，合共 $228！唯一我＂帶回家的＂，就是一些＂口立濕＂食品－－$12 山楂餅，$10 蒜容花生，$38 半磅的泡菜餅！以及 $10／四條小毛巾！（我要了鬆弛熊款，其餘的就由姐姐帶回家給小公主 Chloe）昨天跑步就用了這毛巾，它雖然 $2.5 但冇甩毛，冇甩色，也索汗，挺ＯＫ！

行了個半鐘已屆晚上８點，食 dinner 去也！我們到隔離的新都會廣場食 A-1 英王餐廳！菜式像 UCC 也像 Pokka，不過價錢平得多，味道方面也好好味。我點了芝士白汁雜菇菠菜闊條麵，加 $12 有個餐湯（青豆忌廉湯）！個湯忌廉幼滑，口感厚薄適中，味道輕怡而且有著鮮鮮的豆味，內有２粒烘麵包，一直 A-1 的麵包都不賴（包括個餐包），整個湯好有誠意！至於個闊條麵，個碟雖大，但份量不欺場！個汁底濃而不膩，每條闊條麵有沾及，雜菇唔吝嗇，仲有煙肉粒和火箭菜，論份量價錢及味道，我覺得真係比同類的西餐廳好。要讚的是，星期六晚晚飯時間都唔太多人，唔駛等位，上菜又唔慢，最衰港島區冇，如果唔係可以再去！

食完就到樓上買爆谷！這間「星球工坊」有小包（$45）及桶裝（$60）爆谷，味道多樣新穎，除常見的原味之外，仲有奶茶味，玫瑰味，焦糖味，蜂蜜味，mocha 味等！到步先試食，奶茶味有點像濃谷古，由於上次食過焦糖味（甜中帶點煙燻感覺），今次要了蜂蜜味（甜而不膩，食得出蜂蜜那種清甜味道），之後就散了。

土司工房

第一次食土司工房，一直以為佢係一間台式食肆，點知原來係新加坡／星馬食肆。難得星期五晚都唔太多人，當下只想快Ｄ有位坐有野食唔駛等，所以就入去食了！

呢度食物款式唔太多，但竟然有餐蛋麵？！縱使我挺愛吃，不過冇理由喺呢度都叫餐蛋麵吧，所以就點左海鮮叻沙＋凍飲！呢度跟餐配凍飲＋＄２，熱飲＋＄４，特別一些如恐龍美祿（美祿上有一球朱古力雪糕）加＋＄６，見佢係拉茶的，所以我就要了凍奶茶（呢度名為南洋奶茶）。

付了款搵個位子坐下，侍應就會俾個牌係，當整好食物佢就會搵番你／你個牌將食物捧上！

喺等飲品時，見佢用細杯仔拉了兩拉，將拉茶倒了兩轉，再轉入一個凍飲的冰杯中。初時見他拎著細杯（就像去酒店 cafe那種花奶另上的銀色細杯子般大小），我心諗，咁細杯嘅？？我又諗自己有冇叫錯，係咪叫了熱飲？！之後見侍應拎來一個盛滿冰的凍飲杯，我才知悉，這＂一小杯＂奶茶原來係用咁多冰＂坐凍＂，才變成我的凍奶茶！。。。

講番味道：碗叻沙湯底好入味，好地道！椰漿和沙爹均勻，好香口！米線份量ＯＫ，配料有蝦一只（細細隻，半開入碗），薄切魚片數片，豆腐卜一只（好細粒，又係開半入碗）。如果唔係個湯底ＯＫ，將整個餐分數拉高，以呢Ｄ配料，售＄４３一碗，真有點不濟。。。至於杯南洋奶茶，因為實在太多冰之故，味道好淡，冇奶茶味，只有好多冰水味，或者我應該飲熱飲或俾多少少錢飲恐龍美祿，就算美祿都係好淡味都好，都仲有一球雪糕食下！