Get A Life: 4月 2016

2016年4月17日星期日

吹波糖

自從晒駱駝及更新的香口珠／糖面世，一些懷舊款香口膠，吹波膠已買少見少！好似呢隻咁，擦膠般大小，一ＰＡＣＫ有唔同口味：波子汽水，提子，可樂味等等，＄６而已！口巷巷口淡淡，趣趣怪怪食下，都唔錯！

鬆弛熊兒童餐？！

鬆弛熊魚肉卷，有白熊啡熊和雞！一條條，切片鋪面，像兒童餐，睇見都開心！不過，好睇唔好食，冇味的，仲差過獅子狗卷！

日本提子糖

呢隻提子糖，好多人講緊！圓鼓鼓一粒，上面有粒＂的＂嘅，好過癮，好好味！令人不自覺＂接龍＂咁食，好快食完一包！

7-11 賣 $11.5 (減價後)，以前公司樓下食品批發，賣 $8.5 一包，２包 $16。姐姐在日本買，$4.5 一包！

味道方面：提子味，青提味，士多啤梨味，藍莓味！

甩底喎！界手喎！康寧。食具不如以前！官方回答仲好有問題！！！

家中各食具／器皿（唔止杯碟大細碗，連匙羹都係康寧），至少９成都是康寧產品！雖然價錢貴（幾十蚊至百幾蚊一隻！），但因為佢可以入微波爐，因為佢外面有色裡面白色（唔駛怕會甩色食壞人），因為佢係知名老品牌，雖然貴，媽媽覺得其品牌叫做信得過！。。。不過，時日久了，問題出現！

食食下飯，媽媽大叫！哎呀！－－她一望，手指已流血。。。
攪錯，乜會甩底嘅？！

食食下飯個飯碗甩底，仲要甩得好徹底！成個底托甩晒出黎！又披口又刮手。。。手指頭被界損了！投訴？向邊度，同邊個？！

呢套花嘅碗，唔記得係吉之島定永安買，仲要買左冇耐番黎！

打去吉之島，佢叫我拎番去，換過隻俾我！（下，如果再甩係咪永久換先？如果係Ｄ產品質素本身，咁換到幾時？！）

打去永安，永安話：＂隻碗冇左個圓底，仲用得吖！仲好拎添！＂（下？！好拎，界手架喎？！）

於是，打去康寧！佢地嘅答案，真係。。。。＂唔會架喎！我地Ｄ碗好實淨，點會甩呀！你地點用架？＂。。。首先佢地否定問題，再者將問題轉嫁番俾客人！。。。我地點用？用黎食飯囉，食食下飯＂甩底＂囉！之後，康寧又嘗試將問題轉嫁俾銷售專櫃，問喺邊度買！（喂，喺邊度買頂多你咪又係叫我拎番去換！都係果句，如果係產品本身問題，係咪永久無限換先？！唔係解決辦法黎架喎！）

激氣！！！老豆仲攪笑（定係有＂先見之明＂？），佢話問康寧做乜，連同Ｄ相ＳＥＮＤ俾蘋果報料咪仲有效！或者，老豆講得啱！

食齋之選

初一。十五食齋，唔一定食菜，其實海皇的雙拼（＄２０），都有選擇！

平時食過炒麵拼燒賣，今次食炒麵拼炸兩！（也可選蘿蔔糕，炒米粉等等）

雨後陽光？

咕臣也有，雨後陽光？！

薩利雅餐廳

聞名不如一試，終於有機會！可以用平靚正形容！加＄１２（成人，＄８小童）可以任飲！（有百事，雪碧，忌廉，咖啡，美祿等選擇）

蒜容焗田螺：入味夠香口，Ｄ螺肉唔韌唔黐牙罅！

ＰＩＺＺＡ：集體回憶，像以前＂陽光一代＂果種！

白汁卡邦尼意粉：（＄２９）夠汁，意粉彈牙，配料足！

炸芝士三文魚：好好食！皮脆肉嫩，仲有少少＂流心＂感覺！

白汁芝士豬肉雲吞：略嫌Ｄ汁稀左Ｄ！忘記有６定８隻雲吞！

大快活魚柳早餐

又話大快活Ｄ魚柳靠得住？前日食過美心的把鬼魚柳炒蛋，今次試大快活啦！點知。。。中伏！

都要成＄２９，賣相見得下人，魚柳上有一片鮮檸，點知一食。。。

Ｄ沙拉醬：唔夠酸？！擺了很久？重手溝稀得滯！

魚柳：似炸了＋擺了很久！硬而厚的炸皮，食不得！魚柳肉－－冇魚味，連雪味都冇，乾爭爭的！連我這＂炸物控＂都要＂飛邊＂ＣＵＴ走晒Ｄ炸皮黎食。。。

炒蛋：叫做似樣Ｄ，嫩滑度尚可！起碼好過美心的＂扮＂北海道牛乳炒；老麥的黃黃綠綠＋硬的熟蛋！

私人工作間

姐姐結婚了，我才有床瞓！
跌傷尾龍骨，我才有自己的書檯！
弟弟結婚後，我才有一個，叫做屬於自己的＂工作間＂！

Before---坐櫈仔（雜誌般大小）、腳屈住難伸，貯物欠奉！

跌傷尾龍骨後（有張書桌、椅）

工作間

忍耐？鬥長命？小強毅力？ＥＱ？。。。
土地問題？家庭問題？住屋問題？社福問題？政府問題？。。。

花了一星期時間，不斷往來ＩＫＥＡ，日本城，實惠，１２蚊店，電器舖，大小傢俱店，家品店，度尺，畫紙樣。。。好倦！

北海道芝士腸

不是魚肉腸，不是芝士魚肉腸，是純芝士腸，仲要用北海道牛乳製，食前有期望，食後好失望！

食過平時橙色包裝的某牌芝士魚肉腸，又食過日本和韓國的芝士魚肉腸，發現隻隻牌子都係得個名／得個樣，大條細條，平貴也好，都係冇味的，口感像食膠！。。。

姐姐在零食物語買了圓桶型的北海道芝士腸（$99），俾了一打我，甫開來食，唔，又係得個樣，冇魚味冇芝士味。。。失望！

以後不會再試了。。。我話的！

曼谷泰國菜館

上完佛課到對面的餐廳食姐姐至愛泰國野，２人食飽飽連埋加一埋單６百幾（已用了信用卡優惠），好肉赤啊！

泰式蝦片：甫坐低侍應即端來說是餐廳送的小食，大大籃加上肚餓，急不及待食食食！卜卜脆，像龍蝦片，小小辣，十分惹味！（之後睇脹單，竟見是 $18？不是送的嗎？）

冬蔭公湯（$9X）：２人份量，每人都盛到３碗（酒樓般大小的小碗子）！湯味濃郁，酸辣度夠皮，感覺真係＂好泰＂啊！足料炮製，幾好！

泰式炒飯（有豬，牛，雞肉揀）（$72）：我們要了豬肉！成個炒飯冇乜味，就像淡味楊州炒飯，半點泰味／泰式功架都冇，把鬼！

粉絲蝦煲（$238）：讚！大大煲，粉絲勁多，煮得唔濕唔太乾，唔＂火農＂唔焦；有３隻大蝦開邊入料，好入味！

泰式生蝦刺身（$9X）：有８隻，多過出面食過的泰式餐廳（如：金寶，泰簡單）！生蝦大大隻，每隻上面有Ｄ醬料加蒜片，夾著食唔錯！不過略嫌隨它附上的醬料小碟，較稀兼水多，點生蝦來食，就像點薄荷牙膏水般。。。扣晒分！

由於太飽，本想食芒果黑糯米都食唔落了！

注：忍唔住叫了２罐可樂（@$22，同６年前我喺英國買一罐一樣價錢）！食唔晒拎個盒子打包，竟收 $3 一個？！。。。都要俾啦，唔好做大蹝鬼嘛！

Kalm's 精品店

80 前或 80 冇耐的＂大朋友＂相信對這店名不陌生，一間專賣 Sanrio 精品的店舖，以前在太古城中心一期，太古皇宮酒樓隔離就有一間！以前星期日姑母帶同２位表弟，總會約女麻女麻飲茶，等位時我三姐弟就會到 Kalm's 逛逛！

最近家中大執位，我竟然找到這店子的膠袋，質地好韌勁，好新淨之餘仲好＂古董＂啊！