葉綠素除口氣牙膏

媽媽又無故 DQ 了高露潔......換了呢支日本製的葉綠素除口氣牙膏。昨晚我首次用它，唧出來的牙膏是暗綠色的，一刷即反感，因味道好怪，不是薄荷而是一陣跌打酒味......好古怪好古怪。我不得不換另一支牙膏再刷多次牙......

呢種會意粉嘅味道，暫時只有 2 度地方食到！

小學三年班由筲箕灣搬屋，搬到而家住緊呢度，記得初初裝修時，由於新屋內烏煙瘴氣，我們姐弟三人一起床後便會走出屋外天井位置空地坐，玩，食......那時候女麻女麻準會買定樓下某舊式老牌茶餐廳的公司會意粉俾我食。那種蕃茄汁底，那種食到一咀都係污糟貓，那種滿載童年回憶的味道而家好難食得番啦！......

前晚由灣仔尾行落老銅搵食，行至英皇，突然醒起都好耐冇食過華星冰室了，不如就去食啦！入到去唔係太想食常餐果類食物，赫見有蕃茄會意粉 (單拼$44，雙拼$47，仲要唔跟野飲)......雖然貴，反正坐左入黎，試一次咁多啦！

打下機睇下面書，等左一陣，就開餐了！

呢度嘅會意粉同餸料係分開上的！眼前溫熱的意粉，似曾相識，我急不及待叉一注意粉入口，嗯，係呢種味呀！就係我細個食過果種蕃茄會意粉嘅味呀！邊食著不無感動......

黑蒜油豬骨湯味一丁

星期五去萬寧買野，送左一 PACK 黑蒜油豬骨湯味一丁 (一 PACK 有 5 包)，今晚 DINNER 開齋！食前鋪塊卡夫芝士上面，自家製的半溶芝士一丁製成！

平靚正拉上補下之選：湯烏冬 @ 大家樂

近排嘅平靚正拉上補下之選，就係大家樂嘅雞扒 / 炸豬扒湯烏冬！大大碗，入味又夠飽，連餐飲都係 $27 (有 COUPON 再減 $2) 

甫推出不日之間，我已試晒兩款！

大大塊的雞扒，醃得勁入味！好似台灣夜市果種！

豬扒則是吉列款，附有沙律醬俾你點！

爐爸打，估唔到平靚正！

如題，仲以為爐巴打係中上價錢的居酒屋，原來佢價錢親民，感覺親民 (好多街坊一家大細去食，亦有一支弓的男或女去 "一人前"！絕無尷尬，氣氛和諧！) ，平靚正之餘，仲係性價比的一間街坊食肆！($18 小食之選，去邊度搵！)

阿華田雪糕回歸 Mccafe

阿華田雪糕回歸 Mccafe，好似只有 4 間分店有售，幸好太古坊果間有，急不及待去試上次推出已想食的阿華田雪糕窩夫！

落柯打後職員先叮熱窩夫，然後唧雪糕，再唧朱古力漿和灑上阿華田粉！上凍下暖，略嫌個窩夫甜左 D，搶晒阿華田雪糕 D 味！

登打士食街

太耐冇到來家樂 (而家變了 H&M)，知對面好多新興食肆，好多雜誌都 KEEP 住報導。路經此地，發現原來早已變天，不得不 UPDATE 一下！

日本雪糕蜜瓜包已登陸，各式的台式飲料店，地道 / 新潮小食店......如果我唔係太飽，我應該會掃街！不過，我都幫襯買了一杯抹茶瑪奇朵！

好奇怪，職員問我即飲定拎走？我答即飲。於是職員就開了個厄位，叫我就咁斜斜地飲便行！我心諗，不是要拎飲管，不是篤支飲管入去飲嗎？唔通我已 OUT 到一個點？！......手機飲先之後，我瞥了瞥杯蓋上的厄位，有點遲疑著。如果我斜斜地飲，應該要一段時間先可以飲到奶蓋下面的抹茶...假如我太大動作的話，一飲豈不是會斜瀉，由領口一直倒落至一身都係？！...咁，點飲呀！何況我想先搗勻一下奶蓋與抹茶...不得已，再折返拎支飲管。

水母襪

趁好天，踩了 5 分鐘單車！

純淨蓮蓉月餅 @ 榮華

包裝冇寫，初時我一心以為係傳統那種黃蓮蓉，原來都係白蓮蓉......太甜了，食了四分一要投降了！

西班牙棉花糖提子 Cotton Candy Green Seedless Grapes

來自西班牙的棉花糖味無核青提，咁特別？！今回有幸一試！

嗯，聞時真係好大陣棉花糖味 (舊式用砂糖攪出來的那種雲朵狀棉花糖味)，甜甜的，香香的，十分討好！味道方面，卻與一般街市的無核青提無異。

OUTBACK 真係好好食！

姐姐請食 DINNER，仲預先 BOOK 左 OUTBACK！聽就聽得多啦，嗯，我都係第一次食......

去之前上 OPENRICE 睇下有咩推介，好多人都話專登去食那裡的黑糖包，真係咁好食？！本來諗好一客西冷拼豬肋骨排，再加個小食，連埋個 FREE 的黑糖包，兩個人應該夠皮！

終於到左 "法定日期"，我倆都特登留定肚等食！星期六晚唔算太爆滿，可能因為落雨關係吧！8:30PM 左右去到坐低，侍應即端上一條黑糖包！熱辣辣的，切開點少少牛油，入口即被醇香的黑糖味充滿！呢個包就算唔點任何配料，齋食都好超班，真係高水準！難怪咁多人激讚！

睇餐牌時，姐姐提議不如一人一個扒啦，唔好咁寒暄！她的提議令我心心眼，於是我揀了肉眼，她揀了西冷。原來呢度 D 餐有點配的：例如我個肉眼扒餐，前菜可揀湯或沙律 (梗係揀湯啦，一間有水準的餐廳，餐湯一定唔會罐頭，分分鐘係自己熬製 / 煲。咁岩呢度嘅湯係白菌磨菇湯，好彩揀左湯，因為真係好好飲！好 rich 之餘仲有茸的感覺，份量岩岩好。)；另外仲可揀一個小食！於是我揀左餐湯同埋煙肉芝士薯片！(我以為係類似 DORITOS 薯片，配以煙肉芝士醬，俾你點來食。原來唔係嘅！似焗薯多D) 呢個七成熟的肉眼扒好好食，牛肉鮮甜肥美，油花和肉均稱，唔韌冇渣。伴碟有炸南瓜絲，煎洋蔥，超 SMALL SIZE 蕃茄仔仔數粒，蘆筍X2。

至於姐姐，則揀左西冷扒，五成熟！嘩，個醬汁真係不得了，似蛋黃醬+黃色芥辣醬的卡邦尼汁，同個扒好夾！仲有燒磨菇和蝦做伴碟，又係鮮甜惹味到不得了，真係估佢唔到喎！唔止咁樣，姐姐個餐可以揀 2 樣小食！我地揀左炸籃子薯條，同埋甘藍黑醋沙律！

第一次黎 OUTBACK，無論食物，味道，份量，水準，招呼，環境都非常唔錯！如果一定要挑剔的話，就係套餐有埋餐飲就更好！

超級奄列餐

十五，難得父母主動說跟我食齋，仲叫我帶佢地去舊公司後街那間；又好，難得你地肯 "出城"，一於 TEA TIME 三人行去啦！

閒日下午茶時段冇乜人，輕易搵到位，鐘意點坐都得！TEA TIME 黎講這裡餐牌入面都算好多選擇，而且凍飲唔駛加錢之餘仲 FREE 加大！真係好抵！睇完一輪媽媽揀了超級火腿奄列餐拼多士！我和爸爸要了雜菌時蔬酸辣淮山麵餐，跟奄列多士。

嘩，個超級奄列真係唔可以睇少...加埋我和爸爸果D，真係食唔晒要打包回家！(*PS：晚上將呢D蛋用黎炒飯，份量之多簡直綽綽有餘！) 食完結帳離開，我和媽媽仲抽了 "靜思語" 添！

花園白湯

好耐冇飲過的......花園餐廳白湯！

鬆弛熊縮骨遮

雜誌送鬆弛熊縮骨遮，事有湊巧媽媽和姐姐都買了，送我+自用，一下子就有 3 SETS 雜誌和 3 把遮喺我眼前！

見狀我當然急不及待打開把遮，唔好睇佢係贈品，究其質料相當好+不馬虎，個拉鍊遮袋係風褸質地，就算唔用黎裝遮，都可有其他用途！

七夕！和媽媽在星巴克撐檯腳，玩燈籠！

諗到冇得諗，唔想食連鎖快餐，見有 STARBUCKS COUPON (FREE DRINK)，不如去食野兼換埋月餅都好喎！

食物黎講，媽媽對 STARBUCKS 的 CAKE 尤其鍾愛，細細件好精緻又唔太甜；而我就鍾情它的芝士菠菜撻！去到就近一間，咦，仲有芝士菠菜撻喎 (未必間間都有)，於是問媽媽想食咩，媽媽睇中左開心果紅莓蛋糕，OK，再用券換埋 GREEN TEA LATTE，等左一陣就開餐。

咁岩今天是七夕，食完過對面球場行左個圈，因為有七夕嘉年華舉行。行行下好似落雨，於是就和媽媽設上樓玩月餅，呀唔係，應該係玩月餅盒燈籠先岩！

我覺得今年 STARBUCKS 的月餅盒設計幾靚，而且仲可以變成投影燈添！設計上都好 USER FRIENDLY，拆盒換上預先準備的燈連電池底板，開啟掣後就可以投射兔仔，星星，或星巴克字樣出來。名副其實有得食又有得玩！

月餅成長條形，一盒 6 個，有 3 款味道 (每個味道有 2 個月餅)，分別係：奶皇，伯爵茶，咖啡焦糖流心！三款都唔太甜，比之前出過的純咖啡味 (有點苦澀) 更好食。最驚喜反而係伯爵茶味，香滑馥郁，好 ELEGANT。

STARBUCKS 今年月餅禮盒，整體上味覺，視覺，成個造型的感覺都好好！