Shiseido MA CHERIE MOISTURE SHAMPOO (絲滑香檳洗髮露—滋潤型)

Made in Japan，外型顏色設計討好，雖然 $38 一細支，但都想試！（洗３次頭，已用了近半支）

打開樽蓋已聞得陣陣像桃茶一樣的香味，洗頭水好輕柔，唔厚甸甸，濕髮時好少泡，而且很爽淨，適合天天洗頭用。

用後感：（一）掉髮情況不多，可以接受。（二）由於我本身長髮，為免頭髮打 kick，所以建議配合護髮素會更好！（三）另外，這支洗頭水好似較適合日日洗頭或隔日洗頭人士，因為好似習慣隔日洗頭的我般，星期日洗完，星期二早上頭髮開始感到＂立＂，一定要洗頭才舒服。

椰絲卷卷包

早上我因為某原因而黑黑地面，之後佢就同我傾＜IRONMAN＞，大家都覺得好型，不論 IRONMAN 還是飾演他的演員！說著佢隔住塊 partition 遞左一舊野俾我，下意識我說出：“咩黎架？”佢就展示佢手中另一舊野！係一個麵包，佢分開兩半，我一半佢一半！我拿著手中半個包，搣了少許咬了一口，兒時回憶和感覺就立即湧現．．．

記得細個有一期我好恨食呢種椰絲卷卷包，每次行過＂聖美倫＂我都會望一望麵包櫃入面嘅椰絲卷卷包。（*聖美倫係一間麵包舖的名，它的位置剛好在斑馬線那裡，所以每天返學放學都會經過，等過馬路時都會在那裡駐足）有一次，和姐姐去北角商務買書，買完兜後面的北角碼頭，當時有一間古舊的麵包舖，門前放著一盤又一盤（黑色托盤，上有一塊裝有筍口位、可揭起的亞加力膠）的舊式、大大個的麵包。我緊盯著某一盤，姐姐見狀問我咩事？我說好想試下椰絲卷卷包係咩味！姐姐奇怪，問我：“乜你食椰絲架咩？”我說：“都食架！”（唔知點解，當人人鐘情蛋撻時，我獨愛椰撻！當人人愛吃火腿蛋包腸仔包時，我獨愛奶油椰絲包）

估唔到，自從上次（起碼成廿年前）在北角碼頭麵包舖買過食過的椰絲卷卷包之後，今天，我再次食到。

落花

失望的滋味是什麼？

比谷底更黑暗

比心絞痛更甚

恨不得要將一生的記憶抹走

恨不得要盡快離開這片

根本不屬於我根本容不下我的土地

永久的失望連自己也幾近迷失

以後都不相信將會有好運降臨

連一些自欺欺人、阿 Q 的說話

也不想聽，不想想

我失望的感覺，遠超「沒有希望就不會失望」的階段

我的心已到死實

就像被尼古丁侵黑了的肺部

沒有完結的一天

沒有停止的一天

自殺就是解決方法嗎？

有人問我，點解成日受傷

拃親條頸，肩痛，雞翼位乃至右臂弄傷，

坐骨神經痛，腰痛，左右手抽住痛，

十隻手指節起水泡、弄損，

前臂瘀黑，雙腳、腳趾不停抽筋又抽筋

都仲要堅持學詠春，去捱打？

冇錯，這是另種自殘

我要藉著這些痛來忘記心裡面的痛

藉著可見可感受的痛來告訴自己

我真的受傷了！

快樂，真的很簡單嗎？

我倒想問問陳奐仁

一星期裡，我已３次因想得出神

而誤了車站、行錯月台

我的精神早已錯亂、衰弱得很

IRONMAN，THE ONE

昨晚網上購票，今早去 THEONE 睇<IRONMAN>早場！第一次喺 THEONE 睇戲，沿途行上去電影院樓層，周遭都是奇妙的。早上的 THE ONE 俾我感覺好好，人唔多（甚至冇）因為商場內舖頭未開，難得恬靜又閒息的快逛個圈，認認真真睇下 THE ONE 究竟有咩店舖！（之前，約一年前行過一次，係因為當時有個鬆弛熊展，我只係去那層影了數張相就走，其實冇正式行過呢個商場）雖然只行了５至８樓（因為商場電梯只去到４樓，我要去４院在８樓，所以出 lift 後要使用扶手電梯上去）裡面有間＜釋生趣＞店子，以佛為名，有售佛造型的擺件等等，令我印象深刻。

電影院內以金黃皮配黑色製椅子，上頭的壁燈都很 elegant，跟別的影院不同。前排與後排的椅有足夠空間伸展對腳（唔會很窄很迫），個頭又可以完全地挨在椅背，就算最前排也跟螢幕有一段距離，這是我去過，繼太古 UA 之後，另一間我覺得好坐、舒服、感覺良好的電影院！最重要的是，我睇 3D 早場，成２個幾鐘，都係$65 一張飛（網上訂票＋$7），比皇室及太古更平，令我驚訝！（皇室電腦訂票要＋$10，太古 UA則要＋$8）

我一直對於美國英雄漫畫，乃至它的改篇電影很怕！以前看過幾集的 BATMAN，後期實在忍受唔到而冇再睇。至於 SPIDERMAN 我看了２集，PETER PARKER 的懦夫及無用性格令我頂唔順、覺得很討厭又冇再睇！估唔到 IRONMAN 比 BATMAN及 SPIDERMAN來得更人性，更貼近！他不是不死身，不會打不死，不會脫離現實，這個 character 很著邊際，有實力，不懦弱，不膽怯，而且，仲很型！

抑鬱感覺又來襲

之前我話想睇＜少年PI＞但時間一直就唔岩，結果落左畫！他說他有 DVD，會借我睇，點知，不了了之！今天從收音機得悉＜孤星淚＞出左藍光碟，佢話會買，但由於我唔肯定我屋企部機播唔播到藍光，所以他就買了普通版的，然後借給我看！呢套＜孤星淚＞我都想睇，之前只在英國睇了 opera，反而電影又係就唔岩時間，睇唔到！今次，他兌現了，在 lunch time 時買了隻 DVD，俾我 ＂開齋＂！下午時段，佢仲播它的 sound track。

冇錯，他的舉動依然窩心，但由於某些事情我實在開不了心。。。一直傻下傻下咁，放工後在 apm 行了個圈散個心，回家時突然落狗屎，令心情更是沉重，唯有借夕爺的＜十方一念＞沖洗抑鬱情緒，希望可以。。。

收成

一年辛勞的成果令我意外，在此，我要多謝公司多謝老闆！（縱使在這裡有很多人和事的不快）

希望這一年能夠願望成真！

蜜瓜乳酪布甸

百佳減價（$25.5／6 杯），見到它包裝別緻，的骰可愛，仲要有蜜瓜味，實在難以抗拒，買了一 pack！呈三角形的 packing，初時以為佢只有３杯，打開包裝原來係６小杯，裡面仲附有小匙羹，很貼心！

味道方面，挺像益力多味的布甸！口感嗎？唔知係咪放多了魚膠粉，所以膠膠的，沒有自家製那種布甸質感，不過食到底，杯底裡有好多蜜瓜粒！整體上，它不太甜，味道清新，很好很好！

懂我。寵我

昨天千嬅上 may 姐節目，本來無恙，咪又係一個飲食節目！及至佢地圍埋食，傾下講下時，千嬅說有次佢同丁生 dating，經過一店，他倆在櫥窗望左一陣，丁生問佢係咪有野要買？佢話冇！之後佢地再 date，丁生即送上一份禮物！原來就係當日千嬅喺櫥窗望到果樣野！丁生好細心，千嬅只係望左一眼，而且又冇話係望邊樣物件，而且又冇話要買；翌日丁生就送左俾佢！呢個舉動真係好 sweet，好窩心！

我一直渴望有個懂我。寵我的人，他跟我的步伐一致，知我心事，了解我，保護我！我們思想相近，相處很舒服。。。可是，這一個＂他＂還未出現！或者，我應該說，＂他＂出現左，我們遇上了，但＂他＂不可能跟我一起！

當日千嬅跟鄭生分開，未嘗唔係一件好事！如果唔係，佢與丁生唔會一起！

今天，你叫我一齊落去買早餐，本來無恙！原來，你真係為我儲了６個印花，但想我自己親手換鬆弛熊！（之前我說過我冇乜運，所以你就同我一齊換，借Ｄ運氣俾我！）可惜，我又換到雞！你見狀還說，我換晒你想換果Ｄ！

我鍾意今日呢種感覺！就好似回到８月那時咁，我想呢種感覺繼續落去，但又唔想繼續落去，因為我好難先再習慣自己一個人，我冇時間療傷，冇時間愛一個根本冇機會一齊的人！

第一次睇戲喊

未上畫，睇預告片已想看！上畫時時間一直就唔岩，現在幾近落畫，我才有機會去睇！

挑這電影，原因先撇除它是否大製作，是否大卡士，以及除了自己都姓楊之外，對於重情義，有劇力，情感真摰，扣人心弦的電影我趨之若鶩。＜忠烈楊家將＞可以說是這半年來，我看過的電影之中，最好看的一齣。估不到，因為這戲，我居然邊看邊流淚！這是我第一次因為睇戲而在電影院裡哭！不是說其他的電影未令我動容，而是之前我一直會選擇忍，不過這次，我忍不了，不停深呼吸，但淚水依然悄悄滑下。。。

維他檸蜜

站在貨架前，車前倒後，我想買陽光蜜瓜豆奶，又想買芒果汁，又想買檸檬綠茶，點算好？唯有睇睇營養標籤，這款維他檸蜜，熱量只有 41 千卡，鈉 15 毫克，對比過比道地檸檬綠茶，梨茶更低，所以揀了一 pack 買回家！

回家後急不及待要飲，可是未夠凍，於是趁洗頭前把一包放到冰箱，約廿分鐘就有凍冰冰的檸蜜飲！果然，味道很好，不太甜，又未至於維他檸檬茶 VLT 那種澀，嗯，趁佢仲係減價（$15.5／６包），可以再入貨！

韓國 Soo Essence Sheet Mask (Cucumber)

打開面膜紙，濕濕的，敷上面有輕輕的青瓜味，感覺舒爽清涼。

不過塊 mask 眼窿位開得太大，黑眼圈眼袋位置敷唔到。而人中位又太長，要摺摺才可密敷。另外鼻位又太長，遮著鼻孔，要稍稍摺起個尾。

用後感：可能是太久沒敷 mask，所以用後皮膚不再乾涸，不繃緊（尤其是笑起上來兩邊面珠墩位置）。感覺就是，它用來急救或粗用也不錯！

雞蛋雞

不嬲我都冇咩抽獎，中獎運，就連便利店換公仔亦然！

今次的 7-11 換鬆弛熊活動，我當然最想換捧著蛋多士的啡熊；結果，好容易才儲夠１２個印花（要多謝姐姐俾左十個印花我），我就喜孜孜分２次，每次加 $15 換，點知２次都係換到雞蛋雞－－一個你話你鍾意但其實我知係你老婆鍾意的卡通人物。。。

第一隻雞蛋雞係你同我一齊換，打開一刻你開心的程度令我吃驚！（因為你老婆換了３隻都換唔到）你仲話你會拎隻多士啡熊同我換，又話就算冇啡熊，你都會幫我儲印花。。。我心知你這樣說只是想我留住隻雞蛋雞唔好送俾人，於是，第一隻雞蛋雞頓變成＂人質＂！

我知你唔會好積極咁樣幫我儲印花，因為可能你儲左印花都會俾你老婆，另外，可能佢已經自己換到雞蛋雞，根本唔需要我果隻！再者，前幾日你儲印花的瘋狂程度，同呢兩日的行為相比簡直放緩過放緩。縱然如此，我知道無論什麼事最好就是靠自己，畢竟，我是個倒楣的人，唔會有人真心對我好（某程度上係互惠互利，或有利益當頭），我唔會交上好運，唔會遇到好的人。。。

人生無常

今早如常扭開廁所窗前的收音機，邊聽新聞天氣邊洗面刷牙！記得新聞中一段係講凌晨時份油麻地發生一宗致命車禍，當時的報導很短，又沒有報導死者姓什名誰，所以我只當普通過普通的交通新聞，左耳入右耳出，聽完就算。及至出門口前上一上 facebook，睇到有人留言說 Sita RIP．．．我唔敢相信！講笑咋下嘛！報錯料惡攪咋嘛！同名同姓唧！．．．我邊猶豫邊打開新聞 apps，scroll down，見到．．．係佢，係今早果單交通消息，係陳僖儀．．．佢，佢死左！

時，腦海裡浮現出＜蜚蜚＞這歌，以及她得到勁歌新人獎時的“喊包”場面！雖然我不認識她，但依稀記得她是個唱得之人，都算禮貌周周，是個沒價子的女新人。唔知點解，知道呢單消息之後我一直不能夠釋然，個心“un”住“un”住，唔太開心！慨嘆人生無常... ...

幸運指數

以前睇過一齣電視，唔 sure 係咪＜新鮮人＞，裡面講蒙嘉慧飾演的麗華，為人冇自信、性格鵪鶉、一生唔知做乜，總之就係運氣差！有一日，林保怡和她入去便利店，買了些什麼然後得到包紙巾，這包紙巾麗華一直 keep 著，因為裡面有張運氣卡，她生怕打開了是衰運，然而她更怕打開了是好運，因為好運一下子打開了用盡了，之後豈不是要倒楣？．．．今日，我從袋中掏出中包藏有運氣卡的紙巾，打開一看，張卡足足有５粒星──我今日的幸運指數爆燈，但係，我一ｄ都唔覺！

儲印花大戰

新一輪儲印花大戰又開始！今次係 7-11 大戰 Circle K！前者換鬆弛熊，後者換 Line 的熊仔兔仔公仔，兩者都係針對女仔為主，她們的男朋友／老公呢排忙了！

我都好想有人唔出聲幫我靜雞雞儲印花換公仔，可惜我身旁沒有這一位！就算以前，我所謂的他，都唔會咁做！其實呢Ｄ小舉動，對女仔黎講係好窩心的，因為這代表你著緊佢，你知道她鐘意Ｄ咩，鐘意邊個卡通人物，而且喺便利店買野比平常的貴，假如佢都肯換俾你，當堂ＬＵＭ晒！所以，請珍惜一個肯幫你儲印花換公仔的人！

睇場戲

尋晚發惡夢，紮醒！再睡又係發惡夢，再紮醒！毅然醒來後，雖然夢的內容不太記得，但我慶幸只是發夢而已！。。。

睡得不穩，期間聽到廳中打牌聲，又聽到睡在上隔床的弟弟夢囈說：＂有冇攪錯！＂我知道，今日又要離家出走了！

今日冇上詠春，等到 tea time 時去大家樂食野，邊食邊查看手機 movie apps，知道最快有一場戲，是＜毒戰＞的優先場，所以拿拿臨食完即返家換衫，再落銅鑼灣！唔知點解皇室 UA 要成 $10 手續費，太古 UA 只係 $7 而已？！本來一直想睇＜忠烈楊家將＞，不過時間一直就唔岩，如今突然讓我看到杜琪峰＋韋家輝，時間又咁岩，所以看了＜毒戰＞。＜毒戰＞不過不失，雖未致於令人拍案叫絕，但也總比葉問前傳及葉問－終極一戰好看！它有一貫杜琪峰＋韋家輝的故事性及演繹方式，也有黑色幽默，都ＯＫ嘅！

睇完睇行逛左一陣，然後食碗酸辣米線就回家！現在的情況發展到，屋企一打牌我就離家出走，屋企冇得睇電視，我就到茶餐廳，主要目的就係裡面有電視睇。。。

宜祭祀

唔好意思，今日要走堂！因為我要去拜一拜舊同事！

８點幾起身，梳洗後先到樓下 Market Place 買生果（因為唔肯定室內的佛堂可否點香，所以買生果穩陣點），揀來揀去唔想買橙，所以撩梨子！見到有貢梨和香梨，同樣減價，但見香梨較大較靚，而且應該較潤和甜，所以就買了！付款完畢就去坐地鐵到天后，再搭 968 號巴士入元朗。先跟朋友會合，再去普門寺！

入到去要除鞋，幸好我對襪沒穿窿！我們行了一圈再折返樓下查詢，然後再上去佛堂。入面好莊嚴肅靜，而且窗明几淨，打理得宜又整潔，企理得很！我們搵到舊同事個＂位＂拜一拜再放下香梨擺好，再拜一拜就離開了。在此，希望這位很叻的舊同事在另一角度可以平靜而得渡。

由於元朗感覺不好，所以我們就離開，到九龍灣德福行下街食下野傾下計！估唔到我地２丁友，食完 Pokka Cafe lunch 行左一陣再食 Pizza Hut tea，勁飽但好滿足！至６時許我們就散了。

除塵髮菜湯

我唔知呢種湯叫咩名，它用髮菜，冬菇，眉豆，蠔豉煲成！媽媽說它可以除塵，以前好多地盤工作人士，司機等家庭，都會煲呢種湯，對肺，對呼吸系統都好喎！我就姑且叫它做＂除塵髮菜湯＂！

麥記紅豆批

繼星期日無啦啦急CALL要番工之後，星期一已ＯＴ到十點半。昨天＂提早＂走人，講嘅係明明收６點，也ＯＴ多２粒鐘。

公司附近最近就係麥記，ＯＴ時有機會食到十年前新出已想食嘅紅豆批！買左個紅豆批回公司，熱騰騰，咬一口Ｄ紅豆餡已急不及待湧出！紅豆不太甜，又豆有蓉，外表層皮又脆，好好味！

師伯

今晚李小龍三師兄，亦即係台灣盧文錦師伯黎示範／賜教，我立即趕緊唔ＯＴ，希望一睹師伯的風采，以及學下野！

大約８點我就從公司離開，４５分鐘後就到拳館。平時門常開的拳館突然關上門，我一望裡面，原來師伯已開始示範，一眾師兄弟就圍觀著！我邊看邊拍照／拍攝，因這邊人太多我就打算走到對面，時有人拍拍我膊頭，我一瞥原來是勇師兄，他示意我走到他那處！他讓了原先所站位置給我，果然係個＂好位＂，無遮無掩！可是，唔知係咪要按鍵，我明明拍了成個過程，但最後只得番一條片。。。

師伯示範完，當然要來餉指定動作－－大合照！之後人人湧上前去，要和他合照！（當然我也不例外，我影完後看回合照時，時師傅見到我手拿手機，還以為我未及拍照，即喝止眾人然後拉我上前去，嘩，當時成群人望住我，我有Ｄ受寵若驚！。。。唔好意思地說：＂我已影了！＂）影完相同師兄黐左一陣手，大約到十時半我就離開。由於這所大廈有好多賓館，以及南亞人外籍人，其實好雜，所以我打道行樓梯下樓時，偶爾某層樓有幾個黑鬼＋南亞族人士喝酒聊天，我行過時都心驚膽顫，不敢望他們！到達樓下 lobby，度度閘都鎖上，我心下一涼，走唔到嗎？繞了個圈，時有個南亞看更揚揚手，示意我從另一邊門口出，我才可離開平時去開的這幢大廈。

有 plan 等如冇 plan

昨天應承了師父及助教，今天去上堂！去到拳館，熱左陣身，約 11:30 老闆打來，是長途電話。她說重慶那邊廣告公司又開唔到 D ai file（真係唔知點解，次次佢地都開唔到 ai file？佢地唔係用 mac 機架咩？行內人唔知咩係 ai？定係佢地用番梘所以開唔到？同樣的 file，無錫，杭州，廈門，北京都開到，點解偏偏你地重慶就唔得？。。。我都好想知點解！我只係個中間人，點解你地唔直接同我地Ｄ設計師 deal？次次都要我來傳話，傳檔案？我鬼識咩！！！），我問她可不可以明天早點回公司處理，她說不可，因要趕著今天印刷，明天可以派！她，仲叫我唔好上堂，叫我想辦法盡快攪掂佢！我心下一涼。。。

掛線後我在想，那位負責設計同事住粉嶺，叫她回公司嗎？她晚上又要在大埔學韓文，不行不行。。。另一位，就是設計部的＂大佬＂，亦即是他。。。我不願打給他，而且老闆說打了數遍也聯絡他不上，另外，我知道他今天要去踢波。。。無辦法，剩下最後一位住沙田的同事，他沒拖拍沒事做，是個毒男，應該唔會托我手爭！好，我就打俾他！

等了一會他才接聽，原來他剛起床！我約好他在公司樓下等，我會 12:15 離開尖沙咀，去到公司大約 12:45 左右啦！誰不知，剛巧師父到，他捉著我黐手，黐至１點（正常放學時間），我雙手瘀了損了，但我個心整個早上都惦記著公事，根本沒心機。。。我拿過隨行袋，一邊連忙快快打俾沙田同事著他先去食野，因我要遲一點到！

我三步拼作兩步的下樓，飛地鐵去牛頭角站，在那裡買了爭鮮魚生飯就回公司。我等同事轉了個 300dpi 的 jpeg file 然後就 send 俾重慶同事，再等佢地覆！點知等左一個鐘都冇反應，我聯絡他們同時又聯絡重慶的廣告公司，終於三催四請下他們才回覆個 file OK，可以印刷！我攪埋點手尾就離開！

心情不爽，本來想趁住今日冇落雨，先去尖咀上堂，然後去長洲睇櫻花，再睇場戲／跑步，晚上再 home office。。。點知，老闆一個電話就打亂晒我個 plan！諗到但實行唔到，箇中滋味不好受！仲有，點解到頭來又係我 keep 公司鎖匙？點解要我做埋聯絡，其實係 d file open 唔到，我都唔識轉 file 架，我用 pc 咋喎，又唔係 mac 機；只要設計同事自己轉好 file 再 send 俾那邊對口單位，咁我就唔駛煩啦！。。。

離開公司，我在附近行下散下心！於是去左駱駝漆大廈睇 adidas outlet 然後回家，中途買左杯麥旋風消消氣！

自娛。滿足歹願

隔了個 easter，今日上堂像隔了多個寒暑！如常地，由本來２至４點的課堂，我又＂加時＂了一個鐘，雖然被師兄的標指整損了咀唇和下巴，兩隻前臂又被師父的皮手套刮到又紅又甩皮又損，但總算盡興，發洩了連日來的悶氣！大約５時許，我就離開拳館；臨走前，師父和師兄們都問我明天來唔來？由於我缺席了多個星期日，我再也不好意思推搪，唯有應承明天我會去黐手！師父仲話，明天會有個來自少林功夫的鬼佬，叫我一定要來！

下課後我雙腳就自動行去 Adidas Flagship。逛了逛，臨走前見 fitting 冇乜人排隊，所以我就趣趣地試了 for running & gym 的運動型 bra top，以及棉質新款＋厚束腳的安鼠褲！我在更衣室裡左顧右盼，其實成個＂造型＂都讓我看上去很健康很清爽（只是有點瘦削），而我也很喜歡這樣精神又 sportive 的自己！不過，這種褲要襯 bra top或束腰貼身 tank top 才好看，如果襯 tee 就會把整條褲的設計遮蓋了，變了一條平平無奇，像街坊裝落樓下超市買野的束腳褲。我望著鏡中的自己，想到平時又點會咁樣著出街，就算去跑步，都唔會只著 bra top 吧。。。買了，就變了無用武裝束，結果，就是往抽屜裡長期擺放！。。。最後，我在 fitting room 試了又除下，自娛了陣就離開！

離開 Adidas，心血來潮想食甜點！我其實想食雪糕，不過除左 Haagen-Dazs 之外，我就唔知尖沙咀邊度仲有雪糕店，所以就轉食豆腐花，仲要係北角馬寶道那間老店－－德興隆！

去到德興隆，裡面坐滿了人，等外賣的都有十個左右！我說我一位，等了一陣就有檯搭了！我邊走進那個四分一個卡位的同時，邊喊出：＂一碗凍豆花！＂（這樣同步，較省時嘛），未幾伙記就端來一碗，拍了一幀＂before＂照，就下黃糖再拍幀＂after＂照便可以吃了！唔知係咪成左名，多了人來慕名食豆腐，多了一批＂刻意懷舊＂＂作狀懷舊＂的人來品嚐，味道已不及當年。。。成碗豆腐花的石膏味很重，質感太厚亦唔夠滑，豆味欠奉，所以就算放了兩大匙黃糖都冇影響豆腐花的味道，因為它根本冇味道。。。$8 一碗，唔平唔貴，就當＂浪＂下口，滿足了自己想食甜點的願望吧！

Chi Lam 咖啡

想講講，Chi Lam 代言嘅呢隻 Georgia 咖啡，好得！

味道方面，一拉開個拉環已聞到好醇的咖啡香！飲一啖，冇雀巢咁酸咁澀，又冇哥倫比亞咁烘咁厚咁甘，似 POKKA 但少奶多咖啡香醇回甘的那種討好味道，very good！

繃緊

好明顯，今天並沒有放晴，今天沒有天公造美，今天依然是下著毛毛雨，既密又綿！加上漫天霧氣，陰陰濕濕，好煩人！

連續２天瞓＂黎＂頸，明明新年時已換了新枕頭（媽媽說個牌子枕頭只在永安有售，新年優惠加上減價後也要三百幾四百元一個！這枕頭睡得久也不會扁，不會變形，又不像什麼＂依人體工學／結構＂設計的彎曲形設計，不會頂住條頸），雖然枕了個多月，但我已瞓＂黎＂頸４，５次。。。

我認為係我自己唔識放鬆，就算躺著整個人也是繃繃緊緊的，未入睡時驚覺已叫自己放鬆，身體才寬一寬過來，但很快又是呈現繃緊狀態！平時唔覺，但有時在車廂站著，辦公室座位上，以及躺在salon的洗頭椅上時，頭頸身體繃著的情況最明顯。。。換言之，其實我整個人無時無刻都處於緊張狀態，未能懂得自行調節放鬆過來。究其原因，可訴之於壓力，生活，都市病；日積月累下，整個人就成為生活流的一部份。我知道要放鬆身心，不是去一個旅行，不是藉著行街shopping睇戲食飯購物可改善得到。但，至少可以偷來一刻的潤滑劑，為繃緊得起節，繃緊到生繡，繃緊到纏結的狀態塗上一層自欺欺人的舒適。

望天打卦

此刻我望老天爺天公造美，望老天爺收雨放晴，讓我可以外出走走，散散心。

哥哥

連日假期連日窩居，天氣關係想外出走走不得，晚上想看電視不得，因為前晚直播杜拜賽馬，由晚上十時左右至凌晨三時電視都被家人霸佔。昨晚，家人為了將要入戲院看＜GI JOE 3D＞，所以要看回明珠台的＜GI JOE＞，所以我也沒電視看！直到晚間新聞後，我才有機會觀看哥哥十年音樂會！

說起哥哥，也就是我成長那個年代的巨星之一！記得當時樂壇分開兩批人，一邊是譚詠麟，一邊是張國榮 Fans；每逢勁歌，＜最受歡迎男歌手＞獎就最激烈最緊張，喺未有＂TVB FUN＂，未有＂匯應通＂，未有＂一人一票＂的情況下，譚、張似乎鬥得難分難解！我對兩位沒有喜愛與不喜愛，不過我有位小學同學是哥哥超級 Fans，記得她說，一到勁歌，一到要揭曉＜最受歡迎男歌手＞獎，她與妹妹就會跳上沙發，邊跳邊喊張國榮張國榮！──那年哥哥輸了，她就傷心地哭。翌日就會在校車上跟我們分享這事。這兒時記趣，轉眼，都廿幾年了。。。

沙士那年，我在上海工作，由於當時寬頻剛普及，加上大陸未及發展，同埋＂逢網必 BLOCK＂情況，要上雅虎香港簡直難過登天，遑論要 check email！對待新聞又採取＂有殺錯冇放過＂的態度／做法，關於沙士，那邊其實沒有多說（或許已封鎖了），更沒說出情況已去到怎麼惡劣程度。當時上海、橫店根本冇人戴口罩，所以什麼消毒用品和口罩，都可以輕易買到！生活／工作情況的糟糕、加上沙士陰霾，令我這個異鄉人心情跌宕，未幾同事透過家人告知，說哥哥死了，是自殺的。。。嘩，當堂不敢相信，感覺有如晴天霹靂。令本來灰爆無望的氛圍再加劇，情緒失落致失陷，當下只想快些離開、離開這裡的人事地，我要回香港！（再次強調，那時我對哥哥仍未有什麼感覺）

及後反而經常看到哥哥的電影：阿飛正傳／金枝玉葉１，２／家有喜事／鎗王／倩女幽魂／霸王別姬／春光乍洩／英雄本色等等，還有多首耳熟能詳的歌曲，才慢慢嗒真有關哥哥的一切。如果現在有人問我，鍾意譚詠麟定張國榮？我諗我會答，我會 prefer 哥哥！或許我對他，已跳出了從前的＂有感覺與冇感覺之間＂的空間！

他走了，已有十個年頭！

近一年，由於 Eason 翻唱＜最冷一天＞，再次喚回我對哥哥的某種思念（雖然我不是＂哥＂迷）。再加上我在這公司被喜歡哥哥的某人喚作＂阿榮＂（從英文名譯音過來），是偶然又好、是巧合也好，彷彿我就是被連上一樣！昨晚，當電視機終於騰空，我終於有機會看哥哥繼續寵愛十年音樂會時，剛巧在播放阿蘇的 video，她說：＂。。。唔俾我地喊唧，但掛住你都得掛？＂之後著大家一齊大喊MISS！緊接阿蘇，到太極出場，他們演出的第一首歌就係＜MISS YOU MUCH＞，同時間我收到環球的電郵，甫打開即見哥哥的＜MISS YOU MUCH＞ Album，無論事有湊巧還是緣，那一刻我真的啞口無言。。。