扎手小雞

放假先黎落雨... ... ...

連日假期，因為天雨而滯留室內滯留在家，幸好父母的＂麻雀腳們＂一個番了鄉下，一個去了郵輪，一個去了旅行，一個要湊孫。。。令屋企唔駛變了＂私竇＂，讓我和弟弟可以睡多一點睡晚一點，抖擻精神！

本來諗好幾個節目給自己渡過復活節假期，但天公不造美，暫時只能完成一項－－睇戲＜葉問－終極一戰＞。睇個天應該明天都天陰雨濕。。。

落去樓下美心食野，回家前在 7-11 買了本雜誌回家打發時間。掀下掀下，翻至某頁見到呢Ｄ雞仔，令我諗番起兒時，某年復活節的星期日早上，我們三姊弟連同兩個表弟，姑母及祖母，先到北角敦煌酒樓飲茶，然後去對面華豐國貨，買復活節雞仔！

呢Ｄ雞仔造型別緻，一根一根毛有點扎手，雙眼是用黑色通心膠粒黏成，小咀嗎？有時用戟絨，有時用繞了粗紅線的鐵線制成，從設計到取材到用色都最簡單不過，每每一對對出售，有小雞有母雞，數塊錢就令我們這班小朋友樂透半天，開心渡過復活節。

Lancome Blanc Expert

產品介紹（from官網）：Lancôme 締造尊貴美白經典，全方位對抗膚色暗啞、色斑及不勻膚色，全面提升肌膚質素。Blanc Expert全方位瞬白亮肌系列全效為肌膚減淡色斑，讓肌膚變得均勻、淨亮、透白、無瑕。

眼下顴位有少少斑，不知是曬斑、汗斑定係年齡斑。之前一直用開Olay護膚產品及面膜，也用過 EsteeLauder 皇牌 night repair serum，效果方面，斑斑沒有加多或加深，可能已見效用。但我想切切實實消滅它，見這支 Lancome 就姑且一試！（其實之前都用過 Lancome 灰蓋那系列，覺得效果不大好，不明顯）看看這支能否做到＂減淡色斑。無瑕＂！

復活戰

復活節假期正式開始，連日來的早出晚歸，體力透支，昨晚 11 點已周公急 call，不得不走上床！今日特意唔較鬧鐘，讓自然睡到自然醒，好耐都未試過瞓得咁爽，咁冇擔憂！終於，今日下午１點半正式起身！

梳洗後等到 2:30 tea time 去食野，然後去睇＜葉問－終極一戰＞。臨入場到商場樓下果層快行一轉，結果喺 CATALOG 失守。。。拿著戰利品睇戲，名副其實行街食飯睇戲！睇完打俾老豆，約佢地去北角食羽壽司，由於某些壽司減價（原價廿幾蚊一碟，而家 $9 件），於是狂劃紙仔，４件４件咁劃！結果，我個 "4字" 原來代表 "4碟" －－即係，變了每款８件。。。食到我同老豆完全投降！又由於我好想食雪糕，想左兩個禮拜，所以在回程時在麥記買了杯士多啤梨新地，今日真係飽上加飽！

一週年

一年前去做了負離子，翌日番新工！轉眼已在這公司一個年頭，今日再去做負離子兼剪頭髮！

坐了４個鐘，連洗剪，初時我檯頭有一疊明周，之後個師傅換了一疊 MORE 同埋東地俾我，話呢Ｄ岩我睇Ｄ喎，好攪笑！由於之前自己在家自行染了髮，連埋焗油，所以今次剪完負完出來個效果都唔錯，師傅叫我下次落黎佢幫我做埋染髮，我心諗唔係下嘛，我自己喺萬寧買＋減價，都係幾十元唧，黎 salon 做埋 colour treatment 咪加多幾百蚊？！梗係唔制啦！

泰屋

第一次黎泰屋，叫了泰式金邊粉，柚子沙律，菠蘿炒飯，糯米釀雞翼（兩隻），炭燒豬頸肉，蒜容雜菜少雜菇，飲品Ｘ３（我要了龍眼冰！朋友要了椰青，泰色特飲），埋單 $613，每人$200，坐了３個鐘。

讚：個豬頸肉同埋蒜容雜菜少雜菇超好食，前者入味香口，就算唔點醬都好 OK！後者Ｄ菜估唔到咁入味，而且好有鑊氣！龍眼冰有好多粒龍眼，不過係細粒果種，成杯像蜜糖，又香又甜又冰凍！

彈：雞翼略嫌層皮整得過左龍，食落口太乾太韌，像翻炸的那樣口感，內裡的糯米感覺林 pat pat，煙韌得來黏牙。

緣聚

再次感動！我冇諗過你同我的想法一樣，臨時加插上你屋企同釨潁玩！

最意外的是，你說你會揸車來我公司 pick up 我！我冇諗過你會咁做，我未試過有人特登揸車來，來我公司樓下等我放工，來到你唔催我不特止仲泊車（其實你可以在附近兜一陣），你真係會企定定喺我公司樓下等（而唔係見我未走我而四處行下先），仲喺你怔怔站著的位置影張相 send 俾我，原因係怕我唔知位置！。。。一切一切的舉動都係百分百窩心！這，令我想起Ｎ年前，你帶久病未癒的我去紅磡看中醫（明明當日放工後你要去上堂，但你竟走堂＂的＂我去睇醫生），特登給我煎藥，再揸車送我番屋企。其後的２服中藥，你煎了又揸車送至我家樓下給我；另一服藥，由於那天你要落舖做野，但你竟然先在家煎了，再特登拿回公司給我，然後再逕自落舖，為的就是怕我誤了時間飲用！莫說家人，就連舊男友也唔會咁做！

我想說的是，你的大頭蝦（易迷路＋唔識路）和傻氣依然沒變！和你相處的時間很快就過，大家傾下講下唔會有 dead air，有Ｄ笑點依然只有我地先識笑，能有你這位朋友，也許就如你所說：＂我們（由同事變為朋友）呢Ｄ夾得來的人好難再搵到，當中關鍵就係－－緣！＂

葫蘆館

n年前在尖沙咀葫蘆館食過一次阿華田薑汁撞奶後，味道一直難忘！

港島區葫蘆館執晒，偶爾在lunch time時經過斜路某舖，驚見葫蘆館，食完肉燥撈麵即刻外賣一碗阿華田薑汁撞奶！

喜孜孜拿著這碗外賣回公司，一打開個蓋時點知佢只俾左薑汁撞奶，並冇阿華田，成碗仲要係勁稀的，薑水還薑水、得少許燉奶，好失望！（佢本身$20，外賣要加$1）

2013 花展。花與佛

唔記得邊一年開始，我會去花展影花花！今年都一樣！唯一唔同嘅係，以往幾年都係閒日去，因為每年花展我都總是撞正失業！（仲有，今年入場處設有八達通付款，可以即嘟卡即入場，很方便！）

今年，只有 weekend 有時間去，擇日不如撞日，遲去Ｄ花開始榭會唔靚啦！講真今年主題花唔太吸引，裡面內容又唔太特別；去，只是想清一清心靈，去睇下花，影下相！

一如以往，先在天后站出，因為由天后取道比銅鑼灣站更近更就腳！入到會場採取＂行半＂策略，這樣可以睇晒所有花及旁邊的擺攤！行下行下，突然被一個佛瓷吊飾吸引，想也不想就買下，它像青瓷，佛像很安詳自在，我覺得很有緣，而且只是 $30！（還以為自己會買花買小盆栽呢）影下行下逛了差不多２個鐘，在出口處附近再細心看了所拍照片一遍就離開了！

雖然生活上有很多不如意不愜意，但至少今天花和佛讓我自在了心境，拍照令我在這２個鐘沒有想其他，只有專心致志按動 shutter button！

切磋

由於星期六上堂通常都 over，練成３個鐘，所以即晚或翌日手臂，膀骼都酸痛，有次更是提唔起手，彷彿俾人廢了武功，要成個星期才感到好點！連續３星期的星期日都冇上堂，第一個星期日去了懿蓮淨苑，第２個星期日唔知醒，第３個星期日即係今日，由於昨晚失眠（最後看時間已是早上５點），所以今日冇精神＋雙手怨痛！儘管師傅及兩位好人師兄都問我今日會唔會番。。。

昨天對練很爽，期間有２位外藉人士前來，又拍照又黐手，有一位更邀請我２次和他對練！聽助教說，他們一年來香港一次，而且他們個＂朵＂好勁，之前來學完詠春就番回意大利繼續，更設館授徒，每年來港進行＂一期一會＂，嘩，真係失敬晒！我有幸可以有機會被＂點名＂對練，心感榮幸而且可以和他們切磋，感覺挺有趣！

吞噬

欲哭無涙的感覺好難受，心入面全是苦是澀，時間只可將種種不快推呀推，是全部硬塞進心底黑洞，沒有去掉。假以時日，又或是周之無日，難過就會像蟻蟲般出來侵蝕，將整個心整個人吞噬。

Liese 泡泡染髮劑

早幾個月用過＜黑人頭Ｂ女染髮劑＞，它呈泡泡狀，易搽易用都算上色，但效果唔會似個盒上面 show 出黎果種，大約似４成啦！2013 年，我又心郁郁轉變一下，再來一次染髮。今次，我又再接再厲，千挑萬選之下，加上佢做緊特價，所以就試近排廣告攻勢幾勁嘅 Liese！

佢有好多顏色揀，玫瑰紅色、奶茶啡色同埋焦糖啡色都令我好心儀！最後我揀了一直想染但染不到的焦糖啡！

用後感：要將成支混合液平放才擠出泡（初時我係一手攤開，另一手捏著混合液，180 度咁向手掌擠，這只會擠出液體狀），易搽，搽時乾髮不結纏！一支夠晒用，仲有剩添！唔錯（我頭髮到腰位左右）最值得讚嘅係，Liese 陣味唔似一般染髮用品咁會好刺鼻，染髮時感覺舒服。

包裝盒說染 20 分鐘左右，以我過往的染髮經驗來說，想上色最好染耐少少，所以今次我等了一個鐘頭才沖水！它所附送嘅護髮素，同其他牌子染髮劑所附送嘅一樣，唧出黎份量大約只有２個５元硬幣咁多。。。真係唔夠用，所以我要自行加慣用的護髮素！

效果：挺上色，而且很自然！雖然不算焦糖啡，但卻有栗子啡的效果。染髮時及染髮後，頭髮唔似其他染髮劑咁＂立＂；亦唔似其他染髮劑咁，會甩好多頭髮。但最最最令我驚喜的是，呢隻 Liese 染髮劑用後頭髮唔乾旱反而柔順輕逸左好多，配合埋（我自創的）＂把頭髮撥去一邊＋側睡＋壓髮＂，翌日效果像做了負離子，非常順直貼服，質感效果很好很好！花王出品，真係好有保證！

我們這一家

為了昨天出稿的問題，今早９點已起身（中途當然醒了好幾次）。Ｄ稿終於於早上 11:15 攪定！約一時我如常先去麥記食野然後去上堂，可能身體抱恙，上上下堂我覺得 wing wing 地，好容易才支了過去，下課後急急腳去睇醫生（饞嘴的我突然想食腐竹意米糖水，於是睇醫生前滿足了自己這個慾望）。

踏入 2013 年，雖然而家係第３個月，但我差唔多一個月睇一次醫生！睇完醫生之後買了幾個麵包就回家。我蹣跚的步出電梯，在走廊一步一步走近單位，已聽到麻雀聲漸
大，我站在大門口良久，內心交戰得很，因我實在討厭屋企淪為＂竹戰場＂，又吵又鬧所有人的咀臉極其猙獰。呢種經驗幾乎每星期，甚至隔天便會發生，但又苦無對策。。。試過好多次我都極唔想回家，以前試過在樓下屋村休憩處坐通宵，也試過走出街蹓躂至深夜，但我今天實在抱恙，也想快快食第一轉藥，所以最後都係極不情願的步入屋。

其實你地有冇顧及過我感受？其實你地知唔知你地一講到賭就性情大變脾氣大變？彷彿變了另一個人一樣！而我亦唔希望每月所俾的家用，係主要用來做你地的賭注！飯，又冇得食。。。你地仲好意思打完十幾個鐘頭牌之後喺度呻肚餓，呻疲倦，呻唔夠瞓。。。兼且呻每月萬萬緊。。。

放心吧！

照清楚，得個知字唔駛估估下都好嘅！如果照左冇事，除左買個安心之外，仲可以排除呢個可能性，咁就可以依第二個途徑去醫。

唔理佢講笑定認真都好，佢在嘀咕說今晚要加床陪你云云，姑勿論係你要求又好，係佢要求咁做又好，自願定非自願也好，我都唔想猜想，我希望你身體健康，今晚不致太辛苦，明早大步檻過！以我現在的身世和位置，是暗戀也好是自找也好是犯賤也好，也許我只能做到嘅就係去到呢度，唔可以越界唔可以再行多一步！

放心啦，剛才公事上的小岔子我會處理，就算明天要返公司一趟也好，我都會攪掂。死貓？算啦，我都唔係第一次哽，你 take care 吧！

PS：其實我都唔舒服，頭先放工諗住去睇醫生，可惜離開公司唔夠半個鐘就收到某同事狂打電話責難關於明天和下星期一的稿。。。我病，又算什麼？

芋頭魚

齋菜黎講，除左粟米粥之外，我最愛就係芋頭魚（又名炸芋魚）！它是由芋頭蓉製成，加一個魚形模，倒模後就是芋頭魚，醮甜酸汁（即是錦鹵雲吞醮那種汁），好味得很！

擔心你。祝福你

沒事的，就當擋煞吧！雖然我這一生無機會成為你身邊果個、沒緣份成為你的內人，縱然吾能夠陪你跨過每個難關，我也祝福你身體健康，快快樂樂！

抽籤

綠悠雅苑已公佈抽籤結果，我得到一個４萬幾的號碼，成幢綠悠雅苑都冇咁多單位啦！咁即係，抽到先奇！不過算了吧，就算抽到我都冇錢買，今次只係志在參與唧！唉，上車無望，有自己空間無望，想搬出黎住無望。。。打工仔，咁就一世！繼續。。。忍啦！