ZX 500 街頭 display

北海道牧場餐廳－－辛口芝士火腿忌廉雞湯公仔麵餐

想食公仔麵，有諗過茶餐廳，有諗過華星，行過呢間北海道牧場，喺門口睇了一陣餐牌，有公仔麵，又有日本牛奶炒蛋，比起茶仔餐蛋麵好似抵Ｄ喎！見入面人流唔多仲有位，於是就入去！

我叫了呢個餐，有：辛口芝士火腿忌廉雞湯公仔麵，多士配磨菇炒蛋，熱飲！所謂＂辛口＂，原來係七味粉！個忌廉雞湯真係白汁果種忌廉湯（飲得出的），雖然芝士味唔知去左邊，但用白湯黎整公仔麵，真係第一次食！Ｄ麵唔係茶仔果Ｄ大光麵或福麵，而係出前一丁，嘩，出面食要出前一丁至少要加 $4！至於炒蛋，又香又滑，Ｄ磨菇汁真係足料，似＂黑麥＂果種用磨菇打磨的磨菇汁，濃而不杰，好香而且口感好重！奶茶嗎，用 3.6 奶沖成，又香又滑！

成個餐 $44，茶仔及華星的常餐都要呢個價啦！如果價錢差不多，試下北海道都唔錯，起碼服務好Ｄ，環境整潔Ｄ，坐得舒服Ｄ！臨走時，在收銀旁買了一包杏仁一口酥（$18），試埋佢地的餅食先！

合味道辣海鮮叮叮飯

我是即叮食物／速食文化的粉絲，今晚就叮這個合味道辣海鮮叮叮飯，剪開一角，放入微波爐叮５分鐘就食得！

飯似珍珠米，辣味不過份，唔駛流晒鼻涕雪雪食！海鮮？只有３片薄的細魷魚，幸好汁料搗勻了飯，總算入味！其他配料就只有雜豆，一包有一碗飯，對我黎講，份量多了！

好嘅一餐快捷便宜一餐，就係咁簡單！

apm food court lunch

去 apm 食 lunch，我要了拉麵餐（$59），有豬骨濃湯叉燒拉麵，日式麻醬蔬菜沙律＋日本茶！

之前食過呢個餐，足料大大碗又好味！Ｄ豬骨湯夠入味，叉燒大大塊，拉麵彈牙，仲有半隻流心日本蛋！我鐘意呢個餐有菜，伴以日式麻醬，惹味非常，喝口茶消滯，非常好！

過份

餓了三文魚很久，今日 lunch 一於食日本野！

去大盛點了三文魚生飯（$48），大大粒三文魚，鮮味十足，珍珠米香口精瑩，加入豉油和七味粉吊吊味，扒多兩口飯！食完同事提議去 apm 買珍珠奶茶，我又心癢癢要了一杯特濃抹茶紅豆布甸（$20），嘩，不得了，抹茶與紅豆根本就是一對，不太甜，有咬口，抹茶味濃而不澀，整杯的味道沒有因為凍飲加了冰而變淡，布甸夠滑易啜，與整杯凍飲相映成趣！我急不及待死勁啜飲，未番到公司已飲完！

又飲又食 total $68，我覺得今日餐 lunch 好過份！

芒果薯仔雜果沙律餐

牛頭角街坊茶餐廳－－蘭香園一到 lunch 大排人龍，今日老闆唔喺度，我地早了５分鐘出去，去到等左一陣就有位！搭檯，在所難免啦！

我要了個沙律餐，有半個新鮮芒果＋薯仔雜果沙律，另外我配了炸魚柳及炸雞翼，連餐飲 $50！（除魚柳雞翼外，你仲可以配：雞／豬扒／札肉越式撈檬；豬頸肉公仔麵；牛肉撈丁）

個芒果真係甜到冇朋友，粒粒鮮甜果肉，爽！沙律足料，醬汁搗勻唔太酸！（如果多Ｄ菜會更好）至於個魚柳，大大件，炸漿唔厚，魚肉唔腥，抵讚！三只雞翼，醃得好入味！今餐又煎又炸，不過好好食！

一個月有４個星期？

一個月有４個星期？問這個問題可能大家覺得我好＂廢話＂！其實自從從事 production，要跟routine 每星期轉換節目，你就會發現，其實有時候一個月唔止有４星期！點解咁講？好似今個３月，看看 schedule，總共有５個星期六及日，如果一星期轉一個新節目／新稿，今個月要 prepare ５個／篇！

由於工作太忙，莫說大假放唔到，就連 weekend 都好似要＂皇恩浩蕩＂先＂有機會＂ bargain 得到。。。然而，我只有星期六，日才可進行跑步，又以今個月為例，第１及第２個 weekend 都為拍攝而 sourcing；第３個 weekend 因為我嚴重失眠而心悸，精神狀態欠佳而不能跑；一直等到今日才可支出時間去跑步！（雖然昨晚也失眠，這２天加埋只能睡３個小時左右。。。）

３月最後的一個 weekend，又唔知咩情況了。。。（下一個 shooting 又黎料，老闆想清明前，即４月５日前完成。。。只有唔夠２星期，又係我一個人扛起，真係得閒死唔得閒病！）

佛經機

今天的佛課，落堂後終於拎到呢部＜地藏菩薩本願經＞機！初時見人拎，我還以為係一Ｄ紙鎮或要付款的東東！後來知它是一部佛經機，就如收音機那樣，有火牛，有耳塞，設計簡潔別緻，小巧得來意義深長，而且免費贈給有緣人，所以我也老實不客氣拎了一個！

提子包

麵包機的確係一個可愛的發明，男男女女都被它吸引而著魔！兩口子整麵包，進行親子活動，為健康又好，為情趣又好，麵包機真係＂生得逢時＂！

Chloe 弄了麵包，還加入她最愛的提子乾（她說想加入糖果），整了一舊提子包俾我！雖然未食，不知味道如何，但她的心機和咁有我心，真係好抵鍚！而我，也特地買了一本連贈品的＂公主書＂，和一小盒子朱古力復活蛋送給她！

粟米雞肉溫泉蛋細飯

試了吉野家這個粟米雞肉溫泉蛋飯，有細有大，我當然要個細飯，配以日本茶（縱使唔似玄米或綠茶味，卻像淡淡的茉莉茶），只是 $22！這個 lunch 好便宜啊！

有外表有內在的日本零食

猜猜這是什麼？

是一小罐小水果糖！富士山造型，各種可愛趣致表情，忍唔住買下了！

還有一筒咖啡朱古力，濃而醇的牛奶咖啡，與外層朱古力脆皮味道出奇合拍，明治果然係零食／朱古力鼻祖！讚～

又飲又食

有人請食麥記，本來我只要個紅豆批，之後我示意他要菠蘿特飲，他卻以為我要，結果我毫不客氣又飲又食！

我用自己零用錢買俾你架！

Chloe 小妹妹去台北旅行，不忘送我這個手信，多窩心！她還錄了段音，告訴我這是她用零用錢買的，嗯，十分多謝妳呀！

八方雲集

今天試了八方雲集，要了個套餐（$32）：有台灣大腸米線（多元茜，Ｄ大腸唔＂騷＂，好似街邊碗仔翅！配以醋來食，好味！），５隻韮菜煎餃，珍珠奶茶（Ｄ珍珠好彈好煙韌，奶茶味道係典型台式那種，多奶，茶味較淡！初嚐好好飲，不過Ｄ冰溶左就變得較稀）

入貨

今天的入貨！聽同事說盒茶是台灣出名的天仁，還說它的珍珠奶茶好好飲，是嗎？我說如果與貢茶比較，那個好飲？同事一個O咀反應！...其實，初次飲貢茶，當時我要了杯奶蓋紅茶，我真心覺得超好飲！之後偶爾會試紅豆布甸，都係超好飲！

上網查，見天仁在希慎十樓有間分店，有機會去試下先！

盒明治蕉餅，朱古力餅乾味道不甜但充滿朱古力香，味道好實在，唔似溝出來那種假味！至於香蕉餡，香醇得黎又唔似藥水味，一盒3小包，每小包2塊，好味！

super sandwiches

好想食 super sandwiches，上完日文就搭車去ＣＷＢ，店員說因未準備好，要等上半個鐘，冇計啦，真係好想食，我等！

可能時間尚早，客人（計埋我）只有４檯，我可以坐上落地玻璃旁，心型的啡色皮椅，挺寫意！但我上一手食客的碗碟未收，張檯又好多碎屑，店員都唔抹，算！（客人已唔多，你又說廚房所有野未準備好，店面有３個職員百無聊賴，都唔收回上一手Ｄ食具，都唔抹下檯？！）等了廿分鐘，先來了杯 illy 即磨咖啡，再過５分鐘之後再端來我份餐：半份三文魚蛋沙律三文治＋凱撒沙律！（個餐要 $62，算貴，但因為太想食，就當睇了一場戲吧！）

咖啡方面，如果我唔知這裡是用 illy，說實在，真的不好飲！至於份三文治，三文魚比廣告相相差好遠，得一片。。。但味道總算鮮美唔腥！店員只給我一支叉，其實如果多一把刀會更好！題外話，店員送餐時連同一張餐紙巾給我，我一看見上面有兩 pat 類似紅色果醬的東西黏附著，真係好礙眼同唔衛生！斷估，咁明顯店員唔會睇唔到呱？斷估，成間店唔止得一張餐紙巾呱？。。。咁都得！

估唔到咁耐冇食 super sandwiches，仲要係遊客區的銅鑼灣分店，都攪成咁！。。。

Eason iphone case

之前睇 fans page 已知 Eason design 了 iphone case & ipad case，事隔多時，可是 admin 沒有再指出售賣地點，就連官網都冇講過相關訊息！前晚特意找，俾我知道那裡有售，於是上完佛課立刻啟程到尖咀，結果俾我找到，價錢比我想像中貴，不過我都會買的！（除是 Eason 外，另一原因是 donation 用途）我買了一個後，見那裡只剩３個，有心人要快就要快手了！

外表

行過報攤，被封面吸引而豪花十蚊帶回家的雜誌！

磨心

中間人的角色絕不好受，每天我都是＂磨心＂！而家的＂唔開心＂指數好似每日計咁，每天發生的事還未及沉澱和消化，休息不夠體力未恢復，睜開眼又要＂應戰＂！以前，可能會有 peak time，我知道只會忙上一個 project 或忙上一段小日子，但現在每天我都忙忙忙，由早上７時狂接老闆 whatsapp，追魂 call；單是 lunch time 前已做好 12，13樣工作，有時我覺得自己的處事能力真係高，既同步又分身，每天要處理的收發電郵過百個，我諗我已超越＂鐵人＂的境界！

情緒每天都因為某某而起伏，內心交戰得好辛苦！今天，他臨走前給我遞上一粒黃色小東西，我一瞥，見他手上拿著包 M&M'S！我。。。又心軟了嗎？

栗子撻

早排愛上東海堂的栗子撻，可是後來冇出，昨天赫見公司樓下間東海堂有，即買了一件！好味！

鮮金橘薑蜜

冷親好耐，冇時間睇醫生，前天一早連聲都冇埋，人中和下巴都爆瘡，行過地鐵不得不去健康工房買支現成涼茶！睇勻水牌，覺得鮮金橘薑蜜較好，仲有暖版，於是要了一支，盛惠 $24！

shooting

3月10日拍廣告＋硬照，由於今次有明星，投資多左，好多野更要準備！我的公司所有相連的公司／人都不濟，包括vendor，外判it，大陸同事，production house，talent公司，model公司，外判translate等等，唉！今次，九成工作都係我一個扛上，好辛苦！

拍攝前２星期，每天我都成十一、二點先走得！星期六、日又要去 sourcing！行到腳抽筋，體倦至手抽筋。。。

終於到拍攝當日，我又0600至0100直踩。。。兼顧的事項和 party 又多，翌日又要返９點！咁辛苦，吃力不討好，我都唔知為乜！。。。我只知，如果我 quit 左，搬出黎住、報 course、生活等都大受影響。前途，真係感到迷茫！

魚肉燒賣

一輪攻房戰，今天他給我送上早餐－－腸粉（甜醬＋麻醬）＋燒賣，熱咖啡！我驚喜的是燒賣，打開袋子一見，當堂由心笑到出黎。望著他，他靦腆說：＂知你係燒賣人！＂冇錯，酒樓那些我不愛吃，魚我不愛吃，唯獨這些街邊的魚肉燒賣合我何車！