旺記冰室。。。過譽了！

最近在家附近新張營業，平時經過排晒隊，係咪真係咁正？某天下午茶時段就和媽媽去朝聖！

佢最出名係叉蛋飯、蕃茄濃湯通、足料三文治四重奏。由於媽媽鉀高唔食得蕃茄，咁就索性叫叉蛋飯餐（＄５４），加一份三文治四重奏（＄３２）。

店子太細，搭檯一早預左，不過講真，入面坐得唔太舒服。我讓媽媽坐埋邊（即背脊靠牆那邊），我坐外邊（檯與檯間的通道），正當我腸緊餐牌時，侍應竟然踢到我的椅腳、撞落我度。。。嘩，好彩佢當時唔係拎住熱野，如果唔係我肯定被照頭淋。另外，亦幸好係我坐外邊，如果唔係媽媽便遭殃了。

等左一陣食物來了！炒蛋滑就滑，不過冇蛋香，要靠Ｄ蔥吊味。叉燒有Ｄ韌，味道唔太突出，唔講唔知原來係自家製。。。至於個汁，似稀版嘅煲仔飯甜豉油，又係食唔出原來都係自家製。成個飯五十幾蚊，唔覺佢有咩特別好食或驚喜之處！雜誌／網站勁讚，未免過譽了。

個招牌飯如此，三文治都唔抱咁大期望了！平常心地食啦，點知。。。真係失望！佢係用麥包的，健康Ｄ嘛，不過烘左嘅麥包真係唔係咁好食。。。餡了方面有花生醬、午餐肉、蛋、生菜。但凡食物同廣告相都會有Ｄ相差，呢點絕對明嘅！當份三文治真正上檯時，媽媽先係眼都凸，咁樣嘅？！就咁睇真係薄左Ｄ，同埋好似只有菜和蛋兩樣咁。。。說好的四重奏呢？？？食入口再講啦，都食到有＂少少＂餐肉（唔係講少，真係唔多）。食食下媽媽一臉尷尬問我，食唔食到有花生醬？。。。我和媽媽面面相覷，下意識下我揭開塊麥包睇下。。。係有少少啡色嘅，不過極少囉。。。（呢Ｄ啡色，唔排除係烘麥包的顏色而已）

野飲方面，奶茶亦只是普通水準，有Ｄ澀口，唯一可取就係夠熱！

總括黎講，價錢中上、食物普通而味道唔太突出、菜式選擇較少、服務一般、環境唔太舒適。。。叫做試過就算啦！