忍唔住即晚 PO 文，因為真係好嬲！話說早前見過有一支日本製、聲稱好似唇膏咁大支，小巧的骰方便攜帶，入乾電，靜音嘅脫毛器。喺團購見到 $39一支，諗住買黎試下，我仲特登買多一支送俾姐姐啦，點知換來一肚氣！(我仲特登留番相當日數的腳毛，諗住試下支野駛唔駛得添！…)
團購廣告上的內容 / 產品介紹：
大家喺團購買過野都知道，買完唔係即刻有得拎，分分鐘要等成個月後！終於等到 10月6 日的 ”法定日子”，下午 4 點左右特登搭車去拎。點知職員劈頭第一句就話我做咩第一日就去拎……SCAN 完張收據之後就話間店未送貨去佢地果度！我心諗，既然寫得領取日期係：10月6日至 20日，咁即係 6 號已經有得拎啦，你只可以怪店舖遲送貨俾你地，但你唔可以怪個俾晒錢嘅客人，好第一日就上黎取貨架喎！…又唔係個客錯！…不得已，我留低電話，等佢地有貨到就打俾我，然後就走。(浪費車錢和時間！)
今天，10月12日我收到電話後，下午 3 時半又特登搭車去拎啦。拎完後我即刻喺現場開黎睇 (*因我見個職員幫我拎貨時，先拎起一支，然後隔離個店員同佢講左兩句，佢就放低，再拎另外一支俾我…我唔知係咪佢地知道某件貨有問題，但又唔分開擺，繼續放喺果堆貨入面。我用個 ”堆”字好似誇張左，因為除左我買的兩件外，我見到貨架上仲有多 2 件！…即係話，另外 2 位買左呢件貨的客人，祝你好運啦！！！)，我先後拆開我果兩支脫毛器，其實兩支個入電位都好難開，大約用左十分鐘先開到，開完又關唔番……我就咁放番入個吸塑就走人啦！(因為我知道，就算有咩問題，佢地都做唔到D乜野，如果換貨，換頭先貨架上果兩支俾我…我仲驚！)……呢壇野，感覺唔係幾好，好似有D硬食咁！
左下係個剃頭 (中間旋風其實係貼紙來的...)，右下係入電位 (冇標明正負極位置...)
佢寫就寫 MADE IN JAPAN，仲要成 3000 YEN 添......
番到屋企，即入新電芯試機。由於佢冇清楚 MARK 低 +- (正負) 方向，我靠估的情況入電 (好在入岩位)，入電位個 COVER 依然好難關上 (唔係擰唔係扭，要用D力將佢 ”合”上)。萬事俱備，開始脫毛！一開機，嘩咩料呀，BB聲，好似唱 K支咪突然 feedback 果種又尖又刺耳的BB聲…唉，心有不妙。
諗住忍下D聲，如果真係無敏感+剃到毛，都算佢啦！我就係咁一路BB聲一路試用，下，唔得嘅？？？喂，係半條毛都剃唔到囉！！！冇料到囉！！！會唔會小腿位唔岩呀？(我都知咁幫佢搵藉口好牽強…) 於是我試下剃手指上的毛啦，點知都係冇料到！根本個頭同剃刀的設計錯晒！呢支野，本根唔係脫毛器黎架囉……
個頭自己飛甩後，根本放唔番入去....個位唔岩的！
就係咁，喺手指上來回未夠兩次的 “試用”情況下，支野個頭居然自動甩開埋！一睇，真係好流…佢仲衰到銀色個剃刀零件放唔番入去囉…就咁，$39 玩完了，支野報銷了！
剃剃剃，剃條毛咩……
平野冇好？！呢次只係個別事件？！水貨係咁架！…總之，真係買左個教訓。至於另外果支，都唔知俾唔俾姐姐好。(好似買左樣次貨俾人咁…嗚嗚…)
就咁睇支野的設計和手工，真係唔相信係日本製囉......又求其，手工又差，接合位唔對位，D入懾位又披口又崩嘅！！！(其實呢D情況可以同邊個投訴？賣家？經銷商？消委會？) 順帶一提，買左呢支野嘅朋友，祝大家好運！.......(可能係我頭頭碰著黑，買著D次貨啦！...)
(***PS：我唔忿氣，開埋另外果支，睇下係唔係壞嘅！入電後，唔著，再開蓋，取回粒電；再入電，再試。單係入電呢個步驟，我重複了三次！！！好啦，開機試用啦，呢支唔係 feedback 的BB聲，而係男人吉列鬚刨嘅沙沙聲，都幾大聲！一定一定唔係廣告宣稱的 ”靜音”囉！Fine，咁呢支又剃唔剃到毛呢？…答案係，唔得嘅！OMG，$78 通通報銷了！！！)
沒有留言:
張貼留言