最近，「黑白奶Ｘ本地插畫師crossover送杯碟套裝」活動，繼之前喺茶餐廳點奶茶＋影底杯底圖案＋去facebook上載按LIKE＋錢來換購，今回輪到美心MX！
是次活動既沒有做電視廣告，也沒有喺print宣傳，就連美心個官網都冇講；有心換嘅朋友，除左喺美心「咁岩見到」之外，恐怕只有靠朋友「人傳人」了！（我得知有此活動，都是有次媽媽無意中給我遞上一張「儲印花小卡」！）關於是次換購活動，卻令我激氣起來… …
話說我一星期７日裡面，有６日是到就近美心進餐，向來嗜咖啡奶茶的我，自然好輕易就可以儲夠印花！關於換購活動的requirement及日期、詳情，都寫了在那張「儲印花小卡」上：
『由2011年10月18日至11月17日，凡於美心MX惠顧任何食品配奶茶或單買奶茶一杯，即可獲得印花1個，集齊3個+$19可換黑白奶杯碟套裝一套（換購日期：18/10-31/10）或+$11可換70週年限量杯蓋一個（換購日期：4/11-17/11）』
我手頭上已有２個印花，加多一個就可以換套杯碟了！於是我喜孜孜在counter order食物，付款了後職員卻沒有給我印花，遂問過究竟！
我：是不是有印花？
店：你果杯係凍奶茶，所以冇！
我：（邊說邊指著小卡示意）下？小卡上面唔係寫住惠顧任何食物「配奶茶或單買奶茶１杯」，即可獲得印花１個嗎？佢冇註明一定要係「熱奶茶」喎！
店：（開始答非所問）你睇張卡上面幅相，換購嘅套裝係「熱飲杯」，所以係要買「熱」奶茶先有印花！
咩道理？咩理據？我覺得那位店員有點兒那過！什麼張相係「熱飲杯」，所以係要買「熱」奶茶先有印花！既然是次活動係同黑白奶crossover，即係重點在於用黑白奶沖調的飲品啦！根本與凍或熱呢個point無關！同埋，換購方法係咁講，你地唔依大會所訂定嘅方法不在話下，居然用張promo相黎做擋箭牌，關張相咩事先？？？（記得之前與茶餐廳crossover，佢地都有講明係要熱奶茶啦！）
為免無謂爭拗，那張小卡應該標明客人「一定要」買「熱」奶茶先有印花嘛！仲有，唔通凍奶茶唔係用黑白奶沖的嗎？再者，如果客人買熱鴛鴦咁有冇印花呢？（熱鴛鴦都有熱奶茶，都係由黑白奶所沖）
越諗越氣結，翌日，我到另一間美心MX察看，同樣得到「驚訝」的回應！
我：（點了食物付了款──今次點了「熱」奶茶，但店員又冇俾印花我！）咦，唔係有印花架咩？
店：（一愕，面有難色）有。。。不過Ｄ杯換晒！所以我地唔會同客人提！
我：（詫異）下？18號開始換，20號已經一早換晒？我日日幫襯美心，都係尋日19號先知有呢個活動咋喎！１日就換晒？（*你地公司已經遲左１日「推行」呢個活動！）
店：係呀，經理係咁講，換晒唔會再番貨架啦！
我：咁即係仲有冇印花？好，就當好多人換，呢間分店換晒，我可以去第二間分店換，或者我儲夠３個，等11月果時換個蓋都得唧！
店：（語塞，即從櫃位下端取出「一大捲」印花出來）你要就俾個你囉！
沒有留言:
張貼留言