鐵板大扒 @東泰

弟弟弟婦過黎同我地一齊晚飯，結果去番之前佢未結婚時，我地成日撐檯腳的東泰。看看餐牌，父母點了菜飯套餐，我和弟弟弟婦就鋸扒！

一直都知呢度 D 食物份量十足，D 羅宋湯一絕，扒餐係大大件仲要係鐵板上；以前試過配意粉，佢真係成碗麵碗的意粉俾你，多到食唔晒！而家配薯菜，佢用波浪薯條，同樣又係份量勁多！四十零蚊真係抵食夾大件，D 扒又唔韌又入味，有餐湯有餐飲，真係真心推介！