足料炸魷魚鬚 @ 灣仔

上完堂已 8:30PM，對上一餐雖然係早上10時...但仍然冇乜胃口唔想食粥粉麵飯，於是諗起街頭小食。知道灣仔電腦城橫邊好似有檔幾平 (忘了看店名)，就行去睇下有咩好食，見到有魷魚鬚我已心心眼！於是就落柯打要了一包炸魷魚鬚，店主驚唔夠一包遂叫我揀其他野食搭夠，我就要了 2 舊釀茄子。(今餐 DINNER 只係 $20 而已，平！)

呢 D 炸魷魚鬚，記得太子要 $25 (有好多條---包括魷魚身和腳，炸漿厚厚，尚算足秤！)，銅鑼灣總統戲院斜對面要 $30 (得 5 條，只得少許魷魚腳而且炸漿成尺厚，粉和魷魚比例係 5：1，十分搵笨)。而家灣仔呢檔，只係 $20，仲要係大大包，內有好多條---魷魚身和魷魚腳都有，炸漿好薄，食得出魷魚味，呢個份量和價錢真係出面買唔到！其他食物還有煎釀三寶，雞髀等......

如此老實小店，平價高質，下次要再幫襯！