Soyjoy

見過靚模食，見過外國人食，見過小朋友食，究竟係咪真係咁好食？

去萬寧買眼藥水，見 soyjoy 減價，姑且買一條試試！貨架上有多款口味，我隨意拎了條紫色，一心諗住係藍莓味，回家後才知它是葡萄杏仁味（藍莓味係新出品，而且以藍色做包裝）。晚上邊與媽媽 share 來食，第一啖覺得味道似裝修＋灰水味，口感方面則似＂林＂左的餅干和素鵝 feel！再咬多口嗒真一點，才食到那種很得意的感覺（如十字包入面加入的橙皮＋桃粒味），我覺得它無須加杏仁，只是葡萄會較易接受！

食完上 soyjoy 官網睇，原來它沒有澱粉質，兼低 GI、低膽固醇、低糖，成條 soyjoy 主要用大豆製成，是健康健美食品！不過減價後都要 $7.9 一條，其實算貴（雖知但凡標榜健康的食品都會貴－－可參閱本網誌於 2012 年 2 月 16 日發表的＜健康，某程度上是用錢買回來的！＞一篇）！