母親節2012 @ 澳門──永安咖啡室

第二日 check out 後就去永安咖啡室食地道蒜香撈麵！（$25 一碗）要讚的是佢係用出前一丁，Ｄ雞肉／豬頸肉都用蒜香醃過，分量夠多而且好入味、肉質鮮嫩夠林又冇渣！姐姐那個黑椒牛肉撈丁，Ｄ牛肉好入味，黑椒唔太辣！

當侍應端來撈丁，同時會遞上鎮店之寶──上等咖哩油！唔好睇少呢罌調味醬，因為佢味道好得意，似沙爹加沙茶醬但不太油，用佢黎點Ｄ肉或撈麵食，有畫龍點睛之妙，好絕核！（溫馨提示：怕辣的朋友千萬唔好點咁多，因為太＂重手＂的話後果自負！）

除此之外，舖頭嘅可樂係大樽裝，夠凍夠氣又夠喉！至於杯熱奶茶，茶膽夠靚質感好滑；凍飲就會遞上一 jar 糖水，多甜少甜悉隨尊便！