皇后冰室

上完堂坐九巴去太子花墟，行了個圈，見到好多賀年花和風信子！差唔多２點，有Ｄ肚餓，唔知想食咩，只知道唔想食中式／茶餐廳／雲吞麵類東西！行行下心血來潮想食譚仔，但行勻幾條街都冇，縱觀街上的茶餐廳呀米線呀車仔麵等食肆，一個米線都要成 $48（未計飲野！），而一個五香肉丁炒公仔麵竟然要 $52。。。真貴！行至始創，其實＜紅蔥頭＞Ｄ野食幾岩心水，但成五十蚊一個 set lunch，要加＄６先有餐湯或餐飲二選一，佢仲要加一服務費，真係有Ｄ貴！於是步出商場，邊行邊搵食！

 

突然經過皇后冰室，見門口餐牌只係$38至$45，有餐湯＋蒜容包及餐飲食野，眾多 set lunch 之中有幾款我都好 like，於是排隊等位！我一個人，好易搭檯，等左一陣就有位啦！

 

我要了蕃茄德國腸煙肉螺絲粉呢個餐（$40），味道唔太濃又冇乜味精，幾好！至於個白湯，仲有蓉添，唔係罐頭唔似溝水！真係估唔到，呢間門面裝潢都好骨子雅緻的餐室，食物水準和價錢都唔錯！可以再去！（食完步出食肆，赫見譚仔就在對面街樓上，噢！雖然緣慳一面，但塞翁失馬，俾我可以食到皇后冰室！）

 

檯面有馬賽克瓷，別具心思！ 

食完行多陣便坐九巴過海，因為出隧道就係維園，可趁未多人時逛逛花市，可是一出隧道後司機竟然入錯線，結果要兜去中環先可以折返，撞岩灣仔又塞車，停下開下，可能我太倦，竟然在５分鐘的塞車時間內中了幾次眼瞓。。。足足花了 double 時間先過到海，呢程車真係抵晒！

太倦又太晚，今日跑唔到步了！