年初二，繼續食！

大年初二，下午４時左右姐姐＋姐夫＋ Chloe 小妹妹來拜年，小妹妹還教我玩公主 games，她玩 ipad 和遊戲的熟練程度比我更甚，而家Ｄ小朋友對新科技使用及駕馭等程度實在厲害！姐姐提議買麥記食，大家俾面地每人要了一個特價包。其實我都想食薯條的，但驚食完陣間太飽所以冇提出要個餐 share！食著食著，未幾，約過了半個鐘左右，姨媽和姨丈也到！大家閒聊了陣，就去天后某酒家食開年飯！（期間，姨媽為了偷拍小妹妹而撞倒了我個暖爐，其實我有點嬲，因為她好似感覺唔到聽唔到撞跌野，而且佢先係把擱滿外套風褸等物的油壓椅撞向暖爐－－過熱不透氣會引致火災架。之後，她再向後一挨油壓椅，後面整個暖爐就呯的一聲翻倒了！。。。撞到野連對唔住都冇聲，還自顧在拍照。佢究竟真係聽唔到？真係 feel 唔到？還是裝聾作啞呢？---喺呢度我挺想讚下個暖爐，因為佢被撞倒後即刻自行關掉電源，不致發生什麼事故！）

我地一早訂了檯以及一個套餐，個套餐款式不多，來來去去都是魚呀雞呀，拼盤呀，髮菜生菜等賀年菜式，不過呢度勝在上菜快，食左差唔多半個鐘，差不多已上埋糖水和甜品了！由於二月是爸爸，姐夫和姨丈的生辰，姐姐託她呀嫂自家整了個芒果蛋糕，給大家一個驚喜，拍照當然是例牌菜啦！

由上星期五至現在，日日都食不停，都係時候要制止一下自己了！